|
|
|
 Re: مطاعم الخرطوم (Re: Mohammed Alhasan Mohammed)
|
تحياتى يا محمد الحسن
الفول فى الدكاكين وخاصة فى الاحياء شى قديم جدا طبعا
ومن ايام كناتين اخوانا اليمنيين زمان
الشى الغالب كان الناس بشيلو الفول للبيت، لكن حاليا وزى ما انت قلت
الدكان بقى مطعم والاكل فى الشارع وده السائد ومنتشر
يعنى الناس بتخت الصحن فى الارض وياكلو
مشهد ومنظر عادى و مالوف بقى
وملاحظتك المهمة يا محمد هى انه الناس فعلا ممكن تاكل تلاتة وجبات فول فى اليوم
فى الدكان
| |
  
|
|
|
|
|
|
|
|
Re: مطاعم الخرطوم (Re: محمد عبد الله الحسين)
|
تحياتى اخونا محمد عبد الله الحسن
للاسف كل الاماكن العتيقه السمحة القلناها دى كانت زمان وانتهت
وين الإخلاص و وين اتينيه و وين زمزم ؟
يعنى محل زى جروبى فى القاهرة او قهوة ريش تلقى عمره اكتر من قرن ولسه شغال ومواصل
بالمناسبة كان فى فرع ل جروبى فى الخرطوم لغاية السبعينات وفجاة اختفى
كان فى الناحية الشمالية لميدان الامم المتحدة شرق زنك اللحم
وكان عنده فرع كمان فى مدينة الأبيض
| |
|
|
|
|
|
|
|
|
|
Re: مطاعم الخرطوم (Re: سيف اليزل الماحي)
|
ايسكريم وعصير بيمبو يا سيف كان نقله نوعيه حداثيه فى الخرطوم
ومحلات على السيد من اعرق المحلات فى الخرطوم
ربما تكون من الاربعينات تقريبا
وكانت مطعم و قهوة وحلوانى
السكرية ظهرت فى السبعينات طبعا فى تقاطع شارع القصر وانت داخل على كميونى
والقاسم المشترك هو جودة الاكل والشراب ونظافة المكان و احترام العملاء
| |
|
|
|
|
|
|
|
|
|
Re: مطاعم الخرطوم (Re: أبوذر بابكر)
|
نسيت واحد من اجمل معالم وايقونات محلات الخرطوم
حلوانى حمدتو
مرتع الطفولة والصبا
حلوانى حمدتو مقابل وجنوب الجامع الكبير مباشرة
فى نفس صف المحلات شرق مكتبة النهضة السودانية لصاحبها محمد عباس ابو الريش
وغرب قهوة الزيبق الشهيرة
اكتر شى مميز فى حلوانى حمدتو كان الايسكريم
ايسكريم ابيض اللون يسر الناظرين والاكلين
فى كور، جمع كوره، صغيرة من الالمونيوم
والسعر قرشين، اى والله قرشين بس
عم سعيد بشلوخه الدنقلاويه و وجهه المتجهم الصارم كان جزء من المشهد الشهى وهو واقف وبجهز فى الايسكريم
ايسكريم حمدتو و ليمون الواثق كانو من عجائب الخرطوم
وعلى اليمين وانت داخل المحل بتلقى فترينات الحلويات، باسطة و كنافة وبسبوسه
عمنا عبد الرحيم محجوب هو معلم وصانع الباسطة وهو البديك ويناولك الطلبات
ليه حاجاتنا السمحة ما بتستمر ؟
وليه كل شى ملدوغ بعقرب النهاية زى ما قال ادونيس
ليه محل عتيق و عريق زى حلوانى حمدتو ما بستمر ويتواصل حضوره ويبقى معلم فى العاصمة ؟
فى كل عواصم و مدن العالم بتلقى معالم ليها مئات السنين والناس محافظين عليها بكل حب و حرص
الا نحن
الا نحن بس
يا للاسى
| |
|
|
|
|
|
|
| |
أبوذر بابكر
فيس بوك
تويتر
انستقرام
يوتيوب
بنتيريست