. . يا ساااارية الجبل ياااااا حمدوك القضــــاء والنيابة . . 📄 ورحل صلاح : 👈 لو قلتي انكِ لستِ اتية لأسكتي فيَّ النيران لو قلتِ ، عبر المدى... عيني مشردة ترعى خيالك ربما جئتِ ، تتهامس الاشواق اتية وتصيح بي الاوهام... لن تاتي..... ولن يأتي صلاح ابن البادية فقد رحل بالأمس عن دنيانا الفانية تاركا لنا ارثا ضخما من الأغاني والألحان لطالما ألهبت مشاعر الناس علي مختلف مشاربهم العاشق منهم والبعيد عن وطنه والعريس ليلة عرسه وغناها للستات وكان كل حلمه عايز يكون بهجه ومسره فى دروب البائسين ويبقى صفقه وغنوه حلوه تسعد القلب الحزين ، وظل يحلم بأن يكون لقمه طاعمه يشبع المسكين وجائع قضى يومه يكد ويكدح ودخله ما رضيان يطاوع ، هكذا كان صلاح ابن البادية ما كان يبخل على الحبيب حتى لو أراد له أن يبكي يقول له: إنت لوداير بكاي الف اهلا يا دموع ، مهما ألقي النار في دربك برضي اشتاق للرجوع.... يسأل حبيبه لا غاضبا بل مستفسرا يا حبيبي أكلما قلبىّ المغرم احتمى بك وانزاح ملهما عاد كأسا بلا حبب؟ ثم يخاطب الحبيب إن تكن أنت لم تزل يوم بدر المنى اكتمل نحن شلناك فى المقل وقعدنا على اللّهب..... لم يبخل علينا صلاح ابن البادية بل نثر علينا من جمال روحه التي تشبعت بحب هذا البلد وغمرنا بلطفه وأدبه وذوقه الذي أخذ من جمال النيل بهاهو ومن مناظر الثغر صفحة ومن ريهد البردي لوحة ومن نخيل الباوقة طرحة ومن مريدي السمحة نفحة.... لن ننسى يوم غني لفرح السودان كان كأني به يقول لنا صدفة غريبة لقيتو الليلة صدفة جميلة لقيتو الليلة بعد غيابو ليالي طويلة فعلا كانت صدفة غريبة أن جاءنا في تلك الليلة الفرح ، صدفة غريبة جانا زاير الامل القرب ليوم باكر والنور الفجر دروبنا بشاير وصدفة غريبة أن يكون مطربنا في تلك الليلة صلاح ابن البادية بثغرو الباسم وحنانو وعطفو وشوقو الظاهر بحب واماني وعاطفة نبيلة ، يغني لفرح السودان وهو يردد بينه وبين نفسه هدي بي ياشوقي هدي هدي بي قبال تعدي انت ماملزمني حدي بس تشيل فوقي وتودي.... كان يشعر بالتعب ويداريه عننا بالفرح..... كنا في غاية الطرب والفرح في تلك الليلة ولم نفوق حتى فات الاوان والانكتب علي جبينا الليله بان ، اصبحنا اغراب نحن القراب لارعشه لا لمسه حنان حيث سكت الكنار.... غنى لفرح السودان ثم سافر ليموت بعيدا كأنه لا يريد للبلد الذي غنى لفرحه أن يعاني الحزن والأسى من رؤيته وهو يسلم الروح لبارئها ففضل أن يموت بعيدا.... في الأردن رحم الله الفنان صلاح ابن البادية بقدر ما حب هذا البلد وبقدر ما حب ناسه وسعى لاسعادهم.... خالص العزاء لكل السودان ولمحبي صلاح ابن البادية وأهله وعشيرته وانا لله وانا اليه راجعون.... 📌 ابووضاح📌 .ه. .ه. 📰 التيار: 👈 تحقيق استقصائي لـ”التيار” يكشف أخطر عمليات سرقة للآثار بالبلاد 📌 أيواااا أهو دا الملف الأنا متمني يجي زول يفتحه . 📰 التيار: 👈 ود مدني: عصابة ترتدي زيًا نظاميًا تقتحم منزل مواطن وتنهب مليارات الجنيهات 📌 المواطن جاب المليارات من وين والعصابة القال لها هنا في مليارات منو؟ . 📰 التيار: 👈 مصادر لـ”التيار”: استحداث منصب”نائبين” لرئيس مجلس السيادة 📌 خلاص بدينا؟ . 📰 التيار: 👈 الشيوعي يعلن رفضه لهيكلة الحرية والتغيير 📌 والكيزان برضوا رافضين انتو ناس قحت ديل هندوس؟ . 📰 التيار: 👈 مخاوف من الإفراج عن مدير الأقطان بالتسوية وطيّ ملف فساد الشركة 📌 طي شنو موكيت هو... دا ملف بلاط عديييل... . 📰 التيار: 👈 المتحري: أفراد شرطة شاهدوا المتهم”سيف تيري” يحمل” ساطور” 📌 وأفراد الشرطة ديل ماشافوا الناس الفضوا الاعتصام مالهم؟ . 📰 الجريدة: 👈 تورّط سوريون في تهريب فحم الطلح 📌 ديل ورطوا معاوية بن ابي سفيان في حرب مع سيدنا علي ابن ابي طالب كتير عليهم تهريب الطلح؟ . 📰 الجريدة: 👈 النيل الأبيض: 60% من أراضي الولاية غمرتها السيول 📌 يلا سلوكتكم وازرعوها عيش . 📰 الجريدة: 👈 زيادة في أسعار البصل واللبن ودعوات للمقاطعة 📌 حليلو هو... بعد شوية باقي لي الناس تعيش على الموية الزرقاء ودا اذا اتلقت . 📰 الجريدة: 👈 وزيرة التعليم العالي توصي بإقالة مديري الجامعات ونوابهم 📌 ما توصي حريص . 📰 الجريدة: 👈 فرنسا تقدم مساعداتٍ للسودان بقيمة”60″ مليون يورو 📌 هسع كان الكاشف كان يختهن تحت المخدة ويرقدوا فوقهن هو ووداد وزول ما يسمع بهن . 📰 الوطن: 👈 قوى "التغيير" ترسل وفداً للقاء عبد الواحد بباريس 📌 الا يرسلوا معاهم لودر يزحزحوهو بيهو . 📰 الوطن: 👈 اتهامات لـ "الطيران المدني" بتجاوز قرارات "حمدوك" بوقف التنقلات 📌 الطيران المدني دا شغل الجماعة في جميع انواع التهريب معتمد عليه معقول يسمع كلام حمدوك . 📰 الوطن: 👈 "التربية": إجراء امتحانات الشهادة الثانوية في موعدها مرهون بشروط 📌 اولها عدم التسريب . 📰 الوطن: 👈 إتحاد المصارف: قادرون على تلبية إحتياجات العملاء من "الكاش" 📌 هو العملاء فضل عندهم قروش ؟ . 📰 الوطن: 👈 القيادة السعودية تدعو "حمدوك" لزيارة المملكة 📌 استدعاء يعني والا كيف ؟ . 📰 الانتباهة: 👈 الكشف عن”424″ شركة تعدين تتبع للنظام المباد 📌 علي اليمين الناس ديل كان ما لحقناهم بالثورة دي كان قدوا الواطه دي لامن مرقوا بالصفحة التانية . 📰 الانتباهة: 👈 أمر بتوقيف مأمون حميدة... 📌 تالته تالت ياخيبتها.... هو دا أكنو لي هسع ماهو موقف؟ . 📰 الانتباهة: 👈 نبيل أديب لـ”الانتباهة”: الوثيقة الدستورية”المعدّلة” لم يوقّع الطرفان عليها 📌 نحن الوثيقة دي ذاتها خليناها بقينا ناس بيان بالعمل . 📰 الانتباهة: 👈 قرارات مرتقبة لهيكلة المالية 📌 كمان جاتنا هيكلة الهيكل العظمي؟ . 📰 الانتباهة: 👈 طلب للمحكمة الدستورية بتسليم البشير وهارون للجنائية 📌 آميييييين . 📰 السوداني: 👈 وزيرة الخارجية لـ”السوداني”: لم أستقل ومستمرة في أداء عملي 📌 هَي لكن يا بت أمي في فرق بين (الداء) و(الأداء) . 📰 السوداني: 👈 الجيش: كشوفات الإحالة للتقاعد تأتي ضمن الإجراءات الراتبة 📌 مصدقنكم علي الطلاق ما تحلفوا ، مصدقنكم من غير حلفان . 📰 السوداني: 👈 تحرير عشرات الرهائن من قبضة عصابة اتجار بالبشر في الخرطوم 📌 عصابات الاتجار بالبشر ديل ما نتعاقد معاهم يبيعوا لنا الجماعة الفي كوبر ديل يمكن يريحونا منهم . 📰 الصيحة: 👈 مقتل وإصابة”8″ مواطنين وحرق وإتلاف مقار حكومية بدارفور 📌 ربنا يرحم الموتى ويشفي المصابين لكن بالمناسبة دي فاضل كم مقر حكومي في دارفور؟ . 📰 الصيحة: 👈 مبارك الفاضل: واشنطون أمهلت الحكومة ستة أشهر لرفع السودان من قائمة الإرهاب 📌 انت واشنطون دي اختك من الرضاعه والا شنو؟ ليه بي تحدثك انت براك دون الناس . 📰 أخبار اليوم: 👈 مصادر تكشف عن قرب تعيين عمر قمر الدين وزيراً للدولة بالخارجية 📌 والله بعد الشوفناهو دا ما فارق معانا عمر قمر الدين ، عمر كركدي والا عمر قضيم ذاتو . ... 📌ابووضاح 📌
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Abdulhaleem Osman
فيس بوك
تويتر
انستقرام
يوتيوب
بنتيريست