|
|
 Re: شوفوا المقال الرشيق ده: امنجي يقول:ثورة حت (Re: محمد عبد الله الحسين)
|
موكب 6 يناير: أمنجي يقول "ثورة حتى النصر"، و"والنصر قرّب"
موكب 6 يناير: أمنجي يقول
"الأستاذة سارة ضيف الله"
01-07-2019 04:26 AM
المرأة السودانية كان من الأسباب الأساسية لنجاح ثورة 19 ديسمبر...
الأستاذة الصحفية سارة ضيف الله كتبت انطباعها عن موكب 6 يناير على حسابها بفيسبوك حيث كتبت:
وصلت البيت قبل ساعة كده .... أنا بخير إلا من بعض الكدمات و دقّة تفوت ولا حلم يموت ......
الأصحاب و الأحباب أنا عاجزة عن الشكر والله ....
ضربني وشتمني (العوير) الشايل عصاية ... أجبرونا نركب بوكسي انا وعشرة بنات منهم الصديقة سارة تاج السر ...
وصلونا محظة ابو جنزير ... لفت انتباهي بنت راكزة جداً، تصرخ في وجههم دون خوف كنداكة جد جد....
ركبونا سوا في هايس، واعتدوا عليها ضرباً بالعصي في بطنها .. أنا مسكت العصاية، وقلت ليه: "ما تضرب البت دي تاني، و ما ح تمد يدك عليها" ...
هنا تدخل زعيمهم وهرش الكبار والصغار ونحنا زذاتنا سكتنا. ودخلت هي وأنا في نوبة من الغضب و الدموع لدرجة ان الأمنجي الراكب معانا اتوتر وبقي يلطف الجو بقصايد لحميد والقدال.
وقال لي "ثورة حتى النصر". ... "طيب النصر قرّب".
قمت عملت ليهو كده✌ . والله عمل✌. كده قدّام الحافلة كلها. وقال: "ده شغلنا مجبورين نعمله" .....
وهناك حيث موقف شندي الشهير بالمعتقلات قعدنا أنا و البنت الكنداكة في غرفة واحدة فشكت لي عن آلام في بطنها وانه حصل لها اجهاض قبل يوم تقريباً فخفت عليها شديد ...
قالت لي انتي بتشبهي لي "تيسير النوراني" قالت ليها "تيسير" صحبتي قالت لي لو طلعتي قبلي انا زوجة "مروان الكنزي".
خفت عليها أكثر... قلت ليها "مروان" انا بعرفوا .. صحبي يا "داليا" و بكيت تاني عشانها بت زي. النسمة ....ربنا يحفظها .....
الناس ديل طلعونا نحن قريب العشرين بنت وهم متأكدين مليون الميه، أنه نحن كنا مشاركين في موكب السيد عبد الرحمن ليه؟
ما عندهم امكانية للشراب ولا الأكل.
الناس دي معصورة شديد ظروفهم صعبه قربنا نعمل ليهم صندوق ....
حاجة آخيرة .. أنا قدر ما كنت بحب البوكسي وانا صغيرة هسي لمن اشووفه ساي بيجيني طمام. ...
احلا حاجه الامنجي نزلني انا و د. وفاء وبنت تانية، لما نزلنا في صينية بري قلنا ليه #تسقط_بس ما عرف يعمل حاجة.. شتت بس
التحية للبنات
رابعة ابو حنّة، و الدكتورات دعاء و سحر وسماح و وفاء
نحن شعب أوسطى يلا جيبوا مونة
#تسقط_بس
|
|
 
|
|
|
|
|
| |
محمد عبد الله الحسين
فيس بوك
تويتر
انستقرام
يوتيوب
بنتيريست