رن هاتفها طويلا مساء ذلك اليوم فحملته بعدم اهتمام لاحساسها بالتعب بعد يوم حافل بالعمل في تلبية طلبات اسرتها الصغيرة .. نظرت مطولا الى الاسم الظاهر في شاشته ، وتمتمت .. حسي دي دايرة شنو .. براي روحي مكركرة.. ، فكرت لدقائق في عدم الرد وعندما لم يتوقف الرنين ردت بتكاسل ... عبير.. الو ... ومن الجهة الاخرى كانت سميرة زميلتها سابقا في العمل ... الو ... اهلا عبير ، نمتي ولا شنو ، كيفك حبيبيتي وكيف حالكم واخباركم . عبير ... اهلا سميرة الحمد لله .. لا لا ما نايمة راقدة ساكت ، انوم وين بحري دي فيها مع الباعوض والكهرباء القاطعة دي ، كيفكم انتو سميرة ..والله كويسين ، طولنا منكم وقلت ابقى اخير منك واشوف اخباركم شنو وأسأل ما دام بقيتي تجي الخرطوم قريب مننا وما بتزورينا ... عبير ... والله مشتاقة ليكم ولونستكم ، ودايما في بالي بس عارف الفاتح راجلي برجع من الشغل المغرب وقدر ما اقول ليهو وديني يقول لي فتران ، والله زمن منكم ومن جية الخرطوم .. سميرة .. اجي ..زمن كيفن يعني .. انا حسه راجعة البيت ولمحت عربيتكم واقفة وشايفاك انتي والفاتح داخلين (اوزون) فقلت اضرب اشغالك يمكن تعزموني اجي اتضهب .. عبير باهتمام ... اوزون وين يا اختي .. انا تراني قاعدة في البيت.. والفاتح راجلي ما شاء الله عليه من الثورة دي بدات بقى ثوري شديد ، ومن قبيلك مرق قال ماشي يتظاهر مع ناس الكلاكلة ... سميرة بخبث ... يمكن اكون غلطانة او شفت واحد بشبهو لابس ليهو قميص وردي زي تي شيرت كسباوي داك.... ثم اضافت بخبث اكثر.. يمكن معاهو زميلتو في الشغل ..ياختي اعملي حسابك كويس الايام دي الرجال بقوا زي الحاجة السمحة طوالي بشلبوه منك وهم علي العليهم خفاف ولفاف .. عبير ... اي هو مرق لابس قميص وردي . هو عليك الله يشلبوهو على شنو على عماراتو ولا شركاتو .. يا ختي بلا هم .. واكملت حديثها مع سميرة في مواضيع ليست ذات اهمية وخلاصة الانطباع الذي فهمته من المحادثة انها اتصلت فقط لاخبارها بواقعة وجود زوجها مع اخرى في مقهى ...حركات (جداد ألكتروني).. انهت المكالمة وجلست وهي تغلي في دواخلها وتفكر بصوت عالي ... ياربي دي منو المبارياهو دي ... اتاريهو غاشيني وعامل لي فيها (جيفارا) ... ويوميا يتلبس ويقول لي ماشي مظاهرة ليلية ، وانا الغبيانة صدقتو ولا فكرت انوعمرو ما قال الحكومة دي عاجباهو ولا ما عاجباهو ... يا ربي اقوم البس وامشي اقفشو هناك واعدمهم العافية ، ولا اقوم الملم هديماتي دي وامشي بيت ناس امي ... ثم تتراجع عن تلك الفكرة مسترسلة في الحديث مع نفسها ... لا وكمان انا العويرة كل يوم ابل ليهو في كمامات القطن بالخل واقول ليهو شيلها عشان البمبان ... يخلخل ضروسو ان شاء الله .. انا بعد عيشة الذلة المعيشني ليها دي كمان عينو طايرة وفاتح نفسو كمان يمشي يتونس في الكافيهات ، اريتو يا يما بالكفيت اليكفتوهو ليهو ناس الامن ... ومع كل فكرة وخاطرة تمر في بالها يزداد مؤشر الغضب الداخلي لديها وتتسارع انفاسها وتنتفخ اوداجها ، وهكذا جلست في انتظاره وهي تغلي وتتوعده بينها وبين نفسها بانها ليلة ستكون في حياته ك(جمعة الغضب) ..👌🏼 وهكذا جلست في انتظاره متأهبة ومتحفزة لقدومه ، حتى جاوزت الساعة التاسعة مساءا فسمعت صوت خطواته يتتربش وهو يدخل الى البيت ، ولحظات تراه امامها مقبلا وترآي لها ان ملامح وجهه منشرحة تملؤها الابتسامة والسعادة .... الفاتح .... سلام ..... عبير وقد تحفزت له وعقدت حاجبيها .... اها جيت يا (التنين الاسود) .... ان شاء الله تكون قلبتها وزعت البيان رقم 1... الفاتح ... قربت ... بس كانت كتمة حقت رجال صحي صحي ... والله عبير مقاطعة .... حسي يعني داير تقنعني انك كنت في الكلاكلة .... الفاتح باندهاش مصطنع ..... ااي ليه ... عبير.. ياتو كلاكلة اللفة ولا صنقعت ولا شرقت ولا ياتو واحدة... الفاتح.. حتفرق في شنو يعني عبير .... بسأل بس ... لا فيك ريحة بمبان ...لا عيونك محمرة .. لا نفسك قايم ولا جزمتك دي مغبرة ... التقول بتتظاهر في الفيسبوك ... الفاتح ... يعني انتي دايرهم يقبضوني واجيك مكسر عشان تصدقي ... عبير ... اريتهم لو قبضوك.. لاقيني على عماي تغشغش فيني قال طالع كتمة ... الكتمة يا يما .. ولا مافي داعي ... دي منو الغشتك وكنت معاها وسايقا تتحاوم بيها في من اوزون لتوزون ... الفاتح باندهاش متصنع .... اوزون شنو .. انا كنت في مظاهرة الكلاكلة .. عبير ... عاوز تكضب كمان ... كلاكلة شنو ومظاهرة شنو البتمشيها ، في ناس شافوك في اوزون .. الفاتح ... وانتي تصدقي المندسين ديل..المرجفين وتكضبيني ..عليك الله جاي من مظاهرة تعبان مرهق.... عبير بغضب ... ما تكذب ..عارفاك كنت وين وكنت مع منو ... وما دام جابت ليها اوزونات وخيانات...طلقني .. اديني طلقتي دي حسه .. طلقة حية لا مطاطية لا فشنك ... تاني ما عندي معاك قعاد .. الفاتح ... يا مراة استهدي بالله في شنو ... شابكاني ما تكضب ما تكضب.. انا عمري دا كضبت عليك ... عبير ... عمرك كلو تكضب التقول رئيس وانا الغبيانة بصدقك .. يا زول طلقني واديني ورقتي .. تسقط بس ما قاعدة معاك تاني برجع بيت اهلي الفاتح ... طلقة شنو بالليل دا .. خلي الصباح نتفاهم ونتحاور ... عبير.. يا زول لا نتحاور ولا نتعاور ولا عندي اي رغبة في حوار .. لحدي هنا وكفاية.. ثم تصيح مخاطبة اطفالها وقد ايقظتهم من النوم وهي تجمع في ملابسها وملابسهم بغضب وتوتر.. قومو يا اولاد يلا اصحوا....خلاص مرقنا مرقنا.. فيسألها احدهم ببراءة.. في شنو يا ماما كتمة.. عبير... اي ماشين ناس تيتا.. صحي اخوانك ديل قول ليهم نحن مرقنا .. الفاتح... يا مراة ما تستهدي بالله واديني فرصة افهمك.. من ما جيت نازلة فيني رب رب رب التقول مكنة الفاتح عز الدين.. عبير وقد استعدت للمغادرة وهي تحمل طفلها الصغير احمد على الذي لفحته في كتفها ما بين اليقظة والنوم ... يازول ما عندي قعاد بالليل دا ولا بنتظر للصباح ... انت في طريق وانا في طريق لستك ما يعتر ليك.. وزي ما قلت ليك بكرة طلقتي تصلني... فينتبه الصغير المحمول على كتفها ويلتفت لوالده رافعا اصابعه بعلامة النصر قائلا لابيه...( التلدة ما بتتول.. بتول توكات الدول...التلدة ما بتتول.. بتول توكات الدول)... 🤣🤣🤣🤣 ما يستفاد من الخاطرة.. بعض الرجال قد يسئ استخدام الحق في التظاهر..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر التاج
فيس بوك
تويتر
انستقرام
يوتيوب
بنتيريست