♧ علمتنا صروف القدر و نوائب الدهر £

《 الوصايا العشر لمن اضطر غير باغٍ
ولا عادٍ للتعامل مع مكنيكي في بلدي يال خبوب.
١/ اذا عربيتك وقفت في أي مكان طوالي جرها وديها
الوكالة و ما تجيب ليها مكنيكي تعلمجي في محلها لأنو
مساسقة المشاوير البتجريها في الاسبيرات حتكون اكتر من
المشاوير القطعتها العربية وهي في كامل لياقتها البدنية.
2/ فضي عربيتك من اي شي( العفريتة ومفتاح العجل والمفكات
والشاحن والأم- بي- ثري ) و امشي الورشة . اذا المكنيكي قال ليك
جيب الاسبير الفلاني طوالي قوليهو وتاني وهو طوالي حيقول ليك
كدي دقيقة النشوف الهناي دا امكن مسرب عشان تجيبو معاك.
يعني لازم تتاكد انك حتمشي مشوار واحد للاسبير عشان
مايجيك احساس الزول المرتو بتنزحم للولادة .
٣/ خليك جادي بدون صرامة، وأوووعك تتظارف مع مكنيكية
و توزع الابتسامات و لا تثرثر تخلق جو إيجابي . احتفظ بظرافتك
وجوك الايجابي لنفسك ياخوي . لأنو المكنيكي غالباً بصنع من فسيخ
مثاليتك شربات . اي ظرافة معناها انت رهينة و طبعن، تنقد الرهينة
إن شاء الله ماتتىتق ، و مرحبتين حبابو البل محل ما بتق!!!
٤/ ماتفارق عربيتك شبر . اي حاجة يفكها المكنيكي لاحظ ليها
ولمح ليهو انك حفظتها عن ظهر قلب . وصاحبك ااتنح العامل
ليك وجع وش داك سوقو معاك عشان لما تمش تجيب اسبير يكون
مصاقرم عود عُشَر كان قامو ينكسر و كان قعدو ينحشر.. لأنو
المكنيكية عندهم هتش كتير في الورشة ممكن يبدلو ليك
كومبريسور المكيف عادي و حاجات تانية مفيدة .
٥/ موضوع إنو المكنيكي صاحبك دا شيلو من راسك
و ماتناقشني في النقطة دي لو سمحت يعني .
٦/ اذا مكنتك خفيفة وفيها دخاخين وصوتها ماياهو
لو وديتها للجربندية ديل في احسن الظروف الدخان
بقيف لكن العزم مابتغير وديها للشركات المعروفة في
الصيانة ببلوك لكن المكنة بتطلع فل الفل وعندك حق
ترجع ليهم اذا في شي غلط .
٧ / ست الشاي الجمب المكنيكي لواتجدعت لبك أوعة تطق
معاها حنك تحكي ليها عن قرفك من حركات جارا المكنيكي .
اذا خلاص لسانك حرقك اتكلم عن النيمة القاعد تحتها دي .
٨ / اذا المكنيكي قال ليك شيل الحاجة الفلانية اشتغلها عن فلا
ن وجيبا لي قول ليهو ما ماش انا جيتك انت دا وبعدين بدفع ليك
أنت امشي ليهو بمعرفتك( دا للتوضيح بس ماتقولا بنفس الطريقة
ممكن يمعط ليك حاجة و يفكك سفيه يقولك ماعايز شغل ) لما
يحصل كدا معناها المكنيكي عايز يخلي مسؤليتو مستقبلاً عن
أية نية سوء مبيتة وبعدين يباصوك بيناتم لامن تقول بث.
٩/ في عمرة المكنة غالباً حتشتري كل الاسبيرات والأخوة المكنيكية
قدس الله سرهم ، بجازفو جزو منها يرجعوه بضاعة مزجاة للمحل و
يقبضو تمنا ويلبسوك طواقي خردة تشاليح و إسكاربات اسبيرات
قديمة.ودي دواها الناجع تحنك الحجل بالرجل وربك يجيبو قوي.
١٠ / بعد تستلم عربيتك امشي تيجد ركعتين شكراً لله.