♧ ناس عايشة و ناس دايشة £

《 كسرة.. روتين 》

♧ مره كنت مسافر لماورية شغل كالعادة .فكرت
أشتري لي ( تي شيرت ) من السوق العربي أشيلو
معاي ينفعني وقت الراحة و الدنيا خاشه على صيف
.. لأني مليت من العراريق و الخمخمه السنه كلها ..

♤ اها مشيت السوق و دخلت محل ، لقيت ود ظريف و راقي
و راايق كده قاعد في المحل ببيع تي شيرتات و اقمصه نسائيه
و تياب عاديه كده .. المهم اشتريت التيشيرت و ما فاصلته معاهو
كتير في السعر .. و بعد دفعت ليهو القروش و انا طالعقال لي ما عاوز
حاجه ل( كسر الروتين)😉 ؟ قلت ليهو كسر الروتين ده شنو 😦 ؟ قال
لي معقول ما بتعرف كسر الروتين ؟ 😉 قلت في نفسي الزول ده ببيع
( خرشه ) و لاّ شنو 😱؟ ، قلت ليهو ابدا و الله ما عرفتو ..😥 ..قال لي :
يعني تشيل ليك حاجه للمدام تكسر بيها الروتين ..😍 .. قلت ليهو :بعني
المناسبه شنووو ؟ 🤔 .. قال لي : هو لو اصلا لو بقى لي مناسبه ما بنسميها
كسر الروتين 😁 ..قال لي ياخ الحياة فيها ملل مع الدوامه اليوميه العايشنها
الناس في بيوتم😔 اكل .. شراب .. شيل .. خت .. جيب .. اعمل .. و بس .. 🙁
كدي جرّب الليله بدون مناسبه كده شيل ليها حاجه و قول ليها دي هديه كده بسيطه
لله لله .. 😊 .. قلت ليهو بضحكه كده : ههههه انت تاجر شاطر و مفتح بتعرف تسوّق
كويس غايتو .. 😉قال لي : و الله انا لو اشتريت مني او ما اشتريت ما بغير في رزق
اليوم حاجه 😊❤.. بس انا مجرب الحاجه الاسمها كسر الروتين دي و لقيت اثرها في
حياتي ما تتخيلو كيف❤ .. و انا حبيت بس اشاركك تجربتي و حتشوف كلامي ده ..قلت
ليهو : طيب ياسيدي نجرب وماحنخسر حاجه .. عندك توب مناسب كده و ظريف و بسعر
اظرف😅 .. قال لي : اختار الشكل البعجبك و انا السعر لو ما عجبك اعتبرني ما قلت
كلامي ده اصلا و كأنك ما سمعتو .. و شيل تي شيرتك و امشي..😊

● عزلت توب عجبني كده ، و هو ذااتو عجبو .. و لقيت سعرو اقل مما
كنت متخيلو لأنو ما كان معاي قروش كافيه لتوب .. قال لي جيب اغلّفو
ليك في كيس بصوره حلوه كده عشان يكون في شكل هديه جد جد..❤


♡ شلت التوب و شكرتو ومشيت البيت .. شربته كباية المويه و ناديتا
وناولتها التوب وقلته ليها اتفضلي دي هديه( بسيطه) 😊 ..عاينت لي
كده زي البتتذكّر في حاجه🤔 ،، قالت لي المناسبه شنوووو 😉 ؟ قلت
ليها : ابدا والله من غير اي مناسبه .. دي هديه كده لله قبل ما اسافر منكم .. 😊 ..
تصدقوا وماطالبني حليفه .. الزوله دي رمقتني بنظره غابت عني من زمن طويل ..
خلتني اركز في ملامح وشها و جلحاتا اللي زمن ما ركزته في تفاصيلا كأنو اوّل مره
اشوفا الليله 😢 . والساعه (العمتتني ليك) طبعا اب جيقه الزيّ كان ضبحوهو شخ ما
بقول (حضنتني 🤣) لمن عويناتا رقرقن 😭😭 ( حسستني زي الماشي الجهاد) 😂..
قلت ليها هوي يازوله ها .. برّاحه علي .. و الله فرك الباميه و الغسيل عملن ليك عضلات
تبش عديل 😂😂.. سمعته لي ذي ضحكه (اقصر مني ياخ 😂) جايا من مسافه
بعييييده ..و في نفس الوقت دميعاتا نازله زي الشافع الرضوه بحلاوه بعد جلدو.. 😂
😂 .. قلته ليها و الله القاك قشيتي دميعاتك و مخاخيتك ديل فيني والله ما اخليك😂
😂😂..والمره دي الضحكه كانت وااضحه شديد 😂 قلت في نفسي سبحان الله الخرشه
دي شكلها صنف عجيب البتخلي الزول يبكي و يضحك في نفس الوقت 😂 ..صدق رسولنا
الكريم حين قال : ( تهادوا..تحابوا🌹💓).. فمابالك بهديه تقدمها لزوجتك .. ام اولادك ..
أو هديه صغيره تبسطي بيها ابو العيال وتغيري بيها من الروتين اليومي شويه ..
حاجات صغيره وبسيطه ممكن تغير حياتنا ١٨٠ درجه ..
جربوها والله ماحتندموا ❤