ركب معاي شاب الصباحية وقت الازدحام الجد جد ، كان ممتعض خالص ، طبعا ما بعاين لي راكب معاي وعادة الناس بركبوا في المقعد الخلفي ، ما بعاين عشان النظرة ممكن تتفسر تفسير ما حبابه ، عموما صاحبنا دا بطلع في أصوات القرف والاوووف ديك ، بعد شوية قال لي المدينة دي بقت لا تطاق ياخي ، قبل عشرة سنة كانت أفضل ، قلت اوع يقول لي عملتوا لينا زحمة ، اها كدي نجسه ، الحصل شنو خلاها بقت كعبة كده ؟ صاحبنا فتح: المهاجرين ياخي أعدادهم مهولة ومدينتنا ما اتعملت للعدد دا وما اداني فرصة اقول بغم دور محاضرة من أمها وانا سكت وضمرت شيئا في نفسي ، لمن وصل مكانه وقبل ما ينزل قبلت عاينت ليهو جوه عيونه كانت زرقاء وهو ابيض اللون ، سألته : وين الريش بتاعك ؟ رد مندهش : ريش. شنو ؟ قلت ليهو بتاع الهنود اصحاب هذه الارض وسكانها الأصليين ، بهت وسكت ، تكلم يا ابيض اللون مسكين انك عاجز عن الكلام انك تسمعني ولا ترد علي ههههه ، قال لي بس انا ما هندي الجذور بتاعتي من أوربا . قربت احكي ليه نكتة الصقر مع الحمار بتاعت بتعرف تطير ، قوم شتت بلا البلد اتملت مهاجرين بلا نفخة معاك
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة