زرت السفارة السودانية بالرياض اليوم الخميس.. لأجل إجراء قنصلي.. وقد تفاجأت بعدد من الإجراءات والقرارات المُستحدثة بالسفارة.. وددت نقلها هنا حتى يتمكن القارئ الكريم بالإنتباه لها، خصوصاً وأن هذه الصفحة بها أصدقاء كُثُر من مغتربي المملكة... أول حاجة لاحظت ليها الموقف القدام باب السفارة أصبح بمبلغ 12 ريال.. سألت عنها أخبروني بأنها تتبع لهيئة السياحة.. من هنا أُناشد القائمين على أمر هذه الدار السودانية.. مراعاة أن هذا المبلغ ليس بسيطاً مقارنةً بالمواقف العامة في وسط البلد.. فليخاطبوا الهيئة لتبسيطه أو يتبنوا جزءاً منه كخدمة لزوار السفارة... ** بس في نقطة مهمة كمان يجب ذكرها.. بسبب الموقف دا يمكنك أن تدخل بسيارتك لاحدي باب السفارة.. وطبعاً زي ما عارفين قبل فترة كدي كان مانعين الدخول منعاً باتاً.. إما أن تدخل بالبص أو راجلاً.. فجزاهم الله خير على هذه الخدمة... مظهر السفارة أصبح جميل جداً أُستحدثت عدد من الصالات المريحة تُوجد بها الخدمات المكتبية (من طباعة وتصوير) مجاااااااااااااناً... طبعت ورقتي (الإجراء) بأسرع ما يُمكن بواسطة شاب أنيق يلبس البدلة الكاملة مع ربطة العنق.. وبعد المراجعة.. قلت ليهُو أها من هنا وين يا ابن العم؟؟؟ قال لي من هنا للقنصل مباشرةً.. وطوالي عليك يا القنصل.. لقيت عدد من المراجعين بعضهم متضجر شوية كالعادة.. واحدين يسبوا في بقايا الكيزان وبعضهم يلعن في حمدوك وحكومتو الهوان!!! القنصل وين يا شباب.. قالولي جايي.. استقبلني أحدهم بكل لطافة من المكتب.. مديتلُو ورقتي.. وجيت دخلت في ركن النقاش دا... وطوالي دخلت شمال.. قلت ليهم: إنتُو أصلُو لاب يعجبكم العجب ولا الصيام في رجب... عليكم الله شوفو جنس الخدمات والرُقي دا.. سفارة بقت تفتح النفس وريحتها دي ذاتُو حلوي.. الناس كلهم يحجزوهم عند البوابات برة يجو داخلين بي كرعيهم.. إلا إنتُو تجو بي عرباتكم لاحدي باب سفارتكم!!! وماشاء الله عيني باردي سفارةً حاسدي ما تعاين لينا.. كل الخدمات بقت مجان.. وهسع ورقتي دي زمان كان إلا تدفع ليها 110 ريال حتى يختموها ليك.. إنتُو باختصار كدي تحبو النِقَّة وفَقُرْ وقفا إيد!!! واحد كدي قال لي حيلك حيلك يا ابن العم.. ورقة شنو المجان.. قلت ليهُو توثيق.. اللي هسع دخلتها لي سكرتير القنصل دي... قال لي ألحق ورقتك جيبها يا (عاطل) والحق الخزنة قبل تقفل أدفع قروش الإجراء.. يا راجل.. أنا سالت هناك وقالولي تمشي للقنصل عِدِل.. أنا اتخيلت مافي قروش.. واحد نفَّ فيي قال لي يا اخوي انت سمعت ليك حاجة مجان في سوداننا دا من الله خلقك.. قلت ليهُو لع.. في كلامي دا.. وانا تابِّي على السكرتير قلت ليهُو أديني ورقتي الأدفعها وأجي... مشيت للدفع.. لقيت الإجراء بدل كان زمان بي 110 ريال.. أصبح الآن بي 220 ريال... وطبعاً لأني عامل فيها تفتيحة.. جايي شايل قروشي معاي.. اللي هي بالسعر الزمان.. جريت لا برة لقيت واحد صاحبي أدَّاني باقي المبلغ مشيت دفعتو.. وقصدت من البوست دا.. التوضيح للإخوان.. *الإجراء بالسفارة بدل 110 ريال أصبح الآن 220 ريال...* جيت طنطنت في نص الصالة.. ووصلت لقيت القنصل جاء.. شاب مهذب جداً ونشِط.. لقيتُو يوقع في الأوراق في مكتب سكرتيرو قبل ما يدخل مكتبو لا جُوَّة.. ورقتي ماسكها في إيدي وقعها لي.. بعدها شكيت ليهُو الزيادة غير المبررة دي.. ردَّ علي أحدهم.. ما كل حاجة زادت.. قلت ليهُو الزيادات في السودان مُبرَّرة عشان التضخُّم الكل يوم زائد دا.. لكن هنا أبداً ما مقبولة ومافي سبب ليها.. أو علي الأقل.. كان تنبهُوا الناس.. عشان تجي عاملة حسابها.. خصوصاً وأنه لا يُوجد دفع إليكتروني بالسفارة.. أرجُو من الإخوة في لجنة بورداب الرياض تبنِّي أمر هذه الزيادة غير المُبرَّرة ومراجعتها مع سعادة السفير.. لأنها كبيرة جداً مُقابل الإجراء (ختم كان أو توثيق)!!! تحية وتقدير لكل من أسهم في هذا التطوير الملموس ومحسُوس.. ونرجو المزيد المزيد.. فجاليتنا السودانية بالسعودية تستحق كثير من التقدير والإحترام.. فهي العمود الفقري والشريان المغذي لكثير من البيوتات بسوداننا الحبيب...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
جمال أحمد الحسن
فيس بوك
تويتر
انستقرام
يوتيوب
بنتيريست