قوّة عين الكوز...

Quote: أرجل دي استفزازية وبمعنى كلام أولاد الحلة الواحد يقول ليك أنا ارجل منك بقطع المقابر بعد المغرب والتاني بيقول ليه أنا ارجل منك ولو راجل طالعني الخلا. المهم  الكيزان ديل قلعوا الحكم بالقوة وحكموا السودان بالقوة واشتغلوا تجارب في إنسان السودان دا بالقوة وهسع دي ما بيفكوها إلا بالقوة فدحين ديل ما يكون عندهم قوة عين كيف وهم عندهم قوة البدن كله؟ الأهم حكاية سقطت سقطت يا كيزان دي شغلة ما جايبة حقها وهسع دي المعارضة ذاتها ما مشغولة بيها وكل همها المشاركة والمهدي رئيس نداء السودان ختاها واضحة وصريحة ما في تغيير بالقوة. دحين الناس تفكر في حلول مبتكرة وآليات مبتدعة وفنون وآليات عمل مستحدثة. الزول الشايب العايز تغيير ما ينادي بشعارات أكتوبر وإبريل لأن الشباب وهم مفتاح التغيير ما بيعرفوا لا عبود ولا أزهري ولا نميري ولا الجزولي. الحكاية مش الشايب يعمل صبغة شعر ويعمل حساب في الفيس تحت مسمى "شباب الخلاص" لأن اللغة تظل حبيسة ماضيها والآليات بالية طائشة مراميها. الكيزان بيعرفوا كيف يتحربنوا اليوم أقوى حلفائهم الدول الشيوعية وأقوى علاقاتهم الامنية مع الدول الغربية وتموضعهم في إفريقيا أقوى من داخل السودان نفسه. دولة عميقة بجد وحقيقة هم معارضة وهم حكومة وهم نقابات وهم عمال وهم جنود ماسكين السوق وماسكين القلم والبوق والشايفهم ديل بس الطلائع ولو انقلبت بكرة ح يجوك يحكموك كيزان تكنوقراط . أها ديل ما أرجل ناس في السياسة؟ أكعب حاجة الواحد يعملها هو الإستهانة بخصومه وعدم تقديرهم التقدير الحقيقي  الكلام ممكن يكون حار ومستفز لكن دا ياهو الحال على الأقل من وجهة نظري وبصراحة