ما هذا الذي يحدث في جامعة الأحفاد ـ البروف قاسم بدري يعتدي على طالبات بالضرب

Quote: احتمال ردة الفعل خوفا علي الطالبات

Quote: سمعت من احدي الطالبات انو الامن كان في الجامعه .لخمد المظاهرات المنطلقه من حوش الجامعه . احتمال ردة الفعل خوفا علي الطالبات

Quote: لهذا اقول انها كبوة جواد فابحثوا له عن عذر والله اعلم

Quote: السيد الصادق المهدي في اعتقادي ملزم بإصدار تصريح صحفي

Quote: مادفاعا عن مدير جامعة ولا مبرر لموقف ....دفاعا عن انسان ماشفنا منه إلا الخير ومابنسمح لغلطة لحظة تهدم تاريخ سنين ..... غايتو الليلة فيديو بروفسور قاسم دة بكون وصلني 300 مرة اظنه ....وللمرة ال400 بقول نحن اسرة ابونا البروف ولو ويدقنا ويكسر رقبتنا دة شان داخلي لاسرة وبيتعالج داخلي والبنت الحق في اتخاذ اي اجراء تراه مناسب ...ومافي زول يناقش بنات الاحفاد في حقوق المراة لان دة ملعبهم والضرب مرفوض جملة وتفصيلا ومهما كانت الاسباب بلا شك .....لكن نحن بنتحمل غضب الحليم حتى لو مد يده بتكون من وراها حاجة كبيرة ....اكبر بكتير من الموقف ونحن عارفين ابونا وتاج راسنا......الفيديو دة نزل في مجموعة خاص خاصة بالطالبات وتسرب......انا غايتو لغاية ما اتخرجت بكون اخدت لي 100 شلوت على الماشي ونفعني ماضراني احمد الله شوية اكون بروفسور مامتا ولا اتعوقت ....مرة جبت C في مادته ضربني شلوت احرجني شديد لكن لما شلت سلمى وشيماء عبدالله ريحني نفسيا لاننا عديناها ونسة ونحن بنذاكر سوا شكيت لبابا ربنا يرحمه اتصل به قال له صحيح ضربتها شلوت قدام زميلاتها قال ايوة يامولانا ولما مااتصلحت تاني تتشلت ولا على كيفها.....الوالد ربنا يرحمه قال له تتشلت ليه كسر راسها !!!!!!.... ونوف جلال ديك بتكون فقدت السمع من قرصة ادانها Nouf Hussien ....ممكن تضرب طفلك ويضحك ليك عارف بدك الان ماقاصدة اذية وممكن تنظر له مجرد نظرة ويبكي ويخاف......يد بروف قاسم ابدا مااتمدت باهانة لمراة وحتى ولو اعتقد اخف كتير من اهانة العسكر (مع رفضي التام للموقف الحاصل) اعيد تاني : ماله مايدقنا عاااااااادي ابونا ......راضين كان بشلتنا وبنمشي نعتذر له في المكتب ونستناه لمممممممممااااا​ا يقول لينا صافية لبن كان ماقالها مابنمشي من جمبه لانه ماكان في يوم مؤذي ولو بلغ الاذى ماكان الاحفاد مستمرة كجامعة خاصة طول هذه السنوات ولا كانت في بنت بتدرس مقررات في الجندر وحقوق المراة بالذات سكتت لكن (حسن النوايا يسبق الافعال) لذلك نحبه ........ممكن يقول لواحدة تعالي يابت هنا ماتجي يرميها بطبشيرة .بتحصل كتير اسالوا البنات لما ماكانوا بزعلو؟؟؟.............قاسم بدري (( اب )) واعتقد ان تصرفه ده بدافه يحمي بناتهم من قبل حلف للعساكر البيعتب خطوة جوة الجامعة مايلوم إلا نفسه ...الجامعة بيتي وديل بناتي والليقرب من يتحمل النتيجة .......دة قاسم بدري الانتو مابتعرفوه........قاسم بدري يدقنا ويكسر رقبتنا ماتدخلوا بيناتنا....نحن اسرة مع بعضينا والبنات ديل ذاتهم هس بكونوا بيتبكوا له اسفين اسفين وبيعسكروا له في حوش الجامعة والنادي لما يرضى ويعاتبهم .......دي رابطة انسانية ما بيحسها إلا العاشها........الناس المستغرببن ومستنكرين مدة يده يتذكروا انه نفس الراجل البيخصص منح دراسية كامل مع مصروف شهري للطالبات من الولايات الاقل نموا ..... يضربهم قاسم بدري افضل مما يضربوهم العساكر ويهينوهم في الاقسام وبيوت الاشباح.... الان انا استاذة جامعية وبلاقيني دكتور قاسم في مؤتمرات ومناسبات وبيسلم علي وبقول للناس دي بنتي .......... عارفين قاسم بدري دة قمة استياءه من موظفة في الجامعة تصرفه معاها شنو؟ عارفين عتابه شنو بيقول ليك يابنت انتي مطرطشة ؟؟؟؟؟ يابت فتحي عينك وخلي الطرطشة !! اعيد تالت : مابنخجل من تصرفه في لحظة غضب نحن بناته بنحبه وبتحمل غضبه ولا بنكبر عليه في يوم ان شاءالله يشيل لنا العصايا لكن نحن عارفين هو من .....ومتاكدين انه ماانفجر ومد يده من هين .......... الراجل البيدفع مايعادل 40 مليون تكاليف عملية جراحية لطالبة حصل لها حادث حركة .....وبيسافر يحضر زواج طالبة يتيمة علشان يرفع راسها قدام اهلها ....الراجل البتسمي عليه الطالبات اولادهم دة مامدير جامعة ........دة انسان بنحبه وبحبنا وبتحمل ظروفنا وظروف اهلنا وبينور طريقنا بنصايحه عمره ماخزلنا ...دوما يقيف جمبنا ويمد يده لنا الدقت البنت دي في الخير والشر نحن مجبورين نحترمه ونحبه ونسمع كلامه ........والبنت المطرطشة دي زول يلمني فيها بس قايلة روحها اول ولا اخر واحدة تتدقا ...............تشوف عينكم حيستغل الموقف اعلاميا لكن البنات هم الحيدافعو عن ابوهم ((نحن كدة)) ماتستنوا المحسن يخطأ وتلوموه وتسيبوا الظالم يطغى وتكرموه ..........خليكم من ب. قاسم بدري شوفوا الوطن كله تصرف بروفقاسم بدري مقدور عليه وبيتعالج وسط الاسرة (الاحفادية) ........ ومسامحك ياحبيبي مهما قسيت علي ♡ انصر اخاك ظالما او مظلوما ....مظلوما انصره ...ظالما رده عن ظلمه ..........وشكرا على كل مداخلاتكم وتعليقاتكم سلبا او ايجابا ....تحياتي

Quote: فهل يقبل آل بدري أن تصفع بناتهم بأي مبرر؟

Quote: قاسم بدري..لا يستقيم الظل و العود أعوج..! طالعتني مواقع التواصل الاجتماعي هذا الصباح بفيديوهات قبيحة جدا لعميد جامعة الأحفاد للبنات وهو يعتدي على طالبة بالضرب..ورحت أقرأ في عجالة شيء عن الخبر..من قائل بأنها فيديوهات قديمة يعيد إنتاجها توزيعها الامن لشغل الناس و نحو ذلك...ومن قائل انها طريقة الرجل في تربية بناته الاحفاديات اللواتي سبق وبذل لهن الكثير من الرعاية..فهي يد الاب المربي..ومن قائل أن جاءكم فاسق بنبأ.. بالنسبة لي هذا يوم حزين جدا بشكل شخصي ..فقد ابتلينا فيمن نحب..و قد نكبت الأحفاد قبل اي شخص آخر في تاريخها المشرف نكبة كبيرة لا يخفف منها الا ان يعفى الرجل من منصبه و تعتذر الجامعة للشعب السوداني عن سكوتها على هكذا ممارسات..فكون الفيديو قديم فهذا ادهى و أمر..!.. و للذين يقولون انها يد المربي..نقول هل هذا هو الوعي النسوي الذي تطمح الأحفاد لرفعنا لمستواه.. ان تعلم بناتنا قبول الأعتداء بدعاوى الحب و الابوة؟..فلنغلق مراكز تأهيل النساء ضحايا العنف لان المعتدي زوج محب او أب محب..هذا و الله هو اخبث من الجهل ..هو تنكر الأبوية في مسوح الطيبة و القداسة...الذي يحب لا يؤذي ..و الذي يربي..يداري ويصبر..واول ما نعلمه لأطفالنا ان أجسادهم ملكهم وليست مشاعا لأحد ابا كان او معلما.. ان ما قام به قاسم بدري هو سلوك فردي لا يطعن في مؤسسة ضخمة كالاحفاد ولا في صفاء توجهها..تاريخها ونضالها.. لكن استمرار قاسم بدري على قيادتها هو من سيطعن في الأحفاد اكثر من اي شيء.. الذين ينتظرون مؤتمرا توضيحيا اقول لهم لقد رأينا بأعيننا ما يكفي وليس هنالك عذر او مبرر لهذا السلوك..الا اذا كان مؤتمر يعتذر للشعب السوداني و يصحح..و في حال سكوت الأحفاد عن هذا كما فعلت ان صحت مقولة ان الفيديو قديم ..فعلى المنظمات النسوية اليوم ان توضح لنا ان كان التزامها بقضايا النساء حقيقي ام هو مجرد شعارات جوفاء..لا نعرف الحق بالرجال انما نعرف الحق بالحق فنعرف اهله .. انما اقعد هذا البلد الشللية و المحاباة..و اليوم الأحفاد في مواجهة حادة مع مبادئها و ما تدعو إليه...و نرجو أن يعينها الله على هذه المحنة الصعبة أفرادا و مؤسسات..