*المشهد الأول : المكان : داخل إحدى المنازل المتواضعة يقف (الشافو خلو) هائجاً في وجه زوجته (الشافوها خلوها) وهو يصرخ قائلاً : مية مليار مرة قلت ليك لما أجي من الشغل ما ألقى الولد دا مافي !!.. *الشافوها خلوها : أجي يا ود (حبوبتي) .. إنت بتكون قاااااعد بعد المغرب ومع دا كله بيطلع و بيرجع البيت بعد نص الليل .. مالك ما بتجوط معاه؟!.. *الشافو : أنا يا ولية في الوقت داك بكون بشخخخر .. *الشافوها : طيب انا مالي .. ذنبي شنو عشان تكورك كدا .. أمشي اعمل فلاحتك دي مع ناس حمدوك القفلوا المدارس و الجامعات من سنة (جدي حي) وما عاوزين يفتحوها !!.. *المشهد الثاني : (فجعة) كدا الولد يجي خاشي توووووف وهو في عجلة من أمره !!.. *فيصيح (الشافو) مرة أخرى : كنت وين يا زفت عامل كدا زي (ود أبرق) ؟!.. *الولد : روووووق المنقة يا (فردة) !!.. كنا (صابنها) جنب الفرن لأنه سيدو عامل فيها تفتيحة و قاعد يبيع كل العيش الساعة (2) صباحاً لناس المطاعم .. ونحن لبدنا ليهو و قعدنا نلعب (ليدو) !!.. *الشافوها : يصبوك يا يمة في الخور .. انت مالك وماله يا كرور .. *الشافو : أيوا إنت الحشرك شنو؟!.. أهبط في البيت يا هطلة و راجع مقررات السنة الجاية عشان ما تجي تطلع الطيش و تدخلنا في ورطة !!.. *الولد : ورطة شنو و (جلطة) شنو يا فردة؟!.. أنا ذاتي (نسيت) كنت في سنة كم؟!.. *الشافوها : الترابة في خشمك .. نسيت كيف يعني؟!.. *الولد : يا حاجة السنة في الجامعة بدت (2019) .. و قرينا شهرين في (2020) .. و هسة دي (2021) .. في ذمتك حا اتذكر انا في سنة كم كيف؟!.. *الشافو : حسبي الله ونعم الوكيل .. خلاص خلي الغلبة .. أمشي جيب العيش !!.. *المشهد الثالث : زحمة .. و كبسيبة .. و هرج و مرج .. و دبسيبة .. و زعيق .. و معافرة .. و نعيق .. و اختلاط للحابل بالنابل بصورة لا تحدث إلا في سودان المعاناة و الرهق و المهازل .. *و ما أن يصل (ود أبرق) إلى هناك حتى يحدث ما لم يكن في الحسبان !!.. يلتفت إليه (كهل) أشعث أغبر و يقول له : انت كل يوم بتجي هنا و بنسى مع اللخمة أسألك عن اسمك لأني شايفك قبل كدا كتيييييير !!.. *فيتمعن فيه ود أبرق ملياً .. ثم يقول له بكل (زهج) : يا (عمك) عليك الله فكنا .. كفاية في البيت عاملين لي خوتة .. انت هنا كمان عاوز (تشغلها) لي !!.. *عمك : عرفتك .. عرفتك .. ياخ إنت (دفعتي) !!.. *(ودأ برق) : دفعتك بتاع شنو .. لكن أنا غايتو مشبهك !!.. أوعك تكون معاي في الجامعة؟!.. *عمك : أيوا .. أيوا بس المسافة طولت و الجامعة أبت تفتح !!.. *ود أبرق : لا حول ولا قوة الا بالله .. مالك بقيت كدا؟!.. *عمك : الكرمشة دي من (الباعوضة) و (الضبان) .. و الصلعة من الصفوف .. و (عوجة) الضهر من الوقفة للمواصلات .. و (الشلاليف) المدلدلة دي عشان بقيت صاري وشي طواااااالي.. و (الرفرفة) في العيون بسبب إني كل مرة بحاول أتذكر كنت في ياتو (كلية) في الجامعة؟!.. *و *الله في !!..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عادل هلال
فيس بوك
تويتر
انستقرام
يوتيوب
بنتيريست