♧ علمتنا صروف القدر و نوائب الدهر £

♧و رجعتا حابس أدمعي..في الليلة ديك £
》
《 دا كان حال النيل في ليلة رجع حابس سيل دموعو..
و خجلان من عراقي عمي بشارة غفير مدرسة البنات!!》

●》شدينا مكرفونا في البكسي و لفينا شارع شارع.. زقاق زقاق
و نفاج نفاج لفزعة (النفير ). كلامنا كان واضح جداً النيل محاصرنا
شديد و لازم الناس تتلمة في مدرسة البنات ، لمواجهة الفيضانات.

●》جات أعداد غفيرة من البشر أكتر من تصورنا حسب الموعد المضروب.
و بشارة غفير المدرسة عمل الواجب و رص الكراسي دي رص..بدينا نتناقش
و نتفاكر ؛و اتفقنا علي تعلية الترس و التبرعات كانت أضخم من حجم الكارثة و كل
شوية يجينا فوج مفعم للطيش بالجسارة و مدفوع بالإرادة و الحماس للتضحية.

●》أكتر زول كان منفعل و متفاعل كان عمنا بشارة الغفير..موية التلج الكان جهزناها
كملت لم تكن كافية لأرواء عطش كل هذا الحشد من الأسود الضارية الذي تداعى إلى
الموقع بما يفوق بكتير النفرة الكنا متوقعنها.عم بشارة نقل موية الزير الفي بيتو جك ورا
جك.كان أسرع من لتكتك؛ و هو يهرول ساعياً بين أوضتو و مكانا كما بين الصفا و المروة
و كان عمنا بقدم مويتو مشفوعةً باعتذارواتو.قال: معليش ياخوانا لأنها ماباردة شديد!!

●》قبل الموية عم بشارة حك آخر جيبو الصغير و جاب كيس بلح بركاوي لضيوفنا
بي مية جنيه و كيس فول حاجات مدمس بمية و خمسين.. دي كانت قروش معايشوو
لكن حب المشاركة عندو كان منسوبو عالي ذي النيل .. كان ممكن يكفينا صدرو المفتوح
ضلفتين لكنو شاف الناس بتتبرع بالملايين و أدوار الرملة والشوالات و هو لازم يشارك.

●》انفض سامر( الاعتصام) و انتهى الاجتماع و مرقنا زرافاتٍ و وحدانا راضية ننخرط
في الشغل ولكن دور عمنا بشارة ما انتهى لسة..النيل ولا عبرنا..واصل تحديه..و بشارة ما انتهى.
..ترسنا البحر خيرسانة و نفيرنا زايد و هممنا فووق و لكن النيل ماشي زايد ..أبدن مو متقاعس.

●》لامن تعبنا و قربنا نكسل بقينا نراقب في الترس و أملنا بدأ يتبدد في النجاة أو يكاد..و شوالاتنا
الكتيرة ديك نفدت او قربت تنقرض. بس أشوف ليك عم بشارة قاعد في الواطة ماسك شوال و بتلاوى
مع ولدنا خالد ساتي و يقول ليه: يازول املا لينا الشوال دا ..و خالد بقول ليه: حلفت مابملاه شيل شوالك
دا ط و ابعد من هنا ..وب شارة يحلف إلا يملو ليهو الشوال..فمشيت عليهم أحل الشبكة دي .. و نهرت خالد :
ياخاونا باركوها دا ما وكت خلاف و مشاددة: يازول ماتملا بالكوريك شوال الزول إنت بليد و لا شنو ..خالد
عاين لي و عيونا غرقانة بالدموع و جدع الكوريك وقال لي تعال أنت شوف شوال بشارة و املاهو ليهو.


●》 للدهشة .. لقيت عم بشارة أتاريه مالص عراقيهو عاملو شوال يترس بيهو البحر الهايج دا.ابتسمت
لخالد و قلت ليهو جيب ناولني الكوريك دا و قسمن عظمن البحر دا لو ماخجل من عراقي عم بشارة دا تاني
اصلو ما بخجل و لا بيستحي و لا بيعرف يكرم عشان عين محمرة زايدة مية عين و ..مليت العراقي رملة و رفعتو لعمنا بشارة في كتافينو قام جاري بيهو.. و ناديت الناس قلت ليهم: تعالو وراي مشينا ورا عمنا بشارة معتل العراقي(الشوال) و خالد قاطرو وراهو و ناس الحلة جت ماشين ورانا مستغربين لحدي ماوصلنا اخطر
حتة في الترس و ختينا العراقي الملان تراب و رجعنا حارسين ترسنا لحدي ما البحر انقرع راجع و نجحنا.

♤ خالد قال لعم بشارة ما مفروض تكون غفير مدرسة مفروض تكون أنت المدير لأنو الدرس اللقنننا
ياهو دا مافي معلم فهمنا ياهو و نحن تلاميذ ..حاجة نعمات قالت ياداب حسيت إنو مدرسة بنياتنا دي
حارسا غفير و أثوابه أسد هصور..أنا قلت ليهم: دا كان دافر بحرز دميرة عديل لكن رجع خجلان من عم
بشارة دا اللي كان الوكت داك ماشغال بفارغتنا ديك كلها.. كان ماسك طوريتو يفتح لشدر المدرسة.
💚💚
شوال عراقي عم بشاره/ ودرملي