|
Re: ونسة عربات في الطرمبة (Re: درديري كباشي)
|
2 بعد ضجة و ( ورورة ) المحركات والتدافع - هوي الجوطة شنو صدعتونا . والله الشفع ديل كرهونا البنزين زاتو . - مالك يا هايص عاملة هيصة. - أهلا يا كامري كيفك شديدة ؟والله يا كامري بقيت أكره أجي داخلة المدينة عشان الشفع ديل . - قصدك الركشات ؟ - مالن القشرات ومعاهن المفعوصات الشرفانات ديل . - الأمجادات أهي هي هي هي صاح ؟ وانتي وين الزمن دا كله لا شفناك في صف ولا في شارع . - انا اليومين ديل ماسكة خط يا بت أمي. مش قالوا الخلا ولا الرفيق الفسل. - خط وين يعني كدا ؟ - يا ستي شغالة حسب الطلب مرة شندي ومرة مدني ومرات لغاية كوستي نصلها. خاصة بعد جية المغتربين ديل. والواحد يرفع شفعه بعفشهم تقول له المينا البري؟ يقول لك بري بتاع شنو كوستي طوالي ولا القطينة ولا مدني. - ويدفعوا كويس ؟ - ما شاء الله ولا يساومك النقولوا له يدفع طوالي . عايزين يتخارجوا من البلد دي بأي تمن يا بت أمي. - أها الخط كيف الشارع سمح ونضيف. - والله هي ما نضافة يقولوا عليها كدا لكن أحسن بكتير من خمج الخرطوم دا والحفر الهدت حيلكم دي. والله بس من نمسك الخط السواق يخط لي نمرة خمسة تاني ما يعشق الا اذا يقيف . - والله بختكم أنا عشاقتي اتملخت من كثرة التعشيق والزحمة والحفر والمطبات لمن جاني غضروف في الجربوكس . تأتي ركشة (تتمرحك ) تريد أن تدخل في الفراغ بين الكامري والهايص . - هوي الشافعة دي داخلة وين كمان؟ والله اتحرك عليك اعفصك لمن اطلع دم سيدك بالعادم أمرقي برة يمرق جلدك. - أعصابك يا هايص طولي بلك شفع الزمن دا ما عندهم أدب بتعريفة. - تقولي شنو يا كامري هو كله نص جالون جايين يزاحموا الكبار ويقلوا في أدبهم. - ديل ما ما تربوا زينا يا هايص . نحن زمان لمن نشوف البص ولا الحافلة في الطريق نخلي ليهم الشارع لغاية ما يمروا خليك من نجي نتحشر قدامهم في الصف. - هي هايص معانا . - أهلا الأمورة سوناتا زمن. طولنا منكم شديد. - كيفك انشاء الله شديدة وين الغيبة الطويلة دي . - اسكتي ساي يا سوناتا هايص قالت ليك ماسكة خط وبقت سفرية كمان ؟ - أصلي ما بصدق صحي يا هايص بقيتي سفرية؟ - - ومال نحن بنلعب؟ - أها كيف ومغطية معاكم ؟ - الحمد لله مستورين ومرتاحين من زحمتكم دي ؟ - والأبيض ضميرك كيف انشاء الله منستر معاكم . - ما ياهو ايصالهم دا .تاني عندهم معانا شنو ؟ نقطع الايصال دا ونختوا ليهم في الطابلون . - يعني بقت رسوم ثابتة؟ - زي ما تقولي كدا. وين العسولة أكسنت زمن ما شفتها؟ - ياها ديك قدامنا قربت من المسدس. - واحلاتي ماشاء الله كبرت. - والله لا كبرت ولا شي قولي عجزت من الحفر والمطبات ديل. - لا والله لسع شباب بنورتها . - نناديها تسلم عليك . أكسنت يا بت يا اكسنت . تعالي سلمي على خالتك هايص . - خالتي هايص أصلي ما بصدق. كيفك انشاء الله تمام وكيف عمو تاتشر زمن ما شفناه. - والله عمك تاتشر بس ضارب الخلا من صحراء لصحراء. شعر ناس المدن ديل بقوا ما بيطيقوه عشان كدا بس قال أخير له الخلا دا. - أها لسع ما بقيتوا تلاتة ؟ - نبقى تلاتة كيف هو نحن قعد نتلاقى وين؟ - أنت يا هايص أخواتك الكبار ديل رافعات القزاز ولا تشوفيهم في صف ولا في أي زحمة تقولي ماشات بلا بنزين . - قصدك لاندكروزر وبرادو والله أنا زاتي من اتفارقنا في المينا تاني بس اشوفهن جاريات في الشارع سلام ما يسلمن علينا ما تقولي بنات بطن واحدة أبدا. - يلا يا خالتو مع السلامة أنا دوري جا . يلا جاو . - يلا باي يا عسل محل ما يسري يمري.
|
|
|
|
|
|
|
العنوان |
الكاتب |
Date |
ونسة عربات في الطرمبة | درديري كباشي | 05-13-18, 06:45 AM |
Re: ونسة عربات في الطرمبة | درديري كباشي | 05-13-18, 06:46 AM |
Re: ونسة عربات في الطرمبة | درديري كباشي | 05-13-18, 03:25 PM |
Re: ونسة عربات في الطرمبة | درديري كباشي | 05-13-18, 03:25 PM |
Re: ونسة عربات في الطرمبة | درديري كباشي | 05-13-18, 04:38 PM |
Re: ونسة عربات في الطرمبة | عوض جاه الرسول | 05-14-18, 07:27 AM |
Re: ونسة عربات في الطرمبة | درديري كباشي | 05-15-18, 06:10 AM |
Re: ونسة عربات في الطرمبة | تماضر الطاهر | 05-15-18, 08:18 AM |
Re: ونسة عربات في الطرمبة | درديري كباشي | 05-15-18, 08:55 AM |
Re: ونسة عربات في الطرمبة | تماضر الطاهر | 05-15-18, 09:49 AM |
Re: ونسة عربات في الطرمبة | درديري كباشي | 05-16-18, 08:16 AM |
|
|
|