|
Re: انطباعات عشرة ايام في السودان!!! (Re: عبدالمنعم الطيب حسن)
|
وصلت مطار الخرطوم برفقة الاسرة صباح العيد صباح الجمعة؛ صباح ١٥ يونيو الساعة؛العاشرة والنصف صباحا بالتوقيت المحلي.... -وغادرتها فجر الاحد الموافق ٢٥ من يونيو ذاتو البايخ- كان في انتظارنا بالمطار شقيقي الأكبر عبدالوهاب وابن اختي بدر الدين وسيارتين احداهما لنا؛ والتانية مؤجرة؛ سيارة هونداي اكسنت فل اوبشن؛ عشرة ايّام بمبلغ عشرة مليون جنيه اليوم بمليون جنيه طق ترق؛ جنيه ينطح جنيه.... الجنيه المنطوح أصلا، المنطوح خلقة؛ ................... سأتحدث عن اي شيء وسأكتب عن كل شيء عن حال البلد والنَّاس ومقدرتها العجيبة على التصالح من النفس ومع الواقع المر انه شعب عظيم يضحك كلما وقعت مصيبة وكل ارتفعت سلعة وتماهت وسحبت.... واختفت.... سأكتب عن الظاهر وعن المغتى وعن المغتغت وفاضي وخمج ......... خليكم قراب قراب الحاوي قراب الفيل الفيل وضلو....
............... ساحاول ان اكتب عن ما يهم المغترب وما يدور في ذهنه؛ فما انا الا غزية مغتربا جدا
ومشلهتا حد الشلهتة حد الغربة البطالة .......... ساعود؛
| |
|
|
|
|
|
|
Re: انطباعات عشرة ايام في السودان!!! (Re: تماضر الطاهر)
|
شكرا تماضر الطاهر للمرور، بصراحة الغربة داخل الوطن حارة.... خليك قريبة؛ .............
هلا الدكتور احمد امين يازول غلاء ساكت!!!! غلا الف.... بس العيد وسط الاهل لا يقدر بتمن ولا يحسب بتكلفته المادية ولكنه رغبة لأطفالي فقد ظلوا طوال العام الدراسي يتحدثون عن إجازتهم الفاتت وظلوا يؤكدون اي كل يوم ان تكون الإجازة هناك مع بداية الإجازة هنا وبطولها؛ لو لي انا كان حسبت التكلفة العالية وضحيت كوني زول مارق للربا والتلاف ولكنها عند الأطفال اجازة روحية تتلاشى فيها الماديات وتتجسد في النهاية كاروع حلم.... لا اخفي عليك استمتعت بالعيد هناك وجددت نفسيات لمقابلة غربة صعبة فرضت علينا ومن فرضت عليها غربة مشاها...
| |
|
|
|
|
|
|
Re: انطباعات عشرة ايام في السودان!!! (Re: Khalid Saeed)
|
اووووه حبيبنا خالد سعيد الأرباب شرفت البوست وشرفتني تسلم يا كبير سأكتب عن خوفنا كمغتربين من العودة للوطن حتى كإجازة قصيرة مثل هذه، سأكون معك صريحا فقد كنت مترددا من الذهاب للعيد هناك فقد خفت ان لا اجد وسيلة مواصلات تقلني من المطار حتى واوسي وكانت المفاجاءة ان حضر اخوي بعربته الخاصة واحضر سيارة اجرة لاستعملها خلال إجازتي القصيرة تلك التي قضيتها كلها وسط اهلي في ربوع واوسي الجميلة وذهبت للخرطوم مرة واحدة بعد ان تناولت الفطور في البيت وتحركت حوالي الحادية عشرة صباحا وأكملت إجراءات تأشيرة العودة لي ولاسرتي ودفعت حوالي ٣ مليون ضرائب ورسوم تأشيرة وخدمات ومسميات اخرى وتحركت نحو البلد في حوالي الثالثة؛ وسجلت زيارة في طريقي عودتي لبيت لي تحت الإنشاء في بحري نفسها؛ وتوقفت في الكدرو اشتريت منها كيلو لحمة ضأن بمتين الف جنيه وكيلو كبدة وكلاوي بنفس السعر؛ وسلطة بحوالي ميتين برضو؛ واشترت المدام كيس حلاوة بمتين الف برضو وكيلو جبنة بحوالي مية وخمسين ولعبة للطيب ابني تلات أعوام ونص ب ٢٥٠الف!!! المهم اتغديت في البيت؛ خفت الا اجد مواصلات جاءتني سيارتين في المطار خفت من الظلام وقد شهدت ايّام العيد استقرارا في التيار الكهربائي خفت من الموية. الكانت قاطعة ايّام رمضان في واوسي ولكنها متوفرة ابام إجازتي الكيزان يحاولون ان يهزموننا نفسيا نحن المغتربين عن حال البلد صحيح الوضع فوق مستوى المعاناة بكتير ولكن الناس عايشة تتزوج وتتناسل وتفرح وتضحك وتنبسط، وتمرض وتموت براها متماسكة ومتكاملة سأتحدث عن المناسبات السعيدة التي حضرتها لايف وعن المناسبات غير السعيدة سيدورضالبوست حول فكرة العودة وفكرة الاستقرار تلك لُب المسالة وعضم فكرة البوست سأتحدث عن مقدرة الشعب العجيبة على التعايش الشعب العظيم.... خليك قريب؛
| |
|
|
|
|
|
|
Re: انطباعات عشرة ايام في السودان!!! (Re: حمد عبد الغفار عمر)
|
ههههههها حبيبنا الصديق حمد لبد، يازول هوي أوعك تنطط انت شعب عظيم والكيلو ابو ٢٠٠ الف ماضروري ذاتو ربع كيلو يكفي؛ وبالعدم ام شعيفة الفكرة يا حمد ان الناس تتعايش وتتصالح وتحاول ان تعيش جداخل البلد دي؛ باي هوك او كروك؛ فقد ضاعت زهرة شبابنا في مغتربنا القاسي لا نريد لكهولتنا ان تضيع برضو في الغربة الفكرة ان نعد العدة للعودة الناس بصعوبة عايشة ولكنها عايشة ومبسوطة ياخ يضحكوا لحدت بهناك في نكتة متوسطة المفارقة وأمكن تكون مكررة ولكنهم يضحكون... غايتو نكات زي دي الا تقولا المغترب وتكلكلو عشان يبتسم الناس مهمومة ومصدومة وخائفة من بكرة لكنهم متعايشين نحن دا كلو علينا والعيشة هنا في المغتربات كلها آلية مملة ومكررة ودا الفرق!!!! ........ سي سي لصديقي الوريف عباس الدسيس الشريف؛ ..... وَيَا خالد السيد بالإنجليزي شكرا لمرورك الكريم بس جني وجن المقارنة بالريال دي يا زول الناس الهناك ديل ما بكسبوا بالريال بل ان بعضهم الحد الأدني لرواتبهم يعادل مية ريال وهنا الحد الحد للرواتب يعادل تلاتين مليون لابن البلد فالمقارنة غير صحيحة أصلا فضلا على مفارتقتها الخرافية تسلم يا رجل .......
المواطن السوداني يكسب بالجنيه السوداني فينبغي مقارنة مكسبه بمنصرفه؛ وتجد ان مصاريفه في يومين تلاتة تعادل راتبه في الشهر وكيف يتم باقي الشهر.... تلك الماساة كلها ساعود للتعليق على الامر....
| |
|
|
|
|
|
|
Re: انطباعات عشرة ايام في السودان!!! (Re: Khalid Elsayed)
|
Quote: انت طبعا عارفني لا شعب عظيم ولا بقدر على كيلو اللحمة أبو 250 ألف دا ومعاي عباس الدسيس
|
منعم يا صديق حمدلله علي السلامة حمد اخبارك يا حبيبنا عبدالمنعم بتكلم بلغة زول عندو قروش ونزل السودان اليوم ما يعادل اقل من 100 ريال يعني الشهر 3000 ريال اجمالي بالسوداني 30 مليون بالله الموظف مرتبو كم 5 مليون الباقي اتمو بشنو ياكل نيم و ل اشرب هواء المقارنة بمستوي الدخل هناك وليس بما تكسبه هنا يا حبيبنا العظمة لله ...إِنَّا لَن نَّدْخُلَهَا أَبَدًا مَّا دَامُوا فِيهَا ۖ فَاذْهَبْ أَنتَ وَرَبُّكَ فَقَاتِلَا إِنَّا هَاهُنَا قَاعِدُونَ
| |
|
|
|
|
|
|
Re: انطباعات عشرة ايام في السودان!!! (Re: عباس الدسيس)
|
هلا بالصديق الدسيس والله ليست هنالك قروش للدرجة دي؛ وانت عارف البير وغطاها؛ ياخ الوليدات عاوزين اجازة في بلدهم كما يفعل معظم أقرانهم في مدرستهم التي تعرفها جيدا من قبلي كذلك امهم عاوز الإجازة وانا ذاتي داير التغيير بعد الكتمة الصعبة العارفا... وتلاقت قمم يا مرحي يازول نستمتع مافيش حد واخد منها حاجة وانت يا عبس كل سنة تسوق الجماعة وفِي ربوع مدني يتم الكيف رغم التكلفة العالية والتعب؛ هذه أشياء لا تقاس بمادة او تعب ولكنها رسالة شخصيا مؤمن بها ان اربط أطفالي ببلدهم ومستقرهم القريب.... تسلم يادسيس ونتلاقى في الزمن النصيح ميعادنا في وش الفجر ....... ساعود؛
| |
|
|
|
|
|
|
Re: انطباعات عشرة ايام في السودان!!! (Re: Khalid Elsayed)
|
Quote: وتوقفت في الكدرو اشتريت منها |
حيا الله الكدرو وربوع الكدرو الا ليت شعري هل ابيتن ليلة بتلم الربوع اني اذن لسعيد ناس السودان ديل ولوفين ما بخلوا عاداتن بي سهوله يا منعم طبعاً يا جماعه وقفة الكدرو دي حاجه اساسيه بالنسبه لي سكان الريف الشمالي لي بحري الما بقيف في الكدرو كأنو ما دخل المدينه جرينا كرسينا وجبنا التسالي والفول متابعين ومنتظرين بي لهفه وشوق
| |
|
|
|
|
|
|
Re: انطباعات عشرة ايام في السودان!!! (Re: محمد أبوالعزائم أبوالريش)
|
Quote: انت طبعا عارفني لا شعب عظيم ولا بقدر على كيلو اللحمة أبو 250 ألف دا ومعاي عباس الدسيس
|
ههههههههههههه الواضح ما فاضح والجماعه الاثنين ديل جابو اخرن يا منعم وقالوا ليك ما تشكر الراكوبه في الخريف يا حمد والدسيس بحكم انكم مغتربين وليس مهاجرين فلابد من ربوع الوطن وان طال الزمن فقليل من تمرين العضلات لا يضير
| |
|
|
|
|
|
|
Re: انطباعات عشرة ايام في السودان!!! (Re: محمد أبوالعزائم أبوالريش)
|
حباب ابوالريش؛ ماهي ال ٩٠٪ من المنغصات التي تواجه سكان الحضر والريف منها برآء؟ ........... تصدق الأحياء الجديدة في واوسي مخططة أحسن من اي مدينة... شوارعها واسعة وحيشانا برضك ومبانيها مسلحة و جميلة.... وكل الموجود في اي بيت سوداني في المدينة هو نفسه موجود في الريف ان لم يكن اجود و اجد... ونفس مستوى الحياة في الريف والحضر واحد لجهة المأكل والمشرب واللباس... الظاهر عليك طولت الغيبة؛ .......... بالنسبة لزيارة المستشفيات ياخ أبرأ واستبرا فأل الله ولا فالك يارجل..... ..........
| |
|
|
|
|
|
|
Re: انطباعات عشرة ايام في السودان!!! (Re: علي محمد الفكي)
|
هلا بعلي الفكي؛ زمان لمن كنّا صغار لمن نصل الكدرو يتوسع الشارع ويظهر لاسلكي الحلفايا يميننا نعرف اننا ودعنا الريف ووصلنا المدينة؛ عارف مرات الكدرو بنقيف ساكت كدا مزاج وفِي الغالب نشتري الصعود واللحوم والرغيف منها ولو جينا من بحري متأخرين نضرب الشية في الكدرو برضو ولأهلنا فيها ذكريات.... بس السنة الفاتت اكتشفت ان ستدوتشات الشاورما فيها نسبة الجذر اكتر من اللحم فتجنبتها هذه المرة ....... طلب الفول ب ٢٥ الف جنيه؛ وسندوتش الشاورما في بحري بي ٣٥ الف جنيه.... وطلب الشية في الجيلي ب ٨٠ الف والكوارع ب ستين والبيض ب ٢٥ وطبق البيض ب ٨٠ الف ومحتاج غسيل بيضة بيضة تصدق؛ ......... هوووي سلام....
| |
|
|
|
|
|
|
Re: انطباعات عشرة ايام في السودان!!! (Re: Yasir Elsharif)
|
١٠ أيام بسعر ١٠ الف جنيه ...ده كلام دكتور احمد وكلامك انت بتقول ١٠ أيام بسعر ١٠ مليون ..يعني اليوم بمليون طق طرق..وهل يعني هذا ان ال ١٠ الف جنيه يعادل ١٠ مليون ...وهل ممكن تقلبوا الجنيهات دي دولارات عشان نفهم ايجار العربية بكم ...عشان عندي عربية عاوزة اعرضها للايجار.... ودمتم
| |
|
|
|
|
|
|
Re: انطباعات عشرة ايام في السودان!!! (Re: عبدالمنعم الطيب حسن)
|
Quote: بالنسبة لزيارة المستشفيات ياخ أبرأ واستبرا فأل الله ولا فالك يارجل..... |
مؤكد لم أقصد أن تكون أنت أو أحد أفراد أسرتك الكريمة قد تعرضتم لشئ - عافاكم الله. لكن أسباب زيارات المستشفيات كثيرة ... وفي حال حدوث هذه الزيارة تكون فرصة لعكس إنطباعك كجزء من (إنطباعات عشرة أيام في السودان) التي جاءت في عنوان البوست ... كما تعلم المستشفيات وما يحدث فيها هي موضوع الساعة. أما الفرق بين المدينة والريف، ليس في مستوى البيوت، لكن في ضغوط الحياة في المدينة.
| |
|
|
|
|
|
|
Re: انطباعات عشرة ايام في السودان!!! (Re: عبدالمنعم الطيب حسن)
|
ذهبت مباشرتن بعد دقايق من وصولي البيت وبملابس السفر؛ لثلاث وفيات لاعزاء من اهلي المباشرين وتلك عادة أصيلة عندنا؛ الحزن على الاحباب لا يحتمل التأجيل عزيت يوم العيد على التلاتة بيوت الذين هم أصلا جيراننا وجيران؛ ومكثت في كل بيت حتى طلبوا من الرحيل تقديرا كوني قادما توا من سفر مرهق كل الأسفار مرهقة..... رجعت بعد نحو ساعة للبيت اكملت تهاني العيد والسلام لمن لم يكن موجودا ساعة وصولي؛ باقي الوفيات في حلتنا وقرى واوسي بكرة بمشي وأحكي ليكم عنها.... وفِي البيت تحللت من ملابس السفر ومن وعثاءه؛ ولبست الملابس السودانية المريحة؛ وكانت المدام قد جهزت شيالات مليئة بالحلويات وبالكعك وبالكيك... وجلست مع اخوتي نستقبل الاهل والأقارب حتى جاء وقت غفوت على كرسي ونمت لأول مرة منذ تسعة شهور في حوشي الفسيح؛ سقفي سمائي الفسيح بنجومه البهجة الهواء الطبيعي مع بشارات الخريف يرد الروح لا زفير مكيف ولا شهيق مروحة.... هواءا طبيعيا وعليلا زاده المرور خلال شجيرات ليست بعيدك عني شجيرات ارضها مبتلة لتوها ورائحتها تعانق المدى ياخ نمت بدون كوابيس؛ صحوت نشيطا وخفيفا قبيل شروق الشمس؛ والعين تشوف بعيد وقريب تساعها نجيمات مازالت ترسل ضوءها الخافت في هذ الصباح الجميل؛ ومازالت ملايتي تهبهب خفيفا والهدوء يحف المكان يملؤه حبورا تغاريد عصافير تسكن حديقة منزلي البسيطة؛ لابد ان غناءها اليوم اكثر فرحا فأخيرا جاء من يشاركها المكان الرحيب؛ فهي مبسوطة وتغني وحبيبا معاها وانا كل احبابي هنا؛ شكرا طيوري الجميلة لحسن الاستقبال؛ شربنا شايا سادة وبلبن وأكلنا لقيمات طازجة؛ وبدا اولادي تغيير ملابسهم استعدادا لرحلة العيد في القبة قبة اجدادهم الشيخ عبدالقادر والشيخ محمد وتلك قصة اخرى... ....... سلام طولت عليكم؛
| |
|
|
|
|
|
|
Re: انطباعات عشرة ايام في السودان!!! (Re: عبدالمنعم الطيب حسن)
|
حبيبنا عبد المنعم الطيب حسن بشيري ،،، طبعا بشيري دي اهم من عبد المنعم ذاتو ...
الحكي عن السودان وعن طعامة السودان زي الخدر اللذيذ زي قعدة صحاب في الزمن الوريف . زي وشوشة حبيبة في أضانك بترتب في الزمن الجاي , وزي دعوة والدين في دغشا بدري نسماتو مقالدة القيف . ياخي السودان ده اجمل بلد .. لكن للزول البعرفوا .. البعرف يعني شنو مغربية مليانة وعود وتمني .. ويعني شنو وش الحلة مخدر .. ويعني شنو المطرة بتزرع ولا لا ( على قول ود العمدة ) وتفاصيل كثيرة صغيرة صغيرة . بتشبهنا نحن بس . بالمناسبة كيف الليمونات والشدرات الشالن شبال لباكر . والبيت الاحتواك وكل التمرد الذي كان . وتلك الونسة التي حدثتني عنها كثيرا . الونسة ام عنكوليب . تحياتي ياخ ولي عودة .
| |
|
|
|
|
|
|
Re: انطباعات عشرة ايام في السودان!!! (Re: عمر مصطفى مضوي)
|
منعم يا حبيب لك ولأهلك الأمنيات الطيبة
أولاً شوف لينا بيت في واوسي بالمواصفات التي عليها منزلك الجميل..
السودان وما أدراكما السودان هذا الحب الذي يملأ الوجدان..
أسعد الأوقات التي نمضيها في أحضانه والأهل ويعود الحب للجريان
إشتكيت في إجازتي الأخيرة لزوجتي وهي كانت في هولندا وانا بالسودان بأنني مرهق وغير سعيد في إجازتي!! قالت لي ومن غيرك يكون سعيداً وانت تسكن في مسكن فاخر وتقود سيارة برادو ونجوم المجتمع حولك!! قلت لها يرهقني ويسلب سعادتي الجانب الآخر لهذا المجتمع .. ولا أهنأ بكل ذلك.. عندما أنزل كيس القمامة وقبل أن أضعه أجد من ينبشه باحثاً عن شيء مفيد فيه!! وعندما أقف في الأستوب يأتيني طفل يمسح زجاج السيارة أو كهل ظلمته الأيام أو امرأة تحمل طفلاً بلا مأوى!! وعندما أذهب لسوبر ماركت أجد في بابه من يسأل البسيط لسد حاجة وعوز يقيم صلبه!! هذا جانب والجانب الآخر المتعففين الذين تلتمس الحاجة في عيونهم وستقبلونك بكل الحفاوة ويجتهدون في كرمك وبذل آخر ما يملكون إحتفاءاً بك !! كم هذا مؤلم يا منعم!!
السودان حلو مر بالمختصر المفيد .. هو العشق والوطن والأهل والتراب التي نتمنى أن نسكنها يوماً ولكن!!!
في القلب حسرة.. لقد تباعدت المسافة بيننا ..
سردك جميل يا حبيب واصل ونحن مستمتعين ببساطة الحرف وحلاوة الحكي..
محبتى والأمنيات عبدالعزيز خطاب
المؤسف يا منعم عدم القدرة لمساعدة الجميع و
| |
|
|
|
|
|
|
Re: انطباعات عشرة ايام في السودان!!! (Re: عزيز)
|
مرحبتين حبابك صديقي عبدالعزيز خطاب الذي هو اقرب للرياضي منه للفنان تسلم يا استاذ صاحبي فضل استاذ مرتاح جدا في بورسودان خلاها وجاء هاربا للسعودية يا زول ليش؟ لانو ما قادر أتعايش مع معاناة الناس ومعركتها اليومية لحفظ ماء وجهها وكرامتها صحيح يا عزيز المعاناة الحقيقية هي الإحساس بها معاناة الشعب فقط المرهفين الفنانين امثالك يحسون بها ويتألمون لها ويتفاعلون معها وينفعلون!!! ما بال حكامنا المجردين من اي أحاسيس إنسانية المتبلدون.... هؤلاء لا يحسسون بحسس الشعب كونهم السبب في الماساة وليهم يوما قريبا..... ونحن من مواقع متقدمة مع الشعب لن نترك للفسدة بلدنا الجميل؛ ولن ننهزم سنهزمهم الطواغيت الكبار قبل ان ينضح ديار بنار،،، ......... واوسي تسعد بك يا فنان وبين واوسي وتؤتي وشايح الدم وروابط القربى ويشوفك القلب قبل العينين ......... وتسلم وقريبا نغني جميعا يوم فرح السودان الكبير يوم التغيير؛
| |
|
|
|
|
|
|
Re: انطباعات عشرة ايام في السودان!!! (Re: عمر مصطفى مضوي)
|
مرحبتين بصديق الزمن الفلاني زمن مصطفى سيد وليالي المنصورة.... ياخ اعتقد ان تلك السنين هي ذادنا في الليالي العجاف التي عقبتها وتلك القادمة يا سلام على هاتيك الليالي....
Quote: ياخي السودان ده اجمل بلد .. لكن للزول البعرفوا |
عارف ياعمر ياخ انت دايما تفهمني صاح تريحني في حناني وكنكوجي يبتسم والدنيا يا ناس تنقسم.... سمسم سمسم ؛سمسم صاغ سليم سليم اللوزي؛ وكب لي جالون؛ وولع لي ولع لييييي النحرقو؛ ..... نحن جيل سرحت ليك مايكل ماااايكل ورقصت ليك بريك.... وكأس وراء كاس الفرح شربتو!!! ..... نحن جيل يبدأ مع وردي ومصطفى وبعد الزيادة يدور كمال ترباس ياريت ياريت ونبكي مع النور الجيلاني صحو الذكري المنسية لا لا والفرقة بتصبح ابدية ابدييوووو؛ ....... الليمونات ليمونا فاض على ناس البيت ووصل الجيران هكذا كلمتني عشة اختي وانا متاكد لو هنالك ليموناية واحدة لاعطتها الجيران وهي راضية ...... السودان هو دا ياهو دا ساعود لأكتب وانتظر عودتك لسكب الحرف الندي... تسلم ياود الرفيع الرفيع
| |
|
|
|
|
|
|
Re: انطباعات عشرة ايام في السودان!!! (Re: عبدالمنعم الطيب حسن)
|
الحقيقه الاكيده انو السودان جميل والسودان فيهو خير كتيير جداً لكن يحتاج الى مجهود وتعب واحياناً غض الطرف والاخيره دي هي اس المشاكل الان لانو المجتمع تغير كثير وضغوط الحياه جعلت الناس لا يهتموا بالمصدر فقط ان يكون معك وبقت الحاجات الكنا بنعتبره احتيال وووو بقت فهلوه وشطاره وذكاء وح اضرب ليك مثل عملي في اخر اجازه لي لقيت شاب في العشرينات بوزع ثلج للحافلات السفريه في موقف شندي ( بوزع مش بكسر ) اتونست معاهو وسألتو فعرفت انو بوزع في اليوم اكثر من 100 لوح تلج لانو بستفيد من انو الحافلات وستات الشاي بتشتري بالربع والنص للوح ودا ما بتوفر في عربات التوزيع فهو بشتري من عربات التوزيع ويقسم اللوح حسب الطلب ويوزع على زباينو الصباح واخر اليوم يستلمو منهم لما حسبته بناء على كلامو الشغل دا بكسب من وراهو ما يقارب ال 40 الف ج شهري ( 40 مليون ) لكن برضو بتدخل الدغمسه لانو بدفع لي بتاعين المحليه والصحه ووو حتى مندوبين التوزيع بتاع المصنع فالبلد فيها قروش وفيها فرص عاوزه البستغله ويبذل مجهود
| |
|
|
|
|
|
|
Re: انطباعات عشرة ايام في السودان!!! (Re: علي محمد الفكي)
|
تاني يوم في العيد مشيت مع وليداتي لساحة الاحتفال حول القبة قبة الشيخين الجليلين الأخوين محمد وَعَبَد القادر أبناء الشيخ ادريس ود الأرباب ومن نسليهما ينحدر معظم أبناء واوسي.... ساحة الاحتفال منذ طفولتنا الباكرة جدا وطفولة آباءنا واجدادنا تعني لنا ببساطة العيد تستمر الاحتفالات يومين كاملين هنالك نوبة الشيخ عبدالقادر ودي بتاعة الحلة في اليوم الاول ونوبة الجيلي في اليوم التاني هنالك مديح وقصائد وأفراح لكن العيد الأهم لنا في تلك الساحة هو السوق الكبير يتداعى لنا اهلنا من الجيلي، وديري وكل قرى واوسي يبيعون اللعبات والمأكولات والمشروبات ويوجد ايجار عجلات وزحلاقات وطوطحانيات؛ أصلا احمد ابني الأوسط لم ينتظر الركب وغادر باكرا وراجلا مع أصدقاءه جزءا من أطفال الاسرة ذهبوا مع اولادي بالعربية طبعا انا السواق قابلت كثيرا من اصدقاء الطفولة ياتون مع اولادهم من هم في سن أطفالي وانا ذاتي لي ذكريات في المكان دا وانا طفل وانا مراهق لاحقا كان عندي كشكوش وكنت اجمع ايّام العيد فلوس محترمة لأذهب مع صديقي خلف تالت ورابع ابام العيد للمدينة والمنتزهات زي حديقة عبود ومنتزه المقرن العائلي المهم في الساحة الخلق كتيرين أطفال وآباء وأمهات وتجار جاءت فترة فقدت اولادي وأصدقاءهم وانداحوا في الفرح الجماعي واشتروا لعبات وسندوتشات وعصاير وموية وتجمعوا بعد زهاء الساعتين وقد تغبروا وهذا العيد الرابع المتتالي لهم في الحلة خلاص بقوا يتحدثون عن العيد مثلنا زمان وربطه بالقبة وبالساحة وتلك أغلى أمانيا نسيت ان أقول احمد رجع معانا بالعربية هنالك قوز مرتفع جنب الساحة قوز ترابي مرتفع جدا كنّا نطلع قمته ونجري نازلين ولو وقعت مافي مشكلة فكلو تراب اولادي فعلوا نفس الشيء كما يفعل أقرانهم يبدو ان احمدا قعد تعب لذا فضل الرجوع بالعربية للبيت الما بعيد من القبة أصلا هكذا يحتفل أهل واوسي وأطفالها بالعيد احتفال دسم وممتع وجميل ويبقى في الذاكرة للأبد،،
.......... ............ شكرا صديقي علي محمد الفكي نعم نعم الفرصة موجودة فقد علينا ان نتحرك بخطوات واثقة ومقدرة لاغتناصها...
ساعود
| |
|
|
|
|
|
|
Re: انطباعات عشرة ايام في السودان!!! (Re: عبدالمنعم الطيب حسن)
|
الاخ العزيز منعم سلامات و عيدك مبارك جد زعلان منك . ايام انت جيت انا موجود في البلد . كان ياخ تدينا خبر كان شبعناك لحمة و منقة و مشاوير طويلة . بالمناسبة السودان مهما سرقوا منو برضو حلو . بي حزنو برضو يسالمك بي الاحضان و يضحكك لامن تسال نفسك . ده بلد ولا دي الجنة ؟ تحياتي
| |
|
|
|
|
|
|
Re: انطباعات عشرة ايام في السودان!!! (Re: Osman Musa)
|
مرحبتين والف صديقي عثمان موسى لك العتبى حتى نلتقي قريبا بعد اقل من شهر سأكون هناك سأتصل بك وسنلتقي خاصتن بعد ان قدمت مغريات فنحن شعب يحمل اللحوم ما وجد الى ذلك سبيلا ونضربها ضرب من لا يخشى القاوت ونحب المنقا ولون المنقا والشايل المنقا والزارعا سنلتقي قريبا وكمال الطاهر صديقي وحبيبي من اكتر من ربع قرن ونزلت معاه في يوم ما بيت عمه بالدامر وقربنا نعبر البحر ونمشي الزيداب تسلم يا كبير جهز اللحم والمنقا وبعد داك لومني سلام والى لقاء قريب قريب فرت منقا منقا منقا
| |
|
|
|
|
|
|
Re: انطباعات عشرة ايام في السودان!!! (Re: محمد علي البصير)
|
وفِي البيت تحللت من ملابس السفر ومن وعثاءه؛ ولبست الملابس السودانية المريحة؛ وكانت المدام قد جهزت شيالات مليئة بالحلويات وبالكعك وبالكيك... وجلست مع اخوتي نستقبل الاهل والأقارب حتى جاء وقت غفوت على كرسي ونمت لأول مرة منذ تسعة شهور في حوشي الفسيح؛ سقفي سمائي الفسيح بنجومه البهجة الهواء الطبيعي مع بشارات الخريف يرد الروح لا زفير مكيف ولا شهيق مروحة.... هواءا طبيعيا وعليلا زاده المرور خلال شجيرات ليست بعيدك عني شجيرات ارضها مبتلة لتوها ورائحتها تعانق المدى ياخ نمت بدون كوابيس؛ صحوت نشيطا وخفيفا قبيل شروق الشمس؛ والعين تشوف بعيد وقريب تساعها نجيمات مازالت ترسل ضوءها الخافت في هذ الصباح الجميل؛ ومازالت ملايتي تهبهب خفيفا والهدوء يحف المكان يملؤه حبورا تغاريد عصافير تسكن حديقة منزلي البسيطة؛ لابد ان غناءها اليوم اكثر فرحا فأخيرا جاء من يشاركها المكان الرحيب؛ فهي مبسوطة وتغني وحبيبا معاها وانا كل احبابي هنا؛ شكرا طيوري الجميلة لحسن الاستقبال؛ شربنا شايا سادة وبلبن وأكلنا لقيمات طازجة؛.
الله الله
ياخ أمنيتي يا منعم أعيش لي لحظات زي كدا
لعنة الله عليك في الدارين يا البشير ومن معك
| |
|
|
|
|
|
|
Re: انطباعات عشرة ايام في السودان!!! (Re: محمد علي البصير)
|
مرحبتين حبيبي وصديقي الفنان محمد البصير يازول حبابك الف شرفتني والبوست.... فكرتي الاساسية ان ننتزع حقنا في نعيش في بلدنا نودي اولادنا نمشي إجازات ونرجع او لا نرجع نستمتع ببلدنا واهلها اهلنا الطيبين الكرماء دا حق مقدس لنا ننتزعه رغم أنف الدولة التافهة من اكبر دقن لأصغر متحلل.... حقنا ان نذهب لبلدنا ننوم في الحوش البراح وناكل كسرة بموية طماطم وشطة خدرة ونشرب من الجدول مباشرة ونعيش بكل جوارنا في وطننا ونوري اولادنا ان لهم وطن وأرض ونيل وخيرات هذا حق اصيل لنا؛ وليس امتياز وليس منحة من احد ولن تكون دا وطنا ونحن فيه احرار نذهب له نعيش لحظات مسرتنا؛ وفرحنا بأرضه ونيله وطيره وسماءه ....... الحكام الظالمون الى زوال ويبقى وطن النجوم لنا ولابناءنا ولاحفادنا.. ....... ويبقى تفاؤلنا بان يوم بكرة جميل اخضر نيلو يبقى شريطا اخضرا وجميلا لولاه لاحترقنا. ....... شكرا يا زول يا نيل يافنان ...... وخليك قريب؛
| |
|
|
|
|
|
|
Re: انطباعات عشرة ايام في السودان!!! (Re: عبدالمنعم الطيب حسن)
|
تاني يوم العيد مساءا واصلت الزيارات للتعازي لاهلي في واوسي الشيخ عبدالقادر ودي مسقط راسي ومدفن (صرتي)؛ وواحدة من ست قرى تكون واوسي الكبرى ايّام الأعياد زمان نزورها انا وخلف المرحوم عصام سليم بيتا بيتا يستغرق منا الامر تلاتة ايّام بلياليها كنّا نلفها راجلين الحلة كبيرة جدا؛ لاحقا عندما سافرت مصر واغتربت كنت أمسي الفواتح راجلا برضك بس هسع لابد من عربية.... الكبر الكبر والآن مازالت مجموعات من الشباب تقوم بنفس مهمة المعايدةالمقدسة تلك التي يصلون فيها ناس الخلة بيتا بيتا... ولكن دا موضوع تاني المهم مشى معاي عبدالدايم اخوي الكبير؛ وهو رجل فكه وشعبيته عالية جدا وطبعا انا زول ضيف بحاول اختصر.... المهم تاني بدانا بالاقريب وكل ناس الحلة قرايب وحبايب وقد هالني الاستقبال الدافئ والصادق والحنين من أهل من ذهبنا لهم للتعزية والله يستقبلوننا بأريحية وحب وفرحة كانما جينا نبارك فرحا لا نشارك في تعزية فقيد او فقيدة ولكنه التواصل وتلك تُشعرنا وتشعر اهلنا بسعادة غامرة كوننا لم ننساهم وكونهم لم ينسوننا وتلك سعادة الاهل وطيبتهم رغم ان المسافة بين اخر لقاء لي بهم لم تتجاوز التسعة شهور؛ والله انا ذاتي سعيد بانتمائي لهذه الارض الطيبة وهذا الانسان المكتمل إنسانية وبهاءا استمرت رحلة العزاءات ليوم غدا وبعده وهي تاخد وقتا طويلا في اي بيت يصرون على المشروبات وعلى الشاي والقهوة؛ وعصير الليمون ياخ أشرب الكباية الاولى قبال ما تخلص يملوها تاني وبحليفتا وطلاقا وونستا عن الاغتراب والمقابل المالي والسعودية وكدة خلاص كفاية عزاءات شوية ونتكلم عن مناسبات سعيدة سعيدة الطيب حسن
سلام
| |
|
|
|
|
|
|
Re: انطباعات عشرة ايام في السودان!!! (Re: أيمن محمود)
|
Quote: ده المُح بتاع البوست .. قالت العرب: احشفا وسوء كيلة
- *الدولة التافهة |
هلا ايمنوف؛ تافة ساكت!!! دي فاتت حد التفاهة؛ دي دولة لا تحترم مواطنا ولا شعبها ياخ تصدق البيض دا اي بيضة كاد يتحول لونها الى اغبش من اختلاطها بمخلفات الدجاج تشتري الطبق اجيك الراحة طاقة البيض ذاتو مبالغة في الوسخ المتراكم الناشف!!! ياخ تاجر الدواجن دا لو بحترم البلد دي وفي قوانين بخاف منها وفي سلطة تحمي مواطنها لما باع بيض مختلط تماما ومعملك بمخلفات امه الحكومة نفسها ووزارة الصحة واي جهة رقابية كيف تسمح ببيع بيض وسخان زي دا وفي اي دولة محترمة في العالم يمر البيض المعد للبيع بمرحلة غسيل وحتى هنالك حماية للامهات التي تبيض ان تضع بيضعها في اماكن نظيفة معدة سلفا لهذا الغرض البيضة توضع من امهاتها في مكان نظيف وتغسل بعد ذلك وتعد للتوزيع المستهلك.... نحن ناكل بيض مع مخلفات؛ اجيب طبق البيض واضعة بيضة بيضة في قدح او تشط مليء بالماء واتركه لدقائق واغير الماء وبعد داك بيضة بيضة واعذابي انا واشريري اغسله واحد واحدة واتمره بالمنديل -اختي لمن شافت التعب في الغسيل دا قالت لي: انتوا بتاكلوا القشرة - اهها ارجع اضعه في طبقه المنفوض جيدا .......................... رفضت ان اكل بيض بالطوة عندا رايت الطباخ يكسر البيضة الوسخانة في الطوة الجماعة المعاي استغربوا من عدم اكلي للبيض الذي احبه اجبتهم بان الفول مع زيت السمسم اي اضافة ليهو تعتبر انقاصا من فوليته الحلوة!!!
............................ واحد من حلتنا لديه مشاريع وهمية يحكي دوما عنها في الحافلة التي تقل الناس من المدينة للحلة مرة اتحدث عن مشروع دواجن وان الدجاج ابيضا وسمين ويضع بيضا بيطريا وكبارا ومحترما وبعضه معد للبيع والمزرعة كبيرة منور وخضراء المهم في حاجة من حلتنا سرحت مع المشروع دا التف عليها لقاها مندمجةقال لها: ياحاجة هاك الديك دا
ايمنوف هاك طبق البيض دا
| |
|
|
|
|
|
|
Re: انطباعات عشرة ايام في السودان!!! (Re: عبدالمنعم الطيب حسن)
|
ساعود لاتحدث عن اربعة مناسبات سعيدة حضرتها لايف وعن مناسبتين حزينتين حضرتهما لايف برضو ولاباس من اشارة بسيطة لمرور العزاءات كون كل ذلك يخدم فكرتي حول عظمة الشعب وكيف عايش مع الغلاء الطاحن والسوق الكل يوم يسوق وفي ان السودانيبن تجاوزوا الحكومة الظالمة ونسوها خالص واستمروا متكافلين بشيلين بعضهم البعض لحدت ما تمر العاصفة ثم ينمو البرتقال
| |
|
|
|
|
|
|
Re: انطباعات عشرة ايام في السودان!!! (Re: عبدالمنعم الطيب حسن)
|
الناس عايشة بصعوبة لكنها عايشة فرحانة تعرس وتحتفل وتنبسط حضرت في يوم واحد أربع مناسبات بنات حفرة المناسبة تحك المناسبة وتتداخل معاها تسعة صباحا عندي بنت اخوي وكرامة عودتها من عمرة رمضان وكانت تلك الدعوة الرئيسيّة ضربنا اللحوم ضرب المتمهل وشربنا عصائر وشايات وقهاوي في جو من الانس والاضاحيك مساهماتي في القصص مختصرة جدا ولكني مستمع جيد كوني ادخر حكاوي لغربة صعبة تحركنا كسالى وشبعانين نحو الدعوة التانية مناسبة عرس حضرنا العقد واكتفيت بشراب كركدي مركز ومثلج جدا لم انتظر احدا يضيعني وانا الضيف ذهبت جنب البرميل كما يفعل الراسخون في المناسبات وتناولت كباية مندية واها مشينا تاني لبت خالتي القادمة من عمرة رمضان برضك هنا اكتفينا بشية طازجة ومعاها قهوة رجعنا البيت أرتحنا قليلا مسافة نص ساعة وذهبت راجلا هذه المرة لمناسبة زواج بت قريبي وجاري وهنا رأيت اولادي في نص أصدقاءهم ياكلون انبسطت للجماعية؛ وجلسنا لصينية مكربة على الشدرة ام لحم هبشت شوية وكان غداء عمل وإيناس ففي سفرتي كلهم دفعتي احتفوا بوجودي معهم واحتفيت واكتفيت من اللحوم بالإنس وشككوا في. كوني تحولت من شخص يحب الطعام لشخص لا يحبه هههها ونسوا ان هذه الرابعة والرابعة واقعة.... الناس قمة التكاتف والتعاضد كون يحمون ضهرهم اللعوج الا من ترابطهم نسيت ان أقول ان كل ناس الحلة أخدوا لفة على المناسبات الأربع، لهم التحية اهلي السودانيين الكرام....
| |
|
|
|
|
|
|
Re: انطباعات عشرة ايام في السودان!!! (Re: باسط المكي)
|
Quote: سلامات منعم ..ياخ دة المجنن بوبي |
مرحبتين تلاتة بالصديق العزيز باسط المكي شكرا لمرورك العطير؛
نعم زي ما قال صاحبنا عمر مصطفى انو السودان دا اجمل بلد في العالم بس للبعرفو.... في عصر يوم سفري لاحظت ان بنات واولاد الحوش في حركة دؤوبة علمت لاحقا انهم دقوا الشرنق وجموا خمسين جنيه من كل زولة او زولة ولموا الكوانين واجتمعت كل الاسرة والجيران والاهل في قلب حوشي الوسيع واختلطت رائحة الزلابية بنكهة اللبن المقنن وزاد الرصة بهاءا ان اتنين من جيراننا اتوا مغرب ذات اليوم بشاهم والبليلة وسرعان ما اتصلت التلفونات بالاصدقاء والجيران فجاء كل الشباب وشربنا شايا بهياً واكلنا لقيمات ما احلاها اللمة في نص ساعة تكونت واسمتعنا شفتا الحكاية تاتي صدفة خيرا من الف تخطيط!!! السودان منتظرك فلا تطول الغيبة؛ تسلم يا باسط....
| |
|
|
|
|
|
|
Re: انطباعات عشرة ايام في السودان!!! (Re: عبدالمنعم الطيب حسن)
|
Quote: وها نحن وقد صرنا نسايب وقرايب وكنا أصلا حبايب |
كدي يا منعم النشرح ليك الحكاية دي ... اول بالتبادي أم العروس أخت خدر وجنابو ابراهيم علي المك امهم فاطمه محمد الحسن خالتي لزم ... تاني شي ام العريس بت الزبير التوم .. بعدين عبدالقادر وصفية ديل معرفة وتداخل اسري من الثمانينات بحكم تواجدنا في نفس بلد الاغتراب وسكني بجوار اخي ابن واوسي علي مصطفي مدني اكتر من ٣٠ سنه ... تقول بقينا قرايب ... دا نحنا لحم ودم بس عدم العرفه شين ... تحياتي يا زول يا سمح ...
| |
|
|
|
|
|
|
Re: انطباعات عشرة ايام في السودان!!! (Re: فتحي الصديق)
|
Quote: وفِي البيت تحللت من ملابس السفر ومن وعثاءه؛ ولبست الملابس السودانية المريحة؛ وكانت المدام قد جهزت شيالات مليئة بالحلويات وبالكعك وبالكيك... وجلست مع اخوتي نستقبل الاهل والأقارب حتى جاء وقت غفوت على كرسي ونمت لأول مرة منذ تسعة شهور في حوشي الفسيح؛ سقفي سمائي الفسيح بنجومه البهجة الهواء الطبيعي مع بشارات الخريف يرد الروح لا زفير مكيف ولا شهيق مروحة.... هواءا طبيعيا وعليلا زاده المرور خلال شجيرات ليست بعيدك عني شجيرات ارضها مبتلة لتوها ورائحتها تعانق المدى ياخ نمت بدون كوابيس؛ صحوت نشيطا وخفيفا قبيل شروق الشمس؛ والعين تشوف بعيد وقريب تساعها نجيمات مازالت ترسل ضوءها الخافت في هذ الصباح الجميل؛ ومازالت ملايتي تهبهب خفيفا والهدوء يحف المكان يملؤه حبورا تغاريد عصافير تسكن حديقة منزلي البسيطة؛ لابد ان غناءها اليوم اكثر فرحا فأخيرا جاء من يشاركها المكان الرحيب؛ فهي مبسوطة وتغني وحبيبا معاها وانا كل احبابي هنا؛ شكرا طيوري الجميلة لحسن الاستقبال؛ شربنا شايا سادة وبلبن وأكلنا لقيمات طازجة؛.
|
سرد جميل وممتع حمد للله على السلامة
| |
|
|
|
|
|
|
Re: انطباعات عشرة ايام في السودان!!! (Re: عبدالمنعم الطيب حسن)
|
Quote: وتبقت مداخلة واحدة |
وهذه هي وذهبنا تالت ايام العيد وراباع وخامس لتعزية اهلنا من توفى لهم احدا في فترة غيابي التي لم تتجاوز التسعة شهور هذه المرة؛ نعم نذهب يستقبلنا اهلنا بكل الود والترحاب والاريحية فهي نوع من التواصل مطلوب ومحترم وايه الدنيا غير لمة ناس في خير او ساعة حزن .... ساعة الحزن نكون مع اهلنا هكذا يفعل كل ناس البلد يشاركون الفقد ولحظات الاسى يستقلبنا الاهل باصرار شديد بالليمون والبارد وبي الشاي الحار وبالقهوة ويصرون بكرم مبالغ ان نجلس قليلا من الانس لايضير وطبعا نحنا زمن ممحوق ومافي ولكنه لايسمحون لنا بالمغادرة حتى نستطعم ولو موية من الزير ولكنهم ياتون بها من التلاجة ونحن طبعا بنكون استطعمنا عند الجيران وتستمر الجلسة فترة من الزمن اراها طويلة ولكنهم يرونها قصيرة فتلك فرصة للتواصل مهمة...
وحضرت وفتين في فترة العشرة يوم دي نذهب للمقابر طوالي بمجرد سماعنا الوفاة حيث التلفونات تتطاقش نذهب للمقابر وندفن ونرجع البيوت نرتاح ونعاود ليوم غدا الذي هو يوم البرود هكذا يسمونه اهلي نذهب للوفاة ونجلس لساعات وياكل الناس ويشربون ويدفعون المساهمة والمشاركة بتاعتهم وقد ارتفع سقف المساهمات مع الاسعار هكذا الناس تشيل بعضها وهكذا كل السودان..... ...............
وما واوسي الا سودان مصغر... وكبير... ................. وهكذا كل قرية وريف ومدينة في هذا السودان العظيم بناسه وباهله.. .................
وعمّا قريب..
الهمبريب
يفتح شبابيك الحبيب
والحال يطيب
يا محمد أحمد تستجِمْ
والبيت يتمْ
تتلم تلمْ
تفرح فرح
تحلم حِلِم
كم تطمئن
حقك يجيك لافيهو شك..
يمكن واظن
ويفوتو همْ
والعدل يعمْ
وتغني أمْ
كادت تجن
كبر الولد جُوّا السجن
فاقداهو هى
دا كلو كلو ينتهى
دا كلو كلو ينبهى
زولاً تريدو وتَشْتهِى
تلقاهو فى
لا فى السِّجِن..
لا مختفى
لا يقولو ليك ما تمشي لى
دا كلّو كلّو ينتهى
دا كلّو كلّو ينتهى
....................... لروح الفنان الكبير شاعر الشعب محجوب شريف الهناء والراحة... وشكرا لصبركم اذ وصلتم هذا النقطة من الكتابة عاجز عن شكركم وتقديركم وسلام
| |
|
|
|
|
|
|
Re: انطباعات عشرة ايام في السودان!!! (Re: محمد الامين احمد)
|
الأخت بسمات، ال 10 ألاف سودانية .. بحساب الدولار 40 تعادل 250 دولار .. يعنى 25 دولار لليوم أجار السيارة.
لو قالوا 10 مليون .. بحساب الدولار 40000 (40 ألف بالقديم) .. وباقي الحساب كما إلي أعلي ..
Quote: طلب الفول ب ٢٥ الف جنيه؛ وسندوتش الشاورما في بحري بي ٣٥ الف جنيه.... وطلب الشية في الجيلي ب ٨٠ الف والكوارع ب ستين والبيض ب ٢٥ وطبق البيض ب ٨٠ الف ومحتاج غسيل بيضة بيضة تصدق؛ ......... هوووي سلام.... |
طلب الفول 25 ألف جنية حوالي 0.625$ طلب الشاورمة 35 ألف حوالي 0.825$ طلب الشية 80 ألف يعادل 2$ (دولارين)
الكوارع 60 ألف يعنى 1.50$ يعنى (دولار ونصف الدولار)
البيض والفول نفس السعر .. 0.625$
الطلبات الفوق دي لو أكلتها كلها (خمج) في لحظة واحدة تدفع 5 دولار 63 سنت ..
الأسعار رخيصة لكن الناس فقرانين فقر لله .. !
بريمة
| |
|
|
|
|
|
|
Re: انطباعات عشرة ايام في السودان!!! (Re: Biraima M Adam)
|
شكرا محمد الامين احمد للمرور والتوقيع؛
.................................. بعدين جني وجن الناس القاعدين برة السودان ديل ويقارنوا السلعة التي يشتريها المواطن السوداني بالدولار؛؛؛ مبالغة........ بس السوداني دا بكسب بالجنيه السوداني الذي لا يساوي شيئا تقريبا وتاني هام؛ مرتب استاذ درسني في المتوسطة قبل نحو ربع قرن ما زال في حدود 50 دولار؛ اهاااالخمسين دي لمن بشتري منها شية ب 2 دولار فضل فيها شنو !!!... ..................................... سلام
| |
|
|
|
|
|
|
|