أما القصيدة الأولى في هذا المقطع فقد ألقاها الشاعر في مركز الأستاذ محمود محمد طه في واحدة من ليالي إحياء ذكرى صعوده.
ازهري محمد علي ضلمت.. واتلفحت توب السواد طفت الثعالب ضحكتا وطولت ليل السهاد انفضا سامر فرحته اللمه والناس والوداد فلق الصباح الشجر اقلام جميع والنيل مداد الساقيه والحزن النبيل ومن غير ميعاد طال الشتات ودابت حشاشات القرى فى المدن ذات العماد ولليله لا بان لك صباح لا ملت البوح شهرذاد وانا كلما غابت سعاد غابات من الشك تشتعل يشتعل شوقى واقول بانت سعاد بانت سعاد دلانى اخر اليل نجم انزع مخاوفك واتحد اصعد وسيم فى المشنقه واضحك على وهج الزناد اصعد كما صعد الفراش جذوة النار واحترق ولملم رفاتك وانتفض تحت الرماد خليه جرحك للهوام الخوف على جرح البلاد
البلاد فى حافة النار انتبه انت الوحيد المشتبه انت الوحيد فى حضرة الموت انتبه بصرك حديد وطيفك يجينا شبه شبه الريح محت ريحة خطاك ودلت عليك دابة الارض وغناك دلت عليك فى العتمه دعوات الخلاص والارض ماعون التعب ضاقت بما رحبت خلاص اشتعل غضب الحريق وخطوك على خط التماس الهواجس لوعت صحو الحنين ونعنعت خدر النعاس والصحاب من كل ناحيه مصوبين وجسدك على مرمى الرصاص اترك وراك والفخاخ نصبت على هذا الاساس وروحك من تسامي النشوة
رقصت تحت حبل القصاص
لا ضلك الفاتح برا لا مدا ضل العافيه لعصب الحواس ضاقت خلاص والدودرك للطعم من فوق الشرك دغدق مشاعر الطيبه فى حس الدباس ضاقت خلاص وانت بتدارى الفرحه من حزن المغارب انت بتقاوم لانتزاع الورده من وسط العقارب فاتك قطار الامنيات ندبت حظك وارتديت زى المحارب ندمان على حلم السنين الضائعة فى حقل التجارب وخائف على العمر الفضل والناس تسالمك بالمخالب
الناس تسالمك والصحاب ضحكاتا ذى طعم الطحالب ضاقت خلاص من كل جانب امسينا فى حد الكفاف واصبحنا كلنا فى البلد نحن المواطنين الاجانب
12-06-2019, 08:03 PM
Yasir Elsharif Yasir Elsharif
تاريخ التسجيل: 12-09-2002
مجموع المشاركات: 48774
أما القصيدة التي بعدها وألقاها أزهري في مركز الأستاذ محمود فهي أيضا في تمجيد الموت بوصفه صعودا، أو صلاة. صعود فاطمة أخته. عنوان القصيدة "ثرثرة المياه والعصافير".
ثرثرة المياه والعصافير لامرأة بالغة العذوبة
افتحوا أبواب العصافير الترِك لو حبَت ترك التطير لو دارت تطير من بلاد لبلاد بتسعى والعمر واهباهو للغير حامدة لله وتسبِّح وتصحا فى التلت الأخير الله ماقصقص جناحها والدنيا مازالت بخير
لا فئة تؤدى الى أختى فاطمة وإلى كل فاطمة
فاطمة خبـَارها ما مرقت على المطرة! ولا لاقت إيديها الغيث معلـِّقة روحا في حبل الصبر قادوس ولا كفّت من الدعوات على التاكوهو باب الروح ولا فاقت من الفاتوها فى درب البحر بتكوس فاطمة حبيبة الأطفال ضاقت المُرّة.. ما ضاقت فارّة بسيمها في الضلام فانوس غرستها في الأرِض تيراب لا كمْلت .. ولا حاقت ولا نَقـّر عريقها السوس
فاطمة لافتة تؤدى إلى النص
ممطورة ومتحاشية البلـَل عصفورة في وش الرياح والزيفة والخوف والعلل حمّدْني ودْعِك بالرحيل وقعّدْني دربك بالشلل عصفورة الوطن الجميل يا باقية والأيام دول أمسينا حاضنِنـِّك حلم أصبحنا باكنـِّك طلل
يا اخيّة بحجم الرهان فى المحنة والخطب الجلل نص:
حان الآن موعد آذان الغيث وصلاة الموية على الواطة الحلبت ضرع الغيمة الدرّا الغيمة الانشّت في السماء تبروقة ودشرت همهما من سبلوقة القِـبلة وفتحت بنيان الأفـُق الواسع للطير الرجَّع عصفورة قلبي المطلوقة وفرَّ للشمس السلَّت روحها ومرقت من قفطان الليل زي قرّة ودعوات القلب الفاتح لطفله إتبرّت من أوزار الطين إتوضّت من درن الأحزان المُرة وفتحت للطير الطار القبلة يا طير يا طيب يا صالح تحلم بى عالم متصالح ونحلم بالحاصِب في النِّبْلة لي وين بنودّي وشينا الكالح من أسئلة الأرض ومن نقنقة الغيمة الحبلى نحن القصّينا جناح الريح وعَبـّينا العالم في طبلة يا طير يا طيب يا صالح ارحل ما شاء الترحال في طلب الموية وقوت العام و فِز ما فَزّ الوِز فى السماء أو عام وامرق من سلة حلمي الخاص لرحاب الحلم العام يا كائن - عام قفاك أعوَج.. وما طاب فى البسيطة مقام
يا طير يا طيب يا صالح منو الفتح الأفق لحَمام! فلت من ناب لمخلب عطش جارح يقايض الصحراء ببُقـة في بطن الإبل وريق صبار - يضاير اللـُّجة لآخر فِجّة في ذاكرة المياه العذبة وينتخب المطر سلطان وكان..ما كان حديث الموية فى قعدة بداية الخلق إبتدر الغناء الصلصال وكشفت في الهجيج النار إشتدَّ الأنين والطلق دخلت في الوجع سرسار وقالت قولتها الفاجعة "الولادة إتعسَّرت" وإنقطع العشم في صرخة انقطع حبل الحلم
وندَهْنا : " يا حلاّل تَحلّها" الواسعة أضيق من رحم يا الله فاض بينا الحنين لطفلة حتحتنا فى غناها النضِم
ويا زولة أمّنْتِك غناي وقَهيت وراها نجم نجم جاييك والأيام وراى مكسوف وخائب ومنهزم أدِّيني من صبرك معاى للزيفة والأيام هِدم ادِّيني لروحك درب و اتعلمي إنّو العشق يعنى الغُنا فى من تُحب يعنى إشتعالك فيك واخضرارك فى القلب قرنفلة ونعناعةِ يا مسبية بي قسَم الوُعَاظ الباعة براك أديتي الشواذ العِصمة ودخـّلتي الأغاني الناشزة بيت الطاعة براك يا طاهرة في الزمن النجس و مستـّفة الحيل بغناك أنا ما نسيتك فى الرماد شان اذرف الدمعات وراك وأنا لو ببيعك ما كان غمدْتَ الكلمة في لُب الجفير ومرقتا أعزل في العراك وانتى فى مفترق الطرق تطـَمَّثى تتحسسي السلك الهلاك .. وتهبـِّشِى للغلة فى بيت النمل بتفتـِّشى ماقطّ ماعون من كفاف إلا وتُراق موية وشي يا واقفة فى باب السقط - تدهمشي يمرجحك العطش من بحر الجبل لي دِجلة عاودني الحنين لسحرتك ساكت حمَتني الخجلة أنا كل ما شرقت شمس ألقاك تنقّبي في اليقين من جلدى
و تلعبي في المفاصل حِجلة كل ما شرقت شمس ألقاك تردَحِي فى المنابر " هى النار..هى النار" ما لهلبت جمرة في كبد الرماد تتشالقى وتاطيها " هى النار....." قريبة الموية ومريودة السحاب تاريها مارست الكُمون في روحا و إنقطع طاريها غبت للنسيم والغيم ولّبت هواها غادر الشعراء انهار النبيذ فيها كنت كفيف والدنيا قيامة وكل الناس بتعاين فيك مندهشة وانا جاييك من عبر تقاطع طالع بين الشوق والوحشة أنا جاييك مهموم جدعَت فيني علق من يوسف شفتها قامت زى اللهبة طلعت زى السيف من غِمدو كنا تداعي الجسد الواحد إنتى بتهذي وأنا محموم جريت لقّطِتك من عينيهم جريت بي إحساس
الجري في النوم كوركتى المد .. المد كان النهر فاتح حُضن المدينة سبيل ومادي الأيادي تكـّية وأنا بين صرختك والبر لوّحت لي آخر غريق... ومشيت لقيت قوس قزح في كتفي وشنّقْتَ الغمام طاقية صافحت الحراز للموية حمّدنى الخريف بي طيّه غنيتلك "قسيم التوية حدّث لي ابويا عشان أزور الدونكي واجيب لى حبّة موية"
موية لي بت منسابة وعذبة وصافية بتنَبـِت في الجسد أشجار وتنقع النيل الأزرق حرِْدَت منى ودقت ضهر الفيض بالموج ناديتها العِينه... صبّت فى الرحم العاقر وسألت كم؟؟ جرعه بتشفى غليل الواطة؟؟ وصِبحت طينة طلقت شيطان الريح الهوج ناديت الأم المرقت من ضلعي المعوج فرفر صوتها وضحكت مليانة وبرانا برانا إتونّسنا ونامت مبسوطة ورويانة ، ومطامنة إتعارت توب الموية ، واشتعلت برداً وسلام صعدت سمّوها البرق وهبطت سميتها الطاقة الكامنة وصلينا صلاة الموية على الواطة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Yasir Elsharif
فيس بوك
تويتر
انستقرام
يوتيوب
بنتيريست