ول ابا سيف..حبابك يا صديقي العنوان مضلل..غايتو من امبارح اعاين ليهو وازوغ: لأنو مفردة كاونتر بتجيب الكاروشة..خصوصا في ايام المنبر اليومين ديل..!!! كتر خيرك على هذه السياحة اللطيفة ، والتحية لصديقنا الغائب عضو المنبر السناتور وليد المبارك..وقد كتب من قبل عن هذه الحاجات وشاركنا في احد خيوطنا ومنو عرفنا بعض المفردات خصوصا الزنق..! الفنانة ذكريات ، اول مرة اقتينت ليها البوم (كاسيت) في سنة 2001 ولازال معاي..وكت داك كانت في المين استريم كلشر..لكن شايفها الآن مع الراستات..يعني اتمردت على المين استريم كلشر..! ايمن الربع..بتذكر ظهر في مسلسل (وتر حساس) في دور قصير مثلما كان ظهور الفنان كمال ترباس.. نرجع لعضم الموضوع.. من زمان وجهة نظري ان الإيقاع القاعد يشتغل عليهو ايمن الربع ، هو ليس بايقاع عدني او خليجي كما يتبادر للناس من اول وهلة ، وانما هو ايقاع سوداني ومن صميم الثقافات السودانية الأصيلة..وهو ايقاع نقارة دينكا بور(اساس ريتم المارش السوداني)..والرقصة التي يرقصها الشباب هي نفسها رقصة اهلنا الدينكا..وبالتحديد دينكا بور..!
وبالطبع اذاعة هنا امدرمان زمان لم تفتح المجال لإيقاعات غير التم تم..اما ناس الدليب والمردوم والكرنق وايقاعات دارفور دي فرضت روحها بالإنتشار ثم بعد داك القنوات الرسمية بقت تنتبه ليها..اما نقارة الدينكا فلقد نجح ايمن الربع ان يجعلها ثقافة تمشي بين الناس..وهذا انجاز كبير..! جبت نماذج من قبل للشباب ديل..ولو الظروف سمحت نجيب ليك هادية بت عمك ..واماني..وبسطاوي.. وبــُنه ونيجري..ودل شباب بعد ايمن الربع..وما اكثر الناس الجات بعد الربع وشغال بنفس الإستايل بتاع الربع..! اما الحكاوي فدي خليها في سرك.. هي ثقافة فرضت روحها وليها جمهورها..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست