|
Re: عن الصحفيين و المتصيفحين مقدمي الرامج الت (Re: سفيان بشير نابرى)
|
المشكلة يا سفيان القنوات دي بقت تخاف من المتصيحفين ديل وبالتالي تسعى لودهم باستضافتهم في برامج للحديث عن قضايا وأمور لا يملكون أدواتها .. لا فكرة ولا خبرة ولا حتى حنك وتنظير ساي، عشان كدا كتير جدا من الذين تمت استضافتهم كانوا وجعة لا فزعة للقناة وبرامجها، خصوصا وانو المذيعين ومقدمي البرامج ظااااااااااااااتم مقدراتم الحوارية متواضعة جدا ويفتقدون للنباهة وسرعة البديهة ولذلك غاليا ما يتحول البرنامج المعين إلى قعدة ضل وونسة سطحية غاية في الرتابة والكآبة.. اما الذين يستقدمونهم عشان يكونوا مقدمين ومستضيفين بدل مستضافين فديل أغلبم كوارث لا قبل للمشاهد بها ولا ذنب له فيها لتفرض عليه فرضا .. حتى الدكتور عبد اللطيف البوني لم ينجح ( من وجهة نظري) في وظيفة مقدم برنامج برغم ما يملكه من أدوات، ودا لأنو الظهور على المسرح والإطلالة التلفزيونية يلزمها مقومات أخرى مهمة مثل الحضور الذهني وسرعة البديهة والقدرة على تذويق الحوار بالأفيهات في الأوقات المناسبة وارتجال أساليب جديدة لادارة الحديث بعيدا عن الكلاسيكية التي تبدأ بالترحيب بالضيف وردمه بالأسئلة المكتوبة أو المحفوظة وتنتهى بشكره وتقديره على أمل اللقاء مرة أخرى خخخخخ. للبرامج التلفزيونية أهلها ودهاقنتها كما للكتابة الصحافية ناسها وسدنتها . ............ تعبت ومليت من الكتابة يا سفيان ياخ .
| |
|
|
|
|
|
|
Re: عن الصحفيين و المتصيفحين مقدمي الرامج الت (Re: أحمد محمد عمر)
|
ملاحظة .. إنه الإذاعة في برامج المنوعات متفوقة على التلفزيون بسنوات ضوئية الملاحظة التانية إنه المهاجرين من الإذاعة للتلفزيون غالباً ما بنجحوا بنفس المستوى في بالي تجربة البرنامج الناجح ملتقى الأصدقاء للإذاعية عواطف سر الختم الذي كانت تتحلق حوله ولاية الجزيرة بأكملها كل يوم ، فشل لما حاولت تكرر تجربته في تلفزيون الولاية يمكن عشان الإذاعة بتتيح ليك فرصة خيال اكتر محرراً من التأثيرات البصرية لاستديو التلفزيون ؟! ما عارف لكن رغم الجمال اللافت لإسراء زين العابدين إلا إنه تجربتها التلفزيونية تعبانة شديد مقارنة بثنائيتها الإذاعية مع محمد عبد الكريم
مرة الصدفة البحتة رمتني في المشاركة في برنامج قدمته شادية خليفة - لو ما خانتني الذاكرة - من مؤسسة كنت شغال فيها .. قدمها لينا مرافقها بإنها الاستاذة شادية خليفة .. انا طبعاً اتخلعت بقيت اقول ليها انتي شادية خليفة؟ :) غايتو والله أعلم إنه شكلي كان متفاجئ جداً لأنها ضحكت شديد وقالت لي آآآي أنا الخدراء السمينة القصيرونة دي شادية ذااااااتا
في ذات الإطار مرة حكت المذيعة تماضر القاضي - على ما أظن - قالت واقفة مع عمار عبد الرحمن في بوابة التلفزيون جاء واحد ماري بالشارع وبقى يعاين فينا شديد في النهاية جاء سلم علينا قال لي انتي تماضر القاضي؟ قلت ليه ايوة .. وقال لعمار انت عمار عبد الرحمن؟ قال ليه ايوة .. قال لينا والله التلفزيون مسمحكم ساي
_________ ديشاااااااك دة شنو البري الفوق دة ! هو البوست عن شنو ؟ أيوااا خلاص النعمل فيها بتكلم عن موضوع البوست :) أول صحفي فاجأني بفشلو كمقدم برنامج كان عثمان ميرغني كنت قارئ دائم لعموده في التسعينات ومتوقع ليه نجاحه الحالي في الصحافة .. وحتى لما جاب فكرة استخدام تقنيات الكمبيوتر في برنامج تلفزيوني بوصفه مهندس اتوقعت ليه النجاح رغم إني كنت طالب ثانوي وما عندي علاقة بالكمبيوتر وقتها .. بس كان بفتقد للحضور ومهارات التواصل بتاعته تعبانة جداً كمقدم برامج .. فشل طبعاً البرنامج برغم المالية الاتحشدت ليه ورجع عثمان لمكانه الأساسي الصحافة
| |
|
|
|
|
|
|
Re: عن الصحفيين و المتصيفحين مقدمي الرامج الت (Re: أحمد محمد عمر)
|
هههههههه عادل الباهي ياخ تهمة في الزي ديل ولا بقبله و بنتحر بي كوز الضيف(اوعه تسألني تقولي دا شنو كمان)... يا احمد انت مسقف ولا شنو!؟ كلامك كبار كبار... ياخ الإعلام التلفزيوني و الصحفي في عهود الغيهب بقى لناس فاطنة شاش و حنان عبد الحميد تقول لي توب الكرب السادة!!! ؟
| |
|
|
|
|
|
|
Re: عن الصحفيين و المتصيفحين مقدمي الرامج الت (Re: طلحة عبدالله)
|
سلام سفيان
عفراء عبد الرحمن مثقفة ومتمكنة و بتحَضر كويس لحواراتها..
في ملاحظة في كل القنوات لمن تجي تلقى برنامج شغال و مستيضفين شخص وانت اول مرة تشوفو لانو البلد
بقت مليانة سياسيين و فنانين و لاعبين كورة وشعراء ..
و لحدي ما البرنامج ينتهي ما بتعرف اسم الشخص أو اي معلومات عنه
مفروض و مع كل سؤال يذكروا اسم الشخص و مهنته و موضوع الحوار زاتو
و برضو المعلومات ممكن تكون مكتوبة علي الشاشة.
| |
|
|
|
|
|
|
Re: عن الصحفيين و المتصيفحين مقدمي الرامج الت (Re: Nasser Amin)
|
سلامات سفيان وضيوفو الصحفيين براهم !!
مرة وزير الصحة ولاية الخرطوم ورئيس ومؤسس جامعة مامون حميدة وبالتالي الزيتونة ويستبشرون والمستشفى الاكاديمي والخ الخ واللهو مقدم برنامج تلفزيوني بايخ كان مستضيف دكتورة أظنها بنت أو أخت الوزير مامون حميدة مقدم البرنامج وهي مديرة أو مسئولة في ادارة جامعة الوزير مامون حميدة عشان تتكلم في موضوع صحي وتعليمي ( عموما" عندو علاقة بالصحة الهو وزيرا والتعليم الهو مدير جامعتو)
شفت فقع المرارة ده كيف !! وكمان في عيانين بشاهدوا في البرنامج ده !!
حركة كده زي لما البشير كرم أم الرئيس بوسام الأم المثالية :)
القنوات السودانية دي حدنا معاها بقى بس تسمع زول بغني غير كده حفاظا" على مرارتنا ممنوع نهائيا".
| |
|
|
|
|
|
|
Re: عن الصحفيين و المتصيفحين مقدمي الرامج الت (Re: عثمان الأمام)
|
قبل اسبوع يا سفيان والبقية حايم بالريموت لقيت برنامج في واحدة من قنواتنا العجيبة دي ، مجموعة سيدات ومقدمة الرنامج وموضوع الحلقة عن التحرش الجنسي واحدة من الضيوف تطرقت للمعاكسة كاحد انماط التحرش ، فردت مقدمة البرنامج : "هي لاكين دي مشاغلة ساي ما تحرش " أأأخ فضغطت على زر تغيير القناة لا ألوي على شيء ..
| |
|
|
|
|
|
|
|