|
|
 Re: رسالة أخيرة من الموصلي للابن معتز صباحي (Re: جمال ود القوز)
|
حسب لغة الكوتشينة ، الوِست تحديداً ، الشغلانة دي كالآتي :
التسمية قامت من احمد يس مربوطة ( على حسب قوة ورقو و إعتماده على ورق زميلو او استاذه !)
الطرف التاني قال 9
الموصلي خايف من ( السيك) سمّى و هو جاري قال 13
( عارف ما عندو ورق ، وورق زميلو باين عليه تعبان !)
حاتم قال ملعوبة ! 😏
......
الخطوة الجاية حت آتو شديد
يا كمان دكّوها !!
| |
 
|
|
|
|
|
|
|
|
Re: رسالة أخيرة من الموصلي للابن معتز صباحي (Re: امير بوب)
|
بل الامر
يا امير بوب
اراه كالاتي كوستاوي قديم
ان الاستاذ سمى مربوطة ورجع وقال تمانية بكل ثقة
زميل حاتم مرر باص فوق راي كون القبول عند زميله الحريف
احمد يسن مداها (على قدر الشوق ما يمد)
لحداشر معتمدا على ورق زميلو هو ضامن السيك في قبول لاعب حريف
حاتم ورقو ممتاز وحريف بصراحة
جغم اللعبة وهو مرتاح
ونحن البرة ومشجعين للعبة الحلوة ونحب حاتم سرا وعلانية
شايفنها ماشة في اتجاه سيك
او
ربما دكوها ناس
سلام مربع يا باشا
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: قسم الفضيل مضوي محمد)
|
امير بوب
نما الى علمنا - زي مابقول حدباي- ان امير بوب العامل حريف وست دا
انه بعد ان كان بتفرج على الوست سنين طويلة وقرايبو واصحابو بدأوا يعلموهو اللعب سنين اطول
وبعد السنين دي احس انه بقى تمام وممكن ينزل الملعب عادي جدا وقدر ما الجماعة قالوا ليهو اديها كمان شهر
ولا شهرين حلف بالتقطعو انه حيسيك اي زول يقيف في طريقو
وقد كان ... القبول كان حق زميل امير .. تم التوزيع ورفع امير الورق ورضاهو تمام .. كل بوهية مع بعض
والقاعد يمينو قامت منو (مربوطة ) وامير طبعا التسمية عندو .. صاحبنا ساكت والناس منتظرة تسميتو
والناس تقول ليهو سمي يا .. التسمية جاتك .. وهو ساكت .. ما تسمي ياخي قول تسميتك
طبق الورق في يد واحدة وقال الزول دا قال شنو ؟ كلهم ردوا قال ليك (مربوطة)
مربوطة ؟ مربوطة !!؟سكت مسافة وقال ليهم ( مفتوحة)
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
أنا ما عارف هل الأسئلة بتاعتي دي ما واضحة؟
شنو الفكرة بتاعة (الشهادات) بالضبط؟
يا يوسف،
الموضوع دا واضح وما داير لولوة، مافي زول هنا بينازعك في اسم برنامج
لكن المطروحة استفسارات منطقية عن حدث معين ونحتاج لتوضيحات منك، الناس دي طالبة منك إجابات
نعيد ليك سرد الأسئلة؟
الغريبة دي نفس (الحركة) القديمة بتاعة البوست أبو ستة داك! جيت عرضت الكرتونة
Re: كاونتربوينت؟Re: كاونتربوينت؟
Re: كاونتربوينت؟Re: كاونتربوينت؟
لكن قديت المقرر!
____
ولسة البتاعة المدورة ما وريتنا قصتها شنو؟
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
دي الأسئلة يا يوسف
وما أظن فيها أي مطالبات بشهادات، فقط ردود مقنعة.
- هل رواية تنفيذ أغنية منى مجدي بخصوص تفضيلها لتوزيع آخر وبأنو التنفيذ تم من وراء الكواليس وأنت أصريت مع ذلك تتشبث وتقيف فوق (البتاعة المدورة) صحيحة؟
- ليه بتصف توزيع الزملاء الآخرين بأنه مجرد (تنظيم)؟
- هل فعلاً فرضت على الفنانة نادية الطيب أن تؤدي أغنياتك فقط دوناً عن غيرك؟
- هل فعلاً معتز صباحي (أحب الأغنية) أغنية "الميعاد" بدون ضغط أو فرض منك؟
- حملة (الضغط الجماهيري بالحب) شنو هدفك منها وبتتوقع من الأعضاء هنا يعملوا شنو بالضبط لمساعدتك؟
- شنو أصل المشكلة بينك وبين معتز صباحي سبب بوست (الرسالة الأخيرة) دا؟
- إيه غرضك من الإشارة لمعتز صباحي مرتين بأنه لا يمنع الفنان من الأداء إلا الموت أو (المرض العضال)؟
- شنو بتقصد بالضبط لما تدعي بأنك (زبطت غنا الشباب)؟
- شنو بتقصد بالضبط من أنك (هرم) هرم في أي جانب فني مثلاً؟
- هل تعتقد أن (إعطاء الشباب فرصة للنمو واكتساب الخبرات) لابد أن يتم من خلال ترديد أغنيات أنت طرف فيها؟
- ليه أنت مصر تفرض نفسك على الشباب وترغمه يغني ليك أو يقبل غصب عنه برؤيتك؟
- السبب شنو في نشر موضوع شخصي كان يمكن حله بعيد عن الإنترنت وليه بتفضل حشد الناس وإقحامهم في مشاكلك الخاصة؟
- أغنية (تخيل) هل فعلاً استدعوك عشان توزعها والفرقة العالمية نفذت (توزيعك)؟
- هل أنت سعيد الآن بلقب (المايسترو)؟
___
Crystal clear.
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: حاتم إبراهيم)
|
خخخخخخخخخخخخ
OMG
Is it USAO
HS clear
🤣🤣🤣🤣🤣🤣🤣
أمير شبه المستنير ...
الوست لعبة محدودة التحدي والتفكير ...
من عشرين سنة عملنا بروموشن للوست
وقلبناهو بريدج ... والبريدج زاتو وصلنا
فيهو مرحلة سينير بلير نواحي دبي قبل
اكثر من ١٥ سنة ... علي أية حال البتعملو
فيهو دا اسمو 7nt بي لغة البريدج ...
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: معاوية المدير)
|
Quote: بتبالغ يا أبو حسين ..
بتحمّش في النيران بدل تطفيها ..
حتستفيد شنو يعني من جرجرة زملاء للمحاكم ؟ ..
بعدين هل انت شايف هناك مايستدعي ذلك ..
دي اختلاف وجهات نظر عادية جدا ولاترقى أبدا لمحاكم وجرجرة ..
وعادي أي زول ممكن يكون شايف موصلي مافاهم في الموسيقى ..
ويواجهه بي رأيه ده ويقولوا ليهو قدامه وين المشكلة هنا ؟ ..
هل موصلي فوق النقد مثلا ؟ ..
وهل بتتصور إنه الكل حيتفق على فهمه وإحترافيته للعزف أو الغناء أو التلحين ؟
معقوله لكين !!! ..
بعدين انت ماقريت الإيحاءات الإتوجهت لحاتم من الاستاذ ..
مش ممكن الآية تتقلب في المحكمة حينما يرجعوا للإيحاءات دي ..
هل حاتم ورغم كلامه اللاذع وجه لي موصلي كلام فيه إيحاءات مماثلة ؟ ..
مالك كيف تحكم يارجل !!..
في موضوع التشجيع للتقاضي ده انا بشوف تراجع موقفك ..
ماعاجبني وحاة الله ..
انت بس قول الفضول كاتلك وعايز تعرف حاتم ده منو .. خخخخ.. |
أهلا ود القوز ...
ببالغ في شنو يا زول خلاف ليه أكتر من سنتين تقريباً و تحرش وااااضح جداً ...
الزول دا من زمان الموصلي قال ليه تذاكر الطيران علي نتقابل و نتناقش في الموسيقى و كل زول يقول العندو فيس تو فيس
رفض و عملها لينا كلها أسألة ... 
و هو كل ما يذنقوه يعملها ليك أسألة عشان يشتت الكورة..
و بعدين شايف فرقة حسب الله إتجمعت و دا دليل على إنو الزنقة شديدة ....
و أقول ليك حاجة هو موضوع المحكمة دا بتوقف على إنو الشخصية دي حقيقية و ليها عنوان معروف ... و دي مشكوك فيها ...
خلينا نخلص من الموضوع دا ....
أسي يجيك يقول ليك مشغول و حا أغيب شهر ....
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: جلالدونا)
|
موقف الموصلي في البوست دا
زي وضع بن سلمان مع حادثة خاشقجي
ليه رسالة لفنان من فنان ترسل في الاسفير ؟
وليه اخيرة ؟ وين باقي الرسائل ؟
ولو اخيرة ماذا سوف يليها ؟
ولو تضامن مع فنان في محنة او ظرف طارئ
( كما ورد تلميحا ) ليه تكون اخيرة ؟
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: MAHJOOP ALI)
|
| Quote: و بعدين شايف فرقة حسب الله إتجمعت و دا دليل على إنو الزنقة شديدة |
هههههههههههههههههههههههههههههههههههههههههههههههههههههه
اسع المشكلة ما عرفنا المزنوق من الما مزنوق
يا ابو حسين طالما انت عارف انو في زنقة ورينا ليها وين؟؟؟
انا غايتو ختيت نفسي في محل الموصلي
ومشيت الشرطة عشان افتح بلاغ .. قام المتحري قالي اها مظلمتك شنو؟؟؟
حسب ملابسات البوست دا قدر ما فتشت لي مظلمتي ما عرفت اصيغها كيف وما اتلقت زاتو
غايتو الا كان اقولو الناس ديل وجهو لي اسألة انا ما عايز اجاوب عليها !!!
انا كنت متمني انو الموصلي يرد على ما جاء به الاخ ضرار بالذات
لانو الموصلي فنان واكيد عندو معجبين وعندو جمهور من الموسيقيين واكيد عدم الرد
حا يأثر سلباً على الموصلي في الوسط الفني تحديداً كل دا ناهيك عن القراء والمتابعين هنا
والموصلي يا دوبك راجع بعد غربة طويلة وتجارب اوسع واكيد عندو افكار وبرامج محتاجة التعاون من اهل الموسيقى والفن لتنفيذها
لمن ما يرد على اتهامات زي دي ويفندها ويجلي الحقائق عن كل ما هو غير واضح فبالتأكيد دا حا يضع
كم هائل من الحواجز والموانع التي تحول دون التعاون المطلوب بينه وبين اهل الفن والموسيقى في ام سودان
دا كل الكنت انا بتمناه يحصل لكن للأسف الموصلي اعلن عدم رده على المداخلات وانه يمم وجهه ناحية القضاء وللاسف حسب البوست .. بلا قضية
فيا ابو حسين ياخي بدل تشيل الهبابة وتهبب في النيران .. حاول اجلغلك فيها جغمة موية تطفي بيها النار بدل تخلو الزول يشيل اصبعو ويطبظ عينو
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Mahjob Abdalla)
|
الفريق التاني وينو يا محجوب؟
كدي طلع لي جملة مفيدة اتقالت من طرفهم في القضية
أنا عاوز جملة مفيدة :)
غير أحمد يس ما كان في أي زول بدافع عن موقف الموصلي وأحمد ذاتو بعد ما لقى الموصلي مودي زميله للقضاء حاول يتدخل ودياً والموصلي ما رد ليه .. وشئ طبيعي إنه يزهد بعد كدة في الدفاع عن شخص كتب موضوع في منبر نقاش عشان الناس يتناقشوا فيه ثم قرر تحويل النقاش لسوح القضاء
الباقين كلهم شايلين غبائن قديمة زي ما قال عنهم حاتم ذات مرة (ترا كل يوم بصحى الصباح ألقاهم بكوركوا) 
الموصلي ما ترك أي مساحة لصليح شغال تلميحات وتهديدات ورافض يرد على حاجات أثارها هو بنفسه .. شوية كدة وحيسمي البوست أسألوني قبل أن تفقدوني عن سبب غياب معتز صباحي
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: عبدالمنعم الطيب حسن)
|
Jongleur, professional storyteller or public entertainer in medieval France, often indistinguishable from the trouvère. The role of the jongleur included that of musician, juggler, and acrobat, as well as reciter of such literary works as the fabliaux, chansons de geste, lays, and other metrical romances that were sometimes of his own composition.
عشان انت زول مسكين وغلبان والموصلي معذبك شديد
قلنا نشرح ليك كلمة
الجقلرة
تحريف سوداني لكلمة
Juggler
وهم موسيقيو الشوارع في فرنسا في العصور الوسطى البارعين
هي اسلوب العزف غير المقنن مثل موسيقى الشوارع
الله يكون في عونك ويهديك اخوي الطيب
| |
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
ياخي مستحيل أكون دايرك تسيب الموقع يا استاذ .. هو موقعي أنا ولا داقيني فيه حجر دغش!
كل الحصل كان تعليق على طريقتك في المشاكل بتبدأ بالشفت ود الاشلاق البعفص الصعاليك ثم فجأة تتحول للفنان اللي عندو شعبية وجمهور ويترفع عن الصغائر
وأصلاً كان تأمين على رغبتك بترك الموقع والتفرغ للفن والتوثيق وانا قلت ليك أنا مع القرار عشان عاوز الموصلي الفنان ما الموصلي بتاع المشاكل
وشاكر لكل التفاصيل الذكرتها دي
أساساً الموضوع مجرد حوار أثرته انت براك وبقيت ملزم أمام القارئ بالتبيان لا أكثر ولا أقل
أنا بالنسبة لي ما طالب صور للإثبات .. مصدق أي كلمة بتقولها بكيبوردك
ولا تزعجنك مشاغلاتي مع الشباب فهي مجرد مزاح تأتيك طراطيشه حين تكون شفت الاشلاق وتحتجب عنك تأدباً حين تكون الاستاذ الموسيقار الذي لم تمحى أغنيته سهم طائش من فلاشي لسنين طويلة
أخيراً اسمح لي اتناسى أستاذيتك شوية واخاطبك عضو لعضو
طريقتك في إدارة الأزمة اللي سببتها انت بمنشورك دة أصلاً ما حتعود عليك بخير وما كان في أي زول عارف حاجة عن كل التفاصيل اللي اصبحت مجبر للبوح بيها من أجل قارئك وجمهورك
الطريقة اللي بتحاول تعمل بيها داميج كنترول دي مستحيل تسبب أي حاجة غير مزيد من الداميج
مشكلتك مع معتز صباحي كان ممكن تتحل بالخاص ومع ضرار زي ما اتحلت باعتذاره حسب كلامك قبل كدة كان بتلفون ممكن تتفاهموا ويطلب من الصحيفة حذف مقاله
فكرة إنك تقاضي حاتم لمجرد إنه جاب الخبر وما أضاف ليه أي معلومة من عندياته يدل على ضيقك بالحوار اللي افترعته بنفسك في منبر حوار
فكرة مقاضاتك لصحفية لمجرد إنها نشرت كلام قالوا زول تاني غريبة كلو كلو .. أهو انت فوق نبزت كمية من الناس يمشوا يقاضوا بكري ابوبكر!
لاحظ أنا لا أطالبك بالرد على تشكيك حاتم في مقدراتك لا في البوست دة ولا في أي بوست تاني لكن زي ما قلت ليك هنا حاتم عندو أسئلة مفتاحية أي محايد ممكن يدرك علاقتها بالبوست اللي كان غامض قبل تدخله
وبرضو كعضو أعلن استغرابي لشخص يبدأ حوار ولما يناقشوهو في موضوعه الجابه يقول نتمها عند القاضي !!!
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Salah Zubeir)
|
يا صلاح الزبير انت قريت مداخلتي الأولى؟
أنا أساساً ما بدخل بوست ما فاهم فيه حاجة والبوست كان غامض من البداية
الموصلي رفض الشرح وجاء حاتم شرح قام الموصلي قال بوديهو المحكمة
هسة وريني الحق وين هنا!
طلع لي مكسب واحد من البوست دة يا صلاح؟
قول لي موقفك الواقفو ضد الموصلي غلط عشان كذا وكذا .. أنسى موضوع حاتم دة
أنا ما واقف مع حاتم ولا اتداخلت إلا بعد ما أعلن الاستاذ موضوع التقاضي
أنا بتضايق وحأظل متضايق أبد الآبدين من أي شخص يبدأ حوار بنفسه في موقع حوار ولما الناس تحاوره في موضوعه ذاتو الافترعو بنفسه يقول أنا ما بتاع حوار وإنما بتاع محاكم
بس دي كل القضية
_________
لكن لما الناس تقول كلام صاح في حاتم ما بقيف ضدها .. هسة فوق أؤيد الموصلي على مقولة حاتم السجمان واقول أيوة سجمان ونص وخمسة وحافظ بشير ذاتو سجمان
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: أحمد محمد عمر)
|
| Quote: حاتم عندو أسئلة مفتاحية أي محايد ممكن يدرك علاقتها بالبوست اللي كان غامض قبل تدخله |
😀😀😀😀😀😀
هسع دا شنو يا احمد ....
أسئلة مفتاحية بتاعت فنليتك ...
نان نحنا ما سألنا أسئلة مفتاحية
عن موضوع الأغوات قام هجا وساب
البورد ٦ شهور ... ولا دي تشيف وديك
كو ....
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
Quote: ولو لاحطتم في الحلقات الاخيرة هو وصفني بالهرم فما هو الجديد
+++
معتز دعاني لكل حفلاته وغنى معي على المسرح واشاد بي من على خشبة المسرح ووصفني باستاذه
+++
لما د امير استشارني في مقامات النوت الجابها وكان مختلف احمد يس فيها
كان في زول كاتب عليها؟؟؟
مش وريناهو؟؟؟
مش شكرني؟؟؟
Re: كاونتربوينت؟Re: كاونتربوينت؟
+++
اما حكاية شهرتي دي لو داير تعرفها
امشي اقرا تمجيدك للموصلي في احد بوستاتك بتاعت عطبرة
حيث تغزلت في ابداعي وكدت ان تتفوق على ماقاله قيس في ليلاه
Re: الذين يحاولون تخريب العلاقات بين السودان Re: الذين يحاولون تخريب العلاقات بين السودان
|
الهرم دا مرات بيديني انطباع بأنه محروم جداً من الشهرة وبحاجة ماسة للتقدير والتقييم،
دا بيفسر مسارعته لعرض الشهادات واللهاث خلف الألقاب.
المشكلة بيستخدم تعاطف الناس معاهو سلاح ضدهم.
___
تعقل يا يوسف.
| Quote: عموما تقديرا للناس المحترمين هنا سأجيب على كل اسئلة |
hallelujah
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
Quote: كل الحصل كان تعليق على طريقتك في المشاكل بتبدأ بالشفت ود الاشلاق البعفص الصعاليك ثم فجأة تتحول للفنان اللي عندو شعبية وجمهور ويترفع عن الصغائر
وأصلاً كان تأمين على رغبتك بترك الموقع والتفرغ للفن والتوثيق وانا قلت ليك أنا مع القرار عشان عاوز الموصلي الفنان ما الموصلي بتاع المشاكل |
عفاريم عليك، فهمتو وعرفت ليهو.
حيتذرع بكلامك ويعملو حجة، وياهو شايفو بيفتش على مراقة
أديهو يومين تلاتة وحفتح بوست ويعمل فيها محمبك، ويجو نفرين تلاتة يقولوا ليهو الله والرسول
يقوم يقتنع بأنه السودان كلو بيحبو، ومصر بتاعة الأحذية والملايات كمان!
دي ياها عادتو من زمان، يتور المشاكل ويتورط فيها ويغلبو حلها.
شرفتي المحفل في سابا SAPAA يابت يازينة وبت بابا BABA شرفتي المحفل في سابا SAPAA يابت يازينة وبت بابا BABA
___
عادتو ما بخليها.
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
Quote: بتبدأ بالشفت ود الاشلاق البعفص الصعاليك ثم فجأة تتحول للفنان اللي عندو شعبية وجمهور ويترفع عن الصغائر
+++
ولا تزعجنك مشاغلاتي مع الشباب فهي مجرد مزاح تأتيك طراطيشه حين تكون شفت الاشلاق وتحتجب عنك تأدباً حين تكون الاستاذ الموسيقار الذي لم تمحى أغنيته سهم |
دكتور جيكل ومستر هايد.
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: حاتم إبراهيم)
|
Quote: نان نحنا ما سألنا أسئلة مفتاحية
عن موضوع الأغوات قام هجا وساب
البورد ٦ شهور ... ولا دي تشيف وديك
كو .... |
وحاتك ما شفت ليكم أي أسئلة مفتاحية قبل كدة :)
ووحاتك البوست من ما يتجاوز الصفحة التالتة بخلي متابعته
وعشان نكون متفقين يا صلاح أنا الأسئلة المفتاحية عندي تكون في الكلام الكتبتو بكيبوردك في منبر سودانيز اونلاين
أي تدخل في شئون شخصية أو أي أنشطة أو أي حاجة خارج البورد ما شايله
يعني لو حاتم فتح البوست بموضوع ريبورتاج وطلب من استاذ الموصلي الرد ما كان حيلقى مني أي دعم
لكن البتكتبوا انت بكيبوردك في المنبر دة العندي حق السؤال فيه كونك كتبته طواعية ولا يمثل تدخل شخصي أو مضايقة
وصدقني لو كان الموضوع هنا مجرد تراشق ألفاظ بين حاتم والموصلي والجماعة الساكين حاتم من بوست لي بوست ما كنت حأعمل أي حاجة غير اضحك واقزقز لي فول مدمس وكباية شاي من المدرجات .. الدخلني هنا حاجة واحدة بس زي ما قلت فوق وهي جر البوست للمحكمة
وعشان ما يتفهم الموضوع دة خطأ أنا مشكلتي موش في اللجوء للقضاء نفسه وإنما تحويل مداخلات في صلب البوست لإدانة قضائية
فيما عدا ذلك أهو داك حاتم ليكم اللحم ومعاهو العضم ذاتو ولينا التصفيق للعبة الحلوة :)
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
هل الموصلي كان مسؤول عن قروش العازفين؟!!
هل ادعى الموصلي بانو وزع اغنية تم توزيعها بواسطة زملاءه ؟!
اذكر في عدد قليل من الحلقات التي شاهدتها انو كانوا بذكروا اسماء الموزعين .. وكان هناك اسم يتردد كثيرا لم احفظه
من يستطيع تقييم الاداء المهني للموصلي في ذلك البرنامج؟!
موضوع البوست الاساسي وتقدير الموصلي انو يوجه رسالة من خلال منبر عام من الممكن ان يختلف الناس في تقييمو .. كل زول يعبر عن وجهة نظرو بكل احترام .. وحبذا دونما اتهامات واستقراء نوايا ..
الموضوع المقحم (العازف ضرار) .. لن يحسم من خلال هذا المنبر .. فيهو جانبين .. جانب مهني/اداري/فني .. وجانب مادي .. ولا اعتقد انو من اختصاص اي زول في هذا المنبر ان يبت في الامرين او الجانبين ..
الاعلام للاسف يقتات من مثل هذه الخلافات .. وهو بذلك ليس قيما او قائما على الحقيقة .. وانما هي الفضائحية سمة هذا النوع من الاعلام في السودان وغير السودان.
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Zakaria Fadel)
|
| Quote: وبعد 85 يوم يعني يوم 27/10 ظهر الشايل ليهو كرضمة غباين ضد بروف الموصلي |
سلام ابوصلاح
كلامك نصو صاح.
البوست نام 3 شهور لكن الناس دي كلها (including my self) ما دخلنا البوست ده الا بعد ما شفنا اسم حاتم في اللائحة و لا علاقة لذلك بغبائننا ضد البروف الموصلي او حتي موضوع البوست لان الغالبية لا يحملون غبائن ضد الموصلي.
الفرق دي اتكونت من زمان و بتدخل المباراة لمجرد وجود حاتم في اي ملعب كان ضد او مع.
__________
طبعا نحنا ناس المساطب الشعبية.
لكن صراحة كدا بكري مفروض يفك ليهو الكوتة لانو بجيب الشباك.
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Zakaria Fadel)
|
علق منشورا في المنتدي لموضوع نشر باسم شخص آخر وننتظر تفسيرا
د زكريا ان كانت هذه امنيتك او رغبتك فسيطول اتظارك يا طويل العمر
خصوصا وان جوغة "الجقلرجية لن تتيح لكم اي فرصة"
عموما مستر هايد بقى صاحب الافاك ضرار وسيعرف معنى الجقلرجية ولن يحتاج لقوقل هذه المرة
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
صور حلوة يا يوسف.
بس لسة ما فسرت سبب رسالتك المشفرة للشاب الودود الكان مبتسم معاك في الصور
و(أشاد) بيك تأدبا وتوقيرا فلماذا تكتب هنا وتقرن سيرته بأنك من جعل منه فنان؟
وبأي مسوغ أخلاقي أو خلاف مهني تلمح لعدم رغبته في مقابلتك بعزوها للمرض العضال؟
كيف تقول (لابنك) إنو مافي غيرك حيوصله للعالمية؟
أوصلت منو للعالمية يا يوسف؟
______
عفوا يا هرم الصور لم تقدم أي إجابة.
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
Quote:
أنكر عليهم التوزيع وسمى مجهودهم (تنظيم) وننتظر توضيحه.
وادعى توزيع أغنية (تخيل) للشاب خالد حاج إبراهيم وانتظر تأكيده. |
هل الكلام ده (كلام الانكار) يصلح كاجابة للسؤال هل ادعى الموصلي توزيع اغنية تم توزيعها بواسطة فنان آخر ..
ما طبيعة هذا (الانكار) ؟!
رأي فني مثلا ؟!
مسألة انو فلان قام بتبخيس عمل فني او اعلى من شأن عمل فني وما الى ذلك من تلك (الحكاوي).. فالمسألة خاضعة للاسس والمعطيات التي تم بها هذا التبخيس/الاعلاء ومن قبل ذلك قدرة الشخص على التقييم ومدى تأهيلو وعلمو وخلفياتو الفنية
الكلام التاني انا ما عارف ننتظر (التأكيد) في الاول ولا نبهت الموصلي اولا ثم (نتأكد) لاحقا ؟
ولا كيف ؟!!
ا
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: محمد حيدر المشرف)
|
رديت على سؤالك (المخترع) غير ذي العلاقة بكل المطروح بما يوازيه من الحقائق المطروحة فربما تفهم الحاصل.
وإنكاره رأي فني طبعا ومال (توزيع) و(تنظيم) ديل محطات في طريق أبوجا دبلن؟
مسائل التبخيس لمجهودات الآخرين في الموسيقى تجري بواسطة المذكور منذ عصر تدريسه اللغة العربية.
هذه ليست سياسة يا أخينا حتى تفتينا في الأسس والمعطيات في شأن لست أهل له أبدا.
ما عليك سوى الانتظار حتى نسمع من المذكور سبب انكاره مهارة التوزيع على الآخرين
فنرى أسسه ومعطياته إن كان له منها شيء.
مافي علاقة بين الأول والتاني إلا بشبهة إجادة التوزيع في الاتنين للدرجة التي
تدفع المذكور لزعم توزيعا خرافيا استدعي له!
______
ثم قنع من غنيمة الفوز والسداد بالقعاد في حضرة الشاب في صقع البلاد.
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: حاتم إبراهيم)
|
| Quote: رديت على سؤالك (المخترع) غير ذي العلاقة بكل المطروح |
طول بالك معاي ..
كلامك صاح
مهم جدا انو الناس تسأل عن علاقة الاشياء بالمطروح ..
مثلا يعني ما علاقة تحقيق صحفي مع عازف اسمو ضرار حول برنامج اسمو المايسترو في قناة س24 برسالة الموصلي الموجهة عبر منبر عام للفنان معتز صباحي؟!
ما علاقة مضمون ذلك التحقيق بموضوع هذا البوست؟!
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
مسألة (المطروح) دي خلتني اراجع الصفحة الاولى
بحسب الصفحة الاولى كانت آخر مداخلة في البوست بتاريخ 3 اغسطس (زي حساب صلاح زبير) .. اها بعد كم وتمنين يوم .. وبتاريخ اكتوبر 27 .. تم ايراد هذا المقتبس
Quote: هذا الغياب يصيبني بالذهول غياب قد تكون له اسبابه ولكنه في النهاية غياب وليست هنالك سببا يحول بين الفنان وحضوره الا شيئين المرض العضال وفي هذه حاشاك وحماك الله او الموت وهو امر الله يطول عمرك باذنه تعالى وهو السميع القدير
+++
انا انا اردت التاطيد بان ليس هنالك ما يوقف ابداع الفنان الا المرض العضال او الموت |
ثم (بمناسبة هذا المقتبس)
تم ادراج الريبورتاج بتاع الصحفية ملاذ مع العازف ضرار
ثم توالت الاسئلة (العقلانية) المرتبطة بما هو (مطروح = رسالة الموصلي لمعتز) .. اسئلة (عقلانية) من قبيل هل صحيح منى مجدي عملت كده وكده زي ما سمعنا من فلان؟!
منى عملت ولا ما عملت ؟!
طيب فلان؟!
وهكذا ..
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
ما هو مطروح!
لا اتفق مع الموصلي في نشر هذه الرسالة مفتوحة للجميع .. ولم اقتنع بتفسير الموصلي بتاع الضغط الجماهيري (لا اكذب التفسير, فقط غير مقنع بالنسبة لي) .. هذا رأيي من اليوم الاول الذي قرأت فيه هذه الرسالة..
وطالما فرضت مسألة ضرار ك "مطروح آخر"
كامل التضامن مع اي زول بطالب بي حقوقو المادية والادبية واعلم شيئا عن استغلال وتغول تلك المؤسسات الاعلامية شبه الكيزانية على حقوق الناس.
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: محمد حيدر المشرف)
|
الموصلي قال في مشكلة بخصوص معتز صباحي وما حكاها
قال في في مشاكل صاحبت البرنامج وما حددها
وصف زملاء بمتشققي الأظافر حديثي الولادة وما ذكر اسماؤهم وعملوا شنو
ضرار في ريبورتاج قال بالأسماء والأحداث كل الاتستر عليه الموصلي ورفض الإفصاح عنه
وبرضو مطروح آخر !
هو أصلاً قبل ضرار في زول كان فاهم حاجة !
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: أحمد محمد عمر)
|
لنفترض ان ذلك صحيح
او لنقل او نعترف انو سم الخياط ده صحيح لولوج الجمل ..
لنقل ذلك
من حق اي زول بشير للاشياء بعمومية دون ذكر التفاصيل
ذلك ينعكس على قيمة كلامو ليس الا ..
عشان كده بقولوا عليهو مجرد اشارات عامة ..
والمتلقي بقيم الكلام ده تحت اطار مجرد اشارات وانتهى الموضوع ..
من حق ضرار انو يعبر عن رايو بالتفاصيل .. ويمشي المحكمة ويطالب بي حقوقو .. ويقوم بتبخيس دور الموصلي كما فعل بالضبط .. وزاد بالسخرية كمان .. كل ذلك يدخل في حسابات تقييم كلامو ومحاكمتو في سياقو كزول يحس بمرارة شديدة من مظلمة مادية حاقت به ولولاها لاستمر في مديح الموصلي والتجربة .. اما اذا تضرر الموصلي من ذلك ف يمشي المحكمة كتصرف مدني وحضاري جدا .. بيد انه قاسي وغير محبب لنفوس الناس ان يروا الفنانين في قاعات المحاكم لا خشبات المسرح.
هذا اذا تطايبت النفوس ..
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: صلاح عباس فقير)
|
أمّا الشاب معتز صباحي،
إن كان يُتابع هذا البوست،
فأوجه له التحية الخالصة، وأدعو
الله أن يمُنّ عليه بالشفاء
التّام، وأذكره بأن المرض
أيّاً يكن هو ابتلاء من الله تعالى،
فليصبر وليحتسب.
وليجعل القرآن الكريم ملاذه،
وليجتهد في تجميله بصوته الجميل،
كما قال الرسول صلى الله
عليه وسلم:
(جمّلوا القرآن بأصواتكم).
عزيزي صلاح يبدو ان كلامي احدث لبسا فانا لم اقل ان معتز عيان بالعكس ان معتز بخير ونحن نعمل بروفات سويا وهو قمة في التهذيب انا قلت "بان الفنان لايوقفه من الممارسة الا المرض او الموت"
فهل هذا يعني انه مريض؟؟؟ لا انا اعني انه بخير فلا هو بمريض ولا هو بميت والحمد لله هو فهمني وعاد لمشاطه
للاسف لدي صور كثيرة مع معز نغني في عدة حفلات لم استطع انزالها ولقد ارسلتها لعدة زملاء لعمل اللازم
معتز بخير والصور ستحدثكم عن هميق علاقتنا وعن رجوع مهيب له
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
طبعا بعد ظهور الصور المتعددة في مناسبات عدة جمعتني بالابن معتز
في ناس كويسين خجلو وفي ناس معروف عنهم انهم لاعلاقة لهم بالاستحياء والخجل
وعلى الاقل كان عليهم ان يمسكوا لسانهم وعدم مباراة الجداد الذي معروف عنه انه "بودي وين"
,وا اسفاي
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
في ناس شابكني ضرار ضرار وكانوا نبي اليكم الحكاية
اولا كيف تم موضوع البرنامج
كنت قد جهزت ثلاثة مشاريع لبرامج موسيقية لتقديمها جميعا او على الاقل احدها بالسودان
وقد خدمتني الزميلة العزيزة هادية طلسم باخطدار الاستاذ وجدي ميرغني وطلبها منه مقابلتي لانه ليس بيننا معرفة
وافق الاستاذ وجدي وبدأنا تبادل التحايا والمجاملة عبر الواتس ثم اتفقنا على التلاقي فور وصولي الى الخرطوم
شكرا لهادية
اجتمعنا وعرضت المشاريع عليه واجازها واتصل بالاستاذ الطاهر طالبا منه مقابلتي
تم التواصل بيني وبين الطاهر وتواعدنا ثم التقينا واعجب هو بمشاريعي واختار المايسترو ليكون في رمضان
كان لديهم برنامج يحضرونه لرمضان وحاولو دمج الفكرتين الا انهم في النهاية استقروا على المايستروا لان الفكرة الاولى كانت تعتمد على فكرة لكل حلقة ان تكون الحلقة الاولى عن موضوع الح اولا لهذا الامر زن مثلا والثانية عن موضوع الفرح وهكذاولا يهم ان الذاره وقررت اللجوء لمعارفي من تلاميذ فلجأت اى د وليد الجاك ووليد عبد اللهاعتاغنيات قديمة او حديثة قديمة او حديثة
كانت هنالك فرقة تعاونت في العام السابق في برنامج اسمه مع احمودي يدرها المهذب الخلوق حسام عبد السلام واتفقنا ان يواصل ادارتها والادارة تعني هنا الاتفاق بالانابة عن العازفين وتحديد موعد البروفات وغيره
حسام وجد ان فكرة المايستروا تعني ان الموصلي يدير الاوركسترا فنيا وخاف ان يحدث هذا الخلاف بيننا واخطرني قائلا لا ارد ان يحدث بيننا اي خلاف استاذي لذا فانني اعتذر مع ظروف اخرى اذ انه كان يحضر للماجستير
قررت اللجوء الى بعض معارفي من تلامذتي وهم د وليد الجاك ووليد عبد الله فاشار لي وليد عبد الله الى ضرار
الذي كون فرقة جاهزة للتعاون مع الاستاذة سلمى لتسجيل برنامجها للشروق ووافق ضرار وطلب من الانتظار حتى ينتهو من التسجيل لسلمى
طلبت منه قائمة واشترطت عليه ان يكونوا جميعا لديهم القدرة على قراءة النوتة الموسيقية
فوافق وكان يذكر لي الاسماء فردا فردا وكنت اسأله ان كانوا قرأون النوتة وكان يومئ الى شخصي بالموافقة
عمليا اكتشفت انه كذب على شخصي فثلاثة منهم لم يكونوا يعرفون القراءة الوهلية للنوتة
ولكنهم من ناحية اخرى كانو الافضل في الاوركسترا الا ان عيبهم الوحيد انهم كانو يعدلوننا وعامل الزمن كان هاما لضيق الوقت
تم الاتفاق ماليا بعد قمت بتعيين ضرار للاوركسترا كاداري ووليد عبد الله لمجموعة التنويت وفضل د وليد عبد الله الاستمرار كعازف فقط
الاتفاق المادي كان ١٥٠ جنيها للاغنية و ١٥٠ جنيها للبروفة وعندما يسجلون ٣ حلقات باربعة اغنيات في الالحلقة فهذا يعني ٤ في ١٢ فهذا يعني
ن المتبقيين على المبلغ وا ته ليكون ٣٥٠ ت القناة في وجودي ووفق طلبي
واوفت القناة انذاك وكانت هناك مشكلة عدم وجود سيولة وطلب المدونين والعازفين كاش ورفضوا الشيكات فتبرعت من الكاش الذي املكه لدء العمل
وضرار الكذاب يعلم كل هذا
نعم لقد كان العمل شاقا متوترا وكان ضرار يخلق المشاكل مع المدونين مع ان فيهم ناس مهرة مثل د عبد الله شمو وعاطف ومرة استفز ضرار العازف والمدزن امام الاوركسترا والضيوف
وبدأ الاشتباك في عدم وجودي وكاد وليد ان يفتك بضرار
ضرار كان دوما يقلل من المدونين وعامل فيها بقنيني زمانه
وبعد ان اخطروني وانا كنت خارج صالة البروفات لمقابلة شخص زارني قابلت الشخصيتين ووجدت ان المشكلة مختلقة من ضرار اختلاف في ميزان الاغنية
وليد كتبها في ٢/٤ وضرار قال لا كان يجب ان تكون ٤/٤ فقلت لهم انه الفرق بين احمد واحاج احمد ونفذتها بما قام به وليد
مما اغضب ضرارا وخيرني بين وجوده في العمل ووجود وليد فاخطرته بانني لا اقبل منه او وليد
ان يطلب مني هكذا طلب ومن يفعل ذلك
فليذهب بلا عودة وذهب ضرار
وللحديث بقية
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
سلامات حبيبنا الموصلي
اعتراضي كان فقط على كلامك حول اللجوء للقضاء حيال شخصين كل ذنبهم إنه نقلوا كلام ضرار وأعني حاتم والصحفية وليس حول ضرار
وأعتقد إنه (كلام زعل ماااا بتقصدو انت ما بتقصدو)
ولك كامل الحق في الغضب من ضرار واتخاذ ما تراهو مناسب من اجراءات بشأنه
وما لم تظهر خطوة جدية في مقاضاة الناقلين اعتبر رحلتي في البوست انتهت
ولك من الود ما تعلم وما لا تعلم
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: أحمد محمد عمر)
|
سلامات حبيبنا الموصلي
اعتراضي كان فقط على كلامك حول اللجوء للقضاء حيال شخصين كل ذنبهم إنه نقلوا كلام ضرار وأعني حاتم والصحفية وليس حول ضرار
وأعتقد إنه (كلام زعل ماااا بتقصدو انت ما بتقصدو)
ولك كامل الحق في الغضب من ضرار واتخاذ ما تراهو مناسب من اجراءات بشأنه
وما لم تظهر خطوة جدية في مقاضاة الناقلين اعتبر رحلتي في البوست انتهت
ولك من الود ما تعلم وما لا تعلم
حبيبنا احمد انا رفعت القضية ضد ضرار لانه لم يدلي برأي بل لانه في جريدة الجريدة تكلم عن اشياء بانها حدثت
مثل قوله انني اتقاضى في الحلقة ١٠٠٠٠ جنيه والحقيقة كنت اتقاضى نصف المبلغ
زمثل قوله انني فشلت في ادارة الاوركسترا وهو طلب مني ادارتها لهذا السبب وقد كان!!!
حتى انني مزحت مع وكيل النيابة وقلت له ماذا لو زوكتي قالت لي انت كذبت علي بقولك انك بتاخذ ٥ في الحلقة وانت بتاخد عشرة وماذا لو ان سخصا دائنا
طلب مني حقوقه بحكم هذه المعلومة التي نشرها خصوصا وان هنالك من لهم الاستعداد الفطري والنفسي لتصديقه مثل حاتم
لو ان ضرار قال رايا مثل
الموصلي مابيعرف يوزع
الموصلي مابيعرف يقود الاوركسترا
الموصلي الحانه سيئة فهذا رأي يحتمل المخالفة
ولكنه تحدث عن وقائع اختلقها وافترعها
لك الود عزيزي احمد انني احزن فقط ولكنني لا احمل شيئا في نفسي وكن بالف خير
تابع البوست فمزيد من الحقائق والوثائق الداحضة قادمة خصوصا وانا اشد الرحال لشيكاغو ومنها الى ايوا اليوم الى ايوا
وعندي شهر كده فاضي شويه
كل الود لك والاحترام
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
بعد الانتهاؤ من التسجيلات
اخبرت عاوف الايقاع بهاء الدين وهو صديق مشترك بين وبين ضرار انني بصدد
الضهاب الى استاذ الطاهر ليمنح بونس للعازفين وضرار باعتبار انهم بذلو جهدا كبيرا ومقدرا
وهذه حقيقة اقر بها بونس لا علاقة له بالاتفاق الثابت
لأن العقد شريعة المتعاقدين
فاستمع لي الطاهر الذي اوصلني بهاء الدين الى مكتبه لهذا الغرض وهو دوما له على فضل التوصيل
بحكم عمله "كترحال"
استمع لي استاذ الطاهر وقال لي بالحرف كلامك معقول يا استاذ وفعلاىجهد مقدر وكنت سأستجيب لك لولا هذه الورقة
زكتنت الصدمة
قضية رفعها ضرار ضد القناة
مدعيا انا لم تف بالاتفاق وهذا كذب صراح لانني كنت شاهدا ومعي الاخ وليد عبد الله
فأسقط في يدي ولم يعد لدي ما اقوله
كان ضرار يريد مالا لنفسه ويتخذ من العازفين "دروة" بلغته العسكرية
بل تمادي وقال لي ناس القناة انه اشتغل اكثر من الموصلي فردعوه وقالوا له لو ان الموصلي لم يفعل اي شيئ واستخدمنا اسمه فقط فانك لاتساوي ذلك
امتلأ ضرار حقد على الموصلي الذي قال عنه في الحلقات الاخيرة "هرم"
ربما انه كان يقصد بكسر الراء وليس فتحها وذل لسانه
هي قضية خاسرة بكل المقاييس وحاول ضرار ومحاميه عمل تسوية الا انالقناة رفضت وقالت بانها على استعداد لدفع ٨ مليار ان حكمت المحكمة بذلك لثقتهم فيما فعلوهو
حتى القناة لم تستخدمني كشاهد انا ووليد وقالوا لن نحتاج لان مكتب المحاماة الخاص بهم اكتشف انه ضرار يحلم ويهلوس
فماذا فعل العازفون
في الاول صدقوهو ورفضوا استلام حقوقهم واخيرا اكتشفوا حيلته الماكرة وتسعين في المائة اخذوا استحقاقاتهم
بل عرفت التوبيخ الذي تعرض له ضرار في القروب الخاص بهم في الواتس خصوصا فيما يختص بالاساءة لشخصي
كما ان احدى المغنيات وصفته بانه جبان في القروب الذي يخص المغنيين والمغنيات
نحن على وشك الختام
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
ما الذي فعله حاتم والذي جعلني اقرر ان اتراجع عن سحب القضية ضد ضرار بل ارفع واحدة اخرى ضدهما
منذ ان عرف الموسيقيون بانني قررت مقاضاة ضرار على افترائه على شخصي في جريدة الدريدة واتبعت قولي بالفعل لانه كذب وافترى ولم يقل رأيا بل تحدث عن وقائع من بنات افكاره
ظلت الاتصالات التلفونية تتواتر كي اتنازل عنها من مجموعة كبيرة من الموسيقيين الذين اعتز بهم وجلهم تلامذتي فرفضت رفضا باتا الا اذا ذهب ضرار الى نفس المكان الذي افترى فيه كذبا وتقيأ فيه افكا
وغير ما قاله وهو يعرف ان موضوعه سوف يذهب للقضاء العسكري فهو رائد في سلاح الموسيقى
١- سترفع عنه الحصانة
٢- سيتم التحقيق معه
٣- سيدخل الموضوع الى ملفاته العسكرية وهذا سيضره في حالات كثيرة مثل الفصل من الخدمة او الترقيات
---------
بناءا على كل هذه الحقائق التي يعرفها الزملاء فكثير منهم عسكريين او كانوا كذلك في السابق فقد ازداد توسلهم وضغطهم علىشخصي وفيهم من لا استطيع ان ارفض لهم طلبا
فحدد شروطي وتردد هو وقال ان اي نتيجة تحدث فهو امر الله فسيقبله تم عمل اجتماع مشترك مشحون بعاطفة المتحدثين وهم اصدقاء مشتركين بيننا يجمعن غير الصداقة انن درستهم جميعا
وانه زاملهم جميعا
تحدثت انا وبينت الحقائق لهم وابديت رغبتي بالتنازل عن اول قضية ارفعها في حياتي ضد بني ادم وتصادف انه ضرار "تخيلوا"
تحدث هو وافترى كذبا وقال كلام قريب جدا للينك الذي جلبه المفعوص حاتم
واعتبرت ان هذا كلام في اجتماع مغلق نمشيهو وفندت كلامه وسألته ان يثبت علميا عن اي توزيع موجود في الاغنيات التي ادعى ان بعضهم عملهم فانكر معرفته علميا بهذا الامر وهي مسألة مخجلة بحق وقال سموهو كما تريدون فقلت له انه ليس توزيع بل
تنظيم
فارتاح صاحبنا "العالم" الذي يستند اليه حاتم
المهم تم لومه من قبل الجميع وطلبوا منه ان يقبل رأسي ويعتذر وكانت هذه ستكون القبلة الثانية بعد تلك التي كانت في مسرح نادي الضباط وغنى الكورال "طفل العالم الثالث" بقيادتي يا حاتم اسأل صاحبك ضرار
وعندما انتهى الاجتماع وانا قلت اوكي كان صاحبنا يتمنع وشعر بالحرج واحتضنني معبرا عن تأسفه
خرجت وانا عاقد العزم على التنازل عن القضية في اليوم التالي وحينما اوصلني الزميل بهاء بالمنزل قلت افتح الواتساب لاتسلى قبل النوم لانني مرتاح لفكرة سحب القضية فاذا بؤسالة تاتيني بما يفعلخه حاتم في بوست "معتز صباحي"
واصابتني الدهشة عندما رأيت اللينك الذي جلبه حاتم الشليق وكنت لا اعرف عن هذا اللينك شيئا البتة وتملكني غضبا شديدا على هذا الضرار المضر ان الي يفعله حاتم هنا وجوغة "الجقلرجية" التابعة بلا وعي تكفي لقبولي باي عقوبة يمكن ان تحدث لضرار
ناسف للاطالة وارجو ان تكوموا قد تفهمتم الوضع
بعد كدة حاجيب ليكم لينك تسمعو نفاق ضرار بالصورة والصوت يصفني بالهرم
اما رأيي فيه كعازف فهذا موضوع اخر ليس مكانه هنا
وتقبلوا جميعا فائق الاحترام
زميلكم يوسف الموصلي
ناسف لبعض الحدة فانا غاضب من هذه الحملة الظالمة الجائرة بحق
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
استاذنا الموصلي سلامات وعوافي
مشكور على التوضيحات دي وسرد المشكلة وكل ملابساتها ودا كان هو المطلوب بالضبط
فالمنبر مقروء ويضطلع عليه الكثير من معجبيك ومن زملائك الموسيقيين وكان لا بد من تفنيد
وتمليك كل الحقائق لهم للمحافظة على مكانتك التي تتمتع بها في وجدانهم .
عشان كدا انا من البداية طالبتك بالتداخل وعدم تجاهل الرد هنا لانه يؤثر سلباً عليك
بعد كل ما تفضلت به يبقى المجال مفتوح امام الاخ ضرار ان كان له ما يقوله وشي مؤسف انه ليس عضو في المنبر
ولكن مجالات الرد متاحة عبر السايبر ان كان له ما يقوله فمن حقه نستمع الى رده لاننا هكذا لا نستطيع ان نحكم عليه بشيء.
بعد التوضيحات دي إن اردت الذهاب الى القانون فلن يلومك احد فاخذ الحقوق بالقانون تصرف حضاري ولا ملامة فيه
تحياتي
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
شكرا يا موصلي ..
كل من قرأ اللينك بتاع ضرار سيخلص بسهولة للتمييز بين ما هو رأي او نقد فني ومهني .. وما هو رد فعل منفلت جراء الشعور بمظلمة مادية .. شاهد الانفلات السخرية والتبخيس والاستهزاء كما في الاشارة (البتاعة المدورة ديك)
اناشدك بالتالي
لا تجعل هذا البوست سببا لمضيك قدما نحو التقاضي ..
لو نظرت لهذا البوست بتمعن .. لرأيت ان البوست كان فرصة جيدة لتبيان تفاصيل كنت ستتحفظ كثيرا في ايرادها .. وبالفعل انت كنت متحفظ في ايراد التفاصيل .. وده ياهو بكون طبعك بدون مؤثرات .. وهو طبع جميل جدا بالرغم من انو الواحد ممكن يدفع تمنو .. عموما الموضوع مشى على النحو ده ورفع عنك حرج الخروج بالتفاصيل للعلن وتوفرت لك فرصة الرد ..
اها خلي الكلام يمشي جنبا لجنب التنازل عن القضية الا في حالة تطور المسائل من جانب ضرار وحده.. وطالما الزول حب على رأسك وامام الناس .. فاعتبر الموضوع منتهي .. ولا تأخذه بجريرة غيره ..
واكتر من كده يا فنان
لو في ايدك او تمتلك اي تأثير على القناة في مسألة الحقوق المادية بتاعة العازفين فلا تتواني لو رأيت ان لهم حقا لم يأخذوه ..
وفي كل الاحوال كامل التضامن معاهم ..
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: ABUHUSSEIN)
|
شكرا يا ود المشرف ياخ على النقطتين ديل
Quote: لا اتفق مع الموصلي في نشر هذه الرسالة مفتوحة للجميع .. ولم اقتنع بتفسير الموصلي بتاع الضغط الجماهيري (لا اكذب التفسير, فقط غير مقنع بالنسبة لي) .. هذا رأيي من اليوم الاول الذي قرأت فيه هذه الرسالة..
وطالما فرضت مسألة ضرار ك "مطروح آخر"
كامل التضامن مع اي زول بطالب بي حقوقو المادية والادبية واعلم شيئا عن استغلال وتغول تلك المؤسسات الاعلامية شبه الكيزانية على حقوق الناس.
|
بالتحديد ديل هم الأنا قصدتهم من اول مداخلتين لي
و الأخيرة ما عندها علاقة بالموصلي لانو غير مسؤل من النواحي المادية
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
هسّ النقّة الكتيرة دي ما بتنفع قدام القانون
وناس القانون دايرين الزبدة
نقدر نقول اتهامك لضرار يا أستاذنا الموصلي ح يكون:
الزول دا قال الموصلي بياخد عشرة ألف في حين أنا باخد خمسة بس
طيب وكيل النيابة ح يجتهد يلقى ليهو مادة يتهم بيها ضرار
أعتقد في مادة اسمها تحسين سمعة
المادة دي ممكن تتلتل ضرار تلتلة شديدة
زمان قبل جرائم المعلوماتية دي،
البقولوا ليهو سمين؛
بقول:
آآمييييين
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: أبوبكر عباس)
|
طيب وكيل النيابة ح يجتهد يلقى ليهو مادة يتهم بيها ضرار
أعتقد في مادة اسمها تحسين سمعة
المادة دي ممكن تتلتل ضرار تلتلة شديدة
زمان قبل جرائم المعلوماتية دي،
البقولوا ليهو سمين؛
بقول:
آآمييييين
فعلا يا ابوبكر عندي اصدقاء من القصاة والمحامين
قالوا لي سيب قصة القروش لكن اشانة السمعة بتورط ضرار وممكن تورط "شوبير كمان"
لك الود
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
أستاذنا الموصلي
تحية طيبة
| Quote: لايوجد حقوق , الاتفاق الذي تم تم تنفيذه وبالبزيادة |
يبقى خلاص وأصلا مسألة الحقوق المادية دي لا تحصك في شيء .. هي عقد بين القناة والفرقة الموسيقية والقضية في المحكمة ..
من باب العشم ليس الا
لا تجعل ما حدث في هذا المنبر سببا كي تتراجع عن العفو طالما ان قبلت اعتذار ضرار وضرار لم ينقض اعتذاره قولا او فعلا..
سفيان سلامات وكيف الحال
موضوع الرسالة (ما هو مطروح في الاساس)
هي مبادرة قام بها الموصلي واحترم تقديره واختلف معه في المجال الذي تم فيه طرح المبادرة .. وده كرأى شخصي لي زول يحكم بما هو مطروح امامه .. وده رأيك برضو واتفق معه.
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: محمد حيدر المشرف)
|
يبقى خلاص وأصلا مسألة الحقوق المادية دي لا تحصك في شيء .. هي عقد بين القناة والفرقة الموسيقية والقضية في المحكمة ..
تحياتي ياد محمد
اختلف معك لاني انا الزول الاختار ضرار "العينو" لادارة الاوركسترا وانا العين وليد عبد الله لادارة التنويت الموسيقي
وحضرت الاتفاق
والبعمل فيه ضرار محاولة فاشلة لتحطيم البرنامج وكل الفنانين الجابهم افشلوهو في المحكمة وكذلك كل العازفين
كما انه اساء "لمهنيتي" برغم نفاقه بتسميتي بالهرم في البرنامج
ضرار موضوعة معاي انتهى ولا يهمني ماذا يفعل فيه القضاة
اهي جات ناديه الطيب فضحوتو في الفيديو وتابعه قفه
كل الود يا صديقي
ونسيت احي الحبيب معاويه الزبير
بالنسبة لحتومي قالشكوى ماشة ودي البتديب حقيقتو وعنوانو ومكانو ان شاء الله
ولي قدام
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
يا يوسف
أنت راجل بسيط جداً بالمناسبة
لاحظ إنو الموضوع هنا لا يتعلق بأي (قضايا) تخصك ضد ضرار أو شخصي و(الترويج) البتعمل فيهو غير مجدي
نواياك أو مشاريعك القضائية دي شيء يخصك فما تضع أي افتراضات يمكن جداً أن تكون خاطئة تماماً وتأتي بنتائجها العكسية عليك أنت
دا كلام واضح عليك أن تحاول فهمه.
حأرجع في أقرب فرصة أفند كل الكلام الكتير الأنت وضعته، حتى ذلك الحين (انتبه) إلى أنو في أسئلة أخرى ملحة عليك الإجابة عليها بوضوح.
___
نشر الصور أو الفيديوهات لا يعني عدم حدوث الملابسات والمواقف التي تتطلب التفسير أو يقدم إجابات لأسئلة بسيطة، ونحن لم نسمع للطرف الثاني أو أي أطراف أخرى.
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: ABUHUSSEIN)
|
لا جديد هههه. عادت حليمة.
بعد موجة الترحيب بعودة العلاَّمة الذي افتقده المنبر عاد يبحت في مواضيعه
القديمة، ودي إشارة واضحة إلى إفلاس التاجر.
كدي أعملوا جرد لمشاركات حاتم إبراهيم بعد عودته من عردته الأخيرة عشان نشوف الإضافة.
مجرد تنطيط من موضوع لي موضوع ومهابشة هنا وهناك لاستدراج ناس للملاواة والجرجرة الفارغة
وكلام عن اختلاف بين ناس في أمور بتخصهم هو عايز يستغلها ويكبر كومه ويعمل
فيها الولد خطير في استنطاق "المتهمين" وإنه "حرَّك مياه المنبر الراكدة" بعد ما
أسكرته عبارات الإشادة بأنه "المنبر وراهو خلا".
مما أرى، إنت يا حاتم نثرت ما في كنانتك كان صاح كان غلط وما أظن عندك أي إضافة
تعملها. مشاركاتك مملة جدًا وما عندك أي تجديد حتى في الخصوم. نفس المساككات
لنفس الأشخاص وبأسلوب طفولي. بعد شوية حا تبدأ الساقية في الدوران وترجع لينا
للطاقة الشمسية ثم الأغوات ثم "الملونين" ثم تسوح بينا في رحاب اللغة الشريفة وبعدها
تتحفنا بأغنياتك المسيخة اللي أحببتها واللي عايز تفرضها بالقوة وبعد داك تطلع بينا
الفضاء وأخيرًا تدق بينا الدلجة جوة جحر فئران.
غايتو يا حاتم في زول غاشيك قال ليك إنك بارع في زرزرة خصومك وإنت مصدق
الحكاية وعايش الدور.
طبعًا إنت ما زي أي عضو يغيب ويرجع عادي. إنت لازم يعملوا ليك طقوس
ويفرشوا ليك الطريق عشان حفظ ماء الوجه بعد كل عردة مخجلة. هسي من
جيت مش قلتَ ما عندك وقت عشان أعمالك التجارية "تضررت"؟
هههههههه شوف عدد مشاركاتك في اليوم ما أظن في زول في المنبر بيلحقك.
يا أبوحسين أنا على سفر. بس أفضى وبجيكم، لكن أطمنك كل الأمور جاهزة ليها
شهرين لكن المشغوليات.
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: محمد حيدر المشرف)
|
Quote: عزيزي سفياليه دوما انت تسعى لتجريمي دوما ؟؟ هل انا غلطت معاك في حاجة لا سمح الله
كلمني بالله عشان اعتذر طوالي؟؟
لكم التحية ولن اتنازل عن القضية لان الاساءة فاتت حدها وانا هسع رسلت فيديو نادية الطيب
لتفضح ضرار وقرينه حاتم و
لتكشف لكم وجه ضرار الحقيقي الكاذب
انا في مدار دبي متجه لشيكاغو
خليتكم بعافية |
تصل بالسلامة يا موصلي و يا عزيزي ابدا لا أسعى لتجريمك وليس لي شي ضدك من أساسه و حتى في هذا البوست كانت وجهة نظري من البداية فيه انو الإنترنت ماهو الجهة الممكن توصل بيها رسالة لكن برضو دا تقديري انا انت احتمال تقديرك يختلف لذلك قررت نشرها.
أما موضوع القروش و زيادة العداء للفرقة فأنا اصلا ما دخلتك فيها و لا قريت في الروبرتاج انو ضرار اتهمك فيها أو ذكر اسمك بل ضرار ذكر اسامي أخرى وقال هي الالتزمت تزيد العداد بعديها رفضو.
فصراحة مافي اي شي في كلامي فيهو تجريم ليك.
تحياتي
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: سفيان بشير نابرى)
|
أما موضوع القروش و زيادة العداء للفرقة فأنا اصلا ما دخلتك فيها و لا قريت في الروبرتاج انو ضرار اتهمك فيها أو ذكر اسمك بل ضرار ذكر اسامي أخرى وقال هي الالتزمت تزيد العداد بعديها رفضو.
فصراحة مافي اي شي في كلامي فيهو تجريم ليك
كلامو خطأ لانو القناه ما التزمت هو اتكلم مع موظف صغير جدا وده مهمته الابلاغ لروسائه ثم المدير وده ما حصل
انا عينتو وعينتو الاوركسترا وعينت المدونين
الزول ده كاذب وهسع ناديه الطيب لحقت كضبو امات الصح
هو تكلم عن مهنيتي ووبخه فيه العازفين والمغنيين بالاجماع
اها في شنو تاني
لك الود يا عزيزي
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
Quote: لكم التحية ولن اتنازل عن القضية لان الاساءة فاتت حدها وانا هسع رسلت فيديو نادية الطيب
لتفضح ضرار وقرينه حاتم و |
فعلاً والله جلدك تخين زي ما وصفت نفسك!
بتتكلم عن الفضيحة يا يوسف الوزع للشاب خالد حاج إبراهيم؟
الغريبة يا يوسف إساءتك أنت الفاتت حدها هنا وفي الوسيط الإلكتروني دا ولزميلك
فما عارف هل دي نسميها حملة (الضغط الجماهيري بالكراهية)؟
Quote: في طل هذا الزخم هناك اربع اغنيات من الحاني وتوزيعي
لكل من
معتز صباحي الميعاد
شموس اجمل الايام
نادية الطيب سيد الوسامة
Re: المايستروRe: المايسترو |
سؤالنا فيما يختص بالمذكورة أعلاه لا يتعلق بفيديو، إنما عايزين نستفسر عن الآتي:
- هل فرضت على المذكورة أعلاه أن تؤدي الأغنية أعلاه والتي لحنتها حسب تصريحك أعلاه؟
- هل اشترطت على المذكورة أعلاه أن لا تؤدي أي أغنيات أخرى من تلحين وتوزيع أي شخص آخر غيرك في البرنامج؟
إذا كان الفيديو لا يجيب عن السؤالين أعلاه ويحوي فقط ( إشادة، شكر، ثناء) فهو لا يعنينا هنا.
كما لم تعنينا صورك الاجتماعية الخاصة ولم تغنيك عن تفسير حملة (الضغط الجماهيري بالحب) التي أقحمتنا فيها.
___
في ظل الزخم دا.
==================
يا أحمد ياسين
منتظرين نسمع للطرف التاني، الفنان معتز والعازف ضرار
وأظنك ملزم تطلعنا على الحيثيات طالما انبريت للدفاع، فنحنا هنا ما شايفين غير نصف الحقيقة.
___
لأننا شبعنا صور من أستاذك.
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: حاتم إبراهيم)
|
https://youtu.be/boBIkcq4nQMلعناية بوست الموصلي
من هو المفتش بوارو ... Hercule Poirot؟؟؟
شخصية مفتش البوليس منجوره بواسطة
الأديبة أجاثا كريستي وظهرت في العديد من
قصصها المشهورة جدا" ...
بوارو دا بيعمل فيها ذكي جدا" وبيحل كل
الجرايم المعقدة واشتهر بذلك ... واظنو بيشبه
بوارو بتاع المنبر دا في حاجتين ...
الاولي إنهم شخصيتين منجورات وكرتونيات ساي ..
التانية .. لو لا شهرة أجاثا لما كان بوارو ولو لا شهرة
وتميز الموصلي مقارنة ب (المجهول خارج حوش بكري)
لما كان هذا العبط وتمثيل دور بوارو الكرتوني ...
علي قناعة تامة إنو أستاذنا الموصلي أعطاك أكثر
مما تستحق بي كتير جدا" خوفا" من جمهوره العريض
فقط وليس خوفا" من خربشتك ...
يا ريت واحد ينزل الفيديو عاليه هنا عشان نخلص
من نجاو نجاو نجاو دي ...
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
Quote: يبدو ان كلامي احدث لبسا فانا لم اقل ان معتز عيان بالعكس ان معتز بخير ونحن نعمل بروفات سويا وهو قمة في التهذيب انا قلت "بان الفنان لايوقفه من الممارسة الا المرض او الموت"
فهل هذا يعني انه مريض؟؟؟ لا انا اعني انه بخير فلا هو بمريض ولا هو بميت والحمد لله هو فهمني وعاد لمشاطه
للاسف لدي صور كثيرة مع معز نغني في عدة حفلات لم استطع انزالها ولقد ارسلتها لعدة زملاء لعمل اللازم
معتز بخير والصور ستحدثكم عن هميق علاقتنا وعن رجوع مهيب له
|
أهاااا، يعني لمن تجيب سيرة الموت وتكرر خبر المرض العضال معناها المذكور بخير؟
هههههه لا خلاس أنا شبه صدقتك غايتو.
كتر خير صلاح فقيري.
هسع يعني إيرادك لأسباب الموت والمرض العضال الأنت كررته دا قاصد تدينا (معلومة) قال يعني؟
ماهو سواق البص برضو لا يوقفه من الممارسة إلا المرض أو الموت!
والمزارع برضو لا يوقفه من الممارسة إلا المرض أو الموت!
...
شنو الخبر في (إضافتك) الثرة دي؟
___
احترم عقولنا يازول عشان نحترم كلامك.
ومع ذلك تقديراً للأخ صلاح فقير نتجاوزها ليك مؤقتاً، يبقى عليك تدينا إجابات واضحة ومختصرة، لا فيديو لا صور، كلامك مكتوب عديل:
- هل رواية تنفيذ أغنية منى مجدي بخصوص تفضيلها لتوزيع آخر وبأنو التنفيذ تم من وراء الكواليس وأنت أصريت مع ذلك تتشبث وتقيف فوق (البتاعة المدورة) صحيحة؟
- ليه بتصف توزيع الزملاء الآخرين بأنه مجرد (تنظيم)؟
- هل فعلاً فرضت على الفنانة نادية الطيب أن تؤدي أغنياتك فقط دوناً عن غيرك؟
- هل فعلاً معتز صباحي (أحب الأغنية) أغنية "الميعاد" بدون ضغط أو فرض منك؟
- حملة (الضغط الجماهيري بالحب) شنو هدفك منها وبتتوقع من الأعضاء هنا يعملوا شنو بالضبط لمساعدتك؟
- شنو أصل المشكلة بينك وبين معتز صباحي سبب بوست (الرسالة الأخيرة) دا؟
إيه غرضك من الإشارة لمعتز صباحي مرتين بأنه لا يمنع الفنان من الأداء إلا الموت أو (المرض العضال)؟ (شطب تقديراً لرغبة الآخرين)
- شنو بتقصد بالضبط لما تدعي بأنك (زبطت غنا الشباب)؟
- شنو بتقصد بالضبط من أنك (هرم) هرم في أي جانب فني مثلاً؟
- هل تعتقد أن (إعطاء الشباب فرصة للنمو واكتساب الخبرات) لابد أن يتم من خلال ترديد أغنيات أنت طرف فيها؟
- ليه أنت مصر تفرض نفسك على الشباب وترغمه يغني ليك أو يقبل غصب عنه برؤيتك؟
- السبب شنو في نشر موضوع شخصي كان يمكن حله بعيد عن الإنترنت وليه بتفضل حشد الناس وإقحامهم في مشاكلك الخاصة؟
- أغنية (تخيل) هل فعلاً استدعوك عشان توزعها والفرقة العالمية نفذت (توزيعك)؟
- هل أنت سعيد الآن بلقب (المايسترو)؟
___
عندك هلع للصور، ولله في خلقه شؤون.
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: حاتم إبراهيم)
|
شخص قدم للشعب السوداني باكمله:
انت لي
الأماني السندسية
على قدر الشوق
الحب يا ام سماح
الفرح المهاجر
... و غيرها
يترصده شخص قدم لمنتدى بكري ابوبكر:
بوستا للتكاتيك عن كيفية ( تخريب) أفكار الناس
بوستا تم نشره في الشبكة العنكبوتية باسم شخص اخر
مطاردة لشخص سوداني له سمعته في المجال الأدبي
.... وغيرها
قولوا لي بربكم كيف يلتقيان؟
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Zakaria Fadel)
|
يترصده شخص قدم لمنتدى بكري ابوبكر:
بوستا للتكاتيك عن كيفية ( تخريب) أفكار الناس
بوستا تم نشره في الشبكة العنكبوتية باسم شخص اخر
مطاردة لشخص سوداني له سمعته في المجال الأدبي
.... وغيرها
قولوا لي بربكم كيف يلتقيان؟
تحياتي د زكريا
ده مستر "هايد" بتاع د جيكل
حالو حال المايل في حذا الطابور
وبرغم كده يمتلك حارقي البخور
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
الاحبة الزملاء برغم ارهاق السفر فانني واصلت معكم محبة واحتلااما وتبيانا للحقيقة التي حاول ضرار تعميشها واستغل ذلك حاتم والجوغة بشكل لايدعو للاحترام
اتوقف هنا ولعلمك
قضيتي ضد ضرار قطعت شوطا كبيرا وقضيت ضد حاتم قد بدأت قبل سفري وستستمر حيث افتى لي بعض القانونيين بان حاتم واقع فيها واقع فيها
وتاريخ ملاحقته كي طويل وباذن الله نفلس ماتبقى في شركته التي اعتقد مجرد اعتقاد انها مفلسة فكرا ومالا
ولكم في فيديو الابنة نادية الطيب
قشة واحدة قصمت ظهر البعير ولدي الكثير الا انني اكتفي
بهذا "الغدر"
ولكم محبتي واحترامي
فانا ذاهب لمواصلة الابداع والتحضير للنسخة الثانية من المايسترو التي اعدعكم بانها ستكون الافضل
بعد تدفق طلبات المغنيين للمشاركة فيها كما انني مشغول بالعمل الضخم موسوعة الموسيقى السودانيه
كل الحب لكن
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
كما أوضحت سابقاً، ما عندي شغلة كتيرة بالبوست دا و غير معني بالإصطفاف الحاصل و محاولات البعض الدفاع عن بعض الأبقار المقدّسة لديهم !!
بالحق او بالباطل ما مهم !
البعض لسان حاله يقول انا لا أكذب و لكني اتجمّل !!
اعتقد حاتم حرّك الموضوع بكلام ضرار الجابو
و عمل جو في البوست بعد ما كان جنازة بحر ساي و الناس إنفضّت عنه !!
هناك أسئلة موضوعية طرحها حاتم و ما زالت تنتظر اجابات واضحة و بدون لولوه !!
احتشاد رابطة المعجبين و الهتّيفة و الصّفيقة لن يسقط هذه الاسئلة بالتقادم !!
يعني الموصلي كان جا للحول ، الأسئلة دي راجياهو !
انا معني فقط بالسؤال رقم 13 الذي طرحه حاتم
هل قام الموصلي بتوزيع اغنية تخيل للشاب خالد وهل فعلاً تم استدعاؤه بواسطة الفرقة الموسيقية العالمية لتوزيعها ؟؟
و السؤال بتاعي ، هل قام الموصلي بتلحين و توزيع أغنية للفنانة أصالة نصري !
و من كلمات الشاعر الكتيابي كما إدّعى الموصلي في اكثر من موضع ؟؟
....
أها يا أستاذ ، المايك معاك 😢
....
بتاعين التسالي و صغار الباعة يمتنعون !
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: امير بوب)
|
غايتو يابوب انت زول غلبان ساكت
هسع انا خليت الطقطقة الاولى بتاعت حاتم شوبير مشيت تفتش للجرايد والكلام البتقولو
لمعلوميتك انا ماصرحت لاي جريدة باي كلام بتوزيع اغنية للكتيابي لاصالة نصري اها بتودي وشك وين؟؟؟
الجرايد دايرة تبيع ساكت
٢- نعم انا وزعت تخيل لجون لينون واتأدت في لاس فيجاس بتوزيعي مع اضافة صولو عود لعازف بارع في الفرقة
والاغنية الوزعتها عشان تغنيها اصالة نصري مع الشاب خالد هي"نسم علينا الهوى لفيروز ولم تغني لخلاف حدث بينها والشاب خالد بل ان اصالة كانت ستغني الكلمات التي كتبتها بالعربية لاغنية تتخيل وبدأت التمرين معي في البروفة ثم انسحبت من تخيل لذات الخلاف
قلت لي طقطقة
وا اسفاي عليكم والله
حقد ومرض
معليش للعودة بس عشان اختك في حجمك الحقيقي يا دكتور
كان يفترض ان تكون صفيا ونقيا
| |
|
|
|
|
|
|
|
|
|
Re: رسالة أخيرة من الموصلي للابن معتز صباحي (Re: Elmosley)
|
يوسف كيفك؟
اطلعت على الفيديو، ويبدو أن الأستاذة طلب منها أن تسجله كما واضح من ذكرها للبوست، بوستك (الرسالي) دا يا يوسف .
الأنا مستغرب ليهو طالما عندها أعمال خاصة و(اتنوتت) زي ما سمعت في الفيديو، يعني أعمالها جاهزة، ليه ما أدت أي من أعمالها في البداية وبدأت بأغنية أنت ملحنها؟
لأنو في الجزء التاني من السؤال في إشارة في الموقع بتقول باشتراطك لتأدية أعمال أنت طرف فيها فقط، هل هذا صحيح؟
بناء عليه،
الدقيقة 16:11 إلى 16:24 من فيديو أحمد ياسين
| Quote: إذن نحنا مفروض نصبر على الفنانين الجدد ديل نديهم فرصتهم في النمو واكتساب الخبرات ونعرضهم من خلال في برامج زي دي مش نخليهم يجتروا في أغنيات الماضي |
وكلامك أدناه
Quote: فعلا القصد من هذا البرنامج هو اتاحة الفرصة للشباب ليتغنو باغنياتهم اختلفنا ام اتفقنا معها فهذا جيل يمثل جيل مختلف ومن حقهم ان يعبرو عنه
Re: المايستروRe: المايسترو
|
فبحسب تصريحاتك أعلاه فالمتوقع أن نسمع من الأستاذة أعمالها الخاصة حتى ولو كانت (لموزعين وملحنين غيرك)، لكن لم يحدث ذلك، فما السبب بكل صراحة؟
فليس هنالك أفضل للفنان من أن ينال فرصة تأدية عمل خاص في وسيلة إعلامية ولا كيف يا يوسف!
=========
كنا نأمل كذلك أن لا نرى مثل هذه الجمل في حق زملاءك يا يوسف، وهنا في الوسيط الإلكتروني دا.
- وضرار الكذاب يعلم كل هذا
- كما ان احدى المغنيات وصفته بانه جبان في القروب الذي يخص المغنيين والمغنيات
- تحدث هو وافترى كذبا وقال كلام قريب جدا للينك الذي جلبه المفعوص حاتم
- وتملكني غضبا شديدا على هذا الضرار المضر
- بعد كدة حاجيب ليكم لينك تسمعو نفاق ضرار بالصورة والصوت يصفني بالهرم
- لتكشف لكم وجه ضرار الحقيقي الكاذب
____
لا تزال هنالك بقية أسئلة، ونأمل أن نشاهد الشاب خالد وأصالة نصري في فيديوهات تؤيد ما ذهبت إليه من قبل.
| |
|
|
|
|
|
|
| |
عبدالمنعم الطيب حسن
قسم الفضيل مضوي محمد
Salah Zubeir
Ahmed Yassin
سفيان بشير نابرى
حاتم إبراهيم
معاوية المدير
ABUHUSSEIN
جلالدونا
MAHJOOP ALI
Mahjob Abdalla
Elmosley
جمال ود القوز
محمد حيدر المشرف
Zakaria Fadel
النذير حجازي
Yousuf Taha
أبوبكر عباس
محمد صديق عبد الله
Osama Mohammed
فيس بوك
تويتر
انستقرام
يوتيوب
بنتيريست