|
|
|
 Re: ذكريات اول رحلة (Re: عبدالمنعم الطيب حسن)
|
الرحلة داخلية وستمتد لأيام؛
لاحقا اكتشفنا انها
عشرة أيام بلياليها؛
بدأنا التخطيط للرحلة أنا وصديقي عمر بركات
الذي يسبقني بعامين دراسيين
نحن اهل وجيران وجيل واحد وأصدقاء العمر ما زلنا؛
حتى وانا راجع لمغتربي من اخر اجازة قبل عام تقريبا
ودعني والاصدقاء
حيث رتبوا حفل الشاي واللقيمات؛
وتجمع اهل الفريق وشربنا الشاي وضربنا اللقيمات وانبسطنا؛
اقترح صديقي ان نمشي رحلة
وافقت طوالي وبديت اشتغل في الاجازة المدرسية
في الزراعة
يوميات واشتغلت طلبة برضو واستطعت توفير سبعة جنيهات بنات حفرة
نجيه ينطح جنيه؛
كلمت امي وابوي واخوي الاكبر بالفكرة وصحبة الرحلة فرحبوا شديد بدون
اي تحفظات؛ خاصة وقد اخبرتهم بان الرحلة صحبة عثمان الذي هو قريبنا
وشقيق صديقي وان الرحلة ستكون بعربتهم المعروفة وسنكون راكبين مقعد امامي؛
وانني موفر مصاريف الرحلة....
وافقوا طوالي؛
فتامل...
واشتريت بنطلونين وقميصين وشبط
وجهزنا اغراضنا في شنطة خفافية
ويا بورسودان جوك اولاد صغار
في العمر والتجربة؛
ولكنهم شفوت...
........
ساواصل
| |
 
|
|
|
|
|
|
|
|
Re: ذكريات اول رحلة (Re: عبدالمنعم الطيب حسن)
|
وزي ما قال ابن أبو حليمه استاذنا النور الجيلاني امد الله في أيامه وشفاه ( الرحلة طوييييله طويييله طويييله مكتوبة عليا وبمشيها )
ما تطول الغييبة اخي عبد المنعم ونحن من هسة منتظرين الحكي الجميل يا جميل ...
تحياتي : ياسر العيلفون ....
| |
|
|
|
|
|
|
|
|
|
Re: ذكريات اول رحلة (Re: Osman Musa)
|
اوووه صديقي عثمان موسى
ازيك يا حبيب أشواقنا ماسورة مكسورة عديل كدة....
موجودين يا حبيب كنا مع الثورة
ما زلنا متابعين بالفيس وتويتر
نتمنى الراحة والحرية والديمقراطية لشعبنا الكريم
الذي عان طويلة وتحمل كثيرا وصبر دهرا
......................
محمد الشيخ يا هندسة
كيفك يا حبيب
نعم اعرف واوسي في البارقة واعتقد انها حلة صديقنا
معاوية المدير
وازيدك من التمدد معلومة جديدة
ان مجموعة من اهل الباوقة الكرام اشتروا كم مربوع
في منطقتنا واوسي وسموهوا حي الباوقة
الباوقة اللذيذ تفاحا
في تفاحا يا هندسة في الباوقة
واوسي في الباوقة
والبارقة في واوسي
شفتا كيف كما يقول اساطين الاسافير....
.........
اوووه صديقنا الدكتور مرتضى عبدالجليل
ازيك يا رجل
لعلك بالف صحة وسلامة
خليك قريب يا حبيب
تسلم....
.....
| |
|
|
|
|
|
|
|
|
|
Re: ذكريات اول رحلة (Re: ياسر السر)
|
ياسر حبيبي
تشكر للمرور العطير
ياسر يا عيلفون
العربات البيدفور كانت كتيرة في واوسي في التمانينات
الاسر المرتاحة كلها عندها عربات سفرية
تمشي غالبا بورسودان تشحن بضاعة جاية من الخارج وتوصلها لمخازن التجار
في الخرطوم
والعربات تشحن من الخرطوم وغالبا بضائع معدة للتصدير
ولكن مشوار الرجوع من بورسودان أجدى لصاحب العربية
وهنالك متخصيين ولهم مكاتب متخصصة اسمهم الكمسنجية
وهم وسيط بين التاجر وصاحب العربية
كلمنا عثمان انو بكرة الصباح السفر
لا اعتقد انني نمت كويس
وسواقين العربات كلهم اهل يسافرون سويا اي مجموعة لا تقل عن خمسة عربات
وصلنا الخرطوم من واوسي ٥٠كلم شمال بحري
مرة يا عيلفون ركب معاي سوداني قتا اقدمو لي قدام
قابلني في اطراف الرياض فوقفت لاوصله في طريقي
وانا اصلا ساكن وسط البلد
المهم سالني كعادة السودانيين
من وين اللخو
واوسي
وين دي ما سمعنا بيها في الخريطة
٥٠كلم شمال بحري
سويتم خمسين والله تلقاهن مية😂😂
ودار حوار لطيف
وصلنا بحري وتجمع السواقين الاهل
واحتفلوا برفقنا معهم
وفرحوا اي ما فرح
تصدق تاني لحدت بورسودان ما ركبنا مع عثمان
ضربنا وجبة جماعية في مطعم في بحري نعرفه جيدا
وكنا كتار ضربنا المشاوي وشربنا الشاي وحاولنا ندفع
ضحك السواقين وقالوا انتم ضيوفنا في هذه الرحلة
وتاني مافيكم واحد يفتح خشمو لحدت ما نرجع الحلة
كنت قد سلمت عمر اشتراكي في الرحلة
ستة جنيهات ونص ارجعها لي عمر في الحلة بعد عودتنا
وسلمني عشرة جنيه
واحد من اهلنا في بورسودان دفعلنا خمسة جنيهات
شكرا وسيلة صديقي رجع واستقر بالحلة
وحاولت ان اذكره بحضورنا له في بورسودان
تصدق مسح نهائي القصة دي
مع انني نمنا معاهو في البيت امكن تلاتة ليالي
العصر تحركنا من الخرطوم بطريق مدني
وهالني المناطر الجميلة من خروجنا من الخرطوم ودخولنا ارض
المحنة
ياخ مناظر الخضرة والقرى على ضفتي الاسفلت
ابهجتني وهيجت مشاعري
ستكون وقفتنا الاولى في الكاملين...
لاحظ اننا صبيان برزخًا بين الطفولة والشباب
الغرابة تاتي ان ولدي في نفس سني في تلكم الايام
لو نزل البقالة تحت العمارة
وتاخر شوية بحصلو
شفتا كيف يا عيلفون الفرق
بين جيل وجيل
وتربية وتربية
وآباء وآباء
ومكان ومكان وزمان وزمان
فتأمل
هذا لب البوست
شكرا صديقي...
| |
|
|
|
|
|
|
|
|
|
Re: ذكريات اول رحلة (Re: مرتضي عبد الجليل)
|
جميل ياعبدالمنعم...والاجمل انك متذكر التفاصيل الصغيرة
بس حل لي المسألة بتاعت المتوالية العددية دي
Quote: واستطعت توفير سبعة جنيهات
واشتريت بنطلونين وقميصين وشبط
كنت قد سلمت عمر اشتراكي في الرحلة
ستة جنيهات ونص |
الباقي معاك (٥٠) قرش..
بجيبوا. بنطلونين واحد كوردروي. والتاني شارلستون وقميصين تحرمني منك وشبط مقفول؟
| |
|
|
|
|
|
|
|
|
|
Re: ذكريات اول رحلة (Re: Ahmed Yassin)
|
مرحبتين بالامير علاء سيد احمد
حبابك الف نورت البوست
شوف المفارقة وين
صبيان تحت سن الحلم بقليل
يقطعون الفيافي يسافرون في رحلة بالعربات التجارية تمتد لايام
واستقبال كبير من المجتمع المتكافل اصلا
وانظر لاولادنا جيل اليوم
كنت في اولى ابتدائي اذهب مع ندادتي واصدقاء الطفولة
نشتل البصل
اذكر شتلنا بصل مع مدير مدرستنا الابتدائية
وانا بعد في اولى ابتدائي شتلتا اربعة حيضان
بمبلغ ٦ قروش
سعادتي لا توصف عندما اعلن استاذي حسن اطال الله عمره
عندما اعلن عدد الاحواض ومبلغ الستة قروش
استاذ حسن كان يدرسنا العربي
والمدرسة مختلطة....
هسا ولدي مهند مدرسته على بعد خطوات من السكن لازم امشي
استلموا انا او اخوهو الكبير
فتململ
من المقارنة بين جيل وجيل
دا لب البوست
.......
احمد يسن يا فنان
تحياتي
هههههها
السبعة جنيهات دي وفرتها بعد شراء البنطلونين والقميصين والشبط من باتا في بحري
وحاولت والله انذكر سعر الحاجات دي ما قدرت
لكن متذكر كان عندي سبعة جنيهات
سلمت عمر ستة ونص
واحتفظت بالخمسيناية
وفي ذهني انها مصروفات على جنب فقد اجتاح ببسي مثلا
ولا يمكن اقول لعمر عاوز كدة وكدة
مصاريف جيب تحفظ كرامة الوجه
الم اقل لك
اننا صبيان شفوت
.....
تحياتي يا رجل
| |
|
|
|
|
|
|
|
|
|
Re: ذكريات اول رحلة (Re: عبدالمنعم الطيب حسن)
|
صباح الخير أخ عبدالمنعم
سرد جميل أيقظ في النفس ذكريات الطفولة البريئة
و ذكريات مجتمع جميل الكل يراعي للكل و الجميع يراعون الصغار و الصغر ينشئون معتمدين على أنفسهم
و يقومون بأعمال الكبار و يستقبلون الضيوف و يكرمونهم...
إنها ذكريات الحياة في العقود الفائتة..
| |
|
|
|
|
|
|
|
|
|
Re: ذكريات اول رحلة (Re: محمد عبد الله الحسين)
|
مرحبتين الاخ الأستاذ محمد عبدالله الحسن
شرفت البوست
فعلا فكرة البوست الاساسية مقارنة
بمكان وببراح وبتجربة جيلين
جيل الاباء وجيل الابناء
تستمر المقاربة لنرى الايجابيات هناك والاخفاقات
هنا
ونحاول ان نوفق بين براحين لمصلحة الاجيال الجديدة
وطبعا حنا ما زلنا وقد طالت وقفتنا في الكاملين
مكملين وحا اكمل
| |
|
|
|
|
|
|
|
|
|
Re: ذكريات اول رحلة (Re: عبدالمنعم الطيب حسن)
|
من بداية الجزيرة بدأ الموضوع لنا مثيرا وجديدا
القرى ممتدة على طول البصر وناسا حايمين
ومبتهجين
لم نتوقف في المسيد ولكن لفت نظري الكافتيريات الواسعة
الرحبة وكراسيها الكتيرة؛
انبهرت لم ارى كافتيريات واسعة هكذا في محطة الجيلي
بل ان المطاعم اصغر والحركة اقل
الان تغير الوضع واصبحت محطة الجيلي زحمة في ليلها والنهار
المسيد مسيد ود عيسى
محطة استراحة اذن في قلب الطريق
واصل ركبنا
السواق الراكبين معاهو اخبرنا ان محطة الوقوف هي الكاملين
توقفنا
ها هي الكاملين اذن
كافتيريات ارحب وكراسي كتار وناس كتار
وريحة الفول والشية والشاي المقنن؛
ودائما يا جماعة في المطاعم ومحلات العضة
الناس يتكون متحفزة
وضاحكة ومبسوطة للناس الضربت
والناس اللسا حا تاكل برضو متحفزة وتبلع في ريقا
وتتحرك وقد يغسل احدهم يده مرتين
كلما شما الريحة الشية بلع ريق وتحرك
بعيدا من الرهط فانتظار الطعام فيهو
رجفة خاصة للجوعى
لاحقا اكتشفت بعد كترة الاسفار ان الطعام من اهم
مطلوبات الرحلة
اذن الزوادة التي اخترعها اهلنا في السودان
تاتي من فراغ
بل تمت لحوجة المسافر للطعام
بل ان وجبة الطائرة لاحقا ب يلتهما المسافر لاخر
زيتونة
واعتقد ان وجبة الطيارة برضو تقدم لابعاد رجفة المسافر
وخوفو من الطيارة البطير في الهواء دا
اول مرة مشيت مصر والسعودية ورجعت السودان
صديق العمر خلف مشينا سوى بحري وذهبنا لمطعمنا المعلوم
مطعم الخيام في بحري طلبنا لحوم وكبد وافوال
وخلف عشرة العمر المهم هبشت هنا وهنا ومشيت غسلت ايدي وطلبت الخشاف
خلف استغرب جدا يازول مالك اوعى تكون حاسي بحاجة لا والله تمام
طيب دا شنو زمان كنت بتحب الطعام هسا
بقيت ما بتحب الطعام يا زول السعودية ما خطرة
جارنا فاطي سطر خفيف جاني الصباح
اول يوم لوصولي في الاجازة
عشة اختي تقدم لي كضيف شاي اللبن في كباية شب
ومعاه عصير برتقال متلج وجنبي ابريق مليان موية
صاحبنا جاء ازيك يا مغترب خبرك يا زول
مرحب وطوالي راح متفضل شرب الشاي الحار في نفس واحد
واعقبه بكباية عصيري شفطا وسط دهشتي وفي النهاية
شال الابريق وشرب مسافة
وتجا الابريق والتفت اليّ لاول مرة قائلا
سنة يا السعودية😂😂😂😂
تاخرت الطيارة في مطار الخرطوم ونحن انتظارا مرهقا ومملا
المهم اخيرا جاء من يعلن ان الطيارة جات
مسافر زهجان قال الطيران تجيها الهبوب
الحاجة الكبيرة في السن ردت
لا لا ياولدي ما تقول كدي الطيارة دي اكان جاتا الهبوب نحن ما انتهينا
ضربنا المشويات والفول وشربنا الشاي
وقعدنا ساعات في الكاملين حتى تخليت اننا ربما ننام
ولكن تنادى الرهط
وتداعى الرفاق
وتحرك ركبنا الميمون وقد هبط الظلام
وتمكن
فصرنا نرى اضواء قرى الجزيرة على امتداد الاسلفت
وكدة
| |
|
|
|
|
|
|
|
|
|
Re: ذكريات اول رحلة (Re: MOHAMMED ELSHEIKH)
|
محمد الشيخ يا هندسة
مراحب مراحب
.......
عارف يا محمد انبسطنا في كافتيريا حافظ
ضربنا من الاطاعيم اطايبها ومن المشاريب احلاها
وتحرك طائرنا الميمون
تبدو قرى الجزيرة على ضفتي الاسفلت هنا وهناك تبدو
وكانها سيوف مرصعة بالنجوم من غير نظام؛
مع اضاءاتها السمحة والانوار المنبعثة منها
ايقنت ان الجزيرة اكثر تطورا من قرانا في الشمال
انها تغرق في الظلام
يا سلام
ويبدو الوضع وكأن الرحلة قد استقامت
واننا تورطنا ورطة لذيذة
فقد كنا صبيانا خفافا وطائرين من الفرح
وجاءت الحصاحيصا كما كلمنا صاحبنا الراكبين معاهو
لفت نظري الاضاءة الكثيفة
لمبني كبير وضخم ولست متاكدا ان كان هنالك عمالا يدخلون وبخرجون ام لا
ولكن رسخ في ذهني ضخامة المبنى والنور الكثير المنبعث منه
لا اعتقد ان المصنع يعمل الان
لا اعتقد
الانقاذ لم تترك شيئا وصلت كل مكان وخبرت وعاثت فسادا
ولكن ذلك موضوع اخر
استمر المشوار تبدو القرى قريبة وتختفي لتظهر اخرى وهكذا
حتى وصلنا مدني
لم نتوغل داخل المدينة ولكن عند حافتها الشمالية ربما
ونزلنا كل العربات نزلت من الشارع
ووقفنا وقالوا دا وكت النوم
هذه المرة الاولى على الاطلاق انام خارج بيتنا
خارج حوشنا
خارج سريري
دير لنا اخواننا السواقين سريرين سفريين
ونمنا
......
ساواصل
| |
|
|
|
|
|
|
|
|
|
Re: ذكريات اول رحلة (Re: Ahmed Yassin)
|
صديقي احمد يسن
شكرا لمرورك العطير
تصدق انا بالكاد اتذكر بعض التفاصيل
فقد مرت مياه كتيرة تحت الجسر وفوقه ايضا؛؛
ومرت احداث ومرت سنين ودنين ووراها ليالي
هل تصدق ان رفيقي في الرحلة عمر بركات لم نتناقش ابدا
حول هذه الرحلة طوال التلاتين عاما الاخيرة ربما
رغم اننا نتقابل زمان يوميا وبعدين سنويا وتاني حسب الاجازات
عمر اغترب لسنين بالامارات وحضرتي هنا في السعودية
كلمته ايام زواجه الميمون تزوج قبل
قال لي ان شاء الله احضر عرسك ياخ
واضاف ان شاء الله تحضر انتا عرسك
اوعاك من العروس في المطار
😂
المهم الرحلة دي كانت في اخر غرفة من ذاكرتي (القوية)
القوي الله زي ما قال زميلنا في الجبهة الديمقراطية ارسلناه لزميل اخر
ليقنعه بالتوقيع ولو بالاحرف الاولى معانا في التنظيم
وعندنا سالناه كونه تاخر اننا سنرسل فريق اخر للحوار مع الزميل المرشح
سالناه ان كان زميلا مضمونا فرد
الضمان ضمان الله يا زملاء
زميل تاني اوكلنا له بتجنيد صديقه
كل مرة يرفع تقرير خلاص بتَّبْتو خلا ص كسرتو خلاص انتهيت منو
المهم لما تاخر ارسلنا كادر تجنيد اخر وانحز المهمة في وكت قياسي
وبعد فترة سالناه عن صاحبو كان كان معاهو في التجنيد وكان بقولك شنو
قال والله بتونس معاي ساكت😂
المهم الرحلة دي اتذكرتها قبل ايام في نقاش مع اصدقاء في قروب واتساب
من الكاملين
اها جيت فتحت البوست واهو بنحاول
الرحلة كانت نهايات الصيف وبدايات الخريف
اذكر تماما ان الجو كان ممطرا ولا شمس هناك من ما مرقنا من مدني لحدت ما وصلنا كسلا وتجاوزناها
كان المطر جميلا وخفيفا
والخضرة على مد البص
وبالمناسبة استحمينا في ترعة الرهد
عمك من اهلنا وسواق في عربية
ملص كل ملابسه في العربية ومشى ملط حتى الترعة
واستحمى ورجع
والماس يتكشموا وهو ولا يهمو
قابلته قريبا ام يعد يسوق عربات
ولكنه ما زال لطيفا ومتجاوز ومنفلت
وقد لاحظت ان المزارعين اهلنا الكبار اباءنا عندما نكون في المشرع الصباح وعاوزين نعبر
الجزيرة بالمراكب كل بوم واحد او اتنين يطلع كل ملا بسه
على ضفة النهر ويضع يده على موضع عفته الامامي
وينزل يستحم بموية الصباح الباردة
ويلبس ملابسه وينضم لاخوته المزارعين
كل اعمامنا واخوالنا على مدى الموسم يستحوا كدة
نحن الشباب لو استحمينا بنحتفظ بالملابس الداخلية دون الفنيلة
احمد يسن هوي طولت عليكم
سلام ساعود
| |
|
|
|
|
|
|
|
|
|
Re: ذكريات اول رحلة (Re: عبدالمنعم الطيب حسن)
|
درسنا المتوسطة والثانوي في الجيلي
حوالي خمسة كلم متر من حلتنا
كنا نذهب للمدرسة بالبص وفي فترة عملنا عجلات
ولكن معظم ذهابنا كان بالعربات السفرية
كنا من حلتنا كتار جدا ندري في متوسطة الجيلي
دفعتنا بس ١٤ طالب وفي ناس ورانا وناس قدامنا
ممكن تكون نقترب من الخمسين
معظمنا كنا نمشي الشارع الرئيس
الرابط بين الجيلي والمدن والقرى التي شمالها حتى عطبرة ربما
غايتو كنا نقيف على مجموعات
وما خذلنا يوما اباءنا واخواننا السواقين
والله فكرت منذ سنوات ان اكتب بوست
اقول فيه شكرا لكل سائقي العربات السفرية
في واوسي وودرملي وكل قرى قري
وفي البسابيز وحجر العسل
ومن السبلوقة ومن شندي وكل قراها وشمالا
حتى عطبرة
ياخ ديل اصحابنا يقيفوا لينا ويوصلونا
وربما في خط الرجعة نصادفم
كيف يرون فينا اولادهم واخوانهم الصغار
غايتو ان ست سنين
عديتا انين في الجيلي بنين يا حرف السين
كلنت هذه الستة معظم ايامها ركوبا ملح مع الاحباب الاصحاب
السودان دا عظيم
باهلو البسطاء وناسو التحتانية
ونسيجو الاجتماعي المتماسك
شكرا جميلا اصدقاءنا السودانيين السواقيين الاصيلين
تحياتي لكل من له سيارة سفرية وكان يسافر بخط الشمال
الجيلي
في الفترة من١٩٨١حتى ١٩٨٦
احبابي واصحابي
القومة ليكم
يا لكم من عظماء
والعظيم هو السواق...
| |
|
|
|
|
|
|
|
|
|
Re: ذكريات اول رحلة (Re: عبدالمنعم الطيب حسن)
|
من ما مرقنا من مدني
متجهين شرقا
مافي اي شمش
والخضرة تحيط بجانبي الطريق
فيبدو الاسلفت كانه شريط يلمع وسط الخضرة
تزكرت تلك الساعات الان
نفسيتي ارتاحت
وغابت عني الهموم
الذكريات الحلوة الخضراء تكسب الانسان الراحة
النفسية ويعود لتلك اللحظات الخصبة الحلوة
فقد رايت امي التي ولدت على ضفة النهر وعاشت
طفولتها وشبابها هنالك
وعقب الفيضان الكبير تحرك الرهط شرقا
تحرك مسافة تهبشك غنوة واناولك كاس
كانت امي تذهب للزراعات على ضفة النهر
خاصة في موسم الفيضانان بعد انحسار
النهر يزرع اهلنا اللوبيا ويزرعون العدسي
ويزرعون العجور كانت امي تذهب لمرتع صباها
وتاني بخيرات النيل
كانت ملامحها تاخذ من الطمي عمقه
ومن الخضروات ينوعتها
ومن الماء نضرتها
فتبدو سيدة مكتملة الجمال
تبدو كانصع ما تكون الام
وترجع طفلة تلعب بين جدول وزهرة...
كان ابوي الذي عاش فترة طفولته وشبابه
في الفضاء الممتد من وادي سوبا شرقي ام ضوا بان
حتى تخوم ابودليق نواحي ريرة والصفيا
من عمق البطانة حتى تخومها
استقر على ضفة النهر بعد ذلك
كان عندما ياتيه اخوانه واهله الذين ما زالوا
يقيمون في تلك النواحي
كان يسهرون في انس وأضاحيك وحكاوي
وكان وجه ابي يكتسب وضاءا وجمالا
ويبدو وكانما رجع القهقري لتلك البوادي
الفسيحة
وتحررت روحه وانطلقت
اراه ويكاد ان يعود شبابا والقاً وجمالا
اذن الذكريات للانسان تعود به الى ايام الصفاء
ويعود دهرا قد تولى يا بثينة
المهم
عجبني الشرق
خضرة وحلاوة
وجو جميل وحنين
اكلنا في الشوك وربما القدمبلية بس مش متاكد من الاخيرة
وراينا البدو الجميلين على جمالهم المتينة
وعجبتني مدينة القضارف
وفي القضارف يدوم سعدها
...،،،،،،
ساعود
وجهتنا بورسودان
حتى لا ننسى
| |
|
|
|
|
|
|
|
|
|
Re: ذكريات اول رحلة (Re: عبدالمنعم الطيب حسن)
|
اجتمعت كل العربات في الموقف
وكانت الدنيا ليل
الموقف فسحة كبيرة تتجمع فيها كل العربات السفرية
تلك الشحنت والفاضية المنتظرة الشحن
ويتواجد فيها على الاطراف مكاتب الشحن والكوموسنجية
اها عربات منطقتنا تتجمع في مكان من هذه المواقف منخفض
ويتونسون عن اتحركت متين وصلت متين
وكل واخد يحكي انه ناس في القضارف مثلا ووصل بورسودان الساعة كدةً
والتاني نمنا في ..... ووصلنا كدة والتالت والرابع
عمنا بركات السواق اطال الله عمرو
لا يحب الكلام الكتير
قال للجماعة البتعالطوا ديل
يا ناس هوي ما تزعجونا البنوم في كسلا ول فرنسا
في النهاية بجي ينقطع في الحفرة دي...
ساحكي عن بورسودان
ساحكي عن المدن الساحلية؛
| |
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
عبدالمنعم الطيب حسن
ياسر السر
Osman Musa
MOHAMMED ELSHEIKH
علاء سيداحمد
Ahmed Yassin
محمد عبد الله الحسين
فيس بوك
تويتر
انستقرام
يوتيوب
بنتيريست