♧ علمتنا صروف القدر و نوائب الدهر £

.
💢 *لمحة من الزمن الجميل*💢
--------------------
*رسوم الامتحان*
--------------------
▪️في سبعينات القرن الماضي كنت في الصف الثالث بالمرحلة الثانوية العامة .. وقبل امتحانات الشهادة للدخول للثانوي العالي طلبت منا ادارة المدرسة إحضار رسوم الامتحانات والبالغ قدرها (خمسة جنيهات) وتم السماح لنا بمهلة أسبوع واحد فقط . ▪️قالوا لنا كل طالب يمشي اهله يجيب الرسوم دي .. وانا كنت أدرس بمدرسة تبعد عن حلتنا حوالي ٢٠ كيلو مترا وفي ذلك الزمان لاتوجد خطوط مواصلات منتظمة بالمنطقة .. الواحد يركب الشارع عديل وعليك يا الله .. يجيك لوري ان كنت محظوظا او تدق الكدر لحدي تصل اهلك .

▪️ عزمت السفر في صباح ذلك اليوم والدنيا صيف شهر خمسه حر يدخل
القمرية في الراكوبة .. وقبل بداية السفر لابد من التزود فقد يطول السفر (الكداري) .

▪️مشيت لعمي موسى عنده دكان في المدينة التي أدرس بها .. ياعمي موسى أنا ماشي
أهلي أجيب الرسوم .. أديني بلح وبسكويت أقطع بيهم الطريق .. امكن ما ألقى لوري .

▪️عمك قام من (عنقريبو) ودخل الدكان وزاد على
طلبي سندوتش طحنية ونص عيشة كاملة بقرش .

▪️ قلت ليهو كدا حسابك كم ؟؟ قال لي البلح
والبسكويت بقرشين والنص وبالطحنية مني انا بلاش .

▪️ شكرته وقلت ليه خلاص القرشين وباقي الحساب القديم
بجيبهم ليك مع الرسوم ..قال لي الله يهون عليك ياولدي .

▪️ وتحركت طبعا كداري وعليك يا الله وفي البداية جاتني فكرة كنت
من زمان مفكر فيها ... لكن ما نفذتها قلت أحسب الخطوات كم خطوة
لحدي حلتنا .. وبديت أحسب من دكان عمي موسى واحد اتنين تلاتة اربعة
ومااااشي ... وأحسب وقرمة من السندوتش وقرمة بسكويت و ماسك حسابي
وماااشي ولمن أحصل ترعة أقعد شوية وأشرب موية و أقوماتحرك تااااني ..

▪️زهجت من العد .. جاتني النزعة الدينية قلت أشغلنفسي بالتسبيح
(سبحان الله والحمد لله والله اكبر) .. لكن الشيطان قال لي خليها أحسن
ليك تغني .. وبديت باغنية يوسف خالي بالليل دا ماشي وين بالليل دا ..

▪️يازول دي ذاتها زهجت منها .. فكيتا .. غنيت أغنية (قمنا سيرة لي كدباس يا
ناس اتعبوني خلاس) .. لمن عطشت .. نزلت الترعة شربت موية وجدعت ليدرابتين
تلاتة في الترعة قلت اجوط السمك دا شوية .. وشربت اخر بقتين موية وقمت ..

▪️ ما أطول عليكم وصلت حلتنا عصرا كبير .. قبل المغرب وأنا في أشد الشوق لأمي وأبوي وأخواني
وأخواتي ولجدادتي الرقبانية وبلقاها فقعت قطع شك وجدادتي الرقطاء بتكون مبيضة و راكضة

▪️سبحان الله كلما أجي حلتنا من بعيد أول زول بيشوفني أمي .. (دااااك
عبدالله جاء وحات ابوي) وتتلقاني في الشارع أصلا الزمن داك مافي حيشان أو
بالاصح نادرة والعنده حوش بيكون بدون باب الا حاج بلقة عنده باب زنكي ..

▪️مرة حبيب الله زعل منه قاليه يوم القيامة باب الزنكي دا بختوه
في النار ولمن يسخن يتشوك بيه ويقولوا ليك من أين لك هذا ؟ ..

▪️حق الله بق الله سلمت علي ناس البيت جت .. وسوا لي موية
ليمون بليمونة يابسة يا الله ويامين طلعت منها نقطتين ولخوها لي
بعود وتل تل تل قمت بيها .. وادشيت شبعان طحنية وبسكويت وأ
مي قالت جري يا بت اللقمة دي من تحت العنقريب النطعما للجنا دا
جعان . وامشي لناس كلتوم جيبي لي منهم قرفة بصله اتفها فوقا ..

▪️يمه انا شبعان لبعدين للعشاء وقمت رجعت قدح اللقمة راجع في
محلتو .. وقلت ليهم : اسع انا جيتكم للرسوم والكلام موجه لابوي الله
يرحمه ويغفر له ..قال لي : الرسوم كم ؟ قلت : الرسوم خمسة جنيه يابا
أبوي إتبسمل واتعوذ وبراس السبحة طقطق ولولحها لي فوق .. وقال لي أسع
ديل نجيبن من وين في الصيفية دي لا صرف ولا حرف ؟؟ وعنزنا حقت الشاي
بعناها ليك للبس المدرسة .. أسع علا الجدادة أم حلقا مر والحمارة الزرقاء
الفوقا عيشتنا ونقل مويتنا .. اها كيفن الدبارة يا ولدي .. ؟؟ .
▪️من وقتها ساد التوتر البيت كله قومي يا الفقيرة شوفي
نسوانك ديل كان تلقي دين وانا بشق الحلة كان القى لي شي .
▪️قام الوالد له الرحمة .. والوالدة ربنا يطول عمرها وشقوا
الحلة رجعوا المغرب بالحسرة .. الحلة كلها مالقو فيها خمسة
جنيه دين الله والرسول والحال كان من بعضه الا القليل منهم .
▪️أبوي قال صباحاتو بيض والله كريم ..
▪️جريت عنقريب هنااااك في انتظار السهر مع البعوضة والهم الكبير
ويا المحبوب تدينا هبوب دي امي تقول كدا .. وبالفعل هبت هبيبة خفيفة
طيرت البعوض .. وانا في الحيرة والهم الكبير .. فجاة هداني تفكيري أن اكتب
خطابا محكما وبلغة رصينة وجذابة وانا الذي كنت أكتب خطابات استقبال
المسؤلين الكبار عند زيارتهم لمنطقتنا والليلة الحوبة جات لي روحي دي ..

▪️قمت علي حيلي ودخلت البيت وولعت لمبة الجاز ام قيطان .. وجريت
شنطة اخوي الاصغر واتفرجقت في وطات الله ويا حروف الضاد الليلة بطلع لك
ميتينك بهذه الغبينة وسطرت الخطاب التالي والذي لن انساه واحفظه حتى الان
عن ظهر قلب وكان كالآتي :-بسم الله الرحمن الرحمنالسيد باشمفتش مكتب ٩١ سرحان
المحترم السلام عليكم ورحمة الله تعالي وبركاتهضاقت ولما استحكمت حلقاتها فرجت
وكنت اظنها لاتفرج اليوم جئنا لك انا وابي فاما ان تفرج كربتنا علي يدك .. واما ان تقفل
أمامنا كل السبل ومدى الحياة وتكون أنت سببا في تحطيم مستقبلي .اسالك أمام الله بذلك
فانا مطلوب مني رسوم إمتحانات الشهادة الثانوية العامة وقدرها خمسة جنيات .. واطلب منك
حقا وليس توسلا ولا شحدة فنحن قوم نحمل من عزة النفس ما لا يجعلنا في موقف سؤال الناس
.. ولكننا نطلب منك سلفة بهذا المبلغ تخصم من اول صرف لاستحقاق والدي فان وافقت بذلك
تكون فرجت هذه الكربة .. وان لم توافق فالله المستعان .والسلام عليكم ورحمة الله

▪ وهنا فقط شعرت بالعرق يتصبب مني واحسست براحة وقمت همدت اللمبة
ومرقت عراقي .. وطلعت ناديت ابوي يابا يابا نمت واللا صاحي ؟ رد علي : صاحي
تعال مالك في شنو ؟ يا ابوي بكرة نمشي المكتب ونطلب من الباشمفتش سلفة علي
الصرفة الجاية يا ولدي مافي مكتب بدي الناس سلفة ..يابا انا من قبيل بكتب في
خطاب وأنا عندي أمل كبير الراجل يسلفنا ..خلاص يا ولدي صباحاتو بيض.

▪️ من الصباح شربنا الشاي احمر موش قلت ليكم عنز الشاي بعناها .. وعليك
يا الله اتوكلنا .. انا وأبوي فوق حمارتنا الرزقاء عر ساي بلا سرج .. اونس فيهو
ويونس فوقي لحدي ما وصلنا المكتب مسافة (٨) كيلومترات تقريبا .

▪️مشينا المكتب مافي زول الا الغفير قلنا ليهو دايرين الباشمفتش قال لنا : مشى
البيت قبيل .. ومشينا البيت ولقينا زولا بره فلنا ليه : دايرين الباشمفتش دخل وبعد
زمن ليس بالقصير خرج الينا الباشمفتش يرتدي جلابية مشلخة وقال خير مالكم في شنو ؟ .
▪️انا طوالي ناولتو الورقة اقل من دقيقة نزلت دمعة طق فوق خده وتانية دمعة كبيرة قشاها
بطرف الجلابية وشوية كدا الدموع غمرت وجهه بالكامل وغلبته السيطرة عليها ودنقر واشاح
بوجهه عنا ورفع جلابيتو ويقش دمعاتو و دخل جوة البيت .. مسافة وجانا راجع قال هاكم
أشربوا اول حاجة .. دخل الورقة في جيبو وقال أدخلوا جوة البيت .ابوي قاليه نحن مستعجلين
نمشي نشيل أهلنا .. الراجل اصر علينا وقال : اقعدو اتغدو معاي بوديكم بالعربية أبوي ضرب ضهر
حمارتو الزرقاء وقاليه ودي تركب وين يا السيد الباشمفتش؟ قال خلاص دقيقة ودخل البيت ورجع
سريعا وطلع خمسة جنيه جديدة لنج لا انساها المرسوم عليها وحيد القرن .. وقال لي يا عبدالله دي
رسوم الامتحان ختها في جيبك وشلتها ولكم ان تتخيلوا قدرها عندي حتى هذه اللحظة .. و نحن
دايرين نطير من الفرح ونمشي ،الراجل قال لي : أقيف .. ودي عشرة جنيه هدية النجاح مقدما ..و
دخلتها في جيبي وانا اكاد ما عارف شنو ذاتو .. وكمان دي عشرة جنيه تشتري بيها ملابس الثانوي
العالي الرداء والقميص والجزمة والشرابات ..والخمسة وعشرين جنيه دي هدية مني انا عشان
خطابك دا وح احتفظ بيه في خزنة المكتب شهادة للتاريخ أي باشمفتش يجي بعدي يقراه .

▪عدنا لحلتنا والعودة لا تشبه المشية ابوي يحمد الله ويسبح وانا اغني
(الليلة وين لي وين يا عينيا ) انا فرحان علي شماتة واحد من الجماعة
المشى ليه ابوي يدين منو وقاليه لمن ما عندكم حق الرسوم القراية ليكم
شنو؟ وقد كان من العشرين جنيه إشرينا نص كيلو لحم وملوة بصل ورطل
زيت و رطل سكر ونص وقية بن وحلاوة اشراقة لي فاطنة اختي .

▪ تاني يوم شلت الخمسة جنيه ومعاها تلاتة جنيه ونص ورجعت .. ولكن هذه
المرة لست راجلا بل وجدت لوري من رزقالة حلتنا والسيخ جاك زول والمرة دي
غنيت (دردق بي يا اللوري دردق بي) اغنية خالي عبدالجبار الملقب بي ميتة وتم
سداد الرسوم والجلوس للامتحان والنجاح الباهر ودخلت حنتوب الثانوية اذاعة
على الملا بالرادي وقتها .. وهذه قصة اخرى قصة الحصول على الرادي وحجار البطارية
وزغرودة الوالدة اكاد أسمعها الان في اذني .. وتنزل معها دمعة فرح لن تنسى .

▪️كانت النتائج من حنتوب ترسل للبريد عن طريق المكتب الزراعي ويستلم نفس
الباشمفتش نتيجتي ويفتح المظروف ويضع فيه عشرة جنيهات ومعه ورقة صغيرة
هذه هديتي لك يا عبداللهعمك احمد المصطفىولكنولكنولكنفي السنة الثانية وصلت
النتيجة بدون العشرة جنيهات وقد رحل الى الرفيق الاعلى .
▪️اللهم اسالك باسمك الاعظم وبكل اسم سميت به نفسك ان تجعل
الفردوس الاعلى مسكنه وتجعل البركة في ذريته وتجبر بخاطرهم .

▪️للاسف الشديد بعد موته رحلت الاسرة مباشرة الى
ديارهم ونسبة لعدم وجود وسائل التواصل في ذلك الزمان
التليد انقطع كل شئ عدا دعواتي المستمرة له في ظهر الغيب ..
▪️وأسال كل من قرأ هذا المنشَور بالدعاء له ..
.
.
عبدالله ود البوش
الرياض ١٠ يونيو ٢٠٢٠
.
▪️بعد هذه القراءة المتأنية ادعوكم للدعاء للباشمفتش وكاتب
الرسالة والده وامه واهله وكل المسلمين والمسلمات بالرحمة والمغفرة .
----------------
▪️القصة حقيقية و أنا مجرد راصد لها .
توقيع / ود ال ح ي ش ان الت لا تة
مؤذنٌ محجورٌ منزلياً بجزيرة مالطة،،
.