|
|
|
 Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
طلب منى الأستاذ أن أكتب له شجرة العركيين و أكتب نسبى بأبى و أمى , و جهزت فعلا كراس من الورق المقوى و كتبت الشجرة ....
اعتمدت على وثيقة الشيخ الطريفى ابوناموس و و اعطيتها للأستاذ فى الصالون ... و الصالون ملان بالاخوان و الاخوات فمسكها و قرأها كلها بصوت واضح ...
و قد كنت قد كتبت كل ولى و لقبه ... مثلا .. يوسف اب شرا , ابو عاقلة الكشيف, أحمد أبفلج,... عندما قرأ أبفلج قال لى هنا الباء ما منقطة , تعال نقطها
تبيت ( افج فى الأخوان فج) الى ان حصلت مكان الأستاذ , فأعطانى القلم و نقطت الباء و أعطيته القلم و رجعت لمكانى ...
بعد ان قرأها قال لى : سلسلة مشرقة .. يمكنك أن تقول :
اؤلئك ابائى , فجئنى بمثلهم ** اذا جمعتنا يا جرير المحافل
لأول مرة أسمع هذا البيت و حفظته لتوه ... و الان أزور به الصالحين.
( الحمد آآآآآآلاااااف , و الشكر آآآآآآلاااااف)
---
بتصرّف مما يحكي د. حمد النيل عبدالله دفع الله "العركي" - ود الكشيف -
العركي (ولقبه في ابي حراز "الشيخ") يقيم وزوجه هدى محمد خير بطران "كسلا"
في ابي حراز وهو مطوّف الأخوان وضيوفهم الكرام في زياراتهم لإبي حراز وهي كثيرة ..
| |
  
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
كنت بالمناقل ووجه إلي الأخ عادل إبراهيم حمد* دعوة لحضور مديح بمنزله وقال لي أن المادح من أولاد حاج الماحي ..
ولما حضرت وسلمت على المادح وعرف أنني من الجمهوريين , ترك هذا الرجل كل الحاضرين وإنتفض يحكي لي بنشوة كبيرة عن زيارته للأستاذ..
حكاها لي من بداية دخوله على الأستاذ حتى الوداع وبتفاصيل كاملة ..ويقول أنه لم تتم له زيارة مثلها لأي شخص آخر وهي تمثل زاداً له حتى مماته..
==
بتصرف مما يحكي الباشمهندس جبريل محمد الحسن
* عادل ابراهيم حمد من أصدقاء الجمهوريين وأركانهم بجامعة الخرطوم
يعمل حاليا بالصحافة
والده ابراهيم حمد من أعيان المناقل وكان مرشح الإتحاديين الدائم للبرلمان
عرف عن أولاد حاج الماحى زياراتهم للأستاذ
---
في سبانا ذكرنا تعليق الأستاذ محمود لتلميذه الأستاذ عبداللطيف عن (تميز السودانيين)
علّق على البيت:
أخواني المعاي
البشربو الدّكاي
مع الصديق سديد الرأي!!
قال ليهو "زولكم دة عجيب بالحيل"
---
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
فإلى الولي مرشد الأولياء، وهادي الصالحين إلى طريق رب العالمين، من أحيا طريق أبي صالح الجيلي في البلاد،
وهدى به إلى سبل السداد.. صاحب علم الظاهر والباطن الشيخ دفع الله بن الشيخ أبي إدريس العركي قدّس الله سره..
--
من خطاب للأستاذ محمود محمد طه وهم يزمعون زيارة أب حراز نهايات العام 1970
--
دفق الوبان دفع الله
ود أبو إدريس دفع الله
عنده الحديث دفع الله
مك ما جليس دفع الله
وسلطان عزيز دفع الله
من بعض نشيد "القوم" الذي ينشده الجمهوريون
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
في جلسة مع استاذ سعيد مساء ، حولي سنة 1987 جرى كلام عن الإستقلال . فسألت استاذ سعيد: يا استاذ البطولة شنو في إعلان الإستقلال من داخل البرلمان ؟
وهل كان بإمكان الشعب الجزائري ان يعلنه من داخل البرلمان ويوفر المليون شهيد ؟
قال الاستاذ هو مهندس الإستقلال من داخل البرلمان . .إقيمت ندوة تحدث فيها الاستاذ محمود . وتكلم عن ان الإستعمار قد يجلو ثم لا نجد انفسنا لا أحرارا ولا مستقلين .
.... وإنما متخبطين في فوضى . . .(كلام في المعنى دة ) .عقّب عليهو الاستاذ عبدالرحمن عبدالرحيم الوسيلة وهو شيوعي . فادعى ان الاستاذ أضعفه سجن المستعمر ولذلك يريد بقاءه . .
ثم جاء متحدث ثالث (ذكره ونسيت اسمه ) وسار في خط الوسيلة في الهجوم على الاستاذ . .فأعتلى الاستاذ المنصة وعقب . قال : إستقلال السودان سيعلن من داخل البرلمان . .
كل واحد يطلّع نوتتو ويكتب ... على مسئوليتي ، سيتم إعلان الاستقلال من داخل البرلمان . كل واحد يطلع نوتتو . . .وكرر العبارة . .
في مدني جاء رجل كبير من أهلي تقريبا سألني مندهشا. .ليه استاذك يورط نفسو بكلام زي دا . المستعمر اتفق مع السيدين على الاستفتاء ؟؟
قلت ليهو : ماقاله الاستاذ سيتم .... بعد ايام احد السيدين أيد ،في بيان ،الاستفتاء .قريبي دة جا متشكك لسع فأكدت ليهو طالما قالو ح يتم . وتكرر الامر بعد بيان السيد الآخر .
ولسع استاذ سعيد على قناعتو . بدت نبرة إعلان الاستقلال تسري في الناس لدرجة ان الأزهري في جولة خارج السودان سأله المصريون . كيف ستكون علاقة السودان بمصر ؟
فأجاب : ستكون علاقة الند بالند . . فأحبطهم . وقد كانوا يتوقعونه داعيا للإتحاد . .واستمر الشارع مشغولا بإعلان الإستقلال من داخل البرلمان . .فبارك السيدان الإعلان . .
حوالي سنة 2000 كنا مع استاذ سعيد ضحى . ونسة عادية .كان هو يتحدث مع إحدى الاخوات الصغار في كلام عن السياسة عال . .بالمجلس عبد الرحمن عمر الحسين* .....
شعرت انو الفرصة مواتية لأسأل ذلك السؤال مرة أخرى لعل عبد الرحمن يستوعب معي الكلام . .فكانت نفس الإجابة التي سمعتها سنة 87 . .
قبل حوالي 6 سنوات ذكر مامون سنادة ان أول من دعى لإعلان الإستقلال من داخل البرلمان عبد الرحمن دبكة ، وثنى إقتراحه شاور جمعة سهل ، وكلاهما من صغار البرلمانيين عمرا . .
---
بتصرّف مما يحكي د. المبارك الصديق السعيد
* د. عبدالرحمن عمر الحسين ... أصلا من المدنيين ولكنهم نشأوا بقرية القضيضيم من أعمال الحوش ... زوجه الأستاذة آمال عبدالله الريح العاقب من أهل الأستاذ محمود
عبدالرحمن يعمل بجامعة ود مدني الأهلية وقد عمل بالتعليم العام ... من أشقاءه الأمين ومهدي وقد كان الأمين فرطهم على "الحوض"
قال لي أحدهم:
تتصور يا عبدالله!! الأمين* دة في الستينات قبل التسجيل ... يقعد جنب الأستاذ في المحاضرات ... يكتب المحاضرة نسخا بنفس سرعة الكلام!!!
كيف الكلام دة؟!
ياهو كدي!! زي ما أقول ليك ... تطلع المحاضرة زي ما هي ....
عجيب!!!
---
الأمين عمر الحسين قضى شطرا كبيرا من حياته في الأبيض في عمل خاص بالمنطقة الصناعية وقد زرته في بيته النصف الأول من ثمانينات القرن الماضي
شقيقهم مهدي من موظفي بنك الأدخار الأوائل بود مدني ثم تفرغ للعمل الخاص في مجال المطابع بالخرطوم زوجه أنصاف حيدر التوم حفظهم الله
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أستاذ سعيد قال لينا
لو لقيت وكت اكتب عن عبد الخالق محجوب* وأدبه مع الاستاذ.. لكني لاقي المدد فى تطييب خواطر الناس.. الدين كله تطييب الخواطر..!
---
بتصرّف مما يحكي الأستاذ علي العوض عباس
علي أصلا من كمير العوضية غرب شندي ونشأ بودمدني
درس الإقتصاد جامعة الخرطوم ... حفظهم الله وزوجه عابدة حسن عثمان والأبناء ومنهم "عبداللطيف عمر حسب الله علي العوض عباس"
---
* عبدالخالق محجوب عثمان، سكرتير الحزب الشيوعي السوداني كان قد نشر فى صحيفة الأيام 5 اكتوبر 1954 مقاله (الشيوعية فى السودان لاتحارب الدين الاسلامى) فرد عليه الأستاذ محمود بسلسلة مقالات (بل تحارب)
حكى لي الأستاذ سعيد الطيب شايب أن الأستاذ عبدالخالق بعد ردود الأستاذ محمود عليه جآء للأستاذ وقال له والله أبوي بقى يعتقد أنو نحنا بنحارب الإسلام ... حكى للأستاذ انهم لما يزورو موسكو يستغرب فيهم شيوعيو موسكو: كيف قادة حزب شيوعي يصلون؟!
قال أنو قال للأستاذ انو هو - عبدالخالق - مقتنع جدا بالطرح الإشتراكي في النظرية لكن ما مؤيد مسألة الإلحاد فيها وقال انو ح يجيب مادة كتيرة للأستاذ ليكتب ناقدا لهذا الجانب .... الخ الخ
قال لي الأستاذ سعيد أنو حكى هذه القصة للأستاذ التجاني الطيب بابكر ابان اعتقالهما معا في كوبر وأن تجاني قال له أنه أبدا لم يسمع بهذه القصة من قبل ولكن طلب من سعيد أن يمشوا في نفس هذا الإتجاه ...
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
سلام يا عبد الله
في ديارم حجبوا القمر
واحد من فصول التآمر على الدراما السودانية هو عدم بثها على الفضائية السودانية، هكذا قال الكاتب الدرامي عادل ابراهيم محمد خير وشاهده مسلسل (وجه القمر) الذي أخرجه عبدالرحمن محمد عبدالرحمن وظل حبيسا لما يقارب التسع أعوام، وألمح ان السبب الأساسي يرجع إلى أن فكرة المسلسل تقوم على شخصية دينية لها رؤية صوفية للدين وتتمتع بكاريزما اجتماعية خطيرة، ورأت الجهات المعنية أن هذه الشخصية رمز للأستاذ محمود محمد طه، وعلى ذلك بقي ممنوعا.
---
الجريدة – صفحة فنون الإثنين 20 سبتمبر2010
بهذه المناسبة نضع أغنية "في ديارهم حجبوا القمر" غناء "إنصاف فتحي".. وبرضو "حجبوهو من عيني إلا من قلبي لأ"
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: Yasir Elsharif)
|
من لطائف ما سمعت أمس للشيخ علي المبارك أحتفالا بالمولد النبوي الشريف يقول
محمد زاد الحسنى, .. وطابت بيهو انفسنا
شفيعنا وباقى ريسنا
فى يوم البعث مهندسنا .. وفى الجنات مورثنا
من النيران مخلصنا
رحم الله المادح الشيخ علي مبارك وجعل بركاته فينا
Am 29.01.2011 veröffentlicht
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أماه يا خديجة
المزارع بنوم لكن التيراب ما بنوم
شاب معلم فيزياء في مسقط قال لي لما كنت في الثانوي العام بعرف انو أخوي جمهوري لكن دا شنو ما عارف
لميت في كتيب صغير (يبدو اخو ديوان الصقر يعلو وحده) فيه قصايد من ضمنها قصيدة أماه يا خديجة
بقيت اقراها باستمرار وأقولها في الطابور الصباحي في مدرسة الزيداب
في زول مهووس كدا منعني قال لي تاني ما تقول القصيدة دي في الطابور
كنت مستغرب ليه؟!
سألت أخوي الكبير قلت ليهو أنا مستغرب ليه منعني؟!
قال عشان قصيدة جمهوريين!!
الجمهوريين ديل شنو؟!
بديت أقرأ بالدس للجمهوريين
أها!! من ديك وعيك
—-
الشاب: الأستاذ ابراهيم بشير ابراهيم مساعد
الأخ الأكبر: د. كنال بشير ابراهيم مساعد (جامعة دنقلا)
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
كانت الفجيعة فى الشيخ عبدالحميد عبدالله كبيرة أحسن الله إليه وتغمده برحمته ونشأ أطفاله تنشئة بر ورعاية،
ولقد أسيت للفواجع الكثيرة تلم بخوجلى* رعاه الله وألزمه وأهله الصبر ....
---
من خطاب بتاريخ 13 يناير 1959 من الأستاذ محمود للأستاذ عبداللطيف عمر حسب الله
بعد أيام ستمر 59 عاما على كتابة هذا الخطاب
---
* خوجلي محمد خوجلي من قدامى الأخوان الجمهوريين متعه الله بالصحة والعافية
درس المحاسبة وعمل بودمدني ثم أنتدب لوزارة الخارجية ومنها ألتحق بمنظمة الوحدة الأفريقية
قضى زمانا طويل بأثيوبيا وترأس لفترة الجالية السودانية هناك
تقاعد مؤخرا ويسكن الآن الخرطوم قريبا من مستشفى الخرطوم
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أيوة!! أيوة!! بتذكرو بلحيل ... الخليفة موسى ... ختمي يكاد كان يوميا بزور الأستاذ محمود في كوستي
بتذكر أنو كان من الناس الرافقو الأستاذ محمود في الزيارة الغريبة ديك المشى فيها الأستاذ للشريف المعمّر
في قرية مديسيس وجا راجع في نفس اليوم ...
بتذّكر خليفة موسى دة يوم بعد إنتقال السيد علي الميرغني* جا قال للأستاذ انو شاف في رؤيا أنو هو أنتدبوهو
مع الأستاذ محمود ليغسلوا السيد علي (غسل الجنازة) وغسلوهو ....
---
بتصرّف مما يحكي الأستاذ الطيب محمد الحسن عمر إدريس "العبادي"
* توفى السيد علي الميرغني في العام 1968 وقد كان تشييعه حدثا مشهودا
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
نعم ياهو كدي!! أحمد أسيد ما من أهلنا الحُمُر ... من أهلك الشايقية لكن كان جارنا في الشويحات
قبل ما نرحل لحي أمير وعلاقتو بي نادر* بدت من هنا ...
كان أستاذ لغة إنجليزية نادر بعدها اشتغل في المنظمات
أيوا!! صاح
مامون أخوه يحكي مبسوط إنو الأستاذ محمود ركب في اللوري بتاعهم مرة
قال من وكتها تاني لوريهم دة ما ودوهو المنطقة
قلت: بختهم ولا النار بتاكلو ولا تاكلهم
---
ونسة مع ناس "اللبيض أب قبة فحل الديوم"
الأستاذ محمد علي عبدالرحمن "زول طقت" و د. بدرالدين عثمان سليمان قباني
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: Ali Alkanzi)
|
قال هم شافو النور في بارا ... السيد محمد عثمان الكبير* قام عناهو من الحجاز
والشيخ عثمان دان فوديو من بلد التكرون .... دان فوديو لما وصل بارا لقى الختم سبقو وعقدوا
ليهو على السيدة رقية بت جلاب ... جاب السيد الحسن ... السيد الحسن سرتو مدفونة في بارا
الناس قايلين النور المعنى هو السيد الحسن لكن الحقيقة النور هو السيد علي*
---
زار الأستاذ محمود غير مرة هذه البقاع الطاهرة في بارا وقد كانت منزلته في بعض زياراته
بيوت أهله الركابية آل محمد الحسن عبدالله ياسين وآلهم
---
(بتصرّف)
حديث يلذ سماعه مع الأمير محمد أسماعيل أبوقرجة، الباشمهندس علي الزبير أحمد شميم،
الباشمهندس عبدالحليم حسن العوض و د. مصطفى الجيلي عمر .. بمنزل الأمير بهجليجة/ الصالحة أم درمان
يناير 2018
أطراف من الحديث من آخرين
* تشرفت في مطالع يناير 2018، رفقة الأخ د. بدرالدين عثمان سليمان قباني بزيارة مراقد السادة الختمية
السيد محمد عثمان الختم وأولاده بالحجون / مكة المكرمة جوار مرقد السيدة خديجة رضي الله عنها وأرضاها
لاحظت أن الطريق الذي يشق المراقد لا يسير بمحاذاة مراقد السادة الختمية وبه منحنى باين
قال لي د. بدر أنه يقال أنه لما قرروا شق هذا الطريق قرروا تحويل رفاة بعض ساكني تلك البقاع الطاهرة
ويقال أن السيد الختم الكبير قد حلّم أحد المسئؤولين بالا يقربوهم وقد حدث فكان ذلك المنحنى الباين قبالة مراقدهم
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
هذا حديث يلذ سماعه
للجعلي في عليائه
تعرف يا عبدالله يا ود عصمان السعيد دة بحرو غريق وسرو عجيب
كان واسع الناس ديل كلهم ... اللطايف في مجلسو لا تنقضي عجائبها ... ناس مكنش وعمك كدوية والهادي الخدر
ناس عمك عبدالله الفكي وحيدر قطامة .... ايييك
زمان زمن الأنادي جاهو واحد في البيت رجل طيباااان كدة ... أتونس وأتونس .. أخد راحتو
قال ليهو يا أبو السعود أبشرك والله أنحنا تايتنا في الإنداية ما فيها اي زول معارض للفكرة الجمهورية ..
آآآآآآ آ....... آآآآآ ..... يا هم ديل ... ملح الأرض درى الناس أو لم يدروا
---
بتصرف ونسة مع الأخ الأستاذ محمد موسى محمد حسن
ود موسى من أبناء قرية الحضور بالجزيرة
عمل بالأبحاث الزراعية بالقضارف وودمدني
ود موسى منشد مجدي وقاص ممتع
حفظه الله وزوجه الجدي عبدالقادر موسى البدوي والأبناء عئشة ورضا وأحمد
----
ذكرني هذا بأخ لام أحد الأصدقاء قال ليهو كيف تشرب وتمشي تلاقي الأستاذ؟!!
قال ليهو أنا مستغرب!! هو دة واعي تقدر تلاقيهو كيف؟؟
---
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
قال لي يا صلاح انت عندك روي نبوية احكي لينا .... قلت له انا كنت في بيتنا في ودنوباوي بام درمان
شفت امراة مقبلة علي ولادة وحولها حوالي تمانية نسوة وبعد فترة وضعت مولودا جميلا مكتوب علي صدره
صلي الله عليه وسلم ..... الأستاذ عاين لي مسافة ..... قال لي: أنت ليك معانا كم سنة؟! قلت ليهو سنتين ... سكت وما علّق..
----
بتصرّف مما حكى لي الأستاذ صلاح عبدالله عمر خاطر ... صلاح وّلد بنيالا البحير ونشأ مع أجداده بأم درمان بود نوباوي
وحي العرب التي جاور بها الفنان العظيم ابراهيم عوض وتعرّف على الشعراء الطاهر ابراهيم وعبدالرحمن الريح ويعرف ويحفظ عنهما الكثير..
---
حكى لي عن هذه الرؤيا العظيمة قائلا: (بتصرّف) ... شفت الرؤيا دي قبل ما أجي وأحكيها للأستاذ ... في وكتها حكيتها لواحد شيخ صوفي
قال لي يا ولدي سنتك دي دااااارة!! (ولعلهتا هي نفس السنة التي ألتزمت فيها الفكرة الجمهورية أو بعدها بشوية)
برضو مشيت مدني حكيتها لرجل عجيب اسمه محمد ابو دقايق فقال لي انت بتحضر صاحب الوقت وبتبقي من ناسو
---
أريتو نبقى من ناسو وجلاسو ونشرب من كاسو
شربنا من كؤوس العشق صافية
يا سعدى من ذاق صافيه
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
ياهو كدي!! ياهو كدي!! في الوكت داك لما نكون مع الأستاذ ما بنكون جايبين خبر لأي زول ولا أي حاجة
تتصور مرة جا زارو الفنان ابراهيم عوض .... زوووول فينا عرف دة ابراهيم عوض مافي لغاية ما طلع برة جنب الباب
لاقاهو سليمان عمر ولا حسن ياسين ما عارف عرف انو دة الفنان ابراهيم عوض وما جا قال لينا
ياهو دة كان حالنا في حضرتو ...
---
بتصرّف مما يحكي لي د. علي أحمد ابراهيم رحمة "شيخ علي"
حدثت نفس القصة في زيارة مماثلة للفنان عبدالرحمن بلاص ولكن في زيارة ثانية له تمّ التعريف به وغنى للأستاذ محمود
---
كثير من الشخصيات العامة زارت الأستاذ محمود محمد طه في منزله وقد حكينا في خيط "سبانا" عن زيارة يتيمة للراحل
زين العابدين محمد أحمد عبدالقادر (عضو مجلس قيادة ثورة 25 مايو) الذي قال أنه زار الأستاذ محمود مرة واحدة ولم يزره ثانية
مخافة (أن يسحرني) حسب عبارته
---
في مكتب الأستاذ بعمارة ابنعوف أيضا كان أيضا يزوره الكثير من وجوه المجتمع وقتها ومنهم على سبيل المثال بروفسير عبدالله الطيب
والصادق الصديق عبدالرحمن ...
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
دخلت على الأستاذ ... رحب بي ... وقرأ الايه"ففهمناها سليمان واتبناه حكما وعلما..."
قال لي الايه دي عندك فيها شئ؟ سكته ..قال لي.." بعد الايه دي مافي زول عندو حق ولا فرصه يقول الانسان مخير...."
---
بتصرّف مما يحكي الأستاذ سليمان الوسيلة محيي الدين
سليمان من الجيلي، وهو من أحفاد الزبير باشا رحمة..
عمل بالحفريات بودمدني
له صفحة عامرة بالفيسبوك تحوي الكثير من الذكريات والصور النادرة لحركة الأخوان الجمهوريين بود مدني بخاصة
سليمان رجل نسّابة وموسوعي المعرفة وحكاء لا تمل حديثه ..
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
عمنا علي اللبني صاحب عقيدة كبيييييرة في الأستاذ... بتذكر كان يوميا بيبدأ يومو بالأستاذ وبيختمو بيهو
مرة الأستاذ قدمنا للزلط ... جاتنا طرحة فاضية .. زمن الطرحات بصلوا "ماسورة علي" ...
الأستاذ طلع ريال داير يدفعو .... عمنا علي شال الريال ختاهو في جيبو وطلّع ريال أداهو السواق
الأستاذ أتبسّم وودعنا .... كان عقيدتو عجيبة
---
بتصرّف مما يحكي الأخ سليمان الوسيلة محي الدين
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
ذكرى على اللبني وصورته هيجت اشجانى. كان عنده ضغط .... فى احدى الامسيات الاستاذ قال لى :
على اللبنى رقدوه فى مستشفى الخرطوم ومعاه بناته براهن.دايرنك تمشى عليهم
فعلا ذهبت مارضته حوالى٣يوم .... بناته كان بالمساء برجعوا البيت
ولده سراج كان فى بريطانيا بحضر فى الدكتوراة.
توفى حوالى الساعة ٢ص .اتصلت على الاستاذ بلغته بالوفاة .قال لى اتصل بادارة
المستشفى طلع الاسعاف وانقل الجثمان لى منزله فى الحارة الخامسة .فعلا نقلت الجثمان
وجدت الاستاذ والاخوان فى انتظارى .تم تجهيز الجثمان وقبرناه فى مقابر احمد شرفى
وسافرنأ مع الاستاذ وفرشنا عليه فى مدنى.نفعنا الله بجاهه ...
الله يرحمو قبل وفاتو كم مرة يقول للأستاذ الأولاد قالو دايرين يمشو بيتهم الكبير في مدني والأستاذ يقول ليهو
أصبر شوية ..... واضح أنو أستبقوهو لأمر ما ...
----
بتصرّف مما يحكي د. علي أحمد ابراهيم رحمة ..
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
عن الشيخ عبدالباقي المكاشفي "أبوعمر":
لطيفة حكاها اليوم الأخ سليمان الوسيلة محي الدين: "بتصرّف"
الاستاذ محمود..قالها عن نفسه"كنت اقوي واصلب من قاوم الاستعمار"او كما قال هذة الصلابه...انا لم ار انسانا قريب الدموع مثله...شهدت دموع الاستاذ..كثيرا..وكنت اتعجب! مرة كنا في مدني في فراش زوجة العم دفع الله الطيب أدريس عم الأستاذ جلال.. وجآء الاستاذ للعزاء...وحلس بجانب..عم دفع الله الرجل الصالح..الصائم ..القائم..كان بحكي للاسناذ عن الشيخ المكاشفي..وكان الاستاذ يسمع باهتمام...وحكي شيخ دفع الله..عن كيف الشيخ المكاشفي ما كان بجدع ما تمزق من لباس او عراقي بل كان يخيطهم بيده ويعيد لباسهم..واذا تمزقت يعيد خياطتها ويعيد لبسها..هنا نزلت دموع الاستاذ بغزارة الا ان غطاها بالشال....وقعد يقول..."زي ديل وين..زي ديل وين..هسي"وساد صمت وجو روحاني عجيب..
----
كان أستاذ عبداللطيف عمر يحكي كثيرا عن قصة الشيخ عبدالباقي المكاشفي لما حيرانو أصروا على أنو يمشي الحج ... قال (بتصرّف) خلاس!! جهزوا الزاد الخ الخ ... قال ركبوا عانين سواكن ... في الطريق يلاقوهم العّشام: يابا الشيخ!! جعنا!! يابا الشيخ عرينا!! .... أدوهم!! أدوهم!! قال قبال يصلوا سواكن كل ما عندهم كمل... قال: قبّل على حيرانو قال ليهم الفقرا!! حجكم قُبل!! أرجعوا...
----
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أنا عارضت قرار تأميم قناة السويس من سنة 1956
قريب دة الناس البتابعو الصحف بكونو قروا لصالح محمود* يرد على محمد أمين حسين
قال أنو كان في الحزب الجمهوري وأستقال منو سنة 56 لأنو الحزب عارض تأميم القناة
----
بتصرّف مما ذكر الأستاذ
---
* صالح محمود اسماعيل
كان جمهوريا وكان عضو لجنة الدستور مع الأستاذ مندوبين عن الحزب الجمهوري وتم استبداله في تلك اللجنة
بالأستاذ عبداللطيف عمر حسب الله ..
أسس صالح صحيفة لفترة قليلة ثم أصبح وزيرا للإعلام لفترة قليلة أيضا
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
آآآي!!! كانت معانا في برنامج الدكتوراة .... تحكي ظوااااالي عن الأستاذ
قالت أظنها لما جات من لندن زمان جات للأستاذ لابسة كعب عاااالي...
قالو ليها بعد داك الأستاذ علّق على الكعب العااااالي
قال: عجيبة!!! المرأة داااايما تتشابى للمعالي .....
----
بتصرّف مما حكى لي د. بدرالدين عثمان سليمان قباني ونحن في رحاب النبي الأكرم بمدينته
عن الراحلة المقيمة د. درية حامد العبيد
درية درست بالسودان وبريطانيا وعملت به وبالحجاز وأنتقلت لبارئها بالخرطوم
---
حكت لي الأخت د. سمية محمود محمد طه قالت أن درية على ما يبدو تأثرت بأركان الجمهوريين في هايد بارك
جات من لندن وأعلنت إلتزامها ... جاتنا موضة على عادة ذلك الزمان بلا توب .. الأستاذ قال أدوها توب فأديتها توبي
----
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أخونا الكريم عبد الله عثمان ،،
في هذا الخيط وجد عظيم . وحديث فاره وفواصل ضخمة .
هي ونسة من النوع الذي يردك الى ذاتك والى ذات النفس السودانية العظيمة .
هي اشارات مقدسة لعالم راقي مهذب والى تسامى ليس يحده حد .
ثم عروج الى دنيا الفضائل والمقامات الانسانية الصرفة .
ليس شرطا ان يكون مفهوما لمن لم يلقي السمع وهوشهيد .
بل هو هكذا ترقي في عالم من الانصهار الروحي الفريد .
اكثر ماأاسف عليه عدم مقابلتي للأستاذ حين كان الامر متاحا .
ولشد ماجذبني هنا التوافق الروحي الصوفي المدهش .
النفس السودانية حالة خاصة من الوجد حتى في أقصى تجليات شرورها
اما رايت نبئ السودان الأسمر جون قرنق وهو يهديء من روع محاربيه .
ثم انها حالة خاصة من الجمال الانساني لو رأيت ابتسامة الاتستاذ الوضيئة
وهو على اعتاب الموت . لذلك مثل هذا الحديث التي تتفضل به يرد الناس الى
ذواتهم الى رشدهم الى اصالتهم التي فقدوها بفعل الوعي الزائف والتنطع الذي بلا فائدة .
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عمر مصطفى مضوي)
|
الاخ عمر مضطفى مضوى
سلام
اتعون ما تكتبون؟ ام هي استعراض لمفردات لا تعطي اثراً لقارئ او متلق؟
ااصبح قرنق نبياً اسوداً؟
الا يكفينا هذا الرسو ل الكذب الذي استهل بقوله تلميذه عثمان عبدالله
وهو يقول نوسلك ضرب اسيادنا
عيشوا احلامكم وهذا حق اصيل لكل فرد
ولكن لا تلحقوا ا الامر بالعقيدة وانظر وانت تقول:
اما رايت نبئ السودان الأسمر جون قرنق وهو يهديء من روع محاربيه .
والله السودان عظيم وغير عقيم يلد الرسول الكذب والنبي الكذب
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: Ali Alkanzi)
|
الاخ الكريم علي الكنزي ،،،،
ليس هناك مخرج طال الزمن ام قصر لورطة العقل الديني من الفكرة او ما يماهيها ،،
وليس هناك مخرج لمشاكل السودان غير رؤية دكتور جون قرنق طال الزمن ام قصر
فكيف لا يكونوا انبياء ،،،
ولو كان الاستاذ حيا ورأى أذيتك ومحاولتك تلميحا وتصريحا
للتشكيك المفتوح في مايخصه لتمنى لك الهداية . ولدعى لك بالخير .
كذلك لو جالست النبي الاسمر جون قرنق لناداك باخي ولشرح لك معنى ان تكون سودانويا .
أمة السودان ام عظيمة لو اكتفت بهذين النموذجين فقط . طبعا هذا ليس من باب التطرف ولكن
اتساقا مع السمات الخاصة بالهويه السودانية . الفطرة السودانية السلمية متماهية تماما مع فكرة الخير .
لذلك اخي علي لم تجد من يناصرك او يشد على يدك في محاولتك للنيل من الاستاذ مع اني متأكد ان اكثرهم
غير جمهوريين فقط سوادنيين .
نعم نحن نعي مانقول وان لم يوافق هواك فهذه سنة الله في خلقه ليس بالضرورة ان أؤمن بفكرتك ولك نفس الحق .
ارجو ان اكون قد ابنت لك رأي بكامل الاحترام والتقدير ،،
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عمر مصطفى مضوي)
|
عمر مصطفى مضوي
إنما لأمثالكم نكتب ....
الأستاذ محمود وأنت وقرنق .... الإنسان السوداني البسيط العميق ...
دي الونسة دي محاولة لترسم خطاهم
أخي الجمهوري المعتقل الآن في سجون لإنقاذ - عبدالغني كرم الله البشير (أبو محمود)
فكّ الله أسره يحكي عن كاكوم الذي زار حجرة الأستاذ فأسرته البساطة
يحكي كاكوم لغني فيقول:
يازول لقيت غرفة تتضوع بالبخور، بسييييييييييييييييطة شديد، عنقريب مخروط اظنه من سوق(....).. وجردل صغير، وابريق زي اباريق الدويم،
في فمو زي نحاسه، وهو من الزنكي وحجارة ملساء للتيم، دي الأوضة كلها، ودولاب خشبي، تاني ما في حاجة، والله شعرت برجفة من دخول الأوضة،
وقعدت برااااي اشوف الاستاذ عيان بيان، وبيكيت شدييييييييد، بكيت من صدق الاستاذ، من بساطته، ولمن طلعت من الشارع شفت الناس الماشة كلها كضابة،
كضااااابة، الزول ده عاش صادق، صدق، ما عندو مثيل، شعرت الناس دي كلها بتكضب، أي زول شفت شفت الكضب فيهو وفيني،
والله إلا المساكين ناس الله، الحايمة بلا حول وقوة..وبكيت شديد في الشارع... بالله ياهو ده الاستاذ، فقيييييييييييييييييييييييييييييييييييير كده، بالله ياهو ده الاستاذ، ده الاستاذ،..
شكرا يا مصطفى يا مضوي
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عمر مصطفى مضوي)
|
الاخ عمر مطصفى مضوي
وَإِذَا حُيِّيتُم بِتَحِيَّةٍ فَحَيُّوا۟ بِأَحْسَنَ مِنْهَآ أَوْ رُدُّوهَآ ۗ إِنَّ ٱللَّـهَ كَانَ عَلَىٰ كُلِّ شَىْءٍ حَسِيبًا ﴿سورة النساء آية ٨٦﴾
لهذا ارد عليك أهلاً بالاخ الاكرم مصطفى
واعود لردكم علي وانت تقول:
Quote: ليس هناك مخرج لمشاكل السودان غير رؤية دكتور جون قرنق طال الزمن ام قصر
فكيف لا يكونوا انبياء ، |
يعني لو عملنا برؤيتك فليس للرسالة الثانية نصيب كمخرج لمشاكل السودان، ولا ازيد.
اما قولك:
Quote: ولو كان الاستاذ حيا ورأى أذيتك ومحاولتك تلميحا وتصريحا
للتشكيك المفتوح في مايخصه لتمنى لك الهداية . ولدعى لك بالخير |
الاستاذ هو الذي جذب الاذى لنفسه وكفى بدعوته لرسالة الثانية الكذب من اذى
وحقيقة أنا لا اجد اذاً اصاب الاستاذ مني.
أما دعاءه لي فهذا حديث افتراضي على انسان هو عند ربه، فالاستاذ لم يدع لي بالهداية لذا لا ابني ردي على قول افتراضي.
واراك تقول :
Quote: لذلك اخي علي لم تجد من يناصرك او يشد على يدك في محاولتك للنيل من الاستاذ مع اني متأكد ان اكثرهم
غير جمهوريين فقط سوادنيين . |
وهل ناصر الناس الاستاذ،؟
الم يذهب لربه حاسراً وحسيراً بأنه عجز أن يبني انساناً واحد من امة المسلمين التي بشر بها في رسالته الثانية
وكان هو الواحد الاحد في الرسالة الثانية
اما أنا فاعلم ان الاعمال بالنيات فطرحي لم يكن بحثاً عن نصير
والرسالة الثانية لمن يدركها تهزم بنائها ببنائها
وهذا ما ستجده مني إن امد الله في ايامي
واختم بقولك واجعله من قولي بعد استئذانك ليصبح قولي بعدك:
| Quote: نعم نحن نعي مانقول وان لم يوافق هواك فهذه سنة الله في خلقه ليس بالضرورة ان أؤمن بفكرتك ولك نفس الحق . |
لك ودي
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: Ali Alkanzi)
|
كلنا دعاء في هذه الأيام العصية التي يمر بها السودان وجنوب السودان
هذا البلد العظيم
يا الله
---
وقد ذكر الاخ النور* ان الاستاذ محمود، قام بالتخطيط الهندسي للمدرسة، التي اسسها شيخ لطفي بالمنطقة عام 1945م،
وهي الآن مدرسة عريـقـة وعتيقـة خصصت لإستيعاب ابناء المديريات الجنوبية، منذ حوالي خمسة عشر عاماً،
ولعل في ذلك سر من الاسرار الروحية، لعلاقة المنطقة ومؤسس المدرسة، بالفكرة وعملها، من اجل الوحدة، بين الشمال والجنوب في السودان والعالم
---
* النور حسن سيداحمد (أبية) من قدامى الجمهوريين وأعيان ديم لطفي (ديم القريداب)
يعمل معلما بالمدارس الإبتدائية ومتزوج من الأخت الأستاذ إحلام المبارك حسن
---
يا الله لي سودانك
يا الله لي جنوبك
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أرض المحنةقلب الجزيرة
سلام ومحبة للجميع
اليوم 26 فبراير 2018 يؤرخ مرور 16عام على انتقال الأستاذ سعيد الطيب شايب..
اللهم أنفعنا بذكراه العطرة.. نتبرك وطالبين المدد..
----
كتب الأستاذ أحمد عبدالله الطاهر*
حكى اﻷستاذ سعيد مرة عن ايام دراستهم اﻻولية قائلا:
"كنا تلاميذ صغار لعله في سن الحادية عشر او الثانية عشر، ندرس بمدرسة النهر اﻻولية.. و كنا في طريقنا إلي المدرسة صباحا و عند عودتنا نهارا نمر بدكان غسال-
رجل لعله من قبائل جنوب السودان او جبال النوبة- و كنا نراه يعمل في الغسيل و الكي يوميا..
استمر الوضع هكذا ،ثم انتبهت يوما ما علي ان الدكان مغلق، و قد ظل مغلقا فيما تلى من يوم او يومين.. فقلت لزملائي ﻻبد ان مكروها الم بعمنا الغسال..
و لم نكن نعلم اسمه او اسرته و لكننا نعلم انه يسكن في نغس المنزل الذي به دكان الغسيل.. فطلبت من الزمﻻء ان نذهب و نسأل عن الرجل و عن أمر الدكان و لماذا هو مغلق..
طرقنا الباب، و فتحت لنا سيده كان واضحا انها ربة المنزل.. فعرفتها بنفسي و زمﻻئي، و اخبرتها باننا لاحظنا ان الدكان مغلق فاحببنا الاطمئنان علي صاحبه..
فقالت السيدة ان الرجل مريض منذ يومين.. فقلت لها و من يدير عمل الغسيل و المصاريف؟ فقالت ﻻ احد، و مﻻبس الزبائن اكوام مكدسة
و انا ﻻ استطيع مع عمل البيت و ممارضة زوجي ان اغسل او اكوي..
فرددت عليها: نحن سنتولى امر الغسيل و كي مﻻبس الزبائن إلي أن يبلغ عمنا الصحة و يستطيع مزاولة عمله..
فقالت و لكنكم تلاميذ و لديكم مدرسة؟
فرددت عليها قائلا: سنعمل بالدكان يوميا بعد الدوام المدرسي"..
و قد كان... فقد ظل اﻻستاذ سعيد و رفاقه يعملون بالغسيل و الكي و يوردون العائد لزوجة الغسال لمدة ثمانية ايام،
حتي استعاد الرجل عافيته و صار قادرا علي مزاولة عمله..
---
* الأستاذ أحمد عبدالله الطاهر .... أصلا من المحمية ونشأ بود مدني
درس الأقصتد بجامعة الجزيرة والماجستير من جامعة أوهايو بأمريكا ويعمل حاليا بالمنظمات غير الحكومية بالسودان
أحمد متزوج من الأستاذة نوال (هنادي) الأمين عبدالغفار أحمد من رفاعة
أحمد منشد معتّق وقاص مجيد
أرض المحنةقلب الجزيرة
(عدل بواسطة عبدالله عثمان on 02-26-2018, 06:47 AM)
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أخونا الجميل عبد الله عثمان .
كنت اتوقف كثيرا عند مقولة الاستاذ لقضاة محاكم العدالة الناجزة
انهم غير مؤهلين لمحاكمته وكان هذه الكلمات تستوقفني كثيرا
ماذا كان يعني بها ؟
وقتها كنت مازلت طالبا بالثانوي وكنت ايضا غير مؤهل لقراءة افكار
الاستاذ . غير اني وتدرجا في معارجها من غير انتماء والقراءة مرة بعد مرة
وحتى ونستك هذه . يتأكد لي يوما بعد يوم أن المرء يحتاج الى استعداد خاص وتوفبق
من رب العباد . وكرم منه ونفحة من نفحاته . حتى يتحلى بالطيب واللطف الذي يجعله
مستعدا ان يقرأ ويستوعب . ولا اذيع لك سرا أنني حسدت الجمهوريين في فهمهم وانتماءهم
واستيبعابهم . اذا ان قناعاتي هي انه توفيق من الله يمن به على عباده .
لذلك مثل اللطائف التي تتحفنا بها اعتقد انها عصية على بعضهم ولكن كما اسلفت هي
مما يؤنس وحشة الروح وترد به الانفس الى ذواتها . وترجع الى ذات الوطن الذي يشبهها .
في زمن ومكان ما .
اننا نفهم شيئا فشئيا ماذا كان يعني الاستاذ بل ان طبيعة الاشياء الان تقود الوعي الاسلامي الرسمي
والشعبي لذات الافكار . فتعود غريبة كما بدأت .
العقل السلفي في جميع مستوياته هو نكبة هذه الامة .
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
ولقد يسرني، السرور كله، أن هذا الخيط لا يزال يصادف هوى من أحباب كثر يلتقونني، ويهاتفونني، ويكاتبونني وذلك مما يطامن، هونا ما، من غلواء ما أكابد من الوجل في أمر الكتابة في شأن عظيم كهذا، بل هو الشأن العظيم، فالسير فيه، لا نفتأ نقول، سير في الوادي المقدس، تخلع فيه النعلان ويواصل فيه بالتلبية، ذلك لأنه أمر قد قرّر فيه صاحبه أنه أمر الدين الحق... فلا غرو أن يحتوش الوجل كل أقطار نفسي وأنا اسير في شعابه، تعزيني في ذلك كلماتكم الطيبة وتشجعيكم وأنتظاركم لجديد تنتظره معكم كل الدنيا وقد ناء عليها الحزن بكلكل ... سرني أن قد وصف لي أستاذي النور حمد هذا الخيط بقوله (هذا مغتسل بارد وشراب) والصوفية يقولون "السر شراب" لذلك تاقت اليه أنفسهم وطلبوه "سرا وجهرة". أعجبني وصف أستاذي النور هذا فأتخذته عنوانا لهذا الخيط في نهاية هذا العام وبداية عام جديد نأمل أن نرى فيه هذا الإنسانية المتعبة وقد أنفتحت امامها باحات الأمن والسلام وأطمأنت فيها كل عين وكل قلب وما ذلك على الله بعزيز.. ويظل موعود السماء بأن هؤلاء (الاخوان المسلمين قلعناهم من جذورهم وجدعناهم برة الارض الطيبة دي)*
دعواتكم لي بظهر الغيب ايها الناس
===
(قول للسيد الحسن نحنا الاخوان المسلمين قلعناهم من جذورهم وجدعناهم برة الارض الطيبة دي)
وصية الاستاذ للدكتور عبدالله عوض عبدالله وقد ازمع زيارة للسيد الحسن بكسلا اثر رؤيا رآها وحكاها للاستاذ فاقترح عليه الاستاذ زيارة السيد الحسن
الأستاذ محمود محمد طه: هذا مغتسل بارد وشراب
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
من اللطائف
إِذْ يَحْكُمَانِ فِي الْحَرْثِ إِذْ نَفَشَتْ فِيهِ غَنَمُ الْقَوْمِ
قال الحرث العقل وغنم القوم الخواطر تأكل العقل
كان الأستاذ يردد
وليس بفكر أو بذكر تناله سوى بالصفا والمحو عمّا يغاير
----
وَالْعَمَلُ الصَّالِحُ يَرْفَعُهُ
قال أي يرفعه عن عينك لا ترى لنفسك يدا فيه
من وصايا الأستاذ (بتصرف)
حاجتين أنسوهم: أساءة الناس ليكم وأحسانكم للناس
حاجتين أتذكروهم: الله و الموت
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
شفت الأستاذ لما يجوهو طلاب الحاجات بلف القروش في ورقة ويقدمهن للباب يديها ليهم
---
بتصرّف مما يتذكر خالد بابكر حمزة*
خالد نشأ بودمدني ودرس بالقاهرة فرع الخرطوم
كان أصغر اللذين حكم عليهم بالأعدام في يناير 1985 مع الأستاذ ورفاقه الأساتذة عبداللطيف، بعشر وتاج الدين
كان وقته في الـ 22 من عمره
خالد من اللذين حظوا بخدمة زوار منزل الأستاذ
متزوج من الأستاذة نجوى الطيب علي محيسي
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
قال ليهو يا فَضّل كان تقول ليهو بنتعارف من ألست*
---
مما سمعته لعله من الأستاذ سعيد الطيب شايب (بتصرّف) يحكي عن أحدهم سأل العم محمد الفضل محمد الصديق
من بتين بتعرف الأستاذ محمود.... لعل رد العم فضل كان من الأربعينات أو شيء زي كدة فقال له الأستاذ ما ورد
---
* ألست بربكم
---
ذكرت هذا بسبيل من مطالعتي لحوار لطيف بين الأخوان أستغرقني في علائق تربطهم قبل أن يلتقوا في سوح الأستاذ
كتب د. النور محمد حمد (بتصرف "غليل"):
وما دام الكلام جاب الكلام يا عاصم حامد، فقد حدث أن درست على يدي الأستاذ محمود عثمان الشيخ، في مدرسة حلة حمد الإبتدائية. والأستاذ محمود عثمان من قرية الدناقلة.
وقد حدث أن أتى بإبن أخته، يوسف حسن عثمان، ليدرس معنا في مدرسة حلة حمد. وكان أن سكن معنا بالمنزل، بناء على طلب من والدي. وقد اصبح يوسف هذا وكأنه اخ شقيق لي، ولأخي مضوي.
أصبح يوسف فيما بعد، صائغا، ثم مالكا لدكان مرموق للذهب في أم درمان. وأذكر أن دكانه كان في الناصية التي يتقاطع فيها شارع الدكاترة، بشارع السوق الرئيسي في أم درمان. وأعتقد أن هذه الدكاكين تابعة لأوقاف مسجد أم ردمان الكبير.
الشاهد أن مثل هذه الأخبار، وذكر الناس، وذكر الأماكن، تثير الحنين، وتثير الشوق، وتقدم من ثم نوعا من زاد روحي، ومن عزاء، وسلوى.
قال المتنبي في قصيدته المعروفة (مالنا كلنا جوىً يارسولُ):
فسألنا، وقد نزلنا بنجدٍ، أطويلٌ مقامنا، أم يطولُ؟
وكثيرٌ من السؤال اشتياقٌ، وكثيرٌ من رده تعليلُ
كلما رحبت بنا الروض قلنا: حلبٌ قصدنا، وأنت السبيلُ
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
يمكنك أن تقول هؤلاء آبآئي فجئني بمثلهم إذا جمعتنا يا جرير المجامع
---
بتصرّف مما قال الأستاذ محمود لإبنه حمد النيل عبدالله دفع الله العركي "الكشيف" عندما أتى بشجرة نسبه مكتوبة
---
يستطر د. النور محمد حمد في ذكر الآباء الميامين فيكتب "بتصرف":
الشيخ حمد الترابي، الملقب بـ (حمد النحلان) هوم شقيق الشيخ محمد، الملقب (بـ(ننة). وهما ابناء عبد الرحمن إبن عبد الله. وعبدالله هذا، كان أول القادمين، إلى الجزيرة، من مناطق البديرية، في الشمال. وقد تزوج عبد الرحمن ولد عبد الله، غاية بنت الشيخ سلامة. وهي شقيقة أم حسون ينت الشيخ سلامة، والدة الشيخ دفع الله العركي. فالشيخ حمد الترابي، والشيخ ننة، أبناء خالة للشيخ دفع الله العركي. وقد كان ننة من (رجال الضحوة) الذين تتلمذوا على الشيخ دفع الله. وبعد أن تجلى الشيخ دفع الله، تجليه المعروف على (رجال الضحوة)، ساح ننة سنينا، حتى وصل الحبشة، وحين عاد استقر بالقرب من الكاملين. وعاش معه في تلك البقعة، أخوه حمد، الذي كان فقيها بادئ أمره، و يُدَرِّس مختصر خليل. غير أن كرامات من شقيقه الأكبر، ننة، جعلته يهجر تدريس الفقه، ويأتي إلى طريق القوم.
وقد حكى لي الأستاذ قصة ننة وحمد هذه، في أول يوم جئت فيه إليه، في عام 1971. وما أدهشني، يومها، أن الأستاذ قد حكاها لي، بنفس الصورة التي كنت أسمعها بها من والدي، منذ الطفولة. وقد ذكرت علاقة الدم هذه، بالعركيين، في كلمات بعثت بهن، في وقت سابق، إلى الأخ حمد النيل العركي.
كان الشيخ دفع الله، كثير الزيارة للشيخ إدريس ود الأرباب في العيلفون. وحين يعود من الزيارة، كان ينزل على أبني خالته، ننة وحمد، في بلدتهم، قرب الكاملين. وهي ما يسمى الآن بـ (حليلة الشيخ موسى). وموسى هذا ولد ننة، وعلى قبره قبة ظاهرة وسط القرية التي تقع شمال شارع الظلط، بين الكاملين، والكسمبر. أما ننة، فيروى أنه رفض القبة. إذ أنها بُنيت عليه مرارا، ولكنها كانت تتهدم عقب كل مرة. وفي النهاية تركوه، واسموه (ننة المشمش).
عندما يغادر الشيخ دفع الله العركي، ابني خالته، ننة وحمد، عائدا إلى أبي حراز، كانا يمسكان بحبل دابته، ويسيران أمامه حفاة، حتى يوصلانه، أبو عشر، التي تبعد بضعا وعشرين كيلومترا، ثم يعودان راجعين.
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
ياهو كدي .... خالي غلام الله* دة كان عندو علاقة كبيرة بالأستاذ محمود
مافي تفاصيل كتيرة بدت كيف لكن سنة 66 وهو ضابط أداري في الدندر الأستاذ نزل معاهو
تاني وهو مدير تنفيذي في القضارف برضو الأستاذ نزل معاهو ...
---
بتصرف مما يحكي د. عاصم حامد عبدون
عاصم أصلا من قرية الضناقلة شرق مدني ونشأ بينها وبين سنجة
درس الآداب بجامعة الخرطوم
عمل بالسودان مع المعونة الأمريكية وعدد من شركات الكورية والمنظمات غير الحكومية ويعمل مستشارا في هذا المجال الآن
---
غلام الله محمد الشيخ
درس بحنتوب وجامعة الخرطوم وكان ضابطا اداريا كما ورد
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
اليوم الفاتح من مارس 2018 كتب الأستاذ أحمد محمد عمر (بتصرف) في الرد على أحدهم يهاجم الأستاذ:
رضي الله سيدنا الشهيد محمود محمد طه فقد ظهر لحمك مراً يسد حلق آكله
ستظل سيرتك ناصعة ليس فيها أكل مال سحت ولا أذية مخلوق.......
فليهنأ في عليائه الشيخ الذي فضل حبل المشنقة على تزلف السلاطين على حساب الدين
----
سمعت أن قد نقُل للأستاذ أن الحردلو* (وكان وقتها في كنشاسا) قد قال عنه قصيدة ...
قال (بتصرّف) تنفعوا!! تنفعوا!! أو كما قال
----
سيداحمد الحردلو شامي من مواليد ناوا ... عمل دبلوماسيا ... توفى عليه الرحمة 2012
---
مما قال
محمود جنا طه
ملك وملكه علم
وفقير وفقره علم
ويمين .. يمين الله
لو عندى ايد لاحقه
اديه تاج الرجال
وابنيلو فى الخرتوم
فوق البحر تمثال
لكين خسارتى انا ..
الما عندى ايها حال
---
تنفعو!! تنفعو!!
---
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
قال أنو الأستاذ مشى الإسبتالية يعود مريضا .... الغفير سمح ليهم بالدخول لكن بسرعة غيّر رأيو
كانت لحظتها قدم الأستاذ قد تخطت العتبة .... بسرعة سحبها ورجع ....
----
بتصرّف مما يحكي الأستاذ أحمد محمد أحمد البشير
ود البشير أصلا من تنقاسي وعمل معلما بالجزيرة ثم ألتحق بكلية الفنون وصار نحاتا ومصمم ديكور
كان من الكوادر الخطابية في أركان الجمهوريين
هو النحات الذي قام بنحت تمثال للأستاذ محمود وتم تحطيمه في عهد اللوثة (الوزير عبدالله محمد أحمد والعقيد يوسف عبدالفتاح)!!
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
لمحمد عثمان الجعلي في عليائه
أنت وعوض الكريم فضيل أولاد كار
ثالثكما، معشر الشعراء، سيداحمد الحردلو
دة فضل كريييييييييييييييم فأهنئا به
----
في صالون الجمهوريين، غداة نعينا لعوض الكريم فضيل، كتب الأستاذ عيسى ابراهيم محمد صالح (تمساح) بتصرف
قبل الإرسال: لما قرأت ما كتب "عيساي" طربت لكون ذكرى الحاردلو قد وردت فيما كتب فهذا دليل عندي على القبول
كلبك!!!!
---
حار العزاء في الراحل المقيم الأديب الشاعر العزيز عوض فضيل صاحب الحضور الطاغي والذهن الوقاد، تمتعت بلقائه وصحبته مع خلف الله عبود في البركل التحتاني وآنسنا وأمتعنا، كان في خلوة من هموم الكون والوطن وهيهات .. وهو مسكون بمحبة الأستاذ والجمهوريين والوطن الغالي، والغلابة في قصيدته الرائعة الحزينة يجسد مأساة المسحوقين ممثلة في "زول بي شنب وخدودو أفقي مفصَّدة"، يحكي عنه وعن شقيقته أم الحسن "الشقيانة" بعد أن باع تورو الويحيد ومشيحيد وانتوى الذهاب إلى الخرطوم، ليبحث عن عمل فيها، والتي قال فيها سيدأحمد الحردلو: "ملعون أبوكي بلد"!!، وبعد أمشي وتعال وأمشي وتعال، يقول عوض فضيل (يرحمه الله رحمة واسعة):
أخدوهو في البوليس نفر،
وبعد أن قبل عسكرياً في البوليس يحلم صاحبنا بأخته "أم الحسن" فيستحضرها في خياله ويقول لها:
والله يا أم الحسن
بعد الشقا الشُفتيهو
لا تسقي البهم
لا تحشي قش
للدلكة والدخان
تقومي وتقعدي
ويجسد المأساة والحلم الذي اغتيل في بكائية لا يمكن تجاوزها، إذ هو وهو سارح في حلمه مع شقيقته:
لاقاهو بص شمبات
..............
والدم كتب فوق التراب
زول بي شنب
وخدودو أفقي مفصدة
وفي الجيب خمستاشر قرش
وحجاب عشان عين العدى
ويجسد المأساة أكثر وضآلة حالة السوداني المعدم تجسدها بحق إذاعة أمدرمان حين تعلن عن الجثة يقول الشاعر الحبيب فضيل:
والرادي بعد الكافينول
يعلن عن الجتة ويقول:
زول بي شنب
وخدودو أفقي مفصدة
وفي الجيب خمستاشر قرش
وحجاب عشان عين العِدى
القصيدة محفورة في ذاكرتي قبل أن أتعرف بعوض فضيل ونقلت لي في بورتسودان وحين التقينا كانت بيننا رسول تعريف ومحبة، لعلها كاملة وسط أوراقي التي لا حصر لها ولا عد سأبحث عنها وأوافيكم بها فهي ثرية في كل شيء مأساة وكلمات وأخيلة مجنحة، لك الله أيها المسافر الحاضر فمثلك لا يقبر وانما يحيا بنا وفينا..
-----
الأستاذ عيسى ابراهيم محمد صالح - كرجويل -
أصلا من منطقة كوري ريفي مروي ونشأ ببورتسودان
درس في دار العلوم بالقاهرة وعمل بالثقافة والإعلام ثم ضابطا للغة العربية بالصحف
----
في نعي الأستاذ عوض الكريم فضيل كتب تلميذه الجمهوري محمد محمد الأمين عبدالرازق
من أميز معلمي اللغة الإنجليزية..
حصته كانت أحب حصة إلى نفوسنا في المرحلة الثانوية، فهي "كوكتيل" من المعلومات في قالب فني ممتع..
اللهم توله مع النبيين والصديقين والشهداء، والهم أهله وذويه الصبر والرضا..
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
كنت واقف مع اللستاذ جنب الباب... اخونا الناحي كان بيكنس في الفيحة سااااكت
الاستاذ عاين ليهو كدة وقال في اولياء كتار كبار يتخفو في مثل الحاجات دي ... عندكم في النهود الزبال معروف يزبّل للناس بيوتهم ساي لله ما بشيل من قروش
—-
بتصرفزمما يحكي د. بدرالدين عثمان سليمان قباني
الناجي محمد أحمد رمضان من أحفاذ الشيخ ود هاشم
درس بعطبرة ومعهد المواصلات السلكية
عمل بالسكة الخديد وجامعة الجزيرة والبحرين
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: نصر الدين عثمان)
|
| Quote: فعبد الله لا حاجب له!؟ |
رفعك الله مكانا عليا أبا نفيسة، في زمرة العالين الذين لا يدرون أخلق آدم أم لا
----
مرة جا معانا عدد من طلبة جامعة الخرطوم ليزوروا الأستاذ لأول مرة
بسمعوا بالأستاذ!! الأستاذ!!!
لمن جوا ما فرزوهو هو ذاتو منو فيهم!!! كان حايم وسط أولادو وبناتو في الشارع يسأل دي من رضاعة طفلها
و دة من دراستو و داك أبوك صحتو كيف
أظنو بعضهم بدأ يتسآءل وين الأستاذ؟!
دالي* قال ليهم(بتصرّف) ياهو داك عاينو ليهو رئيس حزب من الأربعينات... حايم في الشارع لا حرس لا بروتوكولات .. لا!! لا!!! لا!!!!
---
المقصود د. أحمد المصطفى دالي وهو فرط آل دالي على الحوض ومنهم الأمين وعزالدين وصديق دالي
---
كتبت اليوم لقروب أخوان جمهوريين
أول عهدي بالأستاذ جئت يوما وقوم يتغدون ... أولاد البيت المعروفين بالخدمة مافي ... بعدما فرغ الضيوف من غدائهم الأستاذ دنقر شال الصينية
ليدخلها للداخل.... تسمرت ما عرفت أتصرف كيف، وأنا حديث عهد بالدار، أراه يدخل بها وثوبه يكاد يقع عن كتفه ولا يقع
آآآآآآآآآآآ
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
حكى لي الأخ بكري الحاج بطريقتو اللطيفة ديك (بتصرّف) حكى عن فقيه جا منزعج للاستاذ قال ليهو انو في كلام ح يعملو قناة رقص وموسيقي في بلاد برة والناس ممكن يلتقطوها في كل محل وانو ده ح يكون تخريب لاولادنا الخ
حسب كلام بكري قال الاستاذ قال ليهو ده تيار ماشي البقاومو بجرفو او الما بمشي مع تيار الحياة بنقرض عبارات في المعني ده
بكري قال اتخيلت ليك مولانا بالليل قافل اوضتو عليهو يشوف في التلفزيون ويرقص وكان يحاكي حركات رقصه بصورة لطيفة
---
البرقص ما بغطي دقنو
----
أعلنت سلطات الترفيه في الحجاز عن حفل للفنان تامر حسني في جدة يوم 30 مارس وقد نفدت التذاكر بالكامل في غضون سويعات رغم أنها غالية جدا
اللطيف أن التذاكر مكتوب عليها تحذير بعدم الرقص أو التمايل
راجت موجة من الفكاهة حيال هذا الأمر في الأسافير منها أن صلاة العشاء جماعة ستكون عقب الحفل مباشرة
😊
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
راجت صور في الأسافير لزيجات مترفة لأبناء بعض أثرياء البلد
كتب الأستاذ محمود محمد طه لعله في أربعينات القرن الماضي كتب:
إن كان هناك يوم، ما أحب أن أرى فجره، فهو اليوم الذى يبدد فيه المترفون من هذا الشعب فضل
أموالهم فى مواخير الفساد، بينما يجتر أخوانهم، فى الوطن، وفى الإسلام، أشجان المحروم المحروب.."
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
مرة أمينة دي مشت الشيخ الطيب لإجازة .... الأستاذ رأى إني أمشي وفد
كان عندنا غنم سقت الغنم دي جبتها لبيت الأستاذ ربطتها في الزقاق الورا داك ...
لما أمينة رجعت الأستاذ قال غنم أمينة يرجعن ليها ...
أمكم بت الشول دي قالت لي والله يا عبداللطيف حلاتة لبنا شربناهو من غنمكم ديل أصلو ما حصل
====
أضافت صفية مختار: لما الغنم ديل ساقوهن ناس البيت كلهم طلعوا ودعوهم في الشارع
----
بتصرّف مما حكى لي في دبي الأستاذ عبداللطيف عمر حسب الله
الأستاذة أمينة جعفر (من أحفاد الشيخ الطيب) وزوج الأستاذ عبداللطيف
صفية مختار محمد طه وأعتقد أن قد ورد ذكرها
حكت لي روايتها أبنتها رباب عبدالله التوم في دبي أيضا
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
محمد علي حمد* حكى لي قال هو حضّر محاضرة "اللمجتمع السليم" بالجيلي سنة 1967
قال كانوا مع الأستاذ ذا النون جبارة الطيب في الشيخ الطيب "غرب النيل" وقطعوا مع الأستاذ
بالمركب لشرق النيل للجيلي ....
---
بتصرّف مما يحكي الأستاذ سليمان الوسيلة محيي الدين
* محمد علي حمد "ود الجزيرة" - ولعله من جزيرة الفيل - من قدامى الأخوان الجمهوريين
عمل بالأرصاد الجوية حتى تقاعد وله قصص وطرائف لا تقع تحت حصر
حكى لي الأخ محمد موسى محمد حسن "ود موسى" أن الأخ ود الجزيرة كان في شبابه، وكعادة شباب ذلك الزمن -
كان فتوة ... قال أنه كان يأتي لمطعم فول مشهور لأحدهم وأسمه "كشك" وكنوع من الفتونة لا يدفع
قال أنه لما أصبح جمهوريا ندم على ذلك وجآء يوما للمطعم مع الأستاذ سعيد الطيب شايب وقال لكشك أنه ندم على فعلته
ويريد أن يدفع كل ما تقدّم قال أن كشك بفرح قال له ما دام أنت باريت ناس سعيد ديل أنا عاااااافي ليك حقى لله والرسول..
---
* أحمد علي حمد
في المجتمع الجمهوري أيضا أخ آخر بأسم أحمد علي حمد - وقد رحل للرحاب السنية نهاية التسعينات بالقاهرة وله بقعة تزار بودمدني -
دائما ما يحصل خلط بين الإسمين ...
أحمد علي حمد هذا من أبناء المزاد ود مدني وكان ممن شاركوا في زيارة أبو حراز التاريخية مع الأستاذ محمود
كان وقتها من صغار الجمهوريين سنا ممن شاركوا في تلك الزيارة المباركة
عمل بالحفريات إلى إن أنتقل في ريعان شبابه للرحاب العلية
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
سنة 72 جانا سيل فظيع في الجيلي ... جيت من مدني ماشي على الجيلي غشيت الأستاذ
الأستاذ قال لي في الخمسينات كان جا سيل كسح الجيلي دي... الحكومة أوفدتوا مع مهندس أسمو أبوجبل ومهندس ثالث
الإتنين ديل أقترحوا عمل جسور - مصدات - من حجارة الجيل والأستاذ محمود قال ليهم السيل عادة بكون جارف والجيلي دي
حفرة .. قال هو أقترح ترحيل الناس لجوار المحطة حينها وهي أرض مرتفعة نسبيا لكن الأهالي أعترضوا وتمسكو بأرضهم
قال لي أنو هو قال ليهم السيل دة ما بخليكم بجيكم تاني ..
أنا لما مشيت الجيلي لقيت الناس الكبار البتذكروا بتذكروا في كلام الأستاذ قالقالو ليهم زمان ..
----
بتصرّف مما يحكي الأستاذ سليمان الوسيلة محيي الدين
| |
|
|
|
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أنتقل عن عالمنا أمس السبت 18 مارس 2018 الى الرحاب السنية الأستاذ إبراهيم ذا النون جبارة الطيب
إبراهيم زوج الأخت الجمهورية منال العطا سليمان وقيع الله ولهما رحاب، محمود، أحمد، وأخلاص همد
----
يحكي الأخ سليمان الوسيلة محيي الدين - بتصرّف -
سنة 1963 جيت لقيت ابراهيم دة قدامي بي سنة في المدرسة كان طالبا هادئا ومميزا ... ملابسو نضيييفة
ولعاب في الكورة يجيب أقوان المدرسة كلها... كنت بسأل دة منو!! دة منو!! يقولو لي دة جمهوري
أنا وقتها ولا بعرف الجمهوريين ديل شنو ولا منو لكن الزول دة كان عاجبني شديد...
----
ابراهيم وسليمان كلاهما منطقة الجيلي والشيخ الطيب وبينهما كتير من الأواصر
---
يواصل سليمان بتصرّف
عندنا في منطقتنا درويش غريب جدا إسمه غريب الله - إتولد عند الشيخ غريب الله أبو صالح وشال إسمو -
ناس المنطقة بعتقدوا في صلاحو وكتيرين بقولو إنو من أهل الخطوة وحتى في علمانيين يحكوا معاهو تجارب في الحتة دي
ابراهيم ذا النون حكى لي قال لي هو لا بعرف غريب الله دة لا غريب الله دة بعرفوا لكم مما أستغرب ليهو قال إنو يوم هو مشى
عزاء للجيلي لعزاء ... قال كنت قاعد وسط ناس بتناقشوا عن الإسلام وأنا كنت بستمع ساكت ما شاركت في النقاش حتى
قال فجأة غريب الله المجذوب دة قال للجماعة ديل غايتو إسلامكم دة ما بعرفوا على أنا وإبراهيم دة كفااااار!!!
قال لي هسع أنا مستغرب عرف اسمي كيف!!
-----
اللهم أنفعنا بجاه ابراهيم ذا النون جبارة الطيب وبجاه أمه الشيخة بخيتة بنت الشيخ الصديق حفيدة الشيخ ةالطيب ود البشير
| |
|
|
|
|
|
|
| |
عبدالله عثمان
Yasir Elsharif
Ali Alkanzi
عمر مصطفى مضوي
نصر الدين عثمان
فيس بوك
تويتر
انستقرام
يوتيوب
بنتيريست