|
Re: طيب لو جاك ضيف؟ (Re: عبدالحفيظ ابوسن)
|
ولا زول أكال في البيت ثم انو بحسبو كيف ؟ النفر عيشة ؟ ولا عيشتين ؟ ولا عملها نميري زمان وكان الرغيف ما اساسي عند معظم الاسر الآن الرغيف اساسي والكسرة استثناء بالمناسبة طرقة الكسرة بي ألف ونص آي الطرقة الواحدة واللفة بي تلاتة ألف طرقتين
| |
|
|
|
|
|
|
Re: طيب لو جاك ضيف؟ (Re: عبدالحفيظ ابوسن)
|
في المسلسل بتاع ارطغرل أعمامك الأتراك بيكون معزومين لمن يجيبوا العضة أي زول بدخل يده في جيبوا بيطلع ليه معلقة بتاعت خشب وبيعضي فشنو الضيف يا يجي بي طرقتوا ولا كمان أكلوا ستيك
| |
|
|
|
|
|
|
Re: طيب لو جاك ضيف؟ (Re: عبدالحفيظ ابوسن)
|
ههه يا منص يعني نقول ليهم الادام علينا والعيش عليكم يا جلال هم بعتبرو الشعب عايش زيهم وبياكلو ديلفري لأنهم بخلاء سئ الطباع يا ودالقوز يا الفحل انتو بتأكلو ضيفكم باسطة بس يعني ؟ مرحبا نعومة اليدو في الموية الساقطة ما زي المالاقي موية زاتو
| |
|
|
|
|
|
|
Re: طيب لو جاك ضيف؟ (Re: عبدالحفيظ ابوسن)
|
تكلم الضيف يجيب معاهو 1- الرقم الوطني 2- حصة العيش الاٍستلمها من الحي الساكن فيهوا 3- مايجي من أساسو ** أستغفر الله العظيم اٍبه الذكاء ده كلوا - بأمانة نحن محتاجين (فهامات) !!!
| |
|
|
|
|
|
|
Re: طيب لو جاك ضيف؟ (Re: عمار قسم الله)
|
تجى الزياره شايل غداك معاك . الحكايه دى لاحظتها بتحصل عند النسوان من فتره الواحده لو ماشه زياره تاخد معاها عمود اكل خاصه لو كانو اتنين او سايقه واحد من اولادا . لكن بحكايه الرقم الوطنى دى لو جوك ناس من البلد الا تشترى الاكل من المطعم عشان تضمن الرغيف ربنا يستر من قاد الايام وما تحمله . تحياتى صاحب البوست وضيوفو
| |
|
|
|
|
|
|
Re: طيب لو جاك ضيف؟ (Re: Asim Ali)
|
شفت الهوان دة يا عمار يتحكمو فينا كتحكم الميت في يد الغاسل يا عاصم في اسرتي قاعدين نعملها لامن نمشي زيارة مفاجئة كلنا بحساب انهم ما عاملين حساب ضيوف . زيارة تواصل ومحبة
| |
|
|
|
|
|
|
Re: طيب لو جاك ضيف؟ (Re: عبدالحفيظ ابوسن)
|
تحياتي يا أبو سن
أنا من دعاة توزيع الخبز المدعوم بالرقم الوطني والبطاقة الذكية
عشان الدعم فعلاً يصل للمستحقين مش تصنع به باسطة وتورتة وكعك أو يهرب لدول الجوار.
لو استطاعت الحكومة تنفيذ هذا الإجراء فسيحدث ذلك وفرة في الخبز وتسطيع الحكومة معرفة كم من الخبز تدعم بولاية الخرطوم فعلياً وكم جوال من الدقيق وكم حاجة كل حي الفعلية.
الحديث عن الضيف أو الزائر ستكون مفهومة إذا حدد عدد معين لا يكفي الأسرة لكن ما دام ليس هناك أي إشارة لعدد الخبز بالنسبة للأسرة يبقى هذا كلام في غير محله.
ومن ناحية ثانية أي حاجة إضافية لخبز مثل الأفراح والأتراح يجب أن تكون خارج دائرة الخبز المدعوم مثله مثل الباسطات والمعجونات وصناعة المكرونات.
ورؤيتي أن يتوافق توزيع الخبز بالبطاقة الذكية مع برامج حقيقي ومدروس لوجبة التلاميذ والطلبة تحت مظلة الدقيق المدعوم.
جيراننا في الشمال لهم نظام البطاقة الذكية في الخبز والمحروقات ونحن دقيقنا المدعوم يذهب إليهم تهريباً ليأتينا في شكل مكرونة وشعيرية واسباقيتي.
نتمنى أن يستعيد الإقتصاد السوداني عافيته حتى لا تكون هناك حوجة لمثل هذه الإجراءات الظرفية.
| |
|
|
|
|
|
|
Re: طيب لو جاك ضيف؟ (Re: Frankly)
|
تحياتي فرانكلي لعلك شاهدت افلام ومسلسلات تتحدث عن فساد توزيع الخبز المدعوم ورداءته . منها مثلا طباخ الزعيم ولقد تفضلت انت مشكورا بالاشارة لأس المشكلة التهريب طيب مش اسلم منع التهريب ؟ فهو افضل للمواطن طيب نجي للتهريب الدقيق بتوزع من شركة سين و سيقا للمدن بحصص معروفة لوكلاء معلومين ومعتمدين الوكيل يوزع الدقيق بمتابعة الامن الاقتصادي وعلمه الحصص تعتمد من لجنة اصحاب الافران صححني ان كنت مخطئا ببقا من السهولة بمكان منع التهريب ومتابعة اي جوال دقيق في تقديري الاسهل والافضل مكافحة التهريب
| |
|
|
|
|
|
|
Re: طيب لو جاك ضيف؟ (Re: عبدالحفيظ ابوسن)
|
عاين الحبرتجي الفوق ده متجدع في الراين ويضرب في الباقيت ويقول انا مع التوزيع بالبطاقة الذكية بطاقة بتاعت فنيلتك هي بطاقة البنك ما بتصرف ليك قروشك دايرة تصرف عيش قال معجنات يعجنك اب ساطور
| |
|
|
|
|
|
|
Re: طيب لو جاك ضيف؟ (Re: muntasir)
|
يا منتصر افرض هسع أنت كسب جولة في الحبرتجي اللي هو كمال فرانكلي وكمان البرتجي دا قال الروووووووووب. وأنت قعدت تفرك في يدينك فرحاً. أها المواطن استفاد شنو؟ وأنت قدمت ليه شنو؟ وح تحل ليه مشكلته كيف؟
بالصفقة والنطيط فوق التربيزة .. تسقط تسقط يا كيزان؟ ولا بتناول الأمر والوضع بموضوعية؟
| |
|
|
|
|
|
|
Re: طيب لو جاك ضيف؟ (Re: عبدالحفيظ ابوسن)
|
تحياتي عبدالحفيظ ثقافتي في المسلسلات والأفلام تعبانة شديد بتذكر مسلسل الكواسر وفيلم سلام بومبي
لمنع التهريب هناك حلول كثيرة يمكن تطبيقها من أهمها هو أن تكون السلعة غير مدعومة وهذا صعب جداً تطبيقه من ناحية إنسانية ومن ناحية سياسية.
يبقى عندنا إجراءات إيصال السلع المدعومة للمواطنين وفي نفس الوقت إجراءات الحد من التهريب (منع أراها كلمة غير واقعية في ظل سعر لسلعة يقل عن سعرها العالمي فما دام هناك من يدفع سعر أكبر من سعر الدعم إذا هناك ضعاف نفوس يهربون لهذا السوق) من ضمن هذه الإجراءات ضبط الممرات البرية والبحرية والجوية وهذا صعب جداً ويحتاج لأموال تفوق عشرات المرات ما تريد أن تتفادى خسارته بالحد من التهريب.
الحل الأخر أن يكون الدعم موجهاً ومن ضمن صوره ما تفضلت به بتوزيع الحصص من المطاحن للوكلاء إلى أصحاب المخابز. ولكن هذه الحصص ليست مبنية على معلومات حقيقية وهي حصص تقديرية ولا تمنع التلاعب في أي حلقة من حلقات توزيع الحصص.
ربط الدعم بالبطاقة الذكية للأسرة يحدد بالضبط ليس كمية الدقيق المدعوم بل أيضأ يحدد كم يجب أن ندعم الحي الفلاني ومخبز الحي الفلاني من الدقيق.
ربط البطاقة الذكية بمخبز محدد يكون للأسرة حق أصيل في الصول على كوتتها اليومية من الخبز فيه شفافية عالية جداً ويوفر على الموطان أموال كثيرة كانت ستذهب إلى غير مستحقيها.
يجب النظر إلى أن هذا الإجراء هو إجراء اسعافي وليس إجراء اقتصادي ففي نهاية المطاف ليس هناك من بد غير تحرير كامل لأسعار السلع لكن لهذه السياسة متطلبات كثيرة منها رفع الحد الأدني من الأجور ليغطي منصرفات الأسرة المتوسطة الحقيقية وإرساء نظام رعاية إجتماعية لمن مدخولهم الشهري دون الحد الأدني من الإجور سواء تحت مظلة الزكاة أو مظلة برنامج رعاية إجتماعية من أموال الضرائب وغيرها من موارد الدولة ولا أرى سبباً مقنعاً لأن لا يكون للفرد السوداني حق أصيل ونسبة من أموال الذهب والبترول والمعادن.
لكن في ظل الأوضاع الحالية الدعم الحكومي مطلوب وبشدة فلنحافظ على أن يصل لمستحقيه فعلاً
تحياتي وتقديري
| |
|
|
|
|
|
|
Re: طيب لو جاك ضيف؟ (Re: Frankly)
|
محاربه الفساد والتهريب والاحتكار والسوق السوداء يجب ان يكون بعقوبات رادعه تصل الى الاعدام العلنى وتبداء المحاكمات من الكبار ان توفرت الاراده السياسيه الحقيقيهوالصادقه (من دون تسويف وخطب) لتم القضاء على كل هذه الاشكال فى شهر واحد.
| |
|
|
|
|
|
|
Re: طيب لو جاك ضيف؟ (Re: Asim Ali)
|
تحياتي وسلامي ودصُرّة منبرنا صديقي ودأب سن ذكرتني غنا جديد بلونية مختلفة لشاعرنا وعمدتنا وشيخنا الفرجوني ،غنا عميق جدا (شِدير الوِدَي) أتخذ من مربوع الغنا وسهله الممتنع اصالته، ولكنه عميق جدا وبه رمزية ,أنسنة طبيعة جمعت كل فنون الخيال بوعيها نحو المجتمع، وذاكرة تراكمية بوعيها نحو الماضي،وعاطفة جمعية متقدة جداو......الخ الشاهد هنا هذا المربوع : ياشديرن زمان في امَات قماري مقامك متغزر ورا ..وباهل الشواك قدّامك هل نزلك وراي ضيف بي محبتو حامك!؟ ولا الضيف كمان جافيتو من شدة ظلم حكّامك معزتتي للجميع
| |
|
|
|
|
|
|
Re: طيب لو جاك ضيف؟ (Re: عبيد الطيب)
|
Quote: بالنسبة للاخ السائل عن جواز صرفه للرغيف وهو يمتلك رقم وطني من سنار، نقول أنه لا يجوز ذلك وهذا تدليس، فمن كانت اقامته في سنار فرغيفه في سنار، وايم والله ما ظهرت الصفوف الا بهذا النوع من التدليس والغش. ترى الرجل يقيم في سنار ويرتاد الصفوف في الخرطوم. واعلم ان اي رغيفة اخذتها برقم وطني ولائي فهي حرام. *السناري* المقيم بالعاصمة عليه بالعصيدة فان لم يجد فبالكسرة. وان صعبت عليه فقراصة، فان لم يجد كل ذلك فعليه بالميناء البري يمتطي دابة ويعود من حيث أتى.
لا تضايقوا الناس في صفوفهم ورغيفهم |
😂😂😂😂😂😂
| |
|
|
|
|
|
|
Re: طيب لو جاك ضيف؟ (Re: عبيد الطيب)
|
مرحب منص واتفق مع عاصم في تشديد عقوبة التهريب يا فرانكلي الحكيتو فوق دة هو الحاصل الآن اقصد قنوات التوزيع اديت فرن عشرين شوال ببساطة ممكن اعرفو اشتغلها ولا باعها . في كم طريقة لمعرفة ذلك الوكيل هل سلم المستحقين المكتوبين ليهو في الورقة ولا باع برة برضو ساهلة لو ضبطت دة تاني التهريب بتم كيف ؟ اوووو العبيد متقريف ليك حرم الفرجوني من الذين يعدلون المزاج كشاعر وكفنان لكن شايف امريكا خصمت منو كفنان صوتو شايفو ما اياهو غنية مصطفي حقت حظر التجول ظنيتها زاتا حقتو ولا انا غلطان ؟
| |
|
|
|
|
|
|
Re: طيب لو جاك ضيف؟ (Re: عبدالحفيظ ابوسن)
|
اول امس يا علي مشيت اكلت فول عيش ردئ وصغير سألت صاحب المطعم قال لي ودي كمان بي حالتها دي بدونا ليها بي جنية ونص باللفة امس شفت العيش افضل قلت ليهو ما شاء الله صلحو ليكم العيش بعد نضمت مع صاحب الفرن قال لي لا زدتو بقت بي اتنين ج اول امس الشوال 25 كيلو زاد 100 ج فجأة من 600 لي 700 ج يعني تاني بزيد
| |
|
|
|
|
|
|
Re: طيب لو جاك ضيف؟ (Re: عمر دهب)
|
والسكر زاد اليوم يا دهب الشوال 50 كيلو من 1180 لي 1300 ج كريستالة صباح 4.5 لتر من 300 ج للمستهلك لي 350 ج زيوت الفول فيهو نزول
| |
|
|
|
|
|
|
|