|
|
|
 Re: حوار أغبش (Re: درديري كباشي)
|
حوار أغبش
2
بعد قليل تحضر صينية الغداء. طبق بطبيخ القرع تحاط به طبقات من كسرة الذرة المخمرة وصحن شطة وصحن سلطة خضراء. وتبدأ منادات الصغار (يا عدولي يا خلودي يا رغودة يا عمودي تعالوا للغدا)
- اليسمعك تدلعي فيهم كدا يقول ساكنين في فيلا وتناديهم لصينية سمك بالفرن.
- هوي يا راجل حتى دلع الكلام دا عايز تحرمنا منه؟ هسع بيت الجالوص دا وصينية القرع دي في ناس يحلموا بيها ما لاقنها .
- ونعم بالله نحن ما قلنا حاجة أتدلعي ودلعيهم بكيفك ما في مشكلة.
- متين انا كمان اتدلعت هو البيدلعني منو ويدلعني بشنو ؟.
- خلاص يا سوسو أكلي .
- السوسة التمسك. استغفر الله العظيم. هوي ياهاشم عليك الله ما تعكر لي مزاجي أقوم ادعيك هسع .
- خلاص معليش يا سوسو ما بسألك تاني .
يتلم الأطفال حول صينية الغداء عدا عماد.
- انتو عماد وينو ماله ما جا .؟
- بري . شكله حردان .
- يحرد لي شنو؟.
- حردان منك أنت دا . كسر الخاطر ما كويس .
- يا ولية انت عايزة تجنيني خاطر شنو انا كسرتو كمان .
- تقول له كان جيت الأول بشتري ليك عجلة وتجي تنكر كلامك.
- الظاهر أنا حا أجن فعلا. أول شنو وزفت شنو ولدك ساقط حا يعيد زيه وزي باقي المدرسة الفاشلة دي.يعني مجموعة ما عنده فرق من الجاب صفر ولا عشرة درجات فقط .
- المدرسة هو بناها ولا كان مديرها. المدرسة كلها ساقطة والموت مع الجماعة عرس.
- نحن مافي شي مضيعنا في الدنيا غير أمثلتنا الفاشلة. منو قال الموت الجماعي عرس كل زول يتحاسب لوحده ويندفن لوحده وكله زول بذنوبه وأعماله. تلاقي أنت خففتي عليه المصيبة بالأمثلة الهبلة دي. وكمان عايزاه يأخد مكافأة على فشله وسقوطه. المدرسة دي خرجت أجيال. نص أولاد الحلة الدكاترة والمهندسين اتخرجوا منها الفاشل هو ولدك وشلته ودفعته واصحابه.
- هوي يا راجل ما تقعد تملاني بكلامك الكبار كبار حق الشويعين دا أنا امشي احنسه واجيبه يتغدا .
- هسع الشويعين الدخلهم شنو في كلامي دا أمشي حنسيه .
- لكن عايزاك ترضيه بكلام طيب ما تكون قاسي.
- أرضيه كيف أوعى تكوني كمان عايزاني اجيب له عجلة وهو ساقط أنت عايزة تضحكي فينا ناس الحلة والحلات المجاورة.
أحد الصغار محاولا المشاركة
- يا أمي يا أمي صحي عماد طلع الأول.
- خد!!!!!!!!! الحكاية اشتهرت كمان.
- آآآآي عماد طلع أول المدرسة (وتنظر ناحية زوجها نظرة شريرة )
- أخوك جاب شهادة تشغله كمساري في حافلة. قال الأول قال.
- يا راجل فال الله ولا فالك .. ليك علي ولدي عماد كان ما بقى دكتور زي عماد ود نفيسة خالتي المسمنه عليه .
- انشاء الله يطلع دكتور يعني انا فرحان بسقوطه أنا عايزه ينجح اكثر منك.
- طيب ما ترضيه
- أرضيه كيف كمان
- جيب له العجلة الوعدتها به .
- أنا متين وعدته بعجلة ؟
- قلت له لو طلع الأول .
- تاني الأول دي ؟؟؟ أها غداك د ازاته ما عايزنه ..
- يتبع
| |
 
|
|
|
|
|
|
|
|
Re: حوار أغبش (Re: درديري كباشي)
|
3
هاشم زعل وترك الغداء (حرد) أخذ جريدته ودخل الصالون تاركا سعاد وعيالها. وهي كذلك دخلت غرفة عماد تترجاه ( تحنسه ) حتى يعود لوجبة الغداء .
- عمودي تعال للغداء والله عندنا قرع مسبك وسلطة وشطة حمراء. تعال نعجنها مع بعض.
استجاب عماد إذ يبدو أنه ضعيف أمام شهوة بطنه.
- استلم الجلسة وبدأ يصدر في الأوامر. جيبو صحن كبير رغودة جيبي ملح من المطبخ. عدولي جيب موية من الزير. وكب الكسرة في الصحن الأكبر وصب عليها ملاح القرع والسلطة الخضراء ورش عليها الملح والشطة وقليل من الماء وبدأ يعجنها بيده. يلا أكلوا.
- يسلم إيدك يا عمدة والله ظبطها صاح. امي تاني كل يوم أعملي لينا قرع بكسرة خلي عمودي يظبطها لينا.
- أكلوا بالهنا يا أولادي أصلا عماد ولدي دا شاطر في أي حاجة.
- إلا في المدرسة.
أتاها الرد من داخل الصالون يبدو أن هاشم عيونة على الجريدة وأذنيه مع ما يدور في الحوش.
ضحكت دون تعقيب عرفت أن الغيظ يملأه. قام دون أن يكمل غدائه وهاهم يستمتعون بوجبتهم بعد ما ظبطها عماد. عفوا الشاطر عماد.
في العصر
قاد هاشم عجلته متوجها الى ميدان الرابطة كالعادة ليحضر مباراة في دوري الرابطة وبعد المغرب يتجه الى النادي للعب الكتشينة ويأتي آخر الليل لينام ويبدأ دوامة الصباح الروتينية.
في ميدان الرابطة التقى بصديقه الأستاذ حسن.
- تعال هنا يا أستاذ حسن دا شنو الخازوق العملتو فيني دا .؟
- خير حصل شنو .
- ياخ أنت تقول لعماد أنت جيت الأول؟
- ما صاح هو جا الأول.
- أول بتاع شنو هي مدرستكم دي فيها أول ما كلهم طيشة وساقطين.
أستاذ حسن بعد ان خلص من الضحك قال: ليه وريني الحصل شنو أنا قلت أرفع معنويات الولد شوية عشان ما يجيه إحباط من السقوط.
- إحباط شنو هم ديل لو يحسوا ما كان سقطوا من الأساس.
- كدي وريني الحصل ما أنا للآن ما عرفت المزعلك شنو ؟
- المزعلني ياخ أنا كنت مواعد عماد أنه لو طلع الأول اشتري له عجلة جديدة.
- أها الحصل شنو تاني .
- حصل شنو كيف ما مسك في كلامك دا قوي وقال هو طلع الأول لازم اجيب له عجلة جديدة مثل ما وعدته.
- أهاااااا ... وبعدها أنفجر في ضحك هستيري.
- والله أنا ما كنت قايله حا يمسك فيها بالجد كان قصدي أخفف عليه صدمة السقوط .
- تخفف شنو هسع أنا اتشاكلت مع أمه بسببه لأنها أصرت أنه اجيب لولدها عجلة زي ما وعدته. بالزعل طلعت من البيت بدون غدا.
- طيب هسع أنا مطلوب مني شنو ؟
- أول حاجة أروح معاك البيت تغديني تعوضني الغداء وبعدين نشوف طريقة تخلصني من خازوق عماد دا .
- ما في مشكلة عندنا غدا قرع ينفع معاك.
- برضو قرع ؟ ما بطال بس جيب لي صحن كبير وموية وملح وشمار خليني أعجنها.
يتبع
| |
|
|
|
|
|
|
|
|
|
Re: حوار أغبش (Re: درديري كباشي)
|
حوار أغبش
4
وصل الصديقان الى بيت أستاذ حسن
وجلسا في الصالون. دخل أستاذ حسن على زوجته طالبا منها تحضير وجبة غداء لصديقه هاشم بنفس المواصفات التي طلبها. كما يبدو أنه شرح لها السبب والموقف الذي جعله ( يحرد ) الغداء في بيته .
أحضر صينية الغداء بها طبق طبيخ القرع وصحن السلطة والشطة مع (الصحن الفاضي) وشرع هاشم في عمل العجن الذي تركه في بيته وأستاذ حسن ينظر له .
- والله دخلتها لي في نفسي يا هاشم آكل معاك.
- طوالي اتفضل ياخ .
- يا سلاااام ياخ دي خلطة عجيبة اتعلمتها وين .
- من عماد ولدي .
- طيب ما هو شاطر أنت زهجان منه مالك ويستاهل يطلع الأول .
- شاطر في بطنه بس وعليك الله ما تجيب لي سيرة الأول دي تاني .
- ياسلاااااااااااااااااااام ياخ تسلم يدك يا سلمى ( رافعا صوته ) ليسمعها بالداخل
ليأتيه الرد مفحما من الداخل بصوت عالي
- بالهنا يا هاشم وانا يدي البيجبها شنو ليد سعاد كمان . هو في يد اطعم منها دي نحن في بيوت المناسبات مسمنها ملكة القرع.
- الا الا الا مرتك مالها قطعت لي ناشف كدا أنت حكيت ليها ولا شنو ؟
- ما لازم ومال ابرر ليها كيف أنك ما تغديت في بيتك.
- والله يا حسن أنت الليلة حد مسلطك عشان تدخلني التجاني الماحي.
- ليه خير ياخ في شنو ؟
- هسع حاكي ليها مالك ما عارفهن متصاحبات.
- ما قلت لك عشان ابرر لها سبب حردانك للغداء في بيتك.
- ما تحكي أي حاجة قول لها مثلا .
- أقول شنو يعني عشان تكتشف الكذبة والاقي نفسي مزرزر لا يا زول نحن ما عندنا كذب بس نرميها مدا زي ما تجي تجي .
- طيب خلاص دي مشيناها ومشكلة الغدا اتحلت وريني كيف أتحل من عماد الثقيل وحكاية الأول الوهمية دي والعجلة.
- أنا اديك فكرة اشتري عجلة قديمة مستعملة من الدلالة وقول له السنة الجاية لو نجحت أجيب لك الجديدة.
- والله فكرة بس انشاء الله هو يرضى بيها كمان.
- لا لا أكيد يرضى بيها .
- أها وأم عماد كيف شكلاها مليانة .
- بعد ترضي عماد هي ما عندها مشكلة أصلا هو ولدها الكبير المدلع .
- والله كلامك صاح. تمشي معاي الدلالة هسع بعد الغداء نجيب له العجلة دي .
- ما في مانع .
وفعلا قريب المغرب دخل هاشم بيته فتح الباب أدخل عجلته.
وأسرته متجمعين في الحوش يشربوا في شاي المغرب. وبعد قليل عاد الى الباب من جديدة ليدخل عجلة أخرى. بما أنها قديمة لم تتحكم سعاد في فضولها.
- أها دي عجلة منو كمان ما تقول لي في زول جايي يبيت معانا.
- يا ولية أهدي. وين عماد؟
- قاعد جوة مع التلفزيون يحضر في كورة.
- يا عماد تعال يا ولد.
خرج عماد من الغرفة ولا زال عابس الوجه: أيوا يا أبوي .
- مبروك جبنا ليك العجلة.
- صحي وينا يا أبوي.
- ما يهدي قدامك ما شايفها ؟
- دي القديمة دي؟
- ايوا انشاء الله السنة الجاية بعد تعيد وتنجح نجيب لك واحدة جديدة .
- يا أبوي طيب أنا كمان ما سقطت وجيت الطيش ليه ما جبت لي عجلة زيه؟
الأب والأم نظرا بدهشة ناحية الصغير عادل الذي أبدى غيرته.
- شوفوا المصيبة الوقعتونا فيها أنت وولدك كمان. لا حول ولا قوة الا بالله.
يتبع
| |
|
|
|
|
|
|
| |
Abdullah Idrees
فيس بوك
تويتر
انستقرام
يوتيوب
بنتيريست