ما حدث في ندوة الحرية والتغيير في الفاشر.. طرد وفد قحت

Quote: اول مهمة من مهام الحكومة الانتقالية خلال الست شهور الجاية هي تحقيق السلام الدائم البشمل كل حركات الكفاح المسلح من دون استثناء و في معلومة مهمة لازم نوضحها. احنا ما في عداء بينا و بين الجبهة الثورية و لا في عداء بينا و بين حركات الكفاح المسلح بل العكس احنا نكن ليهم كامل الاحترام و التقدير و بنؤكد انو هم ناضلو قبل ناس كتار جدا بدأو النضال ضد نظام البشير و قدمو في سبيل ده الارواح و المهج و قدمو حياتهم يعني في ناس حياتهم كلها عايشنها في الاغتراب من اجل قضية شعبهم و ده لازم نؤكدو احنا بنكن كل الاحترام لقيادات حركات الكفاح المسلح و قوى الحرية و التغيير عملت اجتماعين مع الجبهة الثورية من اجل تقريب وجهات النظر و تبني القضايا المشتركة. اجتماع كان في اديس ابابا و اجتماع كان في القاهرة و الجلسات دى حتستمر و ما حتتوقف علي الاطلاق لانها قضية مشتركة و هم جزء من قوى الحرية و التغيير و لازم تستمر اللقاءات البتقرب وجهات النظر. في اديس ابابا احنا اتفقنا علي ورقة كانت اسمها قضايا السلام الشامل. الورقة دى معظم بنودها تم تضمينها في الاعلان الدستورى زى ما ذكر الاستاذ طه. الخلاف كان في نقطتين اساسيات النقطة الاولي الذكرها الاستاذ طه انو تحديد نصا الجبهة الثورية في الاعلان الدستورى و كان في تقدير الناس الموجودين كلهم في قوى الحرية و التغيير انو اذا تحدد انو السلام يتم مع الجبهة الثورية نصا, ده ممكن يكون عقبة في الوصول الي سلام مع باقي حركات الكفاح المسلح. دي كانت القضية الاولي القضية الثانية قضية المشاركة في السلطة. احنا بالنسبة لينا جزء من القضايا الاساسية الاتبنتها حركات الكفاح المسلح هي قضايا قسمة السطلة و الثروة ودي قضية مفهومة تماما و ما في خلاف حولها. الخلاف انو يجب انو يتم النقاش ده كجزء من مفاوضات السلام. بيتم النقاش حول كيفية قسمة السلطة بين كل السودانيين من كل المناطق بتاعت السودان بصورة عادلة و متساوية و ما ممكن يتم النقاش ده قبل او يستبق عملية السلام الشامل المفترض يشمل كل حركات الكفاح المسلح. في رسائل مهمة احنا كنا دايرين نجي نقولها و هنا برضو استميح الحضور انو نحي اهلنا في الفاشر.