|
نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 Re: ياالله!!! موقف انسانى نبيل .. (Re: عبد المنعم سيد احمد)
|
شعر بمعاناة تلاميذ المدرسة التى تجاوره
فقام ببيع عربته لصيانة المدرسة ..
===============
حبيبنا علاء .. مودتي ..
تصرف لم يسبقه عليه أحد على الإطلاق ..
الرئيس في منتجع .. والامطار تهدم المدارس .. وهذا الانسان يتبرع بما يملك ..
وطن عجيب الرجل يستحق التكريم من الشعب ..
تعجز الحروف عن التعبير ..
إنسان رسالي ..
شكرا علاء على هذا الخبر ..
| |
 
|
|
|
|
|
|
|
|
Re: ياالله!!! موقف انسانى نبيل .. (Re: علاء سيداحمد)
|
اجمل ما في حديثه الفخر و الثقة بالله وانه ما عايز حاجة من بشر عايز الأجر من الله
كذلك وهو يحسب المواد و يتحدث عن تقدم العمل في البناء تحس بيه فخور جدا بالإنجاز
يقيني لو الليلة واحد ممن يصرفون المليارات في الكورة لو جاب ليه عربية كروزر موديل السنة ح يرفضها فقد قالها راجي الأجر من الله ما من زول
يا سلام ربنا يخلف عليه بالأجر و الحسنات من فضله وكرمه, رجل مدرسة والله
شكرا علاء على الفيديو
| |
|
|
|
|
|
|
|
|
Re: ياالله!!! موقف انسانى نبيل .. (Re: محمد البشرى الخضر)
|
Quote: اجمل ما في حديثه الفخر و الثقة بالله وانه ما عايز حاجة من بشر عايز الأجر من الله
كذلك وهو يحسب المواد و يتحدث عن تقدم العمل في البناء تحس بيه فخور جدا بالإنجاز
يقيني لو الليلة واحد ممن يصرفون المليارات في الكورة لو جاب ليه عربية كروزر موديل السنة ح يرفضها فقد قالها راجي الأجر من الله ما من زول
يا سلام ربنا يخلف عليه بالأجر و الحسنات من فضله وكرمه, رجل مدرسة والله |
تحياتى وشكرا ليك على المشاركة الشحمانة يا ود البشرى
| Quote: يا سلام ربنا يخلف عليه بالأجر و الحسنات من فضله وكرمه |
اللهم آمين ..
| |
|
|
|
|
|
|
|
|
|
Re: ياالله!!! موقف انسانى نبيل .. (Re: علاء سيداحمد)
|
الاخ علاء من هولندا والامارات تواصل معى الاخ عادل خوجلى قرأ البوست وابدى استعدادا للمشاركة فى دعم شيخنا ود قنجارى بانى المدرسة
علية لا تدع الفرصه تفوتك فى تبنى عمل قد يكون الاول فى سودانيز اون لاين وكل الاسافير
ارفع البوست وتابع التعليقات
| |
|
|
|
|
|
|
|
|
|
Re: ياالله!!! موقف انسانى نبيل .. (Re: علاء سيداحمد)
|
السودانية انتشر خبر على ود قنجاري الذي باع سيارته لبناء مدرسة اساس بقريته انتشار النار في الهشيم واصبح الحدث حديث الوسائط الالكترونية ، وذلك لان ود قنجاري الذي يسكن احدى قرى المناقل بولاية الجزيرة يعيش على مايتيه من السيارة ولان مانجح فيه فشلت فيه لجنة القرية ومن بعدها محلية المناقل التي يتبعون لها وولاية الجزيرة
اخرلحظة اهتمت بالموضوع وتوصلت الي هاتف بن اخيه الذي اوصلها به فكان حديثه يكسوه الرضا وينساب مصحوبا ببساطة من نسميهم ” اهل الله ” اما العبارات فلا معنى لها غير القناعة والثقة في الخالق جلا وعلا
اجراه عبر الهاتف : لؤي عبدالرحمن
السلام عليكم ؟
حبابك
انشا الله طيب ؟
الحمد لله والشكر لله
عظم الله اجرك وربنا يكرمك في الدارين ؟
بارك الله فيك ودي حكمة من الله
دايرين نعرف قصة المدرسة ؟
المدرسة جواري وليها سنتين صقيعة ،والاولاد والمدرسات في الحر من مكان لمكان ، فقلت ياجماعة طالما العربية قاعدة والبنوت في الصقيعة امكن العربية تنقلب وتتكسر وانا مؤجرها باربعة مليون لجماعة مرة يدوني مليونين ومرات مليون في الشهر قلت اخير اسويها في المدرسة دي بعتها لوجه الله تعالى
المدرسة ليها كم سنة جنبك ؟
المدرسة تمت لغاية تامنة وانهارت بسبب المطر من 2015م
انت الحفزك والخلاك تبيع العربية شنو ؟
والله حكمة لقيتهم بعرشوا في مكتب ناس اللجنة قلت ليهم عندكم كم قالوا ماعندنا اي حاجة ، عندنا جماعة اتنين سبابة قلت ليهم بتاخدو العربية قالو لي بناخدها بي كم قالو بمية وتسعين قلت ليهم مبروكة سلموني المية مسيت جبت بيها المواد الاسمنت والكمر واي حاجة ، وكان ماتم العرش بالقروش الفضلت بتمه
فضل ليك شنو انت كان دفعتها كلها ؟
الله موجود
ونعم بالله ..ناس الحلة رايهم شنو ؟
والله ماعندهم حاجة ناس الحلة ولازول منهم قعد معاي وانا قررت براي واولادي قلت ليهم العربية دي داير اسويها في الله
اسرتك قدر شنو وفيها كم ولد ؟
ولابنعدوا
هنا تدخل بن اخيه في الهاتف وقال لي الزول ده عنده زوجتين الاولى الكبيرة عنده منها 7 اولاد و5 بنات ،وهم والدين وهي عمتنا العازة ، ومتزوج مرة تانية صغيرة ، والله حتى بيت عمتنا ده واقع بالمناسبة ، الجماعة قالو ليه ابني بيت العازة ده وامشي المدرسة قال لهم مابتراجع ، وتدخلوا ناس عشان يتراجع عن قراره ومايبيع العربية رفض
بعد عملت الكلام ده في ناس مسؤؤولين جوك ؟
جاني معتمد المناقل
وعرفوك كيف ؟
والله مابعرف لكن بالتلفونات وعمك علي تلفون ماعنده والبتكلم معاك ده ولدي ود اخوي
معتمد المناقل قال ليك شنو ؟
قلت له العرش ده مابديك ليه وبقوم بيه مرة واحدة لكن لو دايرين تسووا حاجة براكم معليش ، قال لي العرش ده حقك ونحن بنسوي مدرسة تانية
مرة اخرى استلم الهاتف بن اخيه وقال لي المدرسة مختلطة ولما جاء المعتمد قال له عم علي انا تكفلت بالعقد كامل وانت اعمل مدرستك فقال معتمد المناقل انه حيعمل مدرسة جنبها وتبرع له ب 10 ملايين
هسع كلامك السويته ده مبسوط منه ومرتاح ؟
جدا والله وكان ماجابو لي ولاقرش انا مبسوط، مبسوط كان مالقيت اي حاجة انا مبسوط الله بكافيني واتمها بضحكة “احسست منها البساطة والطيبة ”
ناس المدرسة شعورهم شنو لما عرفوا ؟
ناس المدرسة “كوركوا ” فرحانين فرحة جد .. وزاد ضحكة تحس انها قادمة من الاعماق وتشعر فيها بالرضى .. وتابع والله الحمد لله فرحانين شديد والله
انت خبرك وصل السودان كله بتقول للناس شنو ؟
رسالتي ليهم بقول ليهم لي الله ..كله شغل في الله
للمرة الثالثة اخد بن اخيه الهاتف وقال : والله نحن في مجلس الاباء واللجنة الشعبية في القرية عندنا استنفار لفصل قلنا نعمله مشينا اشتغلنا وجانا بفطوره هناك ، ويشهد الله نزل البنا من فوق المدرسة وقال ليه ضرب لي المدرسة بتكلف كم ونحن ماعارفين داير يبيع عربيته ، ضربها له 93 مليون قال ياجماعة ببيع عربيتي واتم المدرسة دي كلها مشى المناقل جاب السيخ والاسمنت والخرسانة والطوب
عربيته موديل كم ؟
موديل 83
واشتراها كيف شغال شنو كان ؟
عندها تحدث عم على بنفسه في الهاتف وقال لي ..ياشيخنا انا شغال اواني طبعا ومشيت الخرطوم فضل لي زي 12 الف مابودني اي حتة مشيت ام درمان اخدت دستة ونص اباريق ، الابريق ب 500 بعته ب 1000 ولما تميت 15 يوم عملت قروش وبعدها واصلت واشتريت العربية وعمرت وحجيت
يعني من بيع العدة اشتريت العربية ؟
ااي نعم
بعد ذلك اخذ الهاتف بن اخيه وقال الزول ده فيه صفة تانية من الله خلقه ماغش ولاكذب ، حتى في شغل الاواني المنزلية لو الحلة مقدودة هو بقول للمرة ابيع ليك الحلة مقدودة
العربية اشتراها من العدة ؟
العربية قال تمنها من 18 ابريق باعها واخد حلل ومشي بيها المجلد اشتغل هناك بالدرداقة ومن شغله اشترى العربية دي وعنده باقي قروش عمر بيهن ..هسع خلى شغل الاواني وبقى بشتغل بعربيته
اسمه بالكامل ؟
على قنجاري علي
واسم قريته ؟
واد قنجاري
كم عدد القرى التي تستفيد من المدرسة ؟
قريتين غير قريتنا واربعة كنابي كلهم يقروا في المدرسة
| |
|
|
|
|
|
|
| |
علاء سيداحمد
عبد المنعم سيد احمد
علي عبدالوهاب عثمان
احمد حمودى
لطفى العمده
محمد البشرى الخضر
فيس بوك
تويتر
انستقرام
يوتيوب
بنتيريست