*الصدفة وحدها جمعتني بأظرف صاحب (أمجاد) أول البارحة .. *طال إنتظاري بلا أمل للحافلات التي تمر بشارع المك نمر قادمة من بحري !!.. *وفجأة توقفت بجانبي عربة أمجاد زرقاء فاقع لونها تسر الناظرين !!.. *طلب مني صاحبها الركوب بسرعة .. و (بردلب) ركبت بلا تردد !!.. *كان وجهه مكفهراً و (مكرفساً) لأبعد الحدود !!.. *وعروق رقبته تكاد أن تفر من مكانها !!.. *قلت في سري : دا لو اتكلمت معه في السخانة دي أمكن يطرشق !!.. *لكنه عاجلني قائلاً : عليك الله دي حالة دي؟!.. *لم أرد .. وعملت راااااايح !.. *(فهجمني) بضحكة لم أتوقعها و لم أتخيلها (كلو كلو) !!.. *المهم .. *سكت بعدها (فجعة) .. ثم قال لي : والله يا ود العم شكلك وانت سرحان عجيب جداً .. و ذكرتني بواحد جارنا اسمه (بلاص) !!.. *والله ما خلى ليك حاجة .. بس ما عنده (شامة) .. ولو ما كدا ياكا ذاتو !!.. *ياخ دا من كترة ما بيسرح و يطلع برة الشبكة بقى زي المجنون !!.. *وآخر حاجة عملها لما رطل اللبن وصل (70) جنيه شال (بستلة) اللبن و مشى قال لبتاع البقالة أديني رطلين (موية فول) و نص كيلو سكر و نص وقية شاي !!.. *ثم أطلق ضحكته الصاخبة الممزوجة هذه المرة بكمية هائلة من (البصاق) في اتجاه وجهي من غير أي (فرامل) !!.. *أكثر ما أثار حيرتي في الرجل هو عدم إكتراثه بصمتي و تجاهلي التام له !!.. *لم يحاول أبداً معرفة سر سكوتي أثناء ثرثرته معي !!.. *وهنا قررت أن أتكلم .. فبادرته بالسؤال عن كيفية بدايته للمهنة .. و متى كان ذلك؟!.. *(جدعني) بنظرة جادة و قال لي : انا خريج محاسبة - جامعة الخرطوم - (1988) .. يعني في زمن (الفيضان) !!.. بعدها سافرت الكويت .. قعدت (9) سنوات .. و ندمااااان جداً إني رجعت !!.. *عموماً بدون مبالغة المفروض أنا أكون وزير مالية في دولة أمة الأمجاد !!.. *لكن في النهاية بقيت وزير عربية (أمجاد) .. و الحمدلله على ما أراد !!.. *قاطعته بسؤالي عن سر إصراره على تكرار موضوع (اللبن) !!.. *فضحك ضحكته المزلزلة إياها .. وقال لي : والله نفسي اعرف لييييه يكون عندنا (ديشليون) رأس ماشية و سعر رطل لبن البقر أغلى من لبن الطير؟!.. *وليييييه يكون عندنا ديشليون مصنع سكر و السكر كل يوم (زايد) .. و (الضغط) مرتفع؟!.. *وليييييه يكون عندنا نيل أبيض .. و نيل أزرق .. و نهر القاش و نهر عطبرة .. و خور ابو حبل .. و خور طوكر .. و موية جوفية ما ليها آخر .. و الموية كل يوم قاطعة من البيوت .. و موية الصحة أغلى من البنزين؟!.. *وليييييه يكون عندنا مشروع زي مشروع الجزيرة و نحن جاعانين و مبشتنين و كل مرة (شاحدين)؟!.. *و ليييييييه يكون.......... *لم أدعه يكمل .. و قلت له : *حميدتي قال كتروا من الإستغفار .. و الأمور المعيشية كلها حا تتصلح !!.. *فتمتم قائلاً : أستغفر الله .. أستغفر الله .. أستغفر الله .. *بس لييييييييييييه بلدنا تكون (مستفة) بالدهب و حالنا (بايظ) و اقتصادنا كعب؟!.. *و عندما وجدت نفسي في الصحافة - محطة (7) - أخبرته بأنني قد وصلت بحمد الله و طلبت منه تحديد المبلغ المناسب للمشوار .. *فصاح و (التفاف) يتطاير من (خشمه) كالناموس : *انا من الصباح أقول ليك رطل اللبن بقى (70) جنيه .. تقول لي عاوز كم؟!.. *ياخ (استغفر الله) .. وأمشي ساي .. *ودعته و انا (أكورك) : *الله في ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عادل هلال
فيس بوك
تويتر
انستقرام
يوتيوب
بنتيريست