هل يذعن الكيزان لمقصلة (قانون) التفكيك الجديد ، أم أن هنالك شجرا يسير ؟

Quote: إنتبه ،، هذا الفلم معاد ـ زماان في السينما بعلنوا عن فلم جديد لنج ( قوى حرية وتغيير وكده) وفجأة إدارة السينما تكتشف إنو الفلم الجديد ماعندها تقوم تشغل فلم قديم يقوم جزء من الجمهور يزهج يطلع وجزء يغضب يكسر السينما وبكون في حبة مواهيم من الجمهور عايزين يشوفوا الفلم المكرر ده لأنهم ماشافوا قبل كده ( انتو من ياتم)؟؟ ـ المهم ـ حكاية حل المؤتمر الوطني دى فلم قديم ،، العايز يزعل والعايز يغضب والمقهي وعايز يتفرج علي كيفو ـ زمااااان الصادق المهدى والترابي حلوا الحزب الشيوعي ،، طردوا من الجمعيه التأسيسيه وصادروا الدور بتاعتو وقفلوا جريدتو وبشتنوا بشتنه شديده ـ رئيس القضاء الوقت داك قال ليهم الكلام ده غلط ومادستورى ـ الترابي والصادق قالوا لي شن عرفك ،، ياتسكت ياتقدم استقالتك ،، طبعا قدم استقالتو ـ الجماعه قعدوا يشربوا نخب الانتصار ويمسحوا دقونهم ،، تووووش الحزب الشيوعي دخل ليهم بدبابه كاوتهم دخلهم كوبر واستلم السلطه ،، ـ الاحزاب زى التيران لم تحاول تعقرها وتوديها الجزارة لو ماماسك قرونها كويس بتجيبك الواطه ( سامعاني ياقحط) ؟؟ ــ الشيوعيين طلعوا واستلموا وهيصوا ،، نشق اعدانا عرض وطول ،وفعلا كتلوا الامام الهادى ومحمد صالح عمر وتلاته الف مواطن من مختلف مدن السودان ـ وبعد انتهوا من خصومهم قبلوا علي بعض ،، شفت كيف يعني مجلس قيادة الثورة انقسم على روحوا ( سامعني يامجلس السيادة والوزراء) ـ اصلا الاحزاب السودانيه دى زى الكوامر تنوووم وتقوم دفره وتاخد ليها نطة ودقشه ولم ماتلقي حاجة تدقشها بتدقش بعض . نص مجلس قيادة الثورة سجن النص التاني وضبح ضباط قصر الضيافه ( يارزاز الدم حبابك)- ّـ قام النص التاني طلع من السجن وسجن النص الاول وضبحهم ليك شخخ في الشجرة ( وهاشم العطاء في التربه كراعو أكلتها الكلبه)- ـ وجاء نميري استلم وطلع الترابي من السجن ورجع الصادق من برها وبقوا سمنه علي عسل لحدي 84 ـ الوقت ده كلوا الدولار زايد والجنيه راجع ،، البنزين مافي والرغيف بالصف ( انتو قايلين القصة دى جديدة ) ـ قوم ياالسكر والرغيف وسوار الدهب اتلوموا مع نميري زى ماقام الجاز والرغيف وقوش اتلوموا مع البشير . طبعا اي تلاتة من ديل جاز وعيش وضابط بعملوا يوتيرن بالبلد عادي ـ المهم بعد 85 العملوا مع نميري الانقلاب والصالحوا نميري في نص السكة يوروروا لبعض وأي واحد فيهم عايز يدرع لي التاني انقلاب مايو في رقبتو ـ طبعا نحن شعارات الديمقراطيه عندنا غريبه شويه بقصد الشعارات الحقيقيه مش البرفعوها للجمهور فهي تقوم علي أساس (تورين مابقدروا يعيشوا في دكة واحده) أيوة ديمقراطيتنا الابرة المابتشيل خيتين ،،، وطبعا نحن عندنا مية خيط وفي كل خيط مية عقده عشان كده إبرة الديمقراطية مابتشيلنا فشنو .. أي خيط بمشي يركب لي دبابه يقتحم بيها خرم الإبرة ّـ ولأنو الترابي من 77 في السلطه والصادق ياها عادتو ( بقعد بالجنبه وبالطرف زى الديك الواقف فى الحر بقيف بكراع واحدة ) فالترابي عمل كش ملك ولمه الورق عندو . ويبدأ الفلم يتكرر ـ منع النشاط الحزبي وإغلاق الصحف ، اعتقال ،تشريد ،، ويبدأ الحاكم يضعف والمحلول يقوى ـ اكتر فترة انتفش فيها حزب الامة .والاتحادي في الجامعات والمهاجر هي في عشرية الحل والمنع والمصادرة بتاعت الانقاذ الأولي ،،سامعني ياترس . اكتر فترة جمع فيها الحزب الشيوعي شباب وعضويه ومال ووظائف في اوربا هى فترة عشرية الترابي الأولي ( أسألوا حمدوك ذاتو) 🤣 ّـ اكتر وكت اتماسك في حزب البعث في العراق بعد طلع من السلطه واتحاصر . . اكراد تركيا بقوا أكتر شراسه بعد اعتقلوا زعيمهم أوجلان .طبعا الاكراد كان بهتفوا ( أوجلان للقيادة ونحن للشهادة ) ولكن بعد اعتقاله والحكم عليه بالمؤبد قام بتغيير الهتاف ( انا للشهادة وأنتم للقيادة) شفت كيف ؟ . الاسلاميين الأتراك ماحكموا تركيا بالصندوق إلا بعد إتحل حزبهم بالدبابه ـ أسمعني ياحمدوك ،، وانت في السلطة بتكون محتاج للحكمة مش القوة . البشير مرة بسأل وفي ونسة عامة كيف تستعيد الحركة الاسلامية قوتها فقلت لي تكتيكيا وله استراتيجيا؟ّ فقال لي الاتنين فقلت لي لو تكتيكيا طلعها معارضه ولو استراتيجيا زحها من السياسه ،، فجاط بعض من في المجلس. اولا لأن السؤال لم يكن موجها ابتداءا لى وثانيا علي طريقة شن عرفك ، فلم اسكت وقلت ماهو ماممكن البلد تحرق بين فئتين ،فئة بتخوف البسطاء انو الدين بصادر الحريات وفئة بتخوف البسطاء التانين إنو الحريات حاتسقط الدين ( القال منو الدين والحريات تورين مابعيشوا في دكة واحدة) ـ حمدوك كأني بك بعد أن أعتذرت للبشير عن حقيبة المالية اتفقت معه علي ارسال الاسلاميين تكتيكيا للمعارضة ليعودوا لحكم السودان بعد عشر سنوات ـ دى سنة السياسة في البلد .الصادق والترابي في قمة نشوة انتصارهم علي اليسار إلتهمهم انقلاب مايو . واليسار في نشوة سروره بالانتصار في الجزيرة أبا نحره النميري في الشجرة والشيخ حسن في قمة فتوة السلطه يعيده انقسام 99 إلي كوبر و،،، وتمساح الحالة السودانيه يظل فكه مفتوحا في إنتظار ( فريحان جديد) فهل من مدكر؟ . أخخ من يكسر الشاشه ويغلق باب السينما إلي حين العثور علي متعهد جديد للأفلام الجديدة أبورفقه