03:52 PM July, 23 2018 سودانيز اون لاين Osman Musa- مكتبتى رابط مختصر حصلت في 1998 في مستودع الجينز b1 الطريفي 22 سنة ودانيل 24 . قصة الحب دي قامت في ال warehouse كدي ساكت . بروس . الطريفي في بدايات شغلو دانيل عادتو بدون اي سبب وبقتلو في تولاتو . ويوم اتنين في تاخير 10 دقايق بي سبب المترو خصمت منو نص ساعة . الطريفي زعل وكتب ليها في كرتونة الجينز ( مرات اقول اديهو كلمة تزعلو ) دانيل كانت دايرة تموت عشان تعرف ترجمة الكتابة . بس لما عرفت فصلت ومن هنا شبكت الحكاية .
... يا جماعة طريفي مانهاتن هنا يختلف عن طريفي المثل السوداني الودر. جملو. .
علي كل حال يا سادتي الطريفي جمع بي البفتش عنها من سنين ودنين . عليكم الله شوفوا الدنيا دي ضيقة كيف . بعد اللفيف ده كلو الزول يلاقي حبيبتو في مستودع مساحتو عشرة الف اسكوير فيت . اسمها دانيل حنش مياس الحضرمي. جدودها قالت فلوا. من حضرموت قبل خريف 1944 . قالت لينا الكلام. ده. يوم. عملناليهم. حفلة. الحنة الصغيرة. في استوديو. بروكلن . نتابع
سلامات يا عثمان لعلك لاتعلم ان هناك من يتابع بوستاتك المتنوعه وبدون صور وكذلك بنهايات مفتوحه.... اسلوب فريد لاتتخلى عنه رغم ضغوطات المساطب الشعبيه ومشجعى اللعبه الحلوه:) لكن كويس بل ومفيد ترك مساحه للخيال الفردى ل ملئ تفاصيل اسقطها قلمك بإحترافيه تكاد تكون عفويه:) قصه الطريفى تؤكد أن للحب الف وجه كما يقال دانيل اشتعلت نار مبهمه فى قلبها لم تدرك اسبابها ودوافعها ف البستها ظاهر عدواه ومكاواه نجح الطريفى المرتعش بردا بقلب استوائي ساخن وواضح المشاعر فى الولوج إلى قلب لم يصمد أمام شموس لاتغرب إلا لتشرق فليهنأ الانسان أينما كان بهذا الفيض من المشاعر
07-24-2018, 10:30 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
عزيزنا. ابن المانيا البار. دكتور عبدالرحيم سلامات ياخ تعال النحدثك عن الطريفي ودانيل . ضحكونا . الطريفي قال لي في ليلة الدخلة دانيل علمتني الدبكة اليهودية المخلوطة بي رقصة حضرموت . وانا نزلت ليها عرضة و صقرية صقر الجديان . لامن صبحت . قال لي. مصباح حبوبة دانيل. كانت متكيفة من الحريرة و الجبيرة و السبح. الوصلتني. من امي من السودان . ولامن مصباح درعت لي السبح حسيت بي نفسي بصالح في حبوبة. مصباح مصالحة تاريخية . مصالحة من القلب . وزي اعتزار .
(عدل بواسطة Osman Musa on 07-24-2018, 10:46 AM) (عدل بواسطة Osman Musa on 07-24-2018, 10:48 AM)
07-24-2018, 10:32 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
عزيزنا. ابن المانيا البار. دكتور عبدالرحيم سلامات ياخ تعال النحدثك عن الطريفي ودانيل . ضحكونا . الطريفي قال لي في ليلة الدخلة دانيل علمتني الدبكة اليهودية المخلوطة بي رقصة حضرموت . وانا نزلت ليها عرضة و صقرية صقر الجديان . لامن صبحت . قال لي. مصباح حبوبة دانيل. كانت متكيفة من الحريرة و الجبيرة و السبح. الوصلتني. من امي من السودان . ولامن مصباح درعت لي السبح حسيت بي نفسي بصالح في حبوبة. مصباح مصالحة . مصالحة تاريخية . مصالحة من القلب .
اخونا العزيز سفيان سلامات عارف يا سفيان انا ما عرفت انو في علاقة دم بتربطنا مع اليهود الا. بعد . صبحية ليلة الحنة ديك . في صبحية الحنة حبوبة دانيل. رمت. نفس. زلابيتنا. ونفس الشعيرية . حبوبة. دانيل يا سفيان اسمها مصباح . دقت ال 77 لكن في همبريب ny تنشاف خمسينات . مصباح هي مراقبة البزنس الراس مالو مقدر بي 200 مليون دولار كلو . ومصباح. هي الوافقت. علي العلاقة من البداية . وتعال شوف .
07-24-2018, 02:26 AM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
عزيزنا الاخ سفيان المستودع b1 يا سفيان كان مسرح اجمل الايام . ومانهاتن كرش الفيل جزيرة الشعراء والفنانين و الكادحين ديك يقيف عندها الكلام . خليك قريب عليك الله
08-13-2018, 08:10 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
باريت الصور المعلقة في جدار صالون السيد / حنش مياس الحضرمي صورة صورة . كل الصور ما بين عام 1939 و العام 1944 . فيها صور في باب اليمن بصنعاء سوق الجنابي . وصور في المكلاء وصور في ورشة لنقش الحجر . وصور في سوق صناعة الشمال والسجاد والفرو . ولوحة مرسومة في العام 1903 لشاعر اليمن الكبير وضاح اليمن .. ولوحة تبين خريطة اليمن الكبير مرسومة في العام 1885 قبل تحديد الحدود الشمالية لليمن . ومكتوب تحت الخريطة . انتي الحضارة انتي الجسارة انتي الاصل و الفصل والفن من يشبهك. من .. يا يمن
08-10-2018, 06:12 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
عزيزنا الكاتب الجميل الدرديري سلامات ومبروك علي الشباب دانيل يا الدرديري بعد ما اخوانا عتالة الجينز ترجموا لي دانيل الكلمات دانيل الحت واصرت يكملوا ليها الكلام . بس لما الترجمة دخلت في اللحم الحي . وفي المقطع البقول : في العيون ببنيلو دارين من مودة ومن منا. في الحتة حقت الدارين دي. دانيل طاحت واندلقت. ديك يا الدموع . وبقت. تتمطق في الكلمات الفردوسية تمطق . والله يا الدرديري. في اول عودة لي للسودان. مشيت لي استاذنا الشاعر. الرقيق. وحكيت لو. بي. دانيل والطريفي. و العرس التاريخي وكان سعيد. ومتكيف . .. عان يا الدرديري في شغلات. حصلت في المستودع b1. خليك قريب
07-24-2018, 02:37 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
عزيزنا الشفيف الوليد طه سلامات العالم ضيق يا الوليد في الاساطير القديمة قالوا الطريفي الخامس عشر فارق جملو. نحواحي نهر. العطبراوي . يا الوليد. اخوي. تعيش. كتير. تشوف كتير. . .. خليك. قريب. من المستودع b1
07-24-2018, 03:29 PM
Nasser Amin Nasser Amin
تاريخ التسجيل: 02-07-2017
مجموع المشاركات: 3562
اليوم داك اول مره اسمع صوت العروس العسل دانيل وهي تترنم بالبنينة الحميرية القديمة. والحبوبة مصباح تحاول تحفظ فيها بلهجة حضرموت . قمر اليمن شعشع شج السحاب فضة . .. صوت دهب ومع الفرحة وشوية الخجل تتخللو. بحة نديانة . لو سرحت بيك اللحظة في ديك الصور حتلاقي الناس ديل. يشهونا شديد . يشبهونا. يشبهونا في كل شي في دعوات البنينة وفي الحنة وفي. الحنين . وفي مرواد الكحل . وحتي الزلابية و الحرجل والسحارة. . لكن الحنكشة في سحارة دانيل الجات جواها الشيلة كانت حنكشة واضحة وتكفي الساعة ماركة جورج ارماني . والصبايا تشيل مع دانيل في البنينة قمر اليمن شعشع شج السحاب فضة والريم علي المفرق عادلو البرق رده امتي الرجوع شافين للديرة. و النبعة يا ذا. ذهب. يمني يا ذا عقيق مكلف يا. ذا. خدود. وردة هلا. هلا. لا. لا. هلا هلا هيلا
(عدل بواسطة Osman Musa on 07-25-2018, 07:34 AM) (عدل بواسطة Osman Musa on 07-25-2018, 10:00 AM)
07-25-2018, 11:23 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
خصم نص الساعة من مرتب الطريفي كان سبب الانقلاب الحصلو في حياتو . ومقطع الاغنية الاتكتب في طرف الكرتونة كان الانقلاب الاعنف في مستقل دانيل . دانيل اصبحت مديرة المستودعات كلها في نيويورك و في نيوجرزي . والطريفي اصبح العداد و مدير. المبيوعات في المستودع b1 . ١٩٩٩ دي السنة الاتمدد فيها الشغل بي. مجهودات الطريفي . والطريفي اصبح علي لسان عموم تجار الجينز في البرودوي .
07-25-2018, 03:25 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
الطريفي جمع بي المفارقو من سنين في مانهاتن . وحسب نيتو ما جال كتير . الطريفي قاعد يلاقي اي شي بالصدفة . التاشيرة صدفة والشغل صدفة . في الشغل ما تمالو شهرين والا هو الوحيد بين الشباب العتالة الحسم امرو . ودخل الاسكول بالليل في مانهاتن يمشي الشغل الساعة 7 صباح يطلع 5 مساء يدخل الاسكول 6 مساء يطلع منها 8 مساء . وده يا هو الدعك الحاصل للمهاجرين . جري و لفيف مافي زمن تحلق دقنك . الطريفي بعد ما ضرب الحظ معاو واخد تاشيرة مرافق لي تاجر سمسم طوالي جمد السنة الثالثة تجارة الفرع . ودخل عالم الويرهاوسات والصدف العجيبة .
07-25-2018, 07:32 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
سر الغنا وردت عبارة (سر الغنا) في أحد أغاني الراحل محمود أعتقد اغنية الفات زمان. لكن هل فيها مبالغة؟ بمعنى هل للأغاني اسرار لدرجة ممكن تغير حياة انسان رأسا على عقب للتحول الى مائة وثمانون درجة. صديقنا عثمان موسى والكاتب بموقع سودانيزاونلاين أحد السودانيين المهاجرين الى أمريكا روى حكاية واقعية أقرب للخيال عن أحد الشباب السودانيين الذي قطعوا دراستهم وهاجروا الى أمريكا في بداية حياتهم ليبدوا من الصفر هناك وبكثير من المعاناة. الشاب اسمه الطريفي. حتى الاسم من الأسماء السودانية البحتة التي تنتشر في الوسط والذي يغنيك عن كثير من الوصف والصفات ورسم الشخصية بالحروف. قطع الطريفي دراسته الجامعية من بدايتها وهاجر وبعد عناء معتاد وجد فرصة عمل كعامل في أحد المتاجر المتخصصة في الملابس الجاهزة المصنوعة من الجينز. المتجر تمتلكه أسرة يهودية من أصول يمنية. بنتهم اسمها دانييل مديرة المعرض والمشرفة على الطريفي مباشرة. سنها قريبة من سنه وهي جميلة جدا. والطريفي كان معجب بل (مكسر فيها على قولنا) وفي المقابل هي كانت تكرهه شديد بل معذباه بالعقوبات والخصميات . يوم من الأيام تأخر الطريفي عشرة دقائق فقط. وهي بعد أن أعطته (الطريحة إياها على قول المصريين) خصمت من راتبه نصف ساعة. غضب لكن كتمها في (حنانه كما نقول) ولا اراديا كتب على أحد كراتين الجينز التي تحت يده (مرات أقول أديه كلمة تزعلو ) مقطع معروف من الأغنية الشهيرة للجابري والأستاذ كامل عبد الماجد (سيد الاسم) لاحظت له يكتب شكت وحسبته نوع من السحر (أكيد اليهود هم أهل السحر يؤمنون ويعملون به أكثر منا) ولأن العبارة مكتوبة بالعربي وهي لا تعرف عربي. أخذت قطعة الكرتون، في غفلة من الطريفي، الى عمال سودانيين آخرين ليفسروا لها المكتوب. السودانيين ما قصروا أحضروا الكاسيت وسمعوها الأغنية كاملة وترجموها له سطر بسطر. خلونها نسمعها نحن كمان عشان نعرف سر الغنا الجد ***************** مـحـبـوبــى وكــتــيــن يـبـتــســم الــدنــيــا يـــانـــاس تـنـقــســم الفرحه تملاهـا وتزغـرد فيهـا والشـوق يرتسـم مــرات اقــول اديـهــو كـلـمـه تـزعـلـو حبة عـذاب وكـلام عتـاب انـا عارفـو مابتحملـو علشان اشوف خده الحريـر الدمعـه جاريـة تبللـو لكنـى قبـال ابــدا بلحـظـات اقـيـف اتامـلـو الضحكة واللفته البتاخد من عيونى النوم شهور وتجفلو وأنسى العتاب الكنت نـاوى اقولـه وارجـع منهـزم الــدنــيــا يـــانـــاس تـنـقــســم الفرحه تملاهـا وتزغـرد فيهـا والشـوق يرتسـم فى العيون ببنيلـو داريـن مـن مـوده ومـن منـي بضمه فى قليبـى إنبسـاط ومحبـه فياضـه وهنـا مـاردت غيـره ولاهــو راد زولا ســواى انــا نظراتـه كيفـن اوصفـا دى الفـى عيونـي مدونـا همساته تحنـان القمـارى الراجعـه للعـش والجنـا وتــضـــوى والــلــيــل يــنــهــزم وكــتــيــن يــبــالــغ ويـبـتــســم الــدنــيــا يـــانـــاس تـنـقــســم الفرحة تملاهـا وتزغـرد فيهـا والشـوق يرتسـم ***************** قال عندما وصلوا للمقطع الذي يقول: فى العيون ببنيلـو داريـن مـن مـوده ومـن منـي بضمه فى قليبـى إنبسـاط ومحبـه فياضـه وهنـا مـاردت غيـره ولاهــو راد زولا ســواى انــا نظراتـه كيفـن اوصفـا دى الفـى عيونـي مدونـا همساته تحنـان القمـارى الراجعـه للعـش والجنا. وترجموه لها انفعلت ودخلت في نوبة بكاء شديد جدا (ما عرفوا يسكتوها) وبعدها تغيرت نظرتها ناحية الطريفي. بل أحبته بجنون. وبارك أهلها هذه العلاقة وهم كذلك أحبوا الطريفي لحبها له. تغيرت حياته التحق بالدراسة مسائيا ليكمل تعليمه الذي قطعه وترقى في الوظيفة لصبح مدير المبيعات. وتزوجها وتوسع المتجر أصبح له عدة فروع. أكيد توجد تفاصيل كثيرة في هذه القصة حتى وصلت لهذه النقطة. والذي لم يخلص سردها أخونا عثمان موسى بعد . لكن ما أدهشني أنا هو سر الغنا الذي ممكن يعمل نقطة تحول بهذا العنف ويقلب الكره الى حب.😍😍😍
08-01-2018, 10:42 AM
Yousuf Taha Yousuf Taha
تاريخ التسجيل: 05-03-2013
مجموع المشاركات: 1034
عزيزنا استاذ نادر الفضلي سلامات وياخ كتر الف خيرك علي المرور بالمستودع و متابعة احوال العرسان . اوعدك بي التمومة . وهي اصلها متمومة بس نلاقي فرقة في نقلها للمنبر . انشاءالله حتي لو نتف نتف . وهي في الاساس قامت نتف نتف . والحقيقة هم مطوا. زمن المحبة. وحلحلوها العترسات ودهكوا بعض الاشواك دهك من الدرب . الدرب المحدرب الاصلو ما كان ساهل . الطريفي ماهو othello حق شكسبير . الطريفي عشقو مر. وما بنقدر ولا بتهز . وده سبب كنكشة دانيل . تحياتي وخليك قريب بلاي .
08-16-2018, 03:01 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
عزيزنا الاخ حامد سلامات جايكم . وكيف ما اجيك . ياخ و الطريفي رفيق الكفاح . زمن اكلنا البيرقر بدون بيرقر والتحفنا بالات الجينز عشان نوفر حق محامي الورق . لكن يا حامد دي البلاد لمان يجيك فيها الفرج . مافيها ابن فتلة بدس ملفك ولا بطرطشوك . كل شي معلوم وكلو مفهوم . بجيك يا حامد اخوي
08-04-2018, 07:34 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
عزيزنا الكاتب الجميل الدرديري سلامات معليش انا والله بعيد من اهلي في رحلة عمل بعيدة واصلو. ما احب اشيل معاي كمبيوتر في السفر . والكتابة بي التلفون عندي زي السباحة بالجلابية . لكن برضو. بحاول. الاخوان العرسان طريفي ودانيل. ديل ملح و ملاح . خليك قريب للويرهاوس b1 عليك الله لا تبعد . تحياتي
08-07-2018, 08:47 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
يا عمدة أتاريك جايب خبر الطريفييين لي حدهم، والطريفية! "أم فاطرن يحكي برّاق البدودي سحابا" نان منو فيهم القالوا كان بـريـــدا؟
علا الكضب خرام خبيبي خرام، عرسكم سمح وطربكم قاجي وحس الزعاريد فات الهدسون و قطع البوتاماك ووصل لي عن خليج المكسيك وعدا بي غادي
وهاك "البنينة الحميرية القديمة": “مــرات اقــول اديـهــو كـلـمـه تـزعـلـو حبة عـذاب وكـلام عتـاب انـا عارفـو مابتحملـو علشان اشوف خده الحريـر الدمعـه جاريـة تبللـو لكنـى قبـال ابــدا بلحـظـات اقـيـف اتامـلـو الضحكة واللفته البتاخد من عيونى النوم شهور وتجفلو وأنسى العتاب الكنت نـاوى اقولـه وارجـع منهـزم الــدنــيــا يـــانـــاس تـنـقــســم الفرحه تملاهـا وتزغـرد فيهـا والشـوق يرتسـم فى العيون ببنيلـو داريـن مـن مـوده ومـن منـي ***** بعد ما اخوانا عتالة الجينز ترجموا لي دانيل الكلمات دانيل الحت واصرت يكملوا ليها الكلام . بس لما الترجمة دخلت في اللحم الحي . وفي المقطع البقول : في العيون ببنيلو دارين من مودة ومن منا. في الحتة حقت الدارين دي. دانيل طاحت واندلقت. ديك يا الدموع . وبقت. تتمطق في الكلمات الفردوسية تمطق . .. في الاساطير القديمة قالوا الطريفي الخامس عشر فارق جملو. نواحي نهر العطبراوي . .. صبيات يهود الابتاون والسكند افينو وداونتاون بركلن كانن زي النجف يوزعن في صحون العشاء الحلال ( كشر ) والبخور السوداني الدخل صدر دانيل وما مرق.. عاكل . التوم من رباعة العريس عتالي في المستودع c2. التوم نعنشبو الشربوت . وشغل شريطو المجنونبو . شوف عيني سكر نقع دانيل و جهك القمر الطلع والسنون براقهن شلع يا بتنا ديسك نازل كاسر الضلع النرضي بالهم والولع يا بتنا شوف عيني سكر نقع ***** عليك امان الله السمحات في ديك الليلة حتنو. حت السنين و بدون ترجمة الناس بقت واحد وابو العروس في اليوم داك لبس جمبية جدو الحضرمي . والطريفي هايج يصقر. بالعراقي وكرباج العنسيد. نفس هيجان الاتبراوي في شهر اغسطس. الاتبراوي دافر قدامو حطب الشاف و الكليت و الطريفي. ودانيل دافرين . ***** اليوم داك اول مره اسمع صوت العروس العسل دانيل وهي تترنم بالبنينة الحميرية القديمة. والحبوبة مصباح تحاول تحفظ فيها بلهجة حضرموت . قمر اليمن شعشع شج السحاب فضة ... صوت دهب ومع الفرحة وشوية الخجل تتخللو بحة نديانة. لو سرحت بيك اللحظة في ديك الصور حتلاقي الناس ديل يشهونا شديد .. يشبهونا.. يشبهونا في كل شي في دعوات البنينة وفي الحنة وفي الحنين. وفي مرواد الكحل وحتي الزلابية والحرجل والسحارة. لكن الحنكشة في سحارة دانيل الجات جواها الشيلة كانت حنكشة واضحة وتكفي الساعة ماركة جورج ارماني. والصبايا تشيل مع دانيل في البنينة قمر اليمن شعشع شج السحاب فضة والريم علي المفرق عادلو البرق رده امتي الرجوع شافين للديرة. و النبعة يا ذا ذهب يمني يا ذا عقيق مكلف يا ذا خدود وردة هلا. هلا. لا. لا. هلا هلا هيلا”
يا بنينة.. والريم على المفرق.. عن يهود اليمن
08-08-2018, 01:22 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
عزيزنا الكاتب و المثقف الكبير هاشم الحسن سلامات ياخ. الف شكر علي المجاملة و الختة الكريمة في كشف الطريفي . الطريفي قاليك يا ود الحسن دي هي المحرية فيك . دايما. قدامي ودايما. زول. ملمات . والله اتخيلتك يا هاشم وانت في كسلاء مارق بالسديري و جادع عمتك فوق كتفك تبشر فوق السايرين في سيرة الطريفي . ما عارف الخلاني اتخيل مرور سيرة الطريفي بي شارع الشهيد حران في كسلاء شنو. . بالمناسبة شهيد كلية التربية عبدالرحيم حمد حران ود فاطمة في الحسبة ود خالتنا. لزم. . هو من المحمية حلة القلعة لكن عاش عندكم في كسلاء لاحدي ما استشهد في ثورة اكتور قدام القصر الجمهوري . راجع. ليك. لي عرسة. مانهاتن التاريخية . والحضور. نفر نفر. . من بنات الحاخام يوسف التعزي. وشلة. مونيكا لويسكي . ولاعبة التنس اليهودية. السمحة سارة فيرجسون .
08-08-2018, 02:19 PM
هاشم الحسن هاشم الحسن
تاريخ التسجيل: 04-07-2004
مجموع المشاركات: 1428
Quote: ما عارف الخلاني اتخيل مرور سيرة الطريفي بي شارع الشهيد حران في كسلا
الخلاك تتذكر الشارع دا هو المفرق يا عثمان، المفرق حيث الريم ياعثمان.. "قمر اليمن شعشع شج السحاب فضة والريم علي المفرق عادلو البرق رده" يشهوك في قمر اليمن أو كأنو البلد عدمت الأقمار!! لكن يا أرباب، مع إني ماخد في خاطري من "الطريفي" في شان بتنا "الطريفية"، تحز في الكبدة!! "أَخَدَرْ لَيهُو ضُلْ فَوقُـو المَحَاسِنْ شَـرَّنْ أَفْلج فَاطرُو زَي برق السَواري الكرَّنْ يِتقَسَّـــمْ مَقَاطِـع في المَشِــي ويتْحـرَّنْ زي فــرخ القطـا الأمَّاتو رَكَّـنْ وفرَّنْ" إلا والله انبسطت تب من عرسكم وحفلتكم وأنا ذاتي حسع اتخيلتا السيرة دي في كسلتنا ديك، وما بعيد نودي اليهود ديل يتبركوا في المقام ونمدحلهم شيء لله يا حسن ويا مسهلا يا مسهلا والسيرة كمان أبشرك، غيرنا نحن أهل الطريفي، برضو فيها أهل دانييل من اليمانية.. أقوام أقوام من تعز ولحج وصعدة وصنعا والمخا وهلولة حضرمية، وشعشعات من أقمار اليمانية.. تعرف يا عثمان، في مدخل شارع الشهيد حران بأول الحي (حي الشهيد حران) هناك في مفرق كبير ومهم فعلا وحيث الــدنــيــا يـــانـــاس ممكن تـنـقــســم .. غربا إلى السوق والحكومة والكجر من جهة شمالية قريبة، تووشك في بيوت كبرى أسر اليمانية، آل الضيقي، فيه شهدت رقصهم بالخناجر عجب.. من جهة شرقية يوديك على بيوت ناس الدرديري كباشي مارا بي باب ناس خالتك فاطنة، وممكن تشرب من المزيرة.. ومن جهة جنوب شرقية، ومارا بحي البنيان والهندية، يوديك لي أب جلابية سيد الجبل والختمية.. زيارتو باللتنين.
قلتا لي التوم عشا البايتات "نعنشبو الشربوت"!! ها المطيميس.. لقى البركاوي وبتمودة من وين؟
08-08-2018, 06:14 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
عان يا هاشم اخوي كلام زولك الطريفي . قال : دانيل فقشتلو فقشة من وصيات جبران خليل جبران العشرة . قال : قالتلو نيويورك الحبيبة سرها في فهم اللغة النيويوركاوية الطاعمة لازم تتعلمها وبعد تتعلم منها و تفوت النص بتلاقي اللغة ادرعتك . نعم . انا متذكر اي كلمة طلعت من بين شفايف دانيل . متذكر اول طلعة لينا بعد موافقة الاسرة وشروط الطلعة وموعد العودة . متذكر الفرحة والعجلة ف في مكوة ال roca wear jeans و ال roca wear t.s ومتذكر حتي ال one man show باقي فتيل السودان . ومتذكر بعد شمتو فيني سالتني عن ال natural spray وجات سيرة الصندل وكانت تحمر لي لمان يفلت الكلام للسنتر . . واصم خشمي . وهي تضحك . متذكر انا كنت ساكن في coney island ave وهي ساكنة في ocen parkway بيناتنا زي اربعة شوارع لكن بين الفجتين فرق السماء من الواطة في السعر . اتلاقينا وركبنا المترو مع بعض لي مانهاتن نزلنا الحي الصيني دخلنا محل وشم عربي صاحبو لبناني . من في المترو اتفقنا . انا اكتب اسم دانيل في لوحة كتفي . وهي اختارت ترسم زهرة . وجرجرتنا الزهرة للكلام في المستقبل والتلقيح و النحل و المال و البنون . طلعنا من محل الوشم مشينا لي ال nightclub المشهور البتوين park and madison ave . انا في النايت كلوب كركعتلي جك شربوت مدنكل . جك بداية العلاقة ودانيل كاس نبيز ابوكديس ورجعنا بعد ما هي واهلها حفظو ( مرات اقول اديهو. كلمة تزعلو. تررر. ررا
08-09-2018, 11:23 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
عزيزنا الاخ هاشم الحسن سلام وانشاءالله لو ربك مدد في العمر لابد اقابلك بي الدكتورة الاديبة امة العليم السوسو عبدالله الحجري سفيرة اليمن . الامم المتحدة نيويورك وبعض اشطر اليمنيات مولدات كسلاء في نيويورك . اخونا الطريفي في حكاياتو عن جملو الفارقو جدو الطريفي الخامس عشر يقول : في فيضان من فيضانات زمان الطريفي الكبير. وصل من اتبرا لي نجدة. اهلو. في كسلاء . وقطع بي جملو. خور. الاميراي . ونزل. مع. النفير. ترس. في حلة. مكرم الدروة. . وشمال الحلنقة ولاعند. السواقي. شمال. خور الشايقية . ومن هوشتو. وهمتو. في. محاولات. انقاذ. اهلو. فقد. جملو ورجع. اتبرا. حماري. . لكن الطريفي 1998 طريفي مانهاتن حصل. الرايح من جدو . وافتهن مع حبيبة العمر. دانيل احلي افتهان .
عزيزنا الاخ عبدالله الحبيب سلامات فاتتك احلي عرسة . عرسة الطريفي من البنوتة العسل دانيل . الطريفي يا عبدالله كان بيحكي مع امو عن دانيل في التلفون في مكالمة طويلة شقت الاطلنطي لي ضهاري عطبرة . قال ليها دانيل بقت مننا لحم ودم . ودانيل اصبح اسمها الظافر ينمو في ضمير ولدك ايمانا وبشرا وعلي الغابة والصحراء يلتف وشاحا . فبدانيل يا امي انا. لن ارجع شبراء سندق الصخر حتي يخرج. الصخر لنا زرعا. وخضرا ونرود المجد حتي. يحفظ الدهر. لنا اسما وذكرا. ام الطريفي قالتلو. نان هسع انا ابكي ولا اسوي شنو ؟ علي كل حال يا امي بخورك عكل احلي عكلة . شمنو الساحر شم . وجننبو جن . وفي عز عكلتو لندا القبطية المعانا كتحتلو تاني . لندا يا امي قبطية عطبرة ابدا ما فاتت ولا نست طعمية السودنة . في حنة ولدك يا امي اتلمت كل الاديان . كل الاديان عكلت نفس عكلة بخورك . عرفتك خفستي لاعند ضريح سيدي الحسن . من صرة البركة المصرورة مع اللبان . لكن لقيت ليك الناس ديل هنا عندهن نفس العقيدة .
تعرف يا ود أعم مرتي عندنا صالون خاص ببعض الجمهوريين نقلت فيه قصتكم اللطيفة دي تعقيبا على موضوع مشابه وقلت لهم this is my 2 cents ود أعمك دكتور مصطفى الجيلي كتب تعقيبا عليها
ياخي بالغت... الرواية السكرة دي كلها، وتقول لي "تو سنتس"؟؟!!
بجيك صادي بعد نتلذذ بمداخلات الأديب هاشم الحسن
08-11-2018, 01:27 AM
osama elkhawad osama elkhawad
تاريخ التسجيل: 12-31-2002
مجموع المشاركات: 20429
عزيزنا ابو النسب د. عبدالله عثمان سلامات ومراحب بيك في المستودع b1 . المستوع المسرح الجمع الاديان احباب بعد شكلة كاربة وقطع ماهية .لكن بارك الله في الحبيب الشاعر كامل عبدالماجد القدر. كلامو . يفركش الشكلة ويجمع القلوب . الاغنية يا دكتور عبدالله عثمان بقت زي السكر في لسان بنات الستي . مشكور علي نقل القصيصة الي منبركم العامر وخلي كمان قريبنا الزيدابي الجزور. استاذ دالي يضحك شوية في حكايات المستودع . والتحية مطبوقة الي ود العم العزيز بروف مصطفي الجيلي وقولو. الحكاية ما مرقت من بين كسلا و ضهاري عطبرة و مانهاتن تحياتي
08-11-2018, 09:11 AM
بدر الدين الأمير بدر الدين الأمير
تاريخ التسجيل: 09-28-2005
مجموع المشاركات: 22959
عزيزنا استاذ بدر الدين سلامات ابداع وييييييين ؟ ياخ لا تجامل ساكت . الابداع الحقيقي كان ابداع بنات التعزي ماشاءالله عليهن . التعزي هو جدهن الرابع . جدهن مرق من مدينة تعز قبل مروق جد دانيل . ديل هن . الكان عليهن الرك في الاخراج والتصوير و ترتيب المغنين والمغنيات و جلوس الضيوف . كانن يلصفن في اي ركن زي القناديل . ياخ الف شكر علي المرور الجميل
08-11-2018, 10:58 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
عزيزنا الشاعر والناقد الكبير الخواض سلامات والله يا اسامة ابدا ما كنت قايل الصدف ممكن تلمني بي مدير تحرير صحيفة جيروزاليم بوست في طربيزة عشاء واحدة . وجمبو ملحم سامي اكبر تاجر زنك في امريكا و السيدة الافيت صاحبة سلسلة مطاعم كووشر فود . . لافيت دي يا اسامة قالو عندها كاش في البنك 4 مليار دولار بالقديم . و تصحك عادي .
ما كنت مصدق و انا المهاجر المسكين مدير كلات العتالة في b1 وزميل الطريفي العريس اقعد بين قوم زي ديل . علي كل حال . ابتهجنا و ربعنا الطريفي قبض الرايحة بعد ما ساج ولاج . كلهم ساجوا ولاجوا من بين جبال حضرموت للمغرب وبالباخرة الي نيويورك . .. تحياتي
08-11-2018, 12:51 PM
هاشم الحسن هاشم الحسن
تاريخ التسجيل: 04-07-2004
مجموع المشاركات: 1428
Quote: ام الطريفي قالتلو نان هسع انا ابكي ولا اسوي شنو ؟ علي كل حال يا امي بخورك عكل احلي عكلة . شمنو الساحر شم وجننبو جن . وفي عز عكلتو لندا القبطية المعانا كتحتلو تاني. لندا يا امي قبطية عطبرة ابدا ما فاتت ولا نست طعمية السودنة . في حنة ولدك يا امي اتلمت كل الاديان . كل الاديان عكلت نفس عكلة بخورك. عرفتك خفستي لاعند ضريح سيدي الحسن، من صرة البركة المصرورة مع اللبان . لكن لقيت ليك الناس ديل هنا عندهن نفس العقيدة
((لقد صار قلبي قابلا كل صورة فمرعى لغزلان ودير لرهبان وبيت لأوثان وكعبة طائـف وألواح توراة ومصحف قرآن أدين بدين الحب أنى توجهـت ركائبه فالحب ديني وإيماني)) الشيخ الأكبر.
عليكم النبي يا أرباب ويا عِبدلله ما تقصموا ضهر أخيكم بمثل إشارات “الأستاذ والأديب” بينما نحن في حضرة الأدب والأدباء الجد.. هن شنّهِن غير اسهابات “سوعربيات” في محاكاة عضيرة للأساتيذ منكم على نهج الطبقات، ثم من خبرة قليلة مع طقوس “السكناب” والذي هو أصلا، فن في تطويل السلامات والسؤآلات وتبادل الأخبار العاديات، وتلذذا شديدا بذلك، مع فنجان جبنة بجنزبيل… وها انّديكم شوية سكناب؛ قام الطريفي يحكي مع أمو، قام جاب سيرة بركة الضريح والعقيدة المشتركة مع دانييل، والسيرة دي جابت عِبدلله ود عتمان ومعاهو سيرة مصطفى ود الجيلي الكسلاوي، ودي اللي حتجيب سيرة صاحبو وقريبي عادل ود أمحمّدخِدر والذي هو لمصطفى صاحب ودوام بيطراهو.. وعادل لو حسبتها يا عثمان تلقاهو قريبك وقريب الطريفي الخامس عشر الكان قلتا لينا: ((وصل من اتبرا لي نجدة اهلو في كسلا وقطع بي جملو خور الاميراي ونزل مع النفير ترس في حلة مكرام الدروة وشمال الحلنقة ولاعند السواقي شمال خور الشايقية .. ومن هوشتو وهمتو في محاولات انقاذ اهلو، فقد جملو ورجع اتبرا حماري.)) ودا لأنو عادل أصلو في الزيداب وكِنُّور،، لكن أتبرا الحصاية بلدو الاتولد والربا فيها، وجدو الخدر قالو كان رفيقن للطريفي الخامس عشر لكنِّو بعد النفير في خور الشايقية قرر يقعد في قعر الجبل قريب من ساكن كسلا، وبعدها حصل النسب مع جدي ساكن مصب الآميراي. أها ومنها لم تنقطع العلاقة بين كسلا والزيداب وأتبرة ، بل مدّها بعض الحفدة إلى المكلا ولحج والضالع..
الأرباب أخوي، بعد عشوتك في تربيزة مدير التحرير دي، غايتو رجعتك الجاية للبلد إلا ترافق لك ناقد أدبي مقبول الشهادة.. يمكن يخارجك ويمكن لا:) أو بالعدم تشهد ليك أمة العليم بنت السوسوة.. بالله صحي يا عثمان أمة العليم السوسوة من كسلا ولّ بس عمّن ليها شاردلو من تار، هو الكان الساكن حيّنا؟
08-11-2018, 03:16 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
في هذا المقطع المؤثر ل عثمان موسى، يقفز كاتبه فوق الصور النمطية المتبادلة والعداء الديني:
Quote: قال لي. مصباح حبوبة دانيل. كانت متكيفة من الحريرة و الجبيرة و السبح. الوصلتني. من امي من السودان . ولامن مصباح درعت لي السبح حسيت بي نفسي بصالح في حبوبة. مصباح مصالحة . مصالحة تاريخية . مصالحة من القلب .
تلك مصالحة أثمرها الحب..مصالحة تجاوزت المرارات التاريخية والدينية والمعاصرة،
ورجعت إلى تجذر اليهود الشرقيين في ثقافات المجتمعات التي أتوا منها...
فعثمان يقدّم هنا صورة مختلفة تماماً عن صورة "اليهودي" في المخيال السوداني...
بالرغم من تلك "المصالحة الثقافية"، ففي القصة فجوات:
هل وافقت عائلة الطريفي على الزواج دون اعتراض؟؟،
وخاصة أن الصورة النمطية لليهودي في العالم الاسلامي صورة سيئة، رغم ان الاسلام يجيز الزواج من كتابية ...
نلمس تشجيع الحبوبة اليهودية للعلاقة، لكن في المقابل هل كانت هنالك اعتراضات أخرى لم تشر إليها سردية عثمان موسى؟؟
وهل كان يمكن للعلاقة أن تستمر بدون تشجيع الحبوبة مصباح؟؟
08-13-2018, 12:58 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
عزيزنا الشاعر والناقد والكاتب المبدع الخواص سلامات والف شكر علي مرورك الكريم علي بوست عطيل السوداني وديمونة اليهودية الف شكر علي الحضور البدراني والمشاركة في افراح الاصحاب دانيل و الطريفي والاستماع الي اغنية . ليتني في باب صنعاء نازلي . بصوت الفنان اليهودي زبون جولان . ثم الحديث . حديث الحاضر. المتابع . للداير. والدار. من عشق وفرح وربة في مستودع العشق والعتالة . تحياتي. و وافر. تقديري
08-13-2018, 04:31 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
عليك امان الله يا ود الحسن زولكن ود التوم زول فريق درديب بس في لمحة غزل كان داير يقع في شباك بنات التعزي . ما انو شافهن كم مره في زياراتهن لي دانيل في الويرهاوس . بس في داك الليل وداك المكان . كانن بنات التعزي غير . والله يا ود الحسن لاهسع ما خلن عادات مدينة تعز قبل 124 سنة نفس حجول الفضة عيار تلات تسعات . ونفس سن الدهب اللاصفة فوق العقد الابيض العجيب . ولما الفنان زبون جولان يترس بي اغنية ليتني في باب صنعاء نازلي . ود التوم يترس معاو لامن نفسو. ينقطع . .. ح. اجيك لي الاديبة الكسلاوية امة العليم السوسوة و اجيك لي صنعانيات كسلا التي اشرقت بها شمس ناس كتا ر وجد هي. في الحقي. جنة. الاشراق. والحلاوة و التطلعات . امة العليم يا استاذ هاشم كانت لما ن. تجرليها نمة من نم شاعر اليمن الفخيم البردوني في قناة صنعاء. الجزيرة العربية كلها تتشهد . يا سلام علي البت الحديقة . زي ما قال اخونا خطاب ود حسن احمد الله يطراهو. بالخير .
طربيزتنا خلاف عتالتنا رباعة الطريفي بتذكر. في زولة خمسينية نحيفة طويلة جميلة اذكر. قالت اسمها . كارول وفي الدردشة قالت عندها دكتوراه في التمريض الاكلينكي . وقالت مشت السودان سنة 1984 عملت محاضرة في معمل استاك عن التعليم الاكلينيكي . ومتكيفة جدا من استيعاب الطلبة .
08-15-2018, 08:09 AM
هاشم الحسن هاشم الحسن
تاريخ التسجيل: 04-07-2004
مجموع المشاركات: 1428
ياخ بارك الله فيك يا اخونا هاشم الحسن الجبتلينا زولنا العملاق احمد فتحي ابو ست الحسن الاميرة بلقيس . الفنانين الامريكان اندهشو اشد الاندهاش في عزف احمد فتحي في حضرة اوباما في البيت الابيض . احمد فتحتي طقطق العود بالعربي والافرنجي نقر صنعاني نقر تعزي نقر حضرمي نقر. تهامي . ساط و جاط بين الخماسي و السباعي و اتجننو الفنانين الامريكان بمافيهم اوباما لما فتحي عزف بالعود مقطوعة ري شارلس . احمد فتحي الموهبة تمشي علي قدمين . والرجل. دايما. ما يكون فاكهة الكرنفال اليمني في نيويورك . بلقيس دي. عندها. يقيف الكلام .
08-15-2018, 09:40 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
عزينا الشاعر الكبير اسامة الخواض سلامات والف شكر علي جلب الرايع زيون . فنان التراث اليهودي الاول . وناقل الفن اليمني القديم للعالم الامريكي الشمالي و الجنوبي . ياخ. الرجل اتحفنا في فرح. الطريفي ودانيل . كان حفل. اتمدت. فيه. الايادي السودانية تسالم وتبارك في محبة اصيلة . الف شكر. اخي اسامة
08-20-2018, 07:10 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
طبعا بعد ما الطريفي شاور اهلو وصمم علي الزواج من دانيل كان لابد من نعرف بعض المعلومات عن عادات اليهود . قمنا مشينا لي الحسين اللبناني . والحسين زول قديم مع اليهود كان يشتغليهم معاملات التخليص الجمركي و دفعيات الايجارات و الكهرباء و يتابع الحاجات القانونية مع المحامين .. سالناهو. بعد ما ضحك ديك الضحكة. المستهبلة . سالناهو. عن طريقة كتابة. وثيقة الزواج. وفي ديك اللحظة. عرفنا. منو. انو الوثيقة. بسموها ( كتوباه ) بالعبرية. و حدثنا. حديث طويل. و مهم. عن تفاصيل. التزامات. العريس. نحو. العروس. وعن ليلة الدخلة وعادات بنات اليهود. في ليلة. الدخلة. . العادات القريبة. للعادات. الشرقية. . كلمنا بدون اي تحفظ عن انو بنات اليهود انيقات وجميلات و ما مختونات . يتكلم بي صعلكة لمت خبرة سنين طويلة بين شعوب الارض . وضحكنا. لمان. قال. لينا. بس. الامريكان. ما. يفهمون عادات. صراخ. البنات في ليلة الدخلة. ولازم. الشرطة. تدخل عليك. و تطير. عليك. فرحتك. وايزي. ممكن. تعدي. ليك. كم. ساعة. في. الحبس. و التحقيق. . ثم. الاعتزار للعروس. و العريس. بعد. ما. نفسك. يقوم. .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Osman Musa
سفيان بشير نابرى
Abdelrahim Mohmed Salih
walid taha
Nasser Amin
نادر الفضلى
ناصر حسين محمد
Sayed Bekab
هاشم الحسن
Abd Alla Elhabib
عبدالله عثمان
osama elkhawad
بدر الدين الأمير
فيس بوك
تويتر
انستقرام
يوتيوب
بنتيريست