|
|
|
 Re: أوسكار 2020 (Re: أحمد محمد عمر)
|
أول ملاحظة في اوسكار السنة دي إنه نجوم الصف الأول بتنافسوا في اوسكار الممثل المساعد
شكراً توم هانكز، انتوني هوبكنز، ال باتشينو، جو بيسكي. كنتم كالعهد بكم نجوماً تتلألأ على سماء الاوسكار الذي خبرته وخبرها
أمتعتمونا وأديتم الأداء الأوسكاري. حظ أوفر في الاوسكارات القادمة
معليش السنة دي براد بت ختاكم في فتيل
| |
 
|
|
|
|
|
|
|
|
Re: أوسكار 2020 (Re: أحمد محمد عمر)
|
| Quote: معليش السنة دي براد بت ختاكم في فتيل |
كيفن الكلام دا؟
براد بت موش ذاتو مرشح لاوسكار ممثل مساعد؟
ممكن تقول جاكوين فينيكس ختاهم في فتيل.
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
نبدأ على عجالة بي أفضل الأفلام
Paraise
فيلم كوري مجنون
حبكة درامية كوميدية ممتازة
ما فيه أي حشو .. تشويق من البداية للنهاية
أحداث متلاحقة، حوار مختصر بدون أي تطويل
بيحكي عن عائلة فقيرة كلهم عاطلين عن العمل عايشين داخل قبو في حي فقير
الصدفة وحدها تخلي ابنهم يشتغل عند أسرة غنية ويجتهد ويتآمر لحدي ما يشغل بقية عائلته كلهم معاهو وتدور أحداث مأساوية في النهاية
الفيلم خطير لدرجة صعوده للمرتبة 26 ضمن أفضل أفلام العالم في كل الأزمان حسب تصنيف imdb
فاز بالغولدن قلوب كأفضل فيلم أجنبي ومرشح حالياً لستة جوائز اوسكار من بيتها جائزة أفضل فيلم وأفضل إخراج
الفيلم مشوق وما بتفوت
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
لما يجتمع مات ديمون مع كريستيان بيل يبقى تجيب كباية القهوة وتقفل الموبايل لأنك مع المعلمين
كريستيان بيل جضم فيه دور مبالغة، سائق سباقات يدخله صاحبه مصمم سيارات السباق مات ديمون في المشروع اللي أوكلته ليه شركة فورد من أجل منافسة فيراري وطبعاً هو مقتبس من قصة حقيقية
كريستيان بيل أدى دور المبدع الهبتلي .. الشخص الملكاته الفنية قوية لكن عايش على طبيعته وما بقدر يقدم نفسه للمجتمعات الفوق عشان كدة مدير التسويق كان بحاول يتخلص منه بكل الطرق باعتبار إنه شخصيته لا يمكن تمثل شركة بحجم فورد
الفيلم بجسد علاقات العمل بصورة واقعية شديد بدءً من مات ديمون المفلس اللي جاته الفرصة من السماء وبقى في صراع الاحتفاظ بالفرصة والرضوخ لضغوط مدير التسوق ولا الاحتفاظ بالنجاح وكريستيان بيل وحريقة في المدير .. وفي الحقيقة هو جرب الطريقتين
الفيلم تشويق وإثارة من البداية للنهاية وما بتفوت
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
جوجو الأرنب تدور أحداثه حول طفل مشبع بالنازية أيام هتلر وبشارك في فرق الكشافة النازية لكن بفشل في اختبار قتل الأرنب عشان كدة التعلمجي بسميهو جوجو رابت
تنقلب حياته بعد اكتشافه ليهودية عايشة في البدروم بتاعهم
القصة بتبدأ كوميدية ثم تتحول إلى درامية مع شئ من الرومانسية في الآخر
أنا طبعاً ما بحرق الأحداث عشان كدة ما حأتكلم أكتر من كدة
مرشح لي ستة جوائز اوسكار من بينها جائزة أفضل فيم وجائزة أفضل ممثلة مساعدة سكارليت جونسون
الفيلم جميل وبستحق يتحضر
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
قصة زواج درامية تحكي تعقيدات العلاقة بين مخرج وزوجته الممثلة التي تنتهي بالطلاق .. الفيلم اسمه قصة زواج لكن حقيقة هو قصة طلاق
أداء الممثلين فيه كان جبار وكلهم اترشحوا للأوسكار
مرشح لستة اوسكارات من بينها أفضل فيلم وأفضل ممثل آدم درايفر وأفضل ممثلة مساعدة لورا ديرن وأفضل ممثلة رئيسية سكارليت جونسون اللي داخلة السنة دي بي صرفتين
لو بتحب الأفلام الدرامية البتناقش تفاصيل الحياة اليومية دة فيلمك .. لكن لو داير قصة وتشويق وأحداث متلاحقة ما فيهو
| |
|
|
|
|
|
|
|
|
 Re: أوسكار 2020 (Re: أحمد محمد عمر)
|
اكتر واحد متشوق اشوفو واتمنى يفوز
رغم وجود ال باتشينو وبراد بت
الزول ده اجاد دور العصبجي السفاح في Cassino و goodfellas
لمن الناس بقو يخافو منو عديل
| |
|
|
|
|
|
|
|
|
|
Re: أوسكار 2020 (Re: الزبير بشير)
|
جو بيشي (أعتقد تنطق هكذا) اعتزل التمثيل يا عبد الله من سنة 99
ولم يظهر إلا لماماً مرتين بس خلال كل تلك الأعوام في أدوار هامشية
أها في ايريش مان روبرت دي نيرو حلف بالتقطعه الدور دة ما يقوم بيه إلا جو بيشي والتحانيس دورت
كل ما يعتذر يرسلو واسطة تانية .. قرأت في موقع ما متذكرو إنه عدد التحانيس كاد يصل الخمسين تحنيس حتى وافق
لكن دي نيرو أثبت إنه نظرته فاحصة لأنه البعملوا الزول دة بعيونه وتعابير وجهه ما طبيعي كلو كلو زول بقدر يعبر بالصمت
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
الجوكر هو الفيلم الأبرز في عام 2019
يمكن الناس شافت تأثيره على الشباب عند ظهور أقنعة الجوكر في احتجاجات لبنان والعراق
الفيلم وضع نفسه في المرتبة 34 ضمن أفضل أفلام العالم وتخطى دخله المليار دولار
قصته أثارت جدل واسع باعتبارها دعوة للعنف بل يقال حتى في دور العرض كانت الشرطة حاضرة
ورغم إنه شخصية الجوكر تم طرقها كثيراً في سلسلة أفلام باتمان إلا إنه المميز المرة دي إنه مافي باتمان الخير عشان يحارب جوكر الشر
بل الجوكر نفسه تم تصميم شخصيته على إنه مهضوم في المجتمع ومريض بتعالج من مشاكل نفسيه تجنى عليه المجتمع لما تم إلغاء علاجه على نفقة التأمين
إنسان مكافح بحب الكوميديا ومجتهد فيها لكن واجه فشل في المهنة حقته واتعرض لكمية من التنمر في الشارع والعمل وصلت لحدي مقدم البرامج الشهير روبرت دي نيرو وبعد داك تبدأ رحلة الجوكر الانتقامية من أعداءه لحدي ما يصبح بطل في أنظار الناس
مرشح لي 11 جائزة اوسكار .. والله صحي
طبعاً بعد كدة ما محتاج أقول ليك يستحق المشاهدة
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
الف شكر أحمد للتنوير
الآن ممكن نضع خارطة طريق
لمشاهدة الافلام في 2020
عندما نجد وقت مناسب
تاني مافي زول يجي يقول ما عارف اعمل شنو
هل يمكن مشاهدة الافلام دي في النت
ام نتابع السينما؟ ... اجو الإفادة
| |
|
|
|
|
|
|
|
|
Re: أوسكار 2020 (Re: علاء سيداحمد)
|
من الإسم افتكرتك بتتكلم عن فهرنهايت بتاع مايكل مور
لكن إن شاء الله الواحد يلقى زمن يحضروا
يديك العافية حامد
نعم جميع الأفلام موجودة على النت بس تكتب الاسم وقوقل بجيب ليك السينما في بيتك
يبدو لي في الدول الغربية الحركة دي حرام لكن عندنا حلال بلال :)
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
الفيلم السابع الذي يمثل ذات الرواية القديمة (نساء صغيرات) دة غير المسلسلات
درامي ويتحدث عن حياة عائلة بسيطة وكيف البنات بواجهن الحياة بمختلف توجهاتهن
رغم ترشح الفيلم لي 6 جوائز اوسكار إلا إنه في رأيي فيلم عادي
الحاجة الوحيدة الما عادية فيه الأداء الجبار للنجمة فلورنس بيو واللي اترشحت فيه لجائزة أفضل ممثلة مساعدة
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
علي الحلال ولا نص كلمة
دة تمشي من دربك دة تحضرو
ليوناردو دي كابرويو وبراد بت ومارغوت روبي تاني التفكير ليك شنو!
مارغوت دي طبعاً حكاية عندنا معاها ونسة طويلة في البوست دة كان لقينا الزمن
الفيلم مرشح لي 10 جوائز اوسكار من بينها جائزة أفضل ممثل رئيسي ليناردو ديكابريو ودي فيها قولان وجائزة أفضل ممثل مساعد براد بت ودي خاتينها في الجيب الخلفي مضمووووونة إلا يخجوها حتى تمشي لي زول تاني
طيب ومارغوت؟
ما تستعجل عليها ما مرشحة هنا لكن جائزتها قاعدة في فيلم تاني
لا حأحكي قصة الفيلم ولا أقيمو زي ما قلت فوق .. دة بس تمشي تحضر طوالي
| |
|
|
|
|
|
|
|
|
|
Re: أوسكار 2020 (Re: Nasser Amin)
|
كيف ما من ضمن اللستة يا ناصر!
علي الحلال لو طلع تندك وتتوزع من جديد
خليتو تحلية
آخر واحد بكرة الصباح بجيبو ومعاهو قائمة أفضل ممثلين رئيسيين
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
أخبارك يا أحمد ..
الفيلم الكوري باراسايت كويس لكن فيهو حتات كده ..
بتفقد فيها السيطرة على دركسون متعتك ..
حتات مشاترة وتحسها عبيطة وبتستخف بالمشاهد ..
كوميديا فجة ومحشورة بدون لازمة ..
لو كان تم تجاوزها كان أفضل في تقييم الفيلم
عموما هو فيلم حلو لكين حلوهو ما مكتمل ..
كتير من الاوسكارات الفاتت كانت مسخرة ..
وافلام لاترقى إنك تعرضها لمشاهدي ( الترسو ) ..
فضلا عن مشاهد حساس يتلمس الدقداق البقابلو في الحبكة ..
إن شاء الله حصاصاية صغيرونة تلصق بمجرى اللستك ..
وتعمل ليك استقراش يفقدك السيطرة على الدركسون ..
| |
|
|
|
|
|
|
|
|
|
Re: أوسكار 2020 (Re: جمال ود القوز)
|
والله رأيي عكسك تماماً يا جمال ما شايف فيه أي حشو
لكن جرجرة الكلام عند الكوريين للما متعود على الدراما الكورية ممكن تتشاف ليه عباطة عباطة
الليلة اصلو الله ما هون لي زمن كنت داير اتكلم عن الفيلمين الأخيرات واقول رأيي في المجمل لأنه إعلان الجائزة بعد بكرة
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
الفيلم الملحمي التاريخي 1917 يتحدث عن جنود انجليز أعد لهم الألمان كميناً فأراد القائد تنبيه الكتيبة المحتمل فناءها بالكامل عن طريق إرسال شقيق أحد ضباطها بصحبة صديقه، وتدور أحداث الفيلم بالكامل عن الرحلة من المعسكر الأول إلى معسكر الفرقة الناجية
يعتبر من أفضل أفلام الحروب لأنه ناقشها بدون مزايدة .. الأبطال ما خارقين بقعوا في الكمائن وبتقتلوا وبعض الضباط بخافوا أثناء الحرب وبعضهم بقاتل من أجل رغبات شخصية أو لأنه الحرب جرت في دمه .. وأكتر عبارة بتعلق بذهني أي زول حضر الفيلم لمن اللواء يشكر بطل الفيلم اللي أنقذ الفرقة في النهاية وبي أسى بقول ليه ما تفرح انت الهجوم وقف ليوم الليلة فقط لكن بكرة تاني برجع ويتبعها بالعبارة: (There is only one way this war ends. Last man standing.)
الفيلم شيق يحبس الأنفاس أحداث متلاحقة مناظر مؤثرة موسيقى تصويرية عجيبة لمن بي هناك بالإضافة للإخراج الروعة
اترشح لي 10 جوائز اوسكار وأكيد ليه شأن كبير في جوائز هذا العام
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
The Irishman
التحلية
آخر فيلم من المرشحات
لم فيه روبرت دي نيرو رفقاء الدرب عشان يصنعوا فيلم عصابات بنفس الألق القديم
قد يسأل سائل ليه الممثلين المساعدين الاتنين ال باتشينو وجون بيشي اترشحوا وروبرت دي نيرو ما اترشح!
الإجابة لأنه أصر على أداء دور شاب في بداية الفيلم ومشيته خربت أي حاجة .. واضحة جداً مشية زول عجوز بالإضافة لي إنه قوته البدنية خانتو لمن حاول يسحب جثة
الفيلم خطير مافي كلام
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
للأمانة الأفلام المرشحة أي نعم سمحة وممتعة وأي حاجة لكن ما فيها فيلم أيقونة أو خارق للمألوف
يعني فيما عدا فيلم الجوكر مافي فيلم أتى بي فكرة جديدة تسن أقلام النقاد
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
توقعاتي:
أفضل فيلم وأفضل إخراج 1917
أفضل ممثل Joaquin Phoenix عن فيلم الجوكر
دة الأداء البعجب الاوسكاريين لكن لو سألتني مين أكتر واحد في المرشحين جضم دوره بقول ليك Adam Driver
أفضل ممثلة Renée Zellweger عن فيلم Judy
أفضل ممثل مساعد Brad Pitt
أفضل ممثلة مساعدة Florence Pugh عن فيلم Little Women طبعاً دة رأيي الشخصي لكن في نسبة أقل لإنها تكون Laura Dern ونسبة أقل من التانية إنها تكون Scarlett Johansson
Parasite حيفوز بجائزة أفضل فيلم أجنبي
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
الاستاذ احمد
سلامات
اسمح لي بأن أعبّر عن امتناني لك لهذا البوست الذي أظهرت فيه براعة ودراية في حديثك عن الافلام والممثلين..
فيا ريت تتحفنا بمثل هذه البوستات إنْ سمح وقتك وظرفك..
خالص تقديري وإشادتي مرة أخرى.
| |
|
|
|
|
|
|
|
|
|
Re: أوسكار 2020 (Re: osama elkhawad)
|
وحاتك لا في دراية لا معرفة ياها المشاهدة العادية دي
زي ونسة شباب المصطبة البتناقشوا في الدوري الأوروبي ويقول ليك أنا أعتقد إنه غوارديولا غلط عشان كان مفروض يفتح اللعب بالأطراف
كان بتمنى ألقى زمن أعمل فيه توثيق أفضل زي ما عملت في اوسكار 2018 لكن الزمن بقى ممحوق خلاص
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
مفاجأة الأوسكار بالنسبة لي هي فوز Parasite بجائزة أفضل فيلم وأفضل إخراج بدلاً عن 1917
وحقيقي يستحقها ونص وخمسة
باقي توقعاتي زي ما هي
أفضل ممثل Joaquin Phoenix
أفضل ممثلة Renée Zellweger
أفضل ممثل مساعد Brad Pitt
أفضل ممثلة مساعدة Laura Dern
أفضل فيلم عالمي (أجنبي) Parasite برضو
| |
|
|
|
|
|
|
|
|
|
Re: أوسكار 2020 (Re: أحمد محمد عمر)
|
| Quote: وحاتك لا في دراية لا معرفة ياها المشاهدة العادية دي |
كعادتنا، دائما نتواضع...
المهم:
بوستك من الآن من أقوى المرشحين لأوسكار احسن بوست 2020 ...
| |
|
|
|
|
|
|
| |
Hafiz Bashir
Abdullah Idrees
الزبير بشير
Hamid Elsawi
علاء سيداحمد
Nasser Amin
جمال ود القوز
osama elkhawad
فيس بوك
تويتر
انستقرام
يوتيوب
بنتيريست