♧ دراميات على ظهر رمال متحركة£

: ♧لمدن عنيدة..تنوم و تصحى..على منصات الغضب� (Re: صديق مهدى على)


♧لمدن عنيدة..تنوم و تصحى..على منصات الغضب}
(}نسوي شنو دي صنعة من لا صنعة له؛ إذا كل ذي كبدٍ
رطب بقى مركب مكنة سيد البلد وشغال يسايس الحمير
والبغال يريد تطييعها وتلقاه أكتر زول طمسوس وكلو ضاحك
على دقن كلو؛ و يلا هاك دراما كأنموذجٍ ومثالٍ حيٍّ

♧درامات على ظهر رمالٍ متحركةٍ:
{1}
(من وحي حالنا المايل و لاهو سارعدو لاصليح)
● مدير شركة عملاقة نادى سكرتيرته (ناوي يگتل
بيها ملف بعيدن عن أعين الفضول) قالليها :عندنا أنا
وأنتى برانا رحلة بين طيات السحاب لمدة أسبوع
گامل نسافر على بساط الريح لننتجع على رمال
البلاجات في أحضان الطبيعة بشاطئ الراحة
على جزر الباهاما .رتبي حالك ننطلق.

[} السكرتيرة بدورها اتصلِت على زوجها
قالت ليه: عنديّ رحلة مع گفيلي أسبوع ؛يلا
أنت دبر امورك و مشِّي حالك بالتيك أوي
و لو مو عاجلكاكل نبم و خلي قرص !

▪ الزوج عندو بغلة تانية في الإبريق أصلن معرسا مسيارعُرفي
كسد (مأرب) لمثل هذه الطوارئ . اتصل قال ليها: عندنا أسبوع
راحة (Off) خلينا نملاه سوا نقضيه كروح واحدة في جسدين !

▪ نمبر 2 شغالة مربية (Baby Sitter) لشافع ناس ؛ إتصلت
قالت ليه أنا عندي "شُغُل" طارئ أسبوع كامل ما بقدر اجيك ..

-الشافع اتصل على جدّو وقال ليه : يا جدو المربية عندها شغل
أسبوع كامل ..و ما بتقدر تجيني. تعال سوقني يوماتي نغيّر جو
.

{2}
♤الجد طلع نفسه هو مدير الشركة نادى السكرتيرة
قال ليها :نبطل رومانسيات لأنىحأفضى نفسي أتفسح
مع حفيدي جنا جناي و اللي هو أعز على قلبي من جناي.
{3}
~السكرتيرة اتصلت على زوجها قالت ليه: المأمورية
اتلغِت و أنا خالص راجعة البيت أعوس ليك الغدا!
{4}
~الزوج اتصل على نمبر {2} قال ليها معليش الموضوع
طرشق بغلتي نمبر {1} ما حتسافر وما حأقدر اشوفِك
{5}
~ الزوجة المربية اتصلت على الشويفع قالت ليه: لا خلاص
المامورية طلعت فشنك باباح كسرة بملاح و أنا جاياك بكرة.
{6}
~ الولد : اتصل على جدو و قال له خلاص يا جدو
المربيه حتجيني سوق (سكرتيرتك) و سافرو.
{7}
~ الجد رجع تاني مادى السكرتيرته و قال ليها:
حضري نفسك لازم نسافر للرحلة .و.يلا بعداك
كملوا حجوة أم ضبيبينة خيال أنا كيوردي زاتو فتر

{3}
● هكذا جرت مفاوضات ، و من ثم خرجت (مخرجات)
ما كان يعرف في عهد الأنقاض البائد بالحومار الوطني
و تخمضت عنه صدماتٌ كما يتمخت فيلٌ ليلد فأراً ميتاً ،
و لا يزال نفس الحومار جار بين السودا وعم ريكا حمدوك
نفسو قايم رايح و جاي ، ليظى يراوح مكانه في حركة
ماكوكية تمامن كالمنبت لا أرضاً قطع و لا ظهراً أراح.
*****((((+)))))*****

أخي الحبيب صديق مهدي / تحية و تجلةً وسلام وعدالة ، و بعدُ،،،
لعمري إن مُنحنى الألق ليبدأ منعرجاً صغيراً ثم يَكْبُر ليتخذ مساراً بيناً
فيصير شُعاعاً ثاقباً في ثنياياً العتمة و مُنحنى الحزن يبدأ كبيراً ثم يأخذ
يتبدد رويداً رويداً. كيف لا و أنا أسمع قرع نعليك داخلاً ‘لى داري و أنت
واحداًمن فطاحلة القول الرشيد مشبعاً بطلاوة لهسجنا السكري وطيب
معشرنا و بثورية ورثتموها كابراً عن كابرٍ حتى اصبحنا نخشىعليكم منها.

● و من متابعاتي لك بدا لي و كأنك على مقربةٍ من أحد أستاذتي الاجلاء.
و الله ما كنت أ أنست في نفسي أن أنال ذات يوم مثل كل هذه الحفاة بالوفاء
بأباريق خمر معتق و كأس ينضح بالثناء ، فهو كم يُنسي الألم ، و يذهب أنات العناء
،و يرعرع سنابل الحب و الإخاء. ولو فاقت هناتنا زبد البحر و لامست عنان السماء
!فكم لعبارة جذلة من فعل سحرٍ تطبيب الجراح وتطييب الخواطر بعاجل بشريات
النماء! و كم لأخرى من سنان تدمي القلوب و تؤجج مشاعر الغبن فتثير حفائظ العداء.
فإن الحفز على صنائع الخير مكافأة نفسية تقي مصارع السوء و البغضاء.
و بالحب يربو الإيمان لنزداد كيل بعير تواضعاً لله، لا كبْراً أو استعلاءً.
و بمزج ربع أوقية إخلاصاً..بكوب (ودٍ أصيلٍ) معطر بجميل ثناء ،
يُخفَقُ بملعقتَيْ نُبلٍ و تفاهم و تبسم، ثم ينقع بنهر عطـاءٍ و تيبار سلسبيل
ليكفي لخبز أحلى فطيرة للتصالح روحها ريحان ونكهتها زنجبي
تقدمونها على طبق خير للمة خير كان من بينهم (ود الأصيل).

@ تربت يداي و يسلم لسانك أخي/ ود مهدي، و أنت تغدق عليَّ بإشادات
ما أراك إلا سابقني إليها فموشحاً صدري بأكاليل الزهر و أنت الأجدر مني بمثلها
و بأحسن منها.و ما يمنعني من الحديث عنك إلا خشيتي أن أفسر الماء بالماء
فلا آضيف نقطة لفواصل من عرفوك قبلي. بدليل أن تجدني منهمكاً معك هنا بلا
هوادة في منحنيات طرح متمكن عبر سياحة فكرية هادئة مغرية بالسبر عميقاً في مغاصات الجمال، نمتشق الحروف و بيمينك (عكازة نتوكؤ عليها و قناية نهش بها
على غنمنا) لنستقي نخباً من معاني التفاني . و لعمري هذاما يحفزنا لنواصل السير
رجالاً و ركباناً في رهط كهذا الذي أحببته بكامل تكاوينه و بشتى تلاوينه.. كيف لا
و فارس مثلك يترجل لنا من علياء صهوة الكلم الرصين فيُبيح لنا متعة الركون إلى متصفحات قلبٍ حاضرٍ ، ثم التسكع على شطآن ذائقةٍ رفيعةٍ سمهرية القوام..هنا
حيث الضوء يتخذ مساراً بيناً ثاقياً لا ينعرج إلا ليعكس حزماً من ألق فائضة
بالحب و الحسن و الجمال، منقوشة بأحرف غراء ليلها كنهارها،لا يزيغ
عنها إلا دايش.بانتظار المزيد لينبلج النور فيشيع الود أكثر فأكثر.
♧ تخريمة شهقة لون و تكية خط:
● بس لكن فأجاتني المرة دي. معقول ؤا صديق بعد كول دا
تركبني نع خالتو تراجي في سرج واحد؟ منتهى البوليييغ.

(4)
(دراميات رمال متحركة {على الفاضي}

● ففي بلدةٍ صغيرةٍ و شبه مهجورة غادي من أم صفقنْ عُراض
كشأن حال كل البلد تمر بظروفٍ معيشيةٍ صعبة للطيش لامن تقرف
الليمون والجميع غارقٌ في الديون، و يعيش على الاقتراض.
● فجأةً جاء من أقصى المدرنة رجل يسعى و هو سائحٌ ثريٌّ لامن
قابل بس و قادمٌ من بلاد العم سام إلى البلدة و يدخل اللكوندة و يترك
ورقة نقدية من فئة ال100 دولار مُهملةً على كاونتر الاستقبال ، حيث
يصطحبه نادل خدمات الغرف لكي يتفقد الغرف في الطابق العلوي من
أجل اختيار جناحٍ مريح لإقامته القصيرة . في هذه الأثناء يستغل موظف
الاستقبال الفرصة ويأخذ المائة دولار ويذهب مسرعًا للجزار ليُسدد دينه.

● الجزار يفرح بهذه االعُملة الصعبة و يٌسرع بها لا يلوي على شيءٍ
إلى تاجر الماشية لسداد دين مستحق عليه. تاجر الماشية بدوره يختف
كراعو و يهرول بالدورلارات ذاهباً بها إلى تاجر العلف و و الهومباز لفك
رقبته من ديونه المتلتلة؛ تاجر الأعلاف يلحق بسائق الشاحنه الذي شحن
الغلة من بلدةٍ نائيةٍ لتسديد ما عليه من مستحقات متأخرة . سائق الشاحنه يركض
مسرعاً إلى اللكوندة(حيث يعمل موظف الاستقبال في أول الدراما و الذي استأجر
منه غرفه بالدين عند حضوره لتسليم العلف ليرتاح من عناء السفر فيسلمه الموظف
المائة دولار سداداً لأجرة الغرفة. موظف الاستقبال يعود و يعيد المائة دولار أدراجها
مرة أخرى إلى قواعدها سالمةً غانمةً في مكانها على الكاونتر ؛ و ذلك قبيل عودة
السائح الثري من جولته التفقدية ، حيث لم يعجبه مستوى خدمات الغرف فيقرر
الرحيل إلى حيثُ أتي آخذاً معه المائة دولار خاصته و يطير طييرت أبريش من
الدريش من تلك البلدة و إلى غير رجعةٍ دون أن بخسر شيئاً، و لا أحد من سكانها البسطاء
كسب أي شيء إلا انهم سددوا جميع ديونهم ، و يلا يا دار ما دخلك شر.
● و هكذا دواليك ، تدير بعض القطط السمان من ماليزيا ، شؤون هذه
البلد المغلوب أهلها على أرمهم ؛ تماماً مثلما تعفل الشيء نفسه
الملايات الملتحفة العم/ريكية باقتصاديات العالم باســره.
يعني شغل طواقي فوق طرابيش.
ود ال ح ب ش ا ن ال ت ل ا ت ة
مؤذن تعابان ياي في جزيرة مالطة

® ثالثة الاثافي π√
// الكتلة النقدية في (أم صفقن عُوراض)//
● دائماً ما نسمع عند المتمشدقين بالكلام الكوبار كوبار
من خبراء و(المحللين) من أهل الاقتصاد و المال و الأعمال
و منظري التعاملات النقدية مصطلحات و نظريات ؛ مسلن زي
ناس خسخسة و جدولة و مقاصة و ما شابه و هلم جرا؛ يطلقونها
على ناس قريعتي راحت و تمر علينا سااااه (بندق في بحر) و لا
في زول جايب خبرا و لا يريد الواحد مننامنهم أن يقول إنه لم
يفهم شيئاً.. مثلاً گقولهم: (منحنى الطلب و منحنىالعرض ،
و السعر الحدِّي و الكتلة النقدية و التضخم المفرط) و
تضخم البروستاتة . كلها جمل و مصطلحات مثل
الغلوتيات و يبدو من يتشدقون بها و كأنو
الواحد من هؤلاء (اينشتاين) زمانو.

● {6}و نحنا عشان ما يخمونا معاهم ساي دايرين الليلة
ننزل بالموضوع إلى مستوى رجل الشارع في القرى الأرياف
والنجوع النائية لنشرح معنى (الكتلة النقدية)، و التي (كتلونا) بيها
أولئك الاقتصاديون عندما يتشاطحون بذكر شح الكتلة النقدية أو عن
قلة المعروض من النقود أو انعدام السيولة جراء ضعف القوة الشرائية.

● و كلها معانٍ متقاربة جداً و تكاد أن تكون متطابقة و ما يجمعها هو
أن المواطن و المستمع إلى هذه الألفاظ من الجماعة الذين يقيمون الندوات
فلا يقعدونها عبر القنوات الفضائية أو الإذاعة يعتقد أنهم من سحرة فرعون.
و لا يملك غير أن يقول: (سمح العلم) و ( الله عاد عينا باردة) و ( فوق كل
ذي علم عليم) و الله الحيكومة دي شيتن بغلبا تب مافي ... ولكي نوضح
أن الموضوع أسهل مما يبدو، يمكن أن نشرح الكتلة النقدية بمثال بسيط..

{7}
● فإذا تصورنا وجود قرية اسمها مثلاً (أم صفقن عُوراض ) و قلنا إنو
(أم صفقن عُواض) دي بها مائة مواطن وكل واحد من مواطني (أم صفقن
عُوراض ) دي ، لديه مائة ألف جنيه طبعن و لا بالجديد و الله أناظاطي ماني
عارف يظبطوها كيف. عمومن ،هذا يعني في مُجْمَلِهِ أن جملة الكتلة النقدية
المتوفرة للتداول في قرية أم صفقن عُوراض دي تبلغ مسلن عشرة ملايين جنيه.
و إذا تصورنا أن قرية أم صفقن عُواض توجد فيها كل الخدمات الضرورية لسكان
الحلة مثل الطابونة و الطاحونة ودكان الفول وبتاع الفحم و زريبة الحطب و
الخدُرْجي و بياع اللحم بالتش ( يعني نظام مقايضة اللحم ببعض الحبوب و
البقوليات) و (سيد اللبن جا يا نفيسة) و الحلاق و جزاز الحمير و المشاطة
والحنانةو بتاع العناقريب يعني البوسر بس، موش البگسر العناقريب).

(8)و هذا يعني بطبيعة الحال، أن كل واحد ٍ
من المواطنين سوف يقضي مقاضيه و يجد حاجته
من كل الخدمات التي يقدمها الآخرون و يشتري منهم
سلعهم و يقدم لهم خدماته... فصاحب الدكان يشتري اللحم
من الجزار والخدار من الخدرجي والفحم من الزريبة و يدفع
لزوجته إذا كان مُوَحِّداً أو أو لحريمه إنك كان مُعَدِّداً حق
المشاطة و الحنانة و الدلاگة ،و هكذا كما يفعل الآخرون.

¶ و بهذا يمكننا القول إن حِلة أم صفقن عُوراض
بها كتلة نقدية لا بأس بها ، إذ تعادل عشرة ملايين
طاقتها السكانية مائة شخص و معدلإجمالي السيولة على
المواطنين يعادل مائة جنيه للفرد و تظل حِلة أم صفقن عُوراض
مستقرة تماماً اقتصادياً و أهلها مبسوطون كل منهم يحتاج لخدمات
الآخروكل واحد قادر على دفع قيمة هذه الخدمات والسلع، و بالتالي
فالكل هناك تقريباً بكون آمن في سربة مالك أو ضامن لقوت يومه،
و كأنماحيزتله الدنيا بحذافيرها. و لكن يجب التذكير هنا بأننا لا نزال
ننبش عميقاً جدن في فنون السرقة و التي كمان نوهنا سلفاً بأنها
خشوم بيوت و يمكن ممارستها على محاور و مستويات
بحيلٍ و وسائل و حَرْفَنَاتٍ شتى.

************(9)************
و لكننا إذا افترضنا أن هناك فنانةً أو فناناً مشهوراً
أو مشهورةً جداً من بتاعين العدادات الرمية ديل في
الخرتوم محل الظخىوع كان بنوم و التيارة زاتو بقوم ؛
و أنه تم الإعلان بأن هذا المطرب أو المطربةسوف يقيم
حفلاً ساهراً في أم صفقن عُوراض دي، و أنو تمن التذكرة
خمسين ألف جنيه (بالقديم) فإن ما سيحدث هو أن كل ناس
حلة أم صفقن عُوراض سوف يصرون على حضور حفل الطرب
الساهر مهما كلفهم ذلك و سوف يأتون أعماهم شايل المكسر .

● و لأن المطربة أو المطرب المشهورين جداً و محبوبين خالس
فسوف تحضر النساء و الشيب و الشباب و البنات و الرجالو الشُفَّع
وحتى ا لدواب و الجداد العلقكتروني البنوم بدري داك ظاطو سوف
يساهر في الليلة ديك. لذلك ، فإنناس الحلة سوف يدفعون للمطربة نصف
كتلتهم النقديةو سوف اغادر المطربة أم صفقن عُوراض في آخر تلك الليلة
المهببة الظلماء و حتى الفجر الباكر... و سيجد أهالي أم صفقن عُراض أنهم
قد فقدوا سيولة كتلكتهم النقدياللي كانو يتعاملون بها. و لم يبق أمامهم
سوى خياران اثنان أحلاهما حنضل قيزان : فإما اللجوء اإلى الجهة الراعية
للحفل عبر لجنتها العليا المنظمة و اللجان الفرعية المنبثقة عنها لكي تقو
م بتسليفهم مقابل رهن ديارهم أو أن يهاجروا من القرية و يبحث
كل منهم عن وسيلة أخرى للحصول باب آخر للرزق.

{10}
وهذا أيها القارئ الهُمام هو ملخص مفهوم 
فقدان السيولة وانكماش الكتلة النقدية التي نعتقد عندما
نسمعها من المنظرين في علم الاقتصاد أنهم يقولون شيئاً 
من علوم الفضاء أو الفيزياء الذرية مع أن كل الموضوع لا يعدو 
كونه متمحوراً في أن المطربة (حنان سگليب و لا عوضية ردحي)
شالت الفيها النصيب و حتحتت جيوب ناس الحلة السماكين بكامل رضاهم 
وقواهم العقلية المعتبرة شرعاص و قانوناُ . و هذا النوع من السرقة،أيها السادة 
الگرام ، هو نفس ما تفعله شركات ( منصات التناصل اللا اجتماعي) و التي تقول 
الإحصاءات الأخيرة أن هناك عشرين مليون جهاز موبايل و أن كل مواطن سوداني
جتة لو كان عواطلي ، قاعد يرغي يومياً بما لا يقل عن ثلاثة آلاف جنيه في المتوسط.
و و ما ا يعني أننا ندفع يومياً ستين ملياراً للجماعة ديل و في الشهر حوالي اثنين تريليون
و في العام حوالي أربعة وعشرين تريليوناً..هذا مع العلمبأنهمـ أي ناس الاتصالات ـ 
مثل المطربة (أم بلينة گروفة بنزين) لا يشترون منا شيئاً ملموساً بعينه؛ و إنما 
بحتحتون جيوبنا بكامل رضانامن أي سيولة كتلة نقدية ويستمتعون 
بها بينما نقعد نحن ( أم فگو) في السهلة سااااكت!!...

{11}
♧ في حلتنا كان في سرقة بتاعت محاصيل شديدة. اتفق
سبعة انفار من اصحاب المحاصيل انه يجيبو العوض ود العمدة
يمسك ليهم عيشهم ويخزنه عنده لأنو سور بيته عالي و عندو
سلاح وما بتسرق بسهولة مقابل انه يدوهو حاجة رمزية كده.

● خمسة انفار منهم كل واحد سلم العوض شوال عيش واحد.
لكن البلولة سلمو شوالين والخضر سلمو تلاتة شوالات نط الخضر قال
يا اخوانا العوض ده يمكن ينكرنا ويقول ما عندكم عندي شي اها بعدين نقبل وين؟
اتفقو انه يكتب ليهم ورق بي عدد شوالاتهم ويختمو ليهم قدام شيخ الحلة هاك انت
عندك واحد شوال دي ورقة مكتوب عليها واحد شوال متي ما جيتني البيت و جبت
معاك الورقة دي بديك شوالك حتي لو ما لقيتني بتلقي اولادي هاك انت ديل ورقتين
عندك شوالين هاك انت ديل تلاتة ورقات عندك تلاتة شوالات متي ما حبيت تشيلهم
التلاتة او تشيل جزء منهم حبابك و هكذا بقي العوض الآن عندو عشرة شوالات عيش
حقت ناس وسلمهم عشرة ورقات أو إيصالات تثبت انه عندهم عندو عيش و كدي.

● يقوم الخضر صاحب التلاتة شوالات يحتاج لي غنماية مشي لي جارو ود احمد قال ليهو
انا ما عندي قروش لكن عندي شوالات عيش عند العوض بديك منهم اتنين وتديني الغنماية ،
ود احمد قال ليهو تمام ، اها الخضر قال ليهو بدل ما نمشي ونتلتل العوض انا بديك الورقتين
خلاص بقن حقاتك وانت متي ما حبيت تشيل شوالاتك امشي للعوض و فعلا ود احمد شال
الورقتين . يقوم ود احمد زااتو يحتاج لي طوب لانو حيطتو وقعت مشي لبتاع الطوب
واداهو ورقة من الاداهن ليهو الخضر وقال ليهو دي فيها شوال عيش عند العوض
اديني بيها طوب و هكذا الناس بقت تتعامل بي وريقات العوض بدل ما يتلتلوهو.

● اهاااا قووووم يا العوض إتا زاتك تتزنق في عملية لي بتو و بتاع الدكان يابى
يدينك و لامن فتشت سما واطة لي زول يدينك ما لقيت قام جاتو فكرة شيطانية
قال طالما الناس بقت تتعامل بي الورق بتاعي من غير ما يجو يشيلو عيشهم انا بس
اكتب ورقة زيادة بتاعت شوال عيش وامشي اديها الدكتور اقول ليهو عندك بيها شوال
متي ما حبيت تشيلو حبابك ، ومافي زول ح يعرف انه انا كتبت ورقة جديدة واساساً
مافي شوال عيش لانه مافي زول بجي يفقد عيشو ، وفعلا الامور مشت والعوض ما
انكشف . و بعد فترة تاني اتزنق وعمل نفس الحركة مرة ومرتين وتلاتة

● لكن الطامة الكبري انه الشغلانية حِلت ليهو لامن جات ثالثة الأثافي و فكر يبني
ليهو عوضة في البيت عشان يوسع على وليداتو ، فقام كتب ليهو 15 ورقة بدل ما زمان
كان بكتب واحدة و فعلا وزعهن علي بتاع الاسمنت و بتاع الطوب والبنايين وبني الغرفه
الناس في الحلة حسو انه الورق ده كتير وحسو انه العوض ده بتلاعب فقررو انه يمشو
ليهو ويشيلو عيشهم ، لكن العوض بدأ يتزاوغ منهم مره يقول ليهم المفتاح ما معاي
ومرة يقول ليهم انا اسي عيان كدي تعالو بكرة

● المهم اشتكوهو لي شيخ الحلة وجابو البوليس و اي زول عندو ورقة جابها وجا وكسرو
المخزن ولقو الشوالات العشرة لكن الطامة الكبري انه في 30 نفر كل واحد شايل ورقة مختومة
من العوض انه عندو بيها شوال ، يعني تلاتين ورقة وعشرة شوالات وكل واحد بقول انا ما عندي
شغلة بس عاوز شوالي المهم العوض اخد ليهو دقة كاربة وودوهو السجن طوالي

● بقي هسي كيف يحلو المشكلة تلاتين ورقة وعشرة شوالات. شيخ الحلة قال عشان ما تحصل
مضاربة ومشاكل بين الناس ديل انا بس اقسم الشوالات دي بينكم بالتساوي وكل زول يطلع ليهو
زي كيلتين و نص تِلِت (١/٣ ) شوال ، كده بقي اي زول خسران ليهو تلتين شوال بدون ما يشعر
وحتي بتاعين الطوب والاسمنت اللي ماعندهم شغلة بي عيش ولا شوالات طلعو خسرانين في
صمة خشومم . والورقة الكانت بتجيب ليهم شوال بقت تجيب ليك 1/3 تِلِت شوال والمستفيد
الوحيد هو العوض تلى حسلب قوت يوم ( أهل العوض) . يعني ببساطة العوض سرق من كل
واحد 2/3 تلتين شوال من غير ما يهبش الشوالات.ده ياهو التضخم ببساطة . و ده ياهو
الكان بتعملو بنك بنوك الزوتحفة و دولة تمكينهم ( العميكة) في أهلناة الغبش أبان
مسوحن موية و هم خسرانين يوماتي و مافيهم زولن كدي جايب خبر ... 👌👌👌