أبكيك أنا ؟؟ والا أبكي عمـري الباقي لي ؟ يا منبع الطيبة والحب الكبير جوايا حي يا غالية زي موية عيني ...... يا الجيتي بعد الغربة من سفراً طويل ويوم رجعتك الدنيا شـافت فرحتك لما الدروب مع الحبايب لمتك .... وريني ليه ما قلتي لي ! إنك مفارقة وراحلة لي عالم بعيد مش قلتي لي خليك معاي باقي أيام جاي عيد ؟ ...... جيتك أنا في قلبي شايله الشوق كتير والحب أصيل ياغالية ليه عجلتي بالسفر الطويل ؟ ..... فارقتي ليه والناس نيام يا أختي لسه لسه مااا كمل الكلام ...... يا غالية ما تم الأمل ميعاد رحيلك فجأة عز الليل وصل ليه الفراق من غير وداع ؟ أيام لقاك فاتت سراع مركب رحيلك أبحرت من غير شـراع غابت ملامحك وضحكتك وكل الحكيتو معاكي ضاع ...... أبكيك أنا ؟ أبكي طيبتك وروعتك والا أبكي خوتنا وحنانك وفرحتك ما تقولي لي الموت عنيد وإيديهو هي الما خلتك .... يا أختي ما تم المنى أنا ببكي عمري الباقي وأبكيك انا .... أختك المكلومة ودراوة 3/ 8/ 2019
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة