كتب الكاتب الفاتح جبرا المتوفرة بمعرض الدوحة
|
|
 Re: أحزان الجمهوريين: رحيل المنشد والشاعر الف (Re: محمد حمزة الحسين)
|
داب ما فقت وأتاكدت انك مافي
زي ما كنت بحلم في منامي وغاافي
يافارس ام لبوس سمح السريرة الصافي
فرقك نار لهيبو منو قول يا كافي
وين فرة سنونك ووين سماحتك وحنك
ووين طيبة قليبك ووين نفايلا منك
وين ضحكات هزارك ووينها جلسة بنك
ووين صوت القماري الفي نميمك وفنك
تفقدني وتمازح ومابغيب من بالك
تفرج نار همومي ولي تقول كيف حالك
القدر النزل ومن دون اذن طبالك
اسود يوم رحيلك مني اخدك وشالك
يا ابوالخاوية صدري فيهو كمين عبرة
وجرحك لي ملازم لا بطيب لا ببرا
ببلع في الغباين والوجع والنبرة
ويعلم خالقي في نارا بتوقد كبْرة
واسفاي عليك شالتك الغدارة
مي عارفاك قمر وسط الخلوق والدارة؟
مي عارفك هميم ومن العوج تتضارا؟
ومي عارفة الخلق كاوياها جت بنارا ؟
ببكي وكلي حرقة بالرغم من ايماني
عارف الموت دا حق واصلو القدر رباني
صاحبي الماحصل يوم بالغلط ياباني
هرد الكبدة فرقو والدمع عباني
وين سمح القوافي وهندسة منوالها
وين ادب المنابر ونمتها واقوالا
وين الطرفة ساعة يبتسم يحكالا
يعلم ربي بالالم العلي والحالة
ببكيك يا اب ردف بالدم وماهو كفاية
اياكا الصديق الما انذكر في وشاية
اياكا الكريم جودك بعرفو برايا
فارس قود مكمل لا انفزر لا اتنايا
كمل القول وحاتك وغير صبر مافضل
عايش ذكرتك فارس النحاس الندّل
اللي الخوة حافظ لا نسى ولا اتبدل
فات الفانية ودع وانسدل واتجدل
يتولاك رحيما جيتو عارف قدرك
سيل الرحمة ينزل فوق فراشك وقبرك
يا قلبي الصبحتْ مفجوع وفاقد صبرك
معروف القدر وين ما بتكون هو بخبرك
ربنا يرحمك صديقي واخوي حبيب الكل محمود شريف ودالخاوية
سعدالبنا
15/8/2018
| |
 
|
|
|
|
|
|
|
|
Re: أحزان الجمهوريين: رحيل المنشد والشاعر الف (Re: عبيد الطيب)
|
الأخ الرشيد
لك التحايا
وارجو إرسال هذه الكلمات لشعرا ومسادير
ولك الشكر
مفقود والله يا ابو الخاوية ما ناسنك
مفقود. للبشاشات المنورة. سنك
بعد ودعتنا يحزن شبابك وسنك
انت معانا هسع فى القلوب حاسنك
البكا شن بجيب يا ود عزاز الناس
غير لوعة واسى يجرحنا بالامواس
ياالغالي البشوش الطيب الإحساس
يا طب الجروح فى قلوبنا جرحك غاس
معليش يا الحبيب رب العباد واراد
جعل الموت قدر لى كلو حى طراد
جعل الدنيا فسحة بتجمع الافراد
نجيها ونمشى قبال تنقضى الاغراض
بعد الدامعات باكية القلوب بالحن
وبعدك مانا عارفين الرحيل لى من
يا ابن الكرام الدنيا دنية جن
تضاحكنا وتطرق فى السيوف وتسن
يا ود الملوك الحر
الموت مو بدع فوق كلو حية بمر
طبع الدنيا يوم تفرح ويوم بتضر
شبابك ياهو حسرتنا وحزنا المر
اقريك السلام من الجماعة ومنى
راجنك تكون وسط الجنان متهنى
..ذاكراك القلوب يا غالى ما بتونى
شايفنك تقول هسع معانا تغنى
الله هو الرحمن الرحيم وهو غفار الذنوب
احمد الفرجونى
| |
|
|
|
|
|
|
|
|
|
Re: أحزان الجمهوريين: رحيل المنشد والشاعر الف (Re: محمد حمزة الحسين)
|
الأكرم الأستاذ محمد حمزة الحسين
كان محمود، مثلما قد قيل في جده، له نصيب من "نُصب له علم فشمر يطلبه"
أنقضت حياته عجلى وهو يسابق المكرمات
حكى أمس عنه أحدهم قال جانا لابس نعلات جميلة... جا زول داخل شاف النعلات عجينو
ديل هيل منو؟
هيلك إت!!
وهبها ومشى حفيان ....
------
| |
|
|
|
|
|
|
|
|
Re: أحزان الجمهوريين: رحيل المنشد والشاعر الف (Re: عبدالله عثمان)
|
في يوم الاثنين الثالث عشر من أغسطس 2018 أقامت مجموعة ديوان ابو السارة للادب الشعبى فعالية لتبادل التعازى فى انتقال الأستاذ عبد المحمود محمد شريف الشيخ الصديق حفيد الشيخ الطيب رجل ام مرح والاخ الجمهورى والمنشد والشاعر والعضو فى تلكم المجموعة بمسرح النيل بأم درمان حضرها عدد كبير من الشعراء والمبدعين وقد قامت المجموعة بدعوة الأخوان الجمهوريين فتمكّن عدد مقدّر منهم من تلبية الدعوة الكريمة.
من ضمن ممن حضروا تلك الليلة المباركة كل من الأخوان والأخوات الجمهوريين:
الأستاذ أحمد محمد الحسن عمر "الزعيم"
الأستاذ عبدالماجد أحمد التاي
الأستاذ محمد اسماعيل أبوقرجة "الأمير محمد اسماعيل"
الأستاذ والشاعر العوض مصطفى العوض أبوسن
الأستاذ أنور همد محمد وزوجه الأستاذة سمية حسن ياسين محمد نجم
الأستاذ المنشد صديق ذا النون جبارة الطيب (وهو أيضا من عترة الشيخ الطيب ومن أقرباء الأخ الراحل الكريم)، كذلك حضرت زوجه الأستاذة فاطمة حسن ياسين محمد نجم
الأستاذ بشير أحمد عبدالله (بشير ود أم بشير)
الأستاذة إشراقة محمد حسن
الباشمهندس عبدالحليم حسن العوض
الباشمهندس علي الزبير أحمد شميم
الأستاذ الشاعر أزهري محمد علي "ود العمدة"
الباشمهندس أحمد عبدالله الطيب محمد
الأستاذ سيداحمد بابكر محمد أحمد "الشايقي"
كذلك كان على رأس أصدقاء الفقيد بجانب الأخ الأستاذ ازهرى محمدعلي كل من:
الأستاذ جبرالله عوض السيد مقدم البرنامج
الأستاذ عبدالحليم المخرج الشاعر/قناة الشروق
الأستاذ الشاعرمروان ود المقبول
الأستاذ الشاعر الرشيدالبرى
الأستاذ الشاعر هيثم نجاع
الأستاذ محمدالفاتح ابوعاقلة الباحث فى الادب
الأستاذ الشاعر حافظ ابو لكيلك
والأستاذة الشاعرة خنساء بت المك
الأستاذ الشاعر محمداحمد نقدالله
الأستاذ الشاعر الفاتح ابو السارة
الأستاذ الشاعر عبدالرحمن طه حميد
الأستاذ الشاعرعلى البدوى قرينات
الأستاذ الشاعر على الشكرى
الأستاذ الشاعر صلاح ودمسيخ
الأستاذ الشاعر ابراهيم جابر ابراهيم
الأستاذ الشاعر عطية ابوريش
وعدد مقدّر آخر من الأساتذة والأستاذات الفضليات فات علينا رصد أسمائهم/ن فلهم ولهن العتبي وأجرهم ثابت ومضاعف.
كان الحديث طيبا، سلسا ومنسابا، عن محامد الفقيد ومتدفقا بالقدر الذى وسعة
الزمن وكان الختام قصيدة العارف بالله الشيخ النابلسى من الأستاذ المنشد صديق ذا النون جبارة الطيب
| |
|
|
|
|
|
|
|
|
|
Re: أحزان الجمهوريين: رحيل المنشد والشاعر الف (Re: عبدالله عثمان)
|
تحياتي أخي عبدالله عثمان
له الرحمة والمغفرة والقبول الحسن
جمعنا مع الراحل ايضا (قروب شعراء ومسادير) منذ أربع سنوات
فكان أخونا عبدالمحمود(الخاوية) ينشر الفرح والجمال،بنافلته السمحة وبياض نيته وجمال روحهه
وكذا بصوته الشجي الأليف
يشهدالله أحببته وأعلم حبه لشخصي،لذا أحزنني جدا رحيله ولانقول إلا مايرضي ربنا الله
من تواصلي معه أيقنت تماما أنه لا يمسك في قلبه ولو قليلا من الحقد والحسد
وماعرفت أحدا يسعي للتواصل مع الأصدقاء ولاتهمه المسافة ولا التعب مثل الراحل
| |
|
|
|
|
|
|
|
|
|
Re: أحزان الجمهوريين: رحيل المنشد والشاعر الف (Re: عبيد الطيب)
|
كتب الأستاذ الشاعر الحويج حسن
الحويج حسن
١٥ ساعة
أتصل بي من السودان ليخبرني بعد دقائق سلامه الجميل المقفى ليقول لي بكرة سأكون بمطار البحرين ولمدة انتظار ستة ساعات
اتى الغد وانا اترقب تلفونه بينما كنت اتجول داخل المطار ...رن التلفون وكان المتصل اخ بحريني
هلا اخوي ...انت الحُويج ...نطقها بضم الحاء
يا حُويج هذا خويك عنده كنكشن وبغادر البحرين بعد جم ساعة
منو خوي؟؟
هذا خويك الاسمر البشوش ما ادري شو إسمه
قلت له تقصد الخاوية
فغضب الرجل في لطف وقال لا والله مو خاوية
بالعكس هذا رجل مليان وفيه نخوة عزمناه للغداء فقال مشكورين لكن باكل معاكم بلساني
واصطحبوهو لمكان الاستراحة هنالك احبوهو فصادقوه وتمنوا لو انه يدخل للبحرين
ربع ساعة وعرفت مكانه وساعدوني ضباط المطار لمقابلته...وطيلة العشرين سنة وانا بالبحرين وحسب قانون المطارات ممنوع ان نقابل شخص عابر اجواء البحرين ولكن القوانين تتغير لود الخاوية
في الطريق سألني الضابط وانت وش لقبك
قلت له الحويج ...فقال لا صاحبك خاوية ولا انت حويج...وش بلاكم يا ازوال..ليش القابكم غريبة
هنالك وعلى كراسي الانتظار رأيت الخاوية لاول مرة هو هو عبر التلفون او راي العين هو هو..كأنه من طينة الصحابة تحبه من الوهلة الاولى قال لي ونحن في غيبوبة السلام الحار
والله يالحويج يا ريت لو طلبت زيارة ليك من السودان...ناسكم ديل طيبين طيبة تخلي الزول ينسى برنامجو
قلت لي؟؟
واجن نونو والا البيهو سر نون الوجن
فيطلبها ولكن لاني في رهبة وخوف من هيبة الموسوعة التي امامي فأتهرب ان اقولها
وتستمر الونسة ثم يقطعها ليقول قلت لي
تهامس البحة والتبسيم كلامك..بدور اسمعا منك
فأتهرب ان اقول له شي من انتاجي ويلاحظ هو ذلك ولكن يتقبل مني الزوغة
ونطلب الشاي من المنطقة الحرة تسعة دولارات للكباية الواحدة فنضحك بعد كل تعليق وهو يرشف وينظر للشاي متعجباً في سخرية وتعليقات مرحة
ثم يتزكر قهاوي السودان ويقول تعال يا حسام عباس ويا حسن نمر ويا ود الفكي بدوي شوفو المحن مرت الساعات ولم نحس بها كان خلوق في كل شي كل شي
حتى انه خلوق في حزنه وطريقة الاختباء وراء الضحكة الصادقة ولكنه كان كتوم هذوب عند اخفاقات الاصدقاء يفرح جدا وهو يقول عنهم المدح
وعندما يتزكر ما يشين العلاقة كان يحاول ان يتعمد التحويل لشي اخر فيقول
قلت لي؟؟
أميل الا ما بتعرف على وين ميلو؟؟؟
رحمة الله عليه رحمة واسعة كان الوعد ان نتقابل في هذا العيد ووعدته ان اقول له كل غنوة احب ان يسمعها مني فقد اسمعني وقدم السبت
وكان الوعد ان نكون سوية في وادي القمري..برفقة الاخوان ولكن اقدار الله هي النافذة.... فرحل صديقي وتم إلغاء السفر والحمد لله على كل حال
اللهم اغفر له وارحمه اللهم وأسكنه فسيح جناتك
إنا لله وإنا اليه راجعون
| |
|
|
|
|
|
|
|
|
|
Re: أحزان الجمهوريين: رحيل المنشد والشاعر الف (Re: عبيد الطيب)
|
كل الشكر الأستاذ عبيد الطيب وننتظر المزيد
حياكم الله وبياكم
===
كتب أحدهم
ما قلت لي ناوي الرحيل مالك مبدر في السفر
اشتقت لناسا عزاز أم القدر حزم الأمر
اخترت ترحل يا امير و الدنيا عيد
ما قلت حتى كلمة وداع او كان تطايب خاطرنا من شعر القصيد
سكة سفر سايقاك بعيد
وين ضحكتك وين رنة اللحن الفريد
عسى الأيام تجمعنا بكم في عهد جديد
| |
|
|
|
|
|
|
|
|
|
Re: أحزان الجمهوريين: رحيل المنشد والشاعر الف (Re: عبدالله عثمان)
|
مقتطفات من ليلة الوفاء لعبدالمحمود الشريف:
قال أحد الشعراء ((أنه كان يقود عربة وصدمه آخر وكسر مقدمة العربة فاتصلت بمحمود أخبره بما حدث فقال اعطني الشخص الذي صدمه بالتلفون فاعطيته فقال له أنا صاحب العربة لقد عفونا عنك وأذهب لشانك))
معظم انطباعات الشعراء تتخلص في ان محمود كان كل منهم يعتبره أعز الأصدقاء وأنه عندما يزورهم كان هو صاحب الدار وهم الضيوف وأنه كان ينفق مافي جيبه دون حساب
وكان لا يتحدث عن زملانه في غيابهم بل يكثر الثناء على الغائب وقالت شاعرة ان محمود كان يصحح اشعارهم ويساعدهم وكان هو الشاعر الوحيد الذي تتقبل نقده وتوجهاته بصدر رحب ))
وقال أحد الشعراء أنه عاصر كبار الشعراء في الدوبيت ولم يجد مثل محمود في تمكنه ووضعه للمفردات و الكلمات في مواضعها الصحيحة وشبهه بهم البعض التجاني يوسف بشير
| |
|
|
|
|
|
|
|
|
|
Re: أحزان الجمهوريين: رحيل المنشد والشاعر الف (Re: عبدالله عثمان)
|
محمود كان ومضة ..والومضة طبعها السرعة و أن تملأ المكان بالضوء ..فلله در ذلك الولد الذي أضاء النفوس وعلّقها به ..يمر عليك فيترك لك ذلك الشذى وذلك العبق ..تناديه فلا يلتفت فهو صاحب رسالة أن ينشر الفرح بين الناس..وهو ليس لك وحدك وإن ظننت أنه كذلك..ألف رحمة ونور تغشاك يا محمودي وحين أقول محمودي فهي أنانية لا أبالي أن اتّهم بها وأتحمل كل تبعاتها
الشاعر الفنان العوض مصطفى العوض ابوسن
| |
|
|
|
|
|
|
| |
عبيد الطيب
عبدالله عثمان
jini
فيس بوك
تويتر
انستقرام
يوتيوب
بنتيريست