بعد أربعة شهور في الشارع وأربعة يوم في القيادة، النظام محتار: رصاص ما رجعنا، بمبان ما همانا، سجن وطواريء ودهس، وغضبنا زايد والثورة ماشة تكبر. اي شي عملوهمو ونحنا ماسكين في حاجة وحدة: إسقاط النظام، المحاولات كلها فشلت. لكن، هسي عاوزين يستخدموا سلاح ياما انكوينا بيه، سلاح خطير هو التسريبات، الإشاعات، كلمة عااااجل عااااجل، والأخبار المفبركة، ودي أخطر من السجن ومن البمبان-ما لم نكشف تضليلهم واكاذيبهم- لأنك ما بتكون شايفها جاية من وين. نديكم مثال على الفبركة: الناطق الرسمى قال إنهم فضوا الاعتصام والعالم كله عارف إنو اعداده متزايدة.
طيب نعرف كيف إنه الخبر مجرد شائعة وما عندو اساس من الصحة؟ اول حاجة الخبر الصادق بعد ساعة أفضل من الخبر الكاذب الآن ومن قواعد أهل الصحافة الأولية والبديهية إنه: صحة الخبر أولى من السرعة في السبق الصحفي ولا كيف يا جماعة؟! الاخبار الزي دي نوعين: خبر مسرب، و خبر كضب عديل يصرح بيهو واحد من رموز النظام. ببساطة شديدة، إذا الخبر فيهو نوع من التخويف، أو شئ واضح أنه ما بتصدق، ما تنشروه وتوزعوه لحد ما تتأكدوا منه. ده النوع الأول. أما كذب ناس النظام ديل فهو اسهل حاجة لأنهم ليهم ٣٠ سنة بيكذبوا. ثورتنا دي ضد الطغيان والطغيان واحد من أسلحته الكذب وبث الشائعات والتبريد وكسب الزمن.. نوع البقول ليك حصل كضبت عليكم وهو كضاب لمن لاصقة في اسمو، ونوع يقول ليك في مية يوم مشكلتكم محلولة ونوع يقول ليك الكبري أكلوه الفيران وغيرها وغيرها
نصمد قدام سلاح الإشاعات زي ما صمدنا قدام الموت، وسلاحنا اليقين في الانتصار فالثورة ضد الكذب والكذابين. ولو في اي عااااجل عااااجل فهو سقوط النظام دة.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد البشرى الخضر
فيس بوك
تويتر
انستقرام
يوتيوب
بنتيريست