عيساوي و اعفاه حمدوك, أها الشطر الميّت الجديد شنو!

Quote: ياود البشرى القصه ظاهر الوزاره/الحكومه دى مابتدور من اول نقره الا تقوم دفره .

Quote: الاتصالات لو بقت تابعة لوزارة الدفاع ،البلد خربت

يا ترهاقا ياخ البخربها شنو البلد دي!! كانت لو ما اعفوا عيساوي البلد خربت, لوما عملوا شنو البلد خربت أها اسي الاتصالات ح ترجع تحت اي وزارة تانية غير الدفاع, الح يخرب البلد شنو الدورة دي؟ ياسيدي البلد بي زر ابوها كانت تابعة للمشير و جيشه وامنه و وزارة دفاعه, البلد كلها بي ناسها و نيلها و ارضها و كل شي وما خربت و قدر شعبنا يلحقها و يرجعها
قولوا خير يا اخوانا ما تبقوا زي الأم الما عاجيها عريس بتها وبس مجبورة عليه فوقعت شناف لا خلت الشيلة لا قولة الخير لا الصيوان لا العشا لا توب أم العريس!!

بالأكتر يا ود الزبير يا خ ان شا الله بخير و الاولاد و حاسدك على حضورك للثورة لايف من الاعتصام لغاية اعفاء عيساوي
موضوع تبعية جهاز الاتصالات لوزارة الدفاع ليس اشاعة -اللهم الا لو كان نسخة القرار الصادر من المجلس الانتقالي الشفناها في الاسافير مزورة!
عموما الناس ما تجزع وتعمل مناحة من اي شي وكل شي, ما في قرار له قدسية ولا يمكن تعديله او الغائه! هي الوثيقة ست الشي زااااتها يمكن تعديلها! تاني شنو؟
الناس تشيل الصبر شوية وتدي حمدوك واركان حربه الما كملوا اسبوع ديل فرصة يشتغلوا و يتعرفوا على وزاراتهم ومهامهم الراجياهم
لكن الناس ماسكاها الشفقة و عايزين زي ما قال عاصم العربية المقرشة ليها تلتين سنة تدور من أول نقرة وكمان عادمها يجيب موية! و النكتة انو واقفين نتفرج لا عايزين ندفر ولا حتى نساهم بقولة صلي ع الني و يدّك معانا يا شاب, بس ادينا ربّيع اليدين و النقد و التنظير ومش كدا وبس بل كمان التخوين و الشكشكة !

هههه هلا مولانا, غايتو الثورة دي بخيتة بي الله! عندها اربعين مليون كتالوج لازم خطواتها تطابق التعليمات وإلّا اصبحت ربع ثورة ونص مدنية و خيانة كاملة!
زمان ناس الاحزاب عرفوها لامن قالوا ما ح نشارك في الحكومة التنفيذية! اظن متوقعين نوع الرقابة القبلية و البعدية و الفي النص دي!
شعب خرمان خلي بالك لمحاسبة المسؤولين تلتين سنة البفشل ولا يسرق كله بنشوفه بترقى او يتحول لمنصب افضل, ما قادرين ندي الحكومة دي فرقة خمسة دقايق يجروا نفسهم بس عايزين نغيرهم من تاني يوم !!

(عدل بواسطة محمد البشرى الخضر on 09-15-2019, 09:00 PM)