وزير المالية : " وصول 7 بواخر بنزين و3 جازولين و 2 غاز .. لفك ضائقة البلد من الوقود " . سيدي الوزير .. كنا محتاجين 4 بواخر " موية " و 8 بواخر كهرباء وحات امك . سيدي الرئيس .. سمعتك بتتكلم في واحد من لقاءاتك التليفزيونية وبتقول .. " اتابع كل ما يكتب عني في مواقع التواصل واكتفي بالضحك " . سيدي الرئيس .. احنا في مواقع التواصل بنكتب عن فشلك .. عن فسادك .. عن تقصيرك عن استبدادك وعن ظلمك للوطن . بالله عليك .. البضحك شنو لما نقول ليك الشعب السوداني صايم الليل والنهار بدون موية وبدون كهرباء .. البضحك شنو لما نقول .. المحليات بتفرض رسوم على ستات الشاي القاعدين في الشارع .. البضحك شنو لما نقول ليك .. انعدام الأكسجين في غرف العمليات وانعدام الادوية المنقذة للحياة في الامدادات الطبية .. وحضرتك بتتعالج برة السودان .. انت واهلك وكل الدستوريين . البضحك شنو .. لما نقول ليك كيلو الطمام وصل 80 جنيه وسعر التفاحة الواحدة 40 جنيه وكيلو اللحمة 200 جنيه وتعريفة الموصلات 20 جنيه والرغيفة في بعض المناطق 5 جنيه .. والمرتبات هي نفسها بدون زيادة . سيدي الرئيس وانت بتضحك علينا .. هل فكرتا الموظف الكحيان التعبان بدفع ايجار البيت وتعليم الاولاد وعلاج امو وابوهو من وين ويادوب المرتب 3 مليون بعد الحوافز والبدلات . سيدي الرئيس .. والله انت مافارق معانا .. واحنا لا عايزين سلطة وللا مشغولين بالكرسي بتاعك .. احنا بنسعى للتغير .. عشان حضرتك والكلاب المعاك مقصرين في شغلكم . ياخي اشرح لي .. المواطن بشتري الكهرباء بنظام الدفع المقدم .. طيب البخلى الكهرباء تقطع شنو .. انا دافع ليك مقدم .. يعني دافع قيمة التوليد وقيمة الوقود وقيمة الجاز ومرتبات العمال والموظفين .. اها بعد كدا كهرباء مافي . المشكلة وين .. مافي جاز .. بسيطة من القروش الاخدتها مني دي امشي اشتري جاز .. انشالله تشتري كهرباء من أثيوبيا وتجي تبيعها لينا سيدي الريس وكل الخونة المعاهو .. ياخى افهموا حاجة واحدة .. احنا مواطنين في البلد دي بنطالب بي حقوقنا المشروعة .. واقسم بالله مافارق معانا البشير او النميري او حسين خوجلى . مافارق معانا منو اليحكم السودان .. احنا عايزين عدالة بس .. كل البنطالب بيهو العدالة . ماممكن الواحد يصحى الصباح مايلقى موية يدخل بيها الحمام .. ياخ موية شراب اربعة يوم معدومة . واتفه وزير راكب ستة عربات وخمسة نسوان وطيارتين . وبعد كدا تجي تقول لي اصبر .. يعني عايزني اصبر عليك وانت مستمتع لحدى ما تموت .. وانا اقعد اتفرج . سيدي الرئيس سؤال واحد بس .. انتوا بتاخدوا خيرات البلد دي مقابل شنو !! هل بالجد مصدقين انكم انقذتونا .. هل بالجد مصدقين انكم دخلتونا الاسلام من جديد .. هل بالجد مصدقين انكم حميتوا البلد دي من الاستعمار او الانفصال او الحروب الخارجية . اشرح لي بس .. الخلاكم كاسرين عين المواطن شنو .. هل لقيتونا احنا الشعب السوداني في وضع مخل بالآدب ومسكتوا علينا ذلة . هل لقيتونا في نهار رمضان مع اربعة بنات في شقة في المعمورة لا سمح الله . هل قبضتوا الشعب السوداني مهرب حاويات مخدرات بالجملة . هل مسكتوا الشعب السوداني سارق قروش الزكاة .. وقروش الحج والعمرة .. هل الشعب السوداني اكل القروض الربوية . هل الشعب السوداني كان في موقف عداء مع امريكا ورجع انبطح ليها هل الشعب السوداني بحارب في اليمن .. وخايف يدخل حلايب . طيب ماسكين علينا شنو بالزبط بخليكم طالعين فينا بالبوت والكاكي . . الناس مستمتعة بالذلة . #تافهيحكمشعب_جبان بقلم : امير يو
05-25-2018, 10:00 PM
Mohd Ibrahim Mohd Ibrahim
تاريخ التسجيل: 01-19-2004
مجموع المشاركات: 2234
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
Mohd Ibrahim
فيس بوك
تويتر
انستقرام
يوتيوب
بنتيريست