|
Re: ميم دال ألف دال: وأختِمُ قَولي (Re: عبدالحفيظ ابوسن)
|
الله يا صديقي ابو سن
يا سلام على مدحة زيد قدر الرسول يا رب
وحنين كبير للصقيعة والهدوء وروح المكان وحاجات تانية
كتبت عن زيارتي..لكن ما كملت الموضوع
بحتاج ليك
ما دام من آل البيت الحياتي..سعيدين
،،
الجو في الخارج يدعو للإنجذاب
،، لاح برقاً..لجوفي نقب صرت الهث لهيث الغب
،، الله الله
| |
|
|
|
|
|
|
Re: ميم دال ألف دال: وأختِمُ قَولي (Re: عبدالحفيظ ابوسن)
|
الليلة الحِجاز بَراقو -جاي- لَمَعَن هَيجَن الغرام زادن علي وجَعْاً ودعني الكَرى والمُقلتين هَمَعن طَّرني المَناسِك والمحادي ظَعَن والبيت وأرجُلاً حامن بِحولو سَعن وأفواهاً يلَبَّنْ تارة تارة دَعَنْ والحُجرة أم رياض مَولوع بِها ولَعاً مهما الليلِ جَّنَ روحي وقِليبي نَعَن ما دام في الوَطَن أقوالي ما انسمَعَن واحسرة شبابي اللي الذنوب مَنَعَن وا أسفي إن أقيم وأقدامي ما نَجَعَن لي قبراً عقارِب حُبو لي لَسَعَن إن كان أبقى حي ما تظنوا في نَفعاً
،،
يا الله
حياتي البارع
| |
|
|
|
|
|
|
Re: ميم دال ألف دال: وأختِمُ قَولي (Re: تماضر الطاهر)
|
Quote: ما تظنوا في نَفعاً |
غنى صديق الكحلاوي، وتهتك في ذلك، وحق له أن يتهتكا "إن شاء الله أجن وأزيد في الجن" مجانين الا إن سرّ جنونهم عجيب على أعتابه يسجد العقل
قال سيدي أحمد البدوي مدد
وأختم قولي بما قال الأستاذ محمود محمد طه (ههنا يسجد القلب، وإلى الأبد، بوصيد أول منازل العبودية) و ده طبعا سجود لا رفع منه
هيا وكب
| |
|
|
|
|
|
|
Re: ميم دال ألف دال: وأختِمُ قَولي (Re: تماضر الطاهر)
|
يا تماضر اظن الطيب صالح عندو حديث حول نفسو ما حافظو لكنو بقول في معناه بعضهم يروني فاجرا فاسقا وبعضهم يراني صوفيا ورعا متبتلا او نحو ذلك اياهو البني آدم حسب تجربتي الشخصية مرات تحس انك كومة ضؤ فترخص الدنيا في نظرك وتحلق بك ذاتك حيث لا كائنات تمر . في تلك الساعة تحسك خفيفا مطمئنا واثقا .. لا تخش شيئا من نوائب الدهر . تحلقك بك الكلمات وتتذوقها حتي تحس طعمها حلوا في لهاتك بتكون مبسوط ورايق ومرتب ومراتن تغترف غرفا ولا تفرز من شهوات الدنيا ان استطعت لها سبيلا . تتحول لكائن شهواني شبق جائع . سلوكا او خيالا تتقاذفك الاحلام والافكار البذئية ويتملكك عنفوان اللحظة المحك في الكوابح والمعرفة والمحك اي اللحظات تنتابك اكثر عموما يعجبني الشعر جدا ويحلق بي في سموات الوجد أي شعر كان صوفي ولا غزل ولا ثورة ماكان بليغا جيد السبك ويميل للرمزية حياتي من الشعراء البارعين والمولهين في الحب الالهي لذا هو صادق مع براعة عبقرية
| |
|
|
|
|
|
|
Re: ميم دال ألف دال: وأختِمُ قَولي (Re: عبدالحفيظ ابوسن)
|
عندي صديقة يا ابو سن
زماااان لما المطرة تصب تجيني تقول لي ارح مشوار ...
وين يا بت؟؟
تقول لي نستمتع بتناقضاتنا
نمشي ناكل في مكان فخم..ونحوم حفايا في مسيد
ونسلم على ناس ما بنعرفهم
وتقعد بدل ست الشاي وتدفع حساب الزباين
وبعدها
يرجع الشكل العام المتزن..مع لمعة عين شقية وراضية
ف شنو...
الموضوع كبير وبسيط
الفصول الجوانا تتقلب ولكن لا تخرج عن الإيقاع
،،
عجبتني عنفوان اللحظة
،،
الجمال يعشق بعضه البعض
كن ما ترى وقت/ كيف ما ترى
عايزة اقول كلام كتير لكن ذِكرك للكوابح فرملني
| |
|
|
|
|
|
|
Re: ميم دال ألف دال: وأختِمُ قَولي (Re: تماضر الطاهر)
|
الغالية تماضر ردك على ود ابو سن لمن صديقتك تجيكي وتقول ليكي ارح نمشي مشوار لمن المطرة تصب يدل على انك يا تماضر اديبة وكاتبة رائعة بحق وحقيقة ... انتى وين من زمان مختفية وما قرينا ليك الروائع دي... واقول ليك مرة ثانية وثالثة ورابعة ردك الاخير ده اوسكاااااااار ...اوسكاااار وبشهادة كل زميلاتي وصديقاتي اللاتي مررن على التعليق واحدة قالت تماضر دي مفروض كتبها ومؤلفاتها تكون معروضة في كل المكتبات ومعارض الكتب الاقليمية والدولية...والله صحي.. ودمت بالف خير وصحة وعافية
| |
|
|
|
|
|
|
Re: ميم دال ألف دال: وأختِمُ قَولي (Re: عبداللطيف حسن علي)
|
خلق الانسان حرا يا تماضر انظري للاطفال . العينة الصافية والنقية من الانسان قبل ان تزحم رأسه الكوابح . تلك الكوابح الناتجة من شتى الاتجاهات انظري لهم متحررين .. ذلك التحرر الذي لايمكن وصفه بالفوضى لذا نظل دوما في دواخلنا نبحث عن طفولتنا ان نكون احرارا متحررين من كل الاثقال خفيفين كنسمة لم تمارسي تناقضك بل انتصرتي للطفلة داخلك
| |
|
|
|
|
|
|
Re: ميم دال ألف دال: وأختِمُ قَولي (Re: عبدالحفيظ ابوسن)
|
صديقي ابو سن
لمست كبد الحقيقة
كتير بحس إني وقفت في 6 سنوات
وعمري ما زاد
وكتير جداً ما بمنع نفسي من مشاركة الأطفال بعض العابهم
،،،،
حكاية لم تكتمل
أمدرمان بتوقيع "دراجتي"
كانت تترك أثراً على الطرقات
فألتفت لأرى خطوطها المتعرجة بفعل ارتباكي،
وأقول في سري: إشهدي يا شوارع... فقد مررت من هنا.
ولم أذكر في حكايتي شيء عما سقط مني عمداً
كانت بذور الحب
ومع كل ميقات للذكرى..
تننبت شجرة،
كنت ادخرها ظلاً.. لهجير في العمر أيقنت أنه آأأأأتٍ آت
فكيف أختم قولي؟؟؟
| |
|
|
|
|
|
|
Re: ميم دال ألف دال: وأختِمُ قَولي (Re: Basamat Alsheikh)
|
بسمات يا بنت الفرح:
كتلت قلبي بي سمح الكلام والقول وجابت شي كبير والله ما معقول أوسكار طلتك يا غالية ليكي بقول سلام مرفوق لصاحباتك وشوق مبهول
،،
بسببك أمس نمت مبتسمة ومن جمال كلامك غلبني أرد أعرفي إنك حبيبة جداً..بحب ردودك وأسلوب تفكيرك وزاد عليهم حسن ظنك
كلامكم محفز ومُلهم..أسعدني شديد
الجو الآن في الخرطوم..غيم وبرودة لطيفة وشي حلو يشبهكم
| |
|
|
|
|
|
|
Re: ميم دال ألف دال: وأختِمُ قَولي (Re: تماضر الطاهر)
|
Quote: على الاقل إنت ما زيي..الغربة سبب. عندي دموع متحيلة..وما محتاجة سبب..سالت تضامناً معك. ،
|
الاخت تماضر شاكر دموع التضامن الرقيقه القريبه مع بؤساء المنافي زمان كنت لما اسمع ابيات العبادي في مسرحية ود دكين وهو يتكلم بلسان طه وهو يمدح نفسو قلبي سمين هربه وما بتضناني الغربه كنت بستغرب لكن عندما عالجت الغربه حقيقه لقيت انو وصف نفسو بي فعل يعجز عنه الكثيرين
| |
|
|
|
|
|
|
Re: ميم دال ألف دال: وأختِمُ قَولي (Re: علي محمد الفكي)
|
أنّ احدهم ____ أديتيني مشاعر حية
عوضتيني الزمن الماضي
زمن الجرح الأكبر مني
وقاسي علية
وبيك صادفني ولقى عنواني
رزاز الفرح الخلَّى الجية
أريت صادفني حنانك بدري
لو لاقيتك بدري شوية ____ وقال من به بقية عقل احبك احبك انا مجنونك --- هى كده تفتح جرح و لا تواسى ملدوغ الغرام مش قال ليها شال هم فرقتك قلبى اها نقول شنو عاد نبقى فى الرحيل و جمبها و مشتهيها و الوجع شقا ايام
| |
|
|
|
|
|
|
Re: ميم دال ألف دال: وأختِمُ قَولي (Re: تماضر الطاهر)
|
Quote: يا سلام أخي علي،
ما عايزة أمشي المداخلة بي الشكر والكلام الزي ده
يا ريت تحكي
الدموع جااهزة
ولو إنه اليومين دي الجو مليان بسمات
ح أنتظر منك - بعد الرجاء - بعض الحكايا
،،،،، مودتي المتجددة |
تماضر تحياتي وانتِ تضيفين للمنبر وجه افتقده طويلاً بي كتاباتك المبدعه والمعبره عن الواقع بسلاسه وحرف شفيف اهو قلنا نكسر تلج الدنيا لسه بخير وممكن الناس تفرح وتنبسط ويرجع للمنبر القو المغيب
الغربه يا تماضر بنت الطاهر انفصال وجداني عن المحيط الطبيعي ليك قبل ان يكون انفصال جسدي وهذا الانفصال الوجداني بعد مرحله ما من الغربه يصبح صعب الالتئام فتستمر غربتك الداخليه بعد العوده والواحد يسير في وطنو ولسان حالو زي ما قال المحجوب سرت فيك غريباً ضل سامره داراً وشوقاً واحباباً واخوانا وقد يصل الغريب حاله من اللامبالاه والاحباط والسخط والرفض زي ما صوره البير كامو في روايته الغريب عبر شخصية ميرسولت بسبب انفصاله العاطفي عن البيئه المحيطه به وعمرو الوطن البديل ما بكون وطن اصلي وقصة اندماج الجيل الاول من المغتربين في المجتمع الجديد صعبه لو ما كانت مستحيله والمشكله الرجعه بتكون صعبه اقصد الرجعه الوجدانيه مش الجسديه ولسان حال المغتربين في النهايه لا وصلت ليك لا الرجعه تاني عرفتها
| |
|
|
|
|
|
|
Re: ميم دال ألف دال: وأختِمُ قَولي (Re: علي محمد الفكي)
|
اهلاً علي
اتمناك بخي ، طبعاً ما بقدر طوالي اقول ليك..طيب والحل شنو؟؟ لكن ممكن اقول كيف ممكن تخففوا الاحساس ده؟ محتاجين لعزاءات شكلها كيف؟ زيارات، ذكريات، اغاني... ،
تعال احكي ليك ..وأختم قولي .. دعتني صديقة عزيزة لزيارتها حيث تقيم في إحدى الدول العربية، وقررت ألبي دعوتها..وكنت في شوق شديد لرؤيتها ولو لأيام قليلة، ونحن معرفة إسفيرية نمت وأصبحت أعز من أخت الدم واللحم، وكانت مستعجلة لعلمها بظروف شغلي وعلمي كمان بظروف شغلها وحددت لي زمن، وأنا أصلاً ما عندي جواز سفر..لإحساس جواي إني ما ح احتاج ليهو..وحتى الحج..لا سبيل لإستطاعته. مشيت اطلع الجواز..وكلما يعاكسوني في إجراء افرح..!! والله بفرح..وانا لسه ما بديت جادة للسفر ..خايفة. وقعدت اتخيل..اني مشيت..و ما اتخيلت سمح..بكيت قلت لي ربنا : بس ما بعرف..حلها لي بأي شكل.. إستلمت الجواز في ظرف أبيض تعلوه نافذة شفافة..كأنها عين الجواز بتضحك علي..وبتقول لي سفر يعني سفر..ختيتو في الشنطة ورجعت البيت..ما شفت اي حاجة في الشارع،..ما رديت على رسائلها يوم كامل..كنت محتارة ..ليه الشعور ده. بعد يوم تاني إتصلت..قالت هم جايين السودان ضروري..اختها جاها عريس مستعجل ولازم يكون العقد هنا..حبيت ربنا حب..وشنطتي بي نفس وضعها ..تقرا في كلامي ده..ههههه..وجات هنا..حسيت انها اجمل ايام..شخصية تستحق السفر وفراق ام زين..بس عرفت اني جبانة جداً اكتر مما تخيلت. ، كنا بنقول في شنو؟؟
| |
|
|
|
|
|
|
|