|
Re: اختصاص وكلاء النيابة..فى السودان.. (Re: محمد عوض احمد)
|
نقلا عن الراكوبة..بعض من حديث وينى عمر مع الاستاذ عبدالوهاب همت..
Quote: في يوم الاحد الموافق العاشر من ديسمبر2017 وفي حوالي الساعىة الرابعة والنصف وبعد طلوعي من الشغل كنت واقفة وزميلي ننتظر المواصلات في الخرطوم 3، أثناء ذلك جاءت عربة كرولا يضاء مارة فينا ورجعت تاني السائق لابس( فُل سوت) وقاعد جنبه زول لابس نظامي فتح الشباك واتكلم معاي بشمل عدائي جداً وقال لي اللابساهو دا شنو وهل هو لبس مناسب وانو دا زي خادش للحياء، وانا طوالي سألته انت منو ومنو البديك الحق تقيف في الشارع وتتكلم معاي بالطريقة دي؟ وبدأ صوته يعلو وقال لي اتكلمي معاي زي الناس وأنا وكيل نيابة وقلت ليه ما بعرف وكيل نيابة بقيف يكورك في الناس في نص الشارع ودي حاجة ما مقبولة بالنسبة لي، واحتدينا لحوالي عشرة دقائق وقال لي كيف تتكلمي معاي بالطريقة دي ولازم نوديك القسم وانا قلت ليهو ما بركب في عربية ما بعرفها وما في حاجة اسمها وكيل نيابة يطلب مني أركب معاه دي عربية مدنية وكيف أعرف أنك وكيل نيابة؟ وأصر بشكل عنيف وهددني إذا ما ركبت معاه حيجيبوا عربية البوليس وحيرفعوني فيها ويفتح فيني بلاغ إعتراض موظف وعدم تنفيذ اوامره،واصبحت المسألة واضحة بالنسبة لي أنه دي قضية نظام عام وإرتداء زي فاضح وكدة ومعاي زميلي وفي العربية مشينا على القسم الأوسط وكنا بنتناقش في الموضوع دا وقلت ليه أنا غير مؤمنة بحاجة اسمها النظام العام وما من حق اي زول يتدخل في خياراتي والزول دا ما عندو سلطة علي وهو كان بقول لي دي الشريعة الإسلامية دي مسئوليتي وربنا بسألني واول ما دخلني القسم أخد مني تلفوني وبدأ يفتش فيه عن الصور والفيديوهات وكده وأنا نبهته لأكثر من مرة أنو البعمل فيهوو دا ما قانوني وانا ما متهمة وما في حتى بلاغ ضدي فبدأ يقول لي دي معروضات وقلت ليه ومعروضات بتاعت شنو ومافي تهمة ضدي حتى الآن وين المشكلة وانت ما فتحت بلاغ حيازة مواد أو أجهزة الكترونية مافي سبب بخليك تفتش تلفوني ورفض يديني التلفون عشان أتصل بمحامي وحينها كان لي أكثر من ساعة في القسم وما عارفة الحيحصل شنو ونبهته لأكثر من مرة لكنه رفض يتكلم معاي وقلت ليهو لو ما عايز تتكلم معاي خليني أتصل بمحامي عشان اتكلم معاه فقال لي ما بنتفاهم مع زول فقلت ليهو دا قانون ولا حاجة تانية. بعد أكثر من ساعة جاتني عربية النظام العام وحضروا زملائي ومعاهم محامي وبقوا واقفين منتظرين قدام القسم وبعد داك ركبوني بوكس النظام العام وطلبوا مني أجلس في الأرضية فقلت ليهو عندي مشكلة في ضهري ما بقدر أقعد في الارضية وطلبت أقعد في اطار البوكس واحد من زملائي قال ليهم قعدوها قدام أو خلوها تقعد في الاطار عشان مشكلة ضهرها وزميلي اسمه منتصر إبراهيم. وفجأة بدأ الضابط يتكلم مع منتصر بطريقة عدائية ويكورك وضرب منتصر في كتفه ولزاه لوراء ،والضابط صوته يرتفع ومنتصر بحاول يهدئ فيهو وفي اللحظة ديك جاءوا أربعة من العساكر واحاطوا بمنتصر ودخلوه القسم وأنا ركبوني العربية وأخدوني لقسم النظام العام وزملائي قعدوا مع منتصر. لما وصلت لقسم النظام العام قعدت اكتر من ساعة لأنه ما كان في بلاغ مفتوح ضدي وما كان عندهم شاكي (تخيل) !!!!!!!!!!!.وفي الاخير جابوا شاكي الغريبة أنه كان قاعد جوة القسم وما شاف أي شئ حتى تلك اللحظة، وهو قدم شكواه ضدي بإرتداء الزي الفاضح المادة 152 من القانون الجنائي وبعد داك طوالي دخلوني الحراسة الاستاذ حاتم الياس المحامي حضروبدأ في إجراءات الضمان وحصلت جرجرة والموضوع أخد أكثر من خمسة ساعات ونصف وأنا قاعدة في الحراسة في قسم الديم |
| |
|
|
|
|
|
|
Re: اختصاص وكلاء النيابة..فى السودان.. (Re: محمد عوض احمد)
|
الأخ محمد عوض شكرا لفتحك هذا البوست..
في الحقيقة لي عدة سنوات عايز أسأل عن وظيفة وكيل النيابة شنو؟ و ذلك لما لاحظته و قت وكلاء النيابة و مما قرأت عنه في الأخبار من تصرفات كلاء النيابة المشابه تماما بل و الذي يفوق صلف و تجبّر و تجبّر معظم منسوبي الشرطة. فبدلا من أن يكون وكلاء النيابة هم السند و الملجأ القانوني فقد جاوء هم إضافة جديدة ( و قانونية كمان) لموجات الطغيان و الصلف و التكبر الذي يعاني منه المواطنون.. فحسب فهمي أن وكيل النيابة هو ن ينوب عن الشرطي في التحقيق و ذلك فصلا للتحقيق و الجزء القضائي عن التنفيذي..و و لكن اتضح من خلال الممارسة أن هناك خلط ..و هو يفيد كلا الطرفين.أقصد يفيد الشرطة و يفيد وكيل النيابة لفرض سلطتهما على المواطن العاري من السند المواطن المكشوف الظهر.. في الحقيقة كنت أود أن اعرف رأي الإخوة المحامين في هذا الموضوع. لأنه لم يجد حظه من الشرح و الإضاءة. و أذكر هنا ما حدث من تنازع السلطات و الصراع بين الأفيال حين اعتدى أحد الضباط على وكيل نيابة و قام بسجنه واعتقاله.
| |
|
|
|
|
|
|
|