In كرش ment

Quote: يا نـاس ألحـقونى .. أنا كـشــيت النظـريــة العــامة .. نظـريــة التمـدد والإنكمـاش .. بتقول أنو بنطـلونى إذا بـقى ضـيّق عـلي .. أعـرف أنو أنا شـحـمتا .. و البنطلون لمن يبقى واســع .. دا دليل عـلى أنو حـجـمـى نقص .. وبالعربى الغير فصـيح .. يعنى ضعفتا .. الكلام دا برهن لى أن الزيادة لى زول في عمرى دا .. بتكون أفقيـية .. أو تتناسب طرديا مع كمية الأكل البياكلها .. والراحات النفسية البتعرض ليها أحيانا .. في العطل و الإجازات الرسـمية .. لكن لي كم يوم لاحظت أنو بنطـلونى بقى طـويل .. لدرجـة انـو بقى يكـر بالواطـا .. حتى بعـد مرحـلة الكفكفة الثانيـة .. وهذا ما يثبت أنه .. أنا الفقـير لله .. قـد بدأت الدخول في مرحـلة إنكماش رأسى .. بالعربي الفصيح كـدا .. يعنى بديت أكـش .. القصة دى عقدتني عـديل كـدا .. دا غير الخسائر المادية .. وخصوصـا لو كنتـو متفهمين حكاية أنو الواحد متضـر .. و غــير باغى .. في أن ينهى العمر الإفتراضى لى اربعة وعشرين بنطلونا .. لا يشتكى منـها طـول ولا قـصــر .. وعشان ما أزيد من عقدتى .. ما حا أقول ليكم برضـو يديـن القميص بقـو طوال .. لأنها ما مشكلة ذات أهـمية ما دام لـم أقلق منامـكـم بهـا .. الزرايـر ما بتخـلى أكمامى تشاركنى في صحن الويكـة المفروكـة .. حـاولت أطرح مشكلتى لى معـارفـى وأصـدقائى هنا في بلد المليون إسكود .. لكن ما لقـيت واحـد أدانـى رد مـقنع .. الكـل فـاكرنى بـهـزر .. رغم أنـهم يدركون بـما لا يـدع مجـالا للشــك ..أننى لسـت بأنصارى سـنّة .. ولا ما شـابه ذلـك .. غـايتو .. شـايف لى كـومة دكـاترة في البـورد هـنا .. قـلت أكـيد الناس ديل .. بالـخبرة الأجـنـبـية الإكـتسـبوها .. مـمكـن يـورونا أسـباب الظاهـرة الغريـبــة دى .. كـمــان ولـو في ناس إتعـرضــو لنفس الظـاهــرة .. ممكـن يقـولـو لينا .. عشان الواحــد ما يلقى نفـســو حـالة شــاذة .. أعـوذ بالله من الشـذوذ