اصدارة للزميل ،كيكي.. جوبا ياهو دي

Quote: زمان ... كانت سودانيز اون لاين ..جنتنا .. جنّة الذين يبحثون عن الحرية .. وانا كنت ساكن فيها سكنة ..ما عضو و لا بكتب ..لكن بقراها في اليوم ..عدد ما يُكتب ..وأخري للتدبّر فيما يُكتب .. وكان فيهو نجوم كدا ..زواهر تلالي في العالي ..منهم ..المدعو عبدالكريم اللمين ..والشهير بي ..كيكي مرات كتيرة ..لمن يكون في موضوع جايط كدا .. بعد ما اقرا كلام كيكي .. بقفل الصفحة وطوالي علي ..فعل حقيقي ..بعد ان استبان الموقف ...فله مقدرة عجيبة علي اختصار دقيق للراي حول قضية معينة ..بتعابير موغلة في التراكيب ذات الدقة في التصويب .. مرة منصور خالد قال علي مهدي ابراهيم .. انه يقول كلاما كثيرا بلغة عميقة ..لكنه بلا معني ... فلو قُدّر لمنصور ان يقرأ لعبدالكريم اللمين ..لاحتفظ بنفس درجة التعجّب .. ولقال .. انّ كيكي يقول كلاما قليلا مختصرا بدقّةٍ عجيبة ..ويحتوي كل المعاني .. 😍 و ما فيها حاجة الناس العتيقين ديل ..يقروا للشباب ..هسع انا ما طوالي بقرا لخالد عويس ...😂😂😂 المهم .. عبدالكريم ..صوّب بدقة كعادته .. واختار اعظم مواجد السودانيين ..و أطلق عليها دفقة محبة تحمل ملايين الأجنّة إنسانية ... و اصدر كتابه الاول ... جوبا .. ياهو دي ... أصدره في وقت يُعيد فيه السودانيين إصطفافهم ... كشعب حر و أمّة واحدة ..تبحث عن كرامتها ... أصدره حتي لا يظهر العنصريون و ذووا الانسانية القاصرة ..في اولي صفحات سجل التاريخ ..حين تحل مواكبه علي لحظات زماننا السوداني ... أصدره ... ليضيف جوبا ثالثة ..للتغنّي السوداني ..بعد ..جوبا مالك عليا وشلتي عينيا ..وبعد يا مسافر جوبا .. هاهو يضيف ..جوبا ياهو دي ... يا كيكي شكرا ..ويا حبيب كتابك دا محسوب مع اول بشارات السنة الجديدة بعد انتفاضتنا المستمرة منذ منتصف الشهر .. بشري وطن واحد ...و شعب واحد .. ولو كره الظلاميون !