ما هذا الذي يحدث في جامعة الأحفاد ـ البروف قاسم بدري يعتدي على طالبات بالضرب

Quote: التفاصيل منقولة من دون تصرف عن طالبة " (ي جماعه بكره في اعتصام من اكل الجامعه و المويه و اي شي لو اي بت جابت اكل من البيت الموضوع حيأثر ياريت الناس كلها تستجيب في ناس بقدر يشترو لكن ولله في ناس حق المويه م عندهم، انشروا الموضوع لو سمحتوا ) دا المنشور الوحيد اللاقاني حايم و الوحيد الوصل قروب الدفعة . البوست دا طويل و هو بس السيناريو الحصل قدامي يوم الأربعاء و قد ما يعكس ليكم الكتير و قد يعكس، لحد م اكتب البوست البهني اكتر. حوالي الساعة 11 كنت مارة بكافتيريا السنتر على المالية و كان كل شي هادي رجعت بعد زي تلت ساعة على الغابة كنت ماشة الحمامات، لحد كدا ماف و لا اي جوطة و لا صوت لدرجة اني ما لاحظت تجمع اصلا بس دقيقتين في الحمامات اسمع فجاة جوطة طلعت طوالي لقيت البروف بيضرب في بت و هي كانت بتقول ليه انت العلمتنا نتكلم و نطالب بحقوقنا ي بروف فنحن حنتكلم و حنطالب بيها) اهو هنا خلى البت و نادى بعداك ايلاف الكانت اصلا في الغابة و قعد يتكلم معاها. في الفترة دي مريت بواحدة من الاصطاف كان حوليها شوية بنات و بتقول دي تاني مشكلة تحصل في السنة دي و ما ممكن تشهروا بجامعتكم و دي م طريقة مطالبة ،وقفت جمبها و سألتها نطالب بياتو طريقة يا استاذة ،قالت لي تقدمو الشكاوي بواسطة رابطتكم و يناقشوا الحاجة دي في اجتماعاتهم مع رئيس الجامعة و لاب لاب و علوية دي وين ،هي ماسكة الرابطة فتشوها تشوف شغلا ، كلمتها انو رئيسة الرابطة أبرار حاليا و لما المشكلة الفاتت حصلت قالت انو نشاط الرابطة مقيد جدا و م بسمحوا ليهم يتدخلوا في كل المشاكل ،يعني المشكلة م في الرابطة . اما بالنسبة للخطاب حاولت قبل كدا بت تجمع البنات و تكتب خطاب بكل الشكاوي الحاصلة و يقدموهو للآدارة ،شؤون الطالبات استدعوها و بدل م يعاملوها كطالبة اتعاملت كلاجئة و اتهددت. الاستاذة قالت اذا كنتي بتتكلمي عن امج فأمج كذابة و انا كنت قاعدة و الكلام دا م اتقال ليها و البت دي بتاعة امور و ما تصدقوها ، سالتا طييب لنفرض انو الكلام دا م اتقال ليها اصلا استدعوها ليه و ما خلوها تعمل الخطاب ؟ قالت امشي أسألي أمج خليها توريك هي كان نواياها شنو و اساسا استدعوها بسبب نشاطاتا خارج الجامعة هي اجتمعت ببنات الجامعة برا الجامعة في اوزون في خرطوم 2 ." "للحظة طبعا انا اتهجمت و كلمتها انو المنشور بتاع امج لف السوشيال ميديا كلو و كل الطالبات عارفين انو المقصودة المنطقة الاسمها اوزون الفي الجامعة ،و بديهيا هي م ممكن تناشد كل الطالبات لإجتماع بخصوص الجامعة في خرطوم 2 يعني، و أكدت انو هي كان عندها صور لأمج و البنات صحباتا الاجتمعو في اوزون في خرطوم 2 لكن اتمسحت قال ،قلت ليها بالمناسبة انا صحبة أمج و أولى اني اكون عارفة بالكلام دا ، قالت اصلا امج راسا قوي و شايفة انها هي بس الصح و انا بسببا طلعت من القروب بتاع نادي المناظرات ،هسي شوفي إيلاف دي (كمثال للبت الصالحة) لما نزلت بوست و نبهناها بإنو البوست بشوه السمعة و وعيناها بإنو ما صح ياهو هسي مشت لقاسم بدري وورتو مطالب البنات بكل هداوة ،هسي شفتيه ضربا و لا كفتا. نحن زاتنا كانو عايزين يوحدوا لينا الزي و اعترضنا بطريقة لائقة ما همجية زي حقتكم دي ، نحنا مشينا حرقنا الزي قدام مكاتب الادارة و طوالي سمعو مطالبنا و لليوم ما الزمو بت بزي محدد، نحن م دخلنا الجامعة دي عشان يحددو لينا نلبس كيف( يعني للحظة حسيت بمدى تفاهتنا ،شايفة انو قضية بتاعة زي أهم من المشكلة الحالية او تستاهل اكتر و لا شنو و لا كيف؟ وين الخطاب هسي هنا في الموضوع دا ؟) المهم بعديها البروف طلب انو البنات يجتمعو في قاعة عواطف، يلا في بنات دخلو و في بنات رفضو ،جزو منهم قالو خايفين ياخدو بطاقاتنا و يقومو يفصلونا ، مشيت على مديسن اسكوير لقيت عبير و مشينا القاعة،في اللحظة دي كان قاسم لسة بتكلم مع ايلاف و في انتظار البنات و طبعا البوليس برة في البوابات حسب م يقال و البوابة الجنوبية الغربية (بوابة السنتر) بشكل رئيسي حسب م شفت لانها كانا الاقرب للتجمع.." "البروف هدد بواحدة من 3 حاجات اما اقفل الجامعة اسبوعين تلاتة عادي و اي واحدة تجيني بولي امرها بشكل فردي و نشوف الموضوع دا ، اما ابدا افصلكم و انا اصلا م غالبني ارفدكم ، اما حافتح البوابات و ادخل البوليس و عارفنو بضرب من طرف ،الواقفة من الواقفة حيضربوكم و دا كلو ما في صالحكم و حتضرروا منو فإنتو براكم شوفو صالحكم وين،و قال انو لما جا الجامعة كان صغير زينا و كان عمره 25 و انو هسي عمرو في السبعينات..(ما عارفة الكلام دا علاقتو شنو بس بتسائل هل كان بيضرب الطالبات مما هو استلم ادارة الجامعة دي و هو صغير و يكاد يكون في عمرهم؟ الحاجات دي من زمان ماشة كدا يا ترى؟)" بعداك قال انو الاجهزة الامنية اتصلو بالجامعة و بلغوه انو في شغب زي دا حيحصل في الجامعة ، و بقى يقول انو دي شغلة الاحزاب السياسية و انكم جيتو هنا عشان تقرو و اهلكم محملينكم مسؤولية فإنتو ركزو في مسؤوليتكم و الجيتو عشانو و كونو واعيات عشان الاحزاب المعارضة م تستغلكم ط و مفروض م تنجرو ورا الحاجات دي لأنو انا اذا نفذت واحدة من التلات حاجات القلتها قبيل انتو الوحيدين الحتتضرروا و قال ركزو على الحاجات البتخصكم و هسي الغلاء دا م بيخصكم، واحدة قالت ليهو الاكل دا نحن البناكلو و نحن البنشتريه بقروشنا كيفن م يخصنا؟ واحدة قالت ليه الاكل اساسا زادو سعر من فترة قريبة ي بروف و هسي تاني بعد الغلاء زادوهو و بصورة مبالغة ، واحدة قالت الجودة بتاعة الاكل م كويسة حتى انو لما سأل كيف م كويسة ردو عليه كذا بت بالمشاكل الفي الأكل ، بعداك قال انو هو ما فهم الموضوع الا لما سأل الطالبة زميلتنا ( اللي هي ايلاف) و انكم معترضين على اكل السنتر ، و انو الادارة زاتا عندها شكوى على ناس السنتر و من مصلحة ناس السنتر انهم يحسنو الاكل و كدا ،و قال انو معتز هو المسؤول و بلغوه بشكواكم و ما تعرف ...الخ . بعداك الناس وجهت شكاويها لمعتز و الكلام دا كلو داخل القاعة بس سمعنا البنات البرا القاعة بهتفو "لا لا للغلاء" ففي بنات في القاعة اتخوفو و قالو امكن العسكر دخل جوا عشان كدا طلعنا كلنا برة القاعة. لما طلعنا برة يقال انو البروف جاتو بت هو كان ضربا و كانت بتبكي و بتقول ليه انت ضربتني بدون ذنب و انو البروف اعتذر ليها ، بعدو جات نفس الاستاذة وقفت جمبي انا و كان معاي 2 من صحباتي عبير و أخرى و سألتني البروف قال شنو جوا، قلت ليها هدد بكدا و كدا اذا الجوطة استمرت و قبل اتم كلامي طوالي قامت قالت لي انتي عارفة انو اصلا الجامعة هي الغلطانة العلمتكم تقيفوا ضد العنف و تقيفوا عشان حقكم عشان هسي تجوا تقيفوا ضدها عبير قالت ليها الجامعة ما علمتنا نقيف و نطالب بحقوقنا عشان نسكت لما هي تغلط ، (اتجنن فقير الحلة دقيناهو بي نفس السياط) قالت ليها الاستاذة قاسم دا هلك عشانكم و لولاهو ما كنتو اصلا و مفروض تكونو مبسوطين في الجامعة دي لأنها بتراعيكم اكتر من اي جامعة تانية ..الخ و الماعاجبو يخلي الجامعة دي طوالي و يمشي اي جامعة تانية يتظاهر و البوليس يضربوه و ما تعرف و الديمقراطية دي ما تتوهموا بيها لأنها ماف اصلا (طيب مدام ماف فخلي الناس تحتج بالطريقة الشايفنها متناسبة مع الوضع اللاديمقراطي دا) ،عبير قالت ما بنخليها،لكن حقوقنا بنعافر عشانا، و بالنسبة للمظاهرة البتقوليها فالوصلنا انو في مقاطعة للسنتر و اعتصام عن اكل السنتر و اساسا نحن كنا في امان الله لحد م سمعنا جوطة فجأة و جينا شفنا البروف بيضرب في البنات . الاستاذة بكل الاستفزاز الفي الدنيا قالت لينا ضربا كيف يعني كتلا؟؟! قلنا ليها الا يكتلا يعني عشان تقتنعي انو دا كان ضرب؟ فبررت بإنو هي قصدها الضرب دا كان كيف يعني لدرجة ممكن البت تتأذى منو،؟؟و انو نحن كلنا اتضربنا اصلا و دا ابونا و لاب لاب .. هنا عبير وقفتا و قالت ليها معليش ي استاذة اذا انتي اتضربتي و راضية نحن ما راضيين و البروف ما ابوي هو مدير الجامعة. و طبعا الهتاف كان وقف اصلا، سمعنا من هنا و هناك انو البروف قال للبنات البهتفن انو العايز يقاطع السنتر يقاطع و بس وقفوا تشتروا اكل من السنتر و خلاص . لسة م اتحركنا من مكانا و من كترة الناس و الجوطة انا اصلا م شفت غير فجأة البنات جاريين و البروف ماشي عليهم و فجأة واحدة وقعت اتعترت ، فلما وصلا قعد يشلت فيها بصورة فظيعة و كانو بتفشى فيها ،انا بقيت مخلوعة اصلا و ما فاهمة دا شنو البحصل دا.البنات وراهو بدو يهتفو لا للعنف ، لمدة بسيطة و هدو ،التفتنا انا و عبير نشوف رد فعل الاستاذة، لقيناها دموعا عشرة عشرة و قلنا خلاص معناه براها عرفت، لكن بقت ماشة على البروف و بتقول ليه اهدى ي بروف و بتقول للبنات كرهتونا و امشو من هنا و بتصرخ و تنهر و ..الخ، بعداك م كنت مركزة منو الجمبي بس فجأة أسمع راجل من وسط الجموع و في الحتة الواقف فيها البروغ بيقول هو بيضربكم عشان يحميكم يا بت ،هو بضربكم عشان مصلحتكم و جاني صوت عبير من نفس الفجة و هي بتقول ليه ي استاذ يحمينا من شنو؟ قال ليها من ضرب العسكر البرة دا ، قالت ليهو يعني يحمينا من ضرب بضرب ؟ اما هو يضربنا او العسكر يعني ؟ الراجل قال دا عشان مصلحتك و هو خايف عليك و لاب لاب هنا البروف اتدخل و قال خلوها و ساقا من يدا قال ليها بوديك للعسكر البرة ، قالت ليه ارح و انا بقيت ماشة عليها و قبل م اصل ضربا كف طوالي و حال بيني و بينا البنات ،لما حاولت تحرر يدها منو و بتقول ليهو م تضربني و م عندك حق تضربني مسك يدها التانية برضو و بقت هي بتحاول تحرر ايديها منو و هو ماسكا بقوة و هي بتقاوم هنا اتدخلنا و جرينا عبير لدرجة وقعت في الواطة و في بنات اتعترن بيها زاتو و جزو من الاصطاف و منهم الاستاذة دي زاتا كانو ماسكين البروف بهدو فيه و كانت الاستاذة دي بتشاكل في عبير و بتنهر زحي منو يا بت ...الخ بكل الوعيد الفي عينيها و في حين انو هو اللي كان ماسك ايديها ، بعدنا شوية و بعداك فضيناها سيرة و اصلا البنات اتجهو ناحية الشرق و البروف زاتو اختفى من نظري و مشيت محاضرتي. خلصت محاضرتي و طلعت لقيت سيرة عبير على كل لسان و انها اتعاركت مع البروف و شاكلتو و في البقول ضربتو ، في ناس قالو ضربت البروف كف و الدنيا قايمة قاعدة بعبير ،من حرس لإصطاف لطالبات. ............ مبدئيا دا العارفاه الحصل قدامي و شفتو يوم الأربعاء و لسسة القرف .

Quote: دي طريقتي والبحصل يحصل

Quote: الأحفاد قائمة على الطريقة السودانية، وهي عبارة عن طريقة، مثلما في التقاليد السودانية "شيخ الطريقة والقبيلة"، ولتضمن استمرار المكون يجب أن تعمل بطريقة الشياخة، وهي تكليف رباني مثل ما قال الإمام المهدي في ثورته، ونحن قائمون فيها لأنها تكليف رباني.