|
|
|
 Re: اللخيدر شديرة الاراكا يا الاهلك حموك ما ب (Re: Hassan Farah)
|
Quote:
لك التحية الاخ خضر الطيب
يا اخى الشاب امير كنز تراثى مكتمل الجوانب كلمات وموسيقى واداء فنى راقى
يجب تسليط الاضواء عليه ومتابعة انتاجه خصوصا ونحن نعيش مرحلة الثورة والنهضة القادمة |
نعم يا اخ حسن دا جيل جديد بفهم مختلف
و الاخ امير مع مجموعة من الشباب بشتغلو شغل يتوافق مع متطلبات جيلهم
و انا بستمع ليهم و متابعم و بستمتع بآدائهم الرائع في الأغاني التراثية
او انتاجهم الخاص
| |
 
|
|
|
|
|
|
|
|
Re: اللخيدر شديرة الاراكا يا الاهلك حموك ما ب (Re: Hassan Farah)
|
ديل الشباب البيدوك يقين ورحمن ذات.. انو امسودان فيها خير كتير شديد ياااااااااااااااخ..!
التحية للشاب امير..!
نجضتها نجاض السنين ياااخ..!
الليرك (الكلمات) متسقة شديد كأنوا امير والشاعر هشام ، حضروا زمن (النعيم ود سعد ، الأحى سنن البرامكة..!!) وكل من يحي سنن البرامكة ياهو زولنا تب يا حسن..!
الكلمات سمحة شديد يا حسن..ومافيها كلام..!
دخلة الفوكال..فيها اتساق كبير للغاية..ومثل هذى الأغاني هي اغنيات هادئة (نظام الونسة الدقاقة ديك)..!
التوزيع الموسيقي فيهو اجتهاد جميل شديد..!
دخلة المزيكا (شكلها زي صفارة راعي في غابة سنط وسط بحيرة موية..وهو مشهد عادي ممكن تلقاه في امسودان ، بس امرق لي من بيئة السر قدور وهنا امدرمان..!!!!!)..
الأهم ، ودي الحتة القاعد يغالطنا فيها ول ابا بريمة ، دنة النقارة (الإيقاع)..ولو لقيت فرصة يا حسن فرح..راجع الفيديو واسمع صوت النقارة الحنينة (انسى مساعد الياي/سيدنا الجيتار البيز)..دي النقارة البنعرفها وبنعرف معانيها..كما نزعم..!!
النقارة عندنا يا حسن ليها معاني كتيرة خلاس..يعني نقارة الخراب ليها مجال ، نقارة الحب برضك ليها مجال..!
يعني يا صاحبي العكودابي خدرالطيب (وديني تطلع ود ابوي الطيب عوض ريد الإ اقطع اضانك يا خدر!!)..الغلط في غنية محمد بشير الدولي بتاعة (الجدي) ، يا خدر ، انها غنية غزل اتركبت في ريتم نقارة حرب..!!
كتر خيرك يا استاذنا فرح ، وانت بتجتهد تستعدل سواطة حبيبنا خدر الطيب..!
وبالطبع التحية للشاب امير..وح اتابع اعماله..اي حاجة اقل من الليخدر..بنشدها معاهو للطيش..!
التحية للشاعر هشام ، التحية لناس التوزيع الموسيقي ، والإخراج والإنتاج..!
بالجد يا حسن ده عمل جميل ، ودي شهادة مستمع عادي، يزعم انو سمع انواع كتيرة من مزيكا العالم..!!
اها يا خدر..ناس كبر (بالمناسبة انا برلومك بي كم سنة)..ذوقهم القديم ده ياهو يقين ناس امسودان ، والدليل المزاج العالي بتاع استاذنا حسن فرح..ولمن تقدر تفهم ليه ناس (هنا امدرمان) لسع واقفين في كضبة الحقيبة..وقتها يا خدر ح تعرف حاجة وكم حاجة ذاتو..!!
تحياتي..
كبر
------------------------------------------------------------------------------------------------------------------------------------------------------
نان ما (صبيتا) يا الحبيب....
شغلهم حلو وانت زتو عسل نحل اصيل
ابداع فى الكلمات وفى اللحن وفى صوت الشاب امير
وانت ابدعت فى الوصف...كلام ناس ضهارى ما كلام ناس مدن
شكرا لك الحبيب كبر
| |
|
|
|
|
|
|
|
|
|
Re: اللخيدر شديرة الاراكا يا الاهلك حموك ما ب (Re: Hassan Farah)
|
تحية لحبايبنا الفوق جميعا
اشتقاقات ايقاع الدلوكة...والريتم الحماسي
اللخيدر ...الليركس ما فيهو كلام....
المقدمة او الدخلة بالة خشبية او الات النفخ ..فيها احساس موسيقى وكان حيكون اجمل
اذا كانت البداية بايقاع من ايقاعات الحنجرة او الحلق ( الجراري ، الهسيس ، الكرير)
وادخال الة الطمبور في الجسم الموسيقي ...
بالنسبة للشاب خالد...واضح انه مجتهد ..ويبدو انه ذكي لسببين
اول شىء كان تحت عباية وتاثير (محمد الجزار) وكون معاه ثنائية في عدة اعمال
والاتنين صراحة بشتنوا الفنان العظيم الجابري من خلال ادائهم الرتيب لاغنية( ملك الطيور)
بابطاء اللحن ومط الحروف بصورة تبعث على الملل. والجابري بعبقريته الفذة عرف كيف يؤديها
بذكاء واخترافية خاصة ان العمل من ابداعات عبدالرحمن الريح.
تاني شىء خالد اتجه للاصالة والتراث ودا بحر عميق جدا
| |
|
|
|
|
|
|
|
|
|
Re: اللخيدر شديرة الاراكا يا الاهلك حموك ما ب (Re: Ahmed Yassin)
|
يا سلام يا احمد ياسين
بستمتع بتحليلك للموسيقى و الغناء
انا ما متخصص في الموسيقى
لكن بنقرش على بعض الآلات و صوتي على حسب رأي الاصحاب جميل
محتاج لشغل في الجانب دا و و ممكن بعدها اكون مطرب كبير
لكن هسي على حسب رأي الوغد معتز القريش ممكن اكون مشروع قونة
تباً له معتوه و محبط هههههه
رغم انو ما قصر معاي اهدى لي اورغن و اكورديون و استلف لي لفترة
عود سنين من حبيبنا دكتور حيدر صادق
| |
|
|
|
|
|
|
|
|
|
Re: اللخيدر شديرة الاراكا يا الاهلك حموك ما ب (Re: خضر الطيب)
|
خدر ود الطيب
Quote: لكن بنقرش على بعض الآلات و صوتي على حسب رأي الاصحاب جميل
محتاج لشغل في الجانب دا و و ممكن بعدها اكون مطرب كبير
لكن هسي على حسب رأي الوغد معتز القريش ممكن اكون مشروع غونا |
اكيد انت فنان واضانك جميلة...لانك ود الحوش الفني و ودالتلاتة حيشان
ياخ عشان جبت سيرة معتز قريش انا مني ليك كمنجة هدية..عشان نكمل ليك الفرقة حقتك
| |
|
|
|
|
|
|
|
|
|
Re: اللخيدر شديرة الاراكا يا الاهلك حموك ما ب (Re: Ahmed Yassin)
|
يا سلام عليك يا احمد يا فنان
Quote: اكيد انت فنان واضانك جميلة...لانك ود الحوش الفني و ودالتلاتة حيشان
ياخ عشان جبت سيرة معتز قريش انا مني ليك كمنجة هدية..عشان نكمل ليك الفرقة حقتك |
و هديتك مقبولة يا حبيب
لما درسنا انا و معتز في مدرسة الدويم تلاتة المتوسطة
كان عندنا استاذين طبعاً كل اساتذتنا وقتها كانوا رائعين
لكن الاتنين ديل كانوا الاروع و احد فيهم عازف كمان في حفلات الدويم
و الثاني بعزف آلات كتيرة و كان في حصة موسيقى دخل فيها معتز و بعض الزملاء
انا كنت مسئؤل من الإذاعة المدرسية و الصحيفة الحائطية ما كان عندي وكت ليهم
جمعتني الظروف با ستاذي الأخير دا و هو العزيز الغالي أبي عز الدين البشرى
له التحية و التقدير و اتمناه بخير اينما كان .. فرقتنا الايام
قال لي تعال نعمل ديل .. انت اعمل لي استديو فيديو في غرفة خصصا للغرض دا في بيتو
و اطلب مني العاوزو قلت ليه عاوز اتعلم العود لو ممكن , وهو عازف متمكن في العود
مشىينا سوق آلآت في مدينة الرياض اختار لي عود و بعده بدا يعلمني
العود لما شافو الفنان عبد الرحمن عبدالله قال لي دا من اروع الاعواد
العود كان عراقي
في شخص آخر هو كان زميلنا في التلفزيون هو مهندس ديكور و عازف متميز
في آلة الكمان كان في فترة الفطور بجيني في المكتب و بعزف بعد ما يخلص المقطوعة بقوم بمد لي الكمان
هاك اعزف بقول ليهو يا باشمهندس انا ما بعرف اعزف
بقول لي حاول اعمل اي حاجة تطلع نغمة اصابعك دي مؤهلة للعزف
و بدا معاي بعدها بصورة علمية مشيت مرحلة كويسة على حسب تقديرو
لكن شغل الاعلام مؤلم رغم المتعة لكن مابتلقى زمن كافي مع الالتزامات و الاجتماعيات لممارسة الهوايات و الاهتمامات الاخرى
شكراً ليك يا احمد و آسف للإطالة و ان شاء الله تجمعنا الايام
| |
|
|
|
|
|
|
|
|
|
Re: اللخيدر شديرة الاراكا يا الاهلك حموك ما ب (Re: Biraima M Adam)
|
كتب الأخ أحمد يسين
في بوست للأخ كبر .. تحت عنوان: "فاطنة سيدي غالي وجماليات النشاز" ... الزول الذي لم يطلع علي ذلك البوست يجري جري .. العنوان كما كتبته .. لأن البوست مكبشر عندي .. لأني قلت أن الموسيقي في البوست أشبه ب "المدتيشن" .. أفتح البوست وأنفكي علي وجهي من شدة التعب ومهانة الدنيا .. والسماعات في أذني .. الأولاد بابا أنت عيان .. أقول لهم بأصبعي لا لا ..
هنا ما كتب ول أبا أحمد يسين
Quote: كبر مستلهم وباعث التراث الافريقي والجمال
تقول الاغنية التراثية القديمة :
لا بد أن تدفنوني في قطعة بيضاء
ناصعة من الكتان
وصدقوا عني " ثلاث أغنيات من غناء إمزاد" و "الفاتحة"
امزاد هي الالة الشعبية المشهورة التي كانت تعزفها النساء وتطور الامر
بادخال الالات الغربية الحديثة وبعض تراكيب الايقاع الى اغاني غرب افريقيا
حتى يصل صوتهم الى افاق الانتشار خارج حدود افريقيا.. مع الحفاظ على العناصر الرئيسية للاغنية
زي الايقاع واللحن والسمات العامة للاغنية الافريقية
وطبعا الريادة والسيادة في الانتشار كان للفنان المالي (سالف كيتا) و(ياسو اندور)
من السنغال و(علي فركتاوي) و تيناورين التيوار) وغيرهم قليل
الملاحظ ان الايقاع الصحراوي هو ايقاع (التيندي) المنتشر على طول ساحل غرب افريقيا
فاطمة مع ان الفيديوهات المرفقة جميلة لكن الفنانة دي فيها (repetition)او تكرار
مع انها تقف وتعزف الجيتار مثل العجيب (توم فيرلين) |
هذه المداخلة رجعت ليها كل مرة أستمع للأغاني في ذلك البوست ... يا حبذا ول أبا أحمد يسين .. يكتب لينا الأسماء حينما يتحفنا بمثل هذه المداخلات .. بالأسماء بالأنجليزية أو حتى الفرنسية ليساعدنا في المتابعة ..
سعيد بهذا المنبر الذي يجمعنا بالمدعين أمثال ول أبا أحمد ياسين وكبر ..
خضر، سلام .. أستاذنا حسن فرح عملها .. أها أنا عفيت منه تب دنيا وأخري .. والجايات أخير من الفايتات ..
بريمة
| |
|
|
|
|
|
|
|
|
Re: اللخيدر شديرة الاراكا يا الاهلك حموك ما ب (Re: Biraima M Adam)
|
ههههاي .. غلطة شاطر .. كما يقولون ..
| Quote: سعيد بهذا المنبر الذي يجمعنا بالمدعين أمثال ول أبا أحمد ياسين وكبر .. |
المبدعين .. بالله شوفوا حرف واحد غير الجملة بأكملها ... وهذا يذكرني أبن عم لنا وجاء نزل عنده عمنا الحاج عثمان وهو أكبر أعمامنا ذبح أبن عمي ذبيحه لإكرام وفادة عمنا .. فعمنا معروف عنه قليل لتناول اللحوم رغم غناه قبل التمرد .. لديه ما يزيد عن الألف رأس ..
وبعد تناول قليل من القطع من هنا وهناك، قال عمنا "الحمد الله .. اللهم أدمها نعمة" .. فرد أبن عمي وهنا الفازورة ذي الغلطة الفوق، قال: "يا عمي والله أنت أكلت" .. فقال له عمنا "نعم أكلت .. طعام طيب" .. فقال أبن عمي "زوجتي تحرم (تطلق) علي .. أنا قاصد أنت ما أكلت".
وأنا كمان "زوجتى تطلق علي .. يا ول أبا أحمد يسين وكبر لم أقصد مدعين .. بل قصدت مبدعين"!
بريمة
| |
|
|
|
|
|
|
|
|
|
Re: اللخيدر شديرة الاراكا يا الاهلك حموك ما ب (Re: Biraima M Adam)
|
هيييييييه
زمان قلنا اهلنا في غربنا العجيب هم اغنى بنى ادمين فنيا وتراثيا
ضربة النقارة دي ممكن تألف فيها مؤلفات موسيقية ..
خليك من المردوم البقولوا جابو الفلامنكو من اسبانيا عبر شمال افريقيا
الجمال والشغف وين ؟ وكيف تعرف ان الله يضع فيك لمسة جمالية وانسانية وتعبيرية
بترفع مقامك....اهو الدليل اتنين من امتع خلق الله..
كبر + بريمة
والاتنين هم ايقاع ميزان ٤/٤
هسي الواحد يرد على بريمة دا كيف؟ حيرني زاتو
ياخ السودان دا عشق و...زي كبر وبريمة ديل هم الباعث الحقيقي لهذا العشق
| |
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
Hassan Farah
خضر الطيب
Kabar
Ahmed Yassin
Biraima M Adam
فيس بوك
تويتر
انستقرام
يوتيوب
بنتيريست