الكاونتر كلمة تمّ تعريبها حتي ظنّ البعض أنها عربية اباً عن جد، فتجد الزول البسيط يقولك، خُتلي جردقتي دي فوق كاونتر الدكان . أما النقطة فمعروفة طبعاً من زمن قديم وكانت مرتبطة بعِليم العروس والغناية البتعلم العروس بينقطولآ، يعني بيجدعو فوقا القرش والتعريفة والفريني، حتي تطورت النقطة وأصبحت تُشتت للفنانات الكُبار مثل ندى القلعة وغيرها، والغريب ان النقطة بعد كل هذا التطور حصل ليها هبوّط فهبطت حتي أصبحت يشتتوها للغنايين الذكور كمثل فرفور، ؤ دا إنحدار ما ظننا ان النقطة ستصل إليه يوماً ما، لكن تعيش رجب تشوف عجب !. عموماً دا كلو إنبثاق من أساس الكاونتر نقطة والذي سوف يكون محور حديثنا في هذا البوست .
ملحوظة، الكاونتر نقطة مُصطلح مُعقد جداً يصعب حصره في تعريف مُعيّن ...
06-14-2017, 12:59 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
حاولت أن أجد نموزجين للعكام ؤ كدباس لكن ما لقيت، بالله لو في وآحد محتفظ بشي للعكام أو كدباس يمدنا بيهو ؤ حبذا لو كانت غنوة لآمِن يجيها خريفا لأنها تعِج بالكاونتر نقطة .
شكراً ...
06-14-2017, 01:00 PM
بدر الدين الأمير بدر الدين الأمير
تاريخ التسجيل: 09-28-2005
مجموع المشاركات: 22959
عارف حاتم دا كاتبي المفضل؛ ياخ بجود شغلو لمن غلط... وسخرية تهرس العضم؛ ولكنها محببة ولطيفة محفزة للتفكير والغوص؛ البقع تحت مواويليو بنجمو؛ نجام قبورة؛ ولا يتجاوز اللائحة؛ ولا يستخدم فاحش القول؛ والكتابة؛ ولا يدعي انه شفت بالوراثة؛ او انه تربية ........ فشنو حاتم اكتر زول مفيد في رائي في المنبر دا
..................................... بالمناسبة يا مدير انت ذاتك ماك زولن ساهل ياخ تحمل الفحل دا براهو يشفع لك لسبعين مداخلة؛
والله صحيح!!!
06-14-2017, 06:39 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
ال نجاوبك قبل ما تسأل يا ود الامير الكاونتر نقطةده تعرف عامل زى شنو زى ود المدير و قبانى قاعدين فى كندا و عايزين يمشو السودان قبانى سافر بالاثيوبية عن طريق المكسيك نيالا الخرطوم ود المدير قام عن طريق الفلبين القضارف الخرطوم قاموا فى نفس اليوم و اللحظة و وصلو فى نفس اليوم و اللحظة الكلام ده من خشم المايسترو الموسيقى الشهير جاليول دونابرت المتخصص فى تاريخ الموسيقى بعد ما خمّسنا سيجارة مع بعض و شحدنى سفّة وقع ليك !!! _____ هسى ود الخدر يجى ناطى
06-14-2017, 06:46 PM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
Quote: ياخ بجود شغلو لمن غلط... وسخرية تهرس العضم؛ ولكنها محببة ولطيفة محفزة للتفكير والغوص؛ البقع تحت مواويليو بنجمو؛ نجام قبورة؛ ولا يتجاوز اللائحة؛
الدنيا علمتنا يا عبد المنعم آآي والله، اعترف بذلك، أنا لروحي لما أقرأ كلامي جسمي بيكش النجام مطلوب لغرض التجويد صحيح، فاللائحة هي التي تتجاوزني أحياناً
هوي يا حاتم و بوب اطلعو من هنا .. و حسّكم عينكم تعتّبو بى جاى تانى ما دايرين مشاكل الناس الهنا ديل ناس خلوة و محو امية ساكت و احسن ما فيهم انا زول كتًاب و جنس نضمكم ده ما بخبروهو دحين .. ورونا عجاج كرعيكم --- يا سيد الحوش ممكن طلب استيكة خاص و كده
06-14-2017, 07:00 PM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11825
غايتو الايام منعتنا نكون من ناس الكاونتر نقطة. نبقى كيف ياخ ونحن جابو لينا ساكسفون جديد لنج ننفخ فيهو اربعت تنفار خمستاشر يوم مافي واحد قدر يطلع منو نغمة واحدة.
06-14-2017, 07:23 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
ها يا ود الشيخ كمان النفخ ماب تعرفوغايتو حالة سعبة خلاسك دى بالتبادى قاعد تنفخ كيف غايتو لو بتنفخو زى ماب تنفخ الصفارة العادية لا يوم الدين ماب تطلّع منّو نص فايايا يظهر كده ح افتح ليك درس عصر براك و هاك شوف النفخ كيف
ما دايرين نفخ في البوست دا، ؤ هو زاتو حسب المادة الحا نقدما لا يتعرض للنفخ والآته . كفاية النفخ اللِتنفخ في الكاونتر بوينت والناس اللِتنفخو والنفاخين ...
06-14-2017, 09:41 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: سلام ود المدير هههههه نحن لازم نشوف رأي مستر روبرت استرين في مصطلح كاونتر نقطة دا !😂
سلآمات يا دكتور بوب . زمان في كراكتير لعز الدين الله يرحمو المشاطة (جادات ما يشوفني) قالت للمرا البتمشط فيها، الخواجيات سرقن مننا الكوفات ؤ سمنّو الكوفير . فإنت مستر روبرت بتاعكم دا سرق مننا الكاونتر نقطة ؤ سماها الكاونتر بوينت، عليه بدل تمشي للتقليد خليّك معانا هنا سوف نتحدث عن الأصل في اكتر من سوناتا .
بختي يأخ لقيت لي صديق في لندن، والموصلي أصلو صديقي ...
06-14-2017, 09:48 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
تعرف يا مندرة الفيوغ الحاصل بين الدلوكة و الستم مع خلقية الصفقة يتطابق تماما مع تعريف الكاونتر اللاين بتاع الدلوكة منخفص .. قرار .. الشتم خش بى خلفات متوسط و ده لاين تانى الصفقة سبرانو عديل و عندها دخلة مع الشتم مرًة و التانية مع الدلوكة و دى الجابت التوالفية فى شكل الايقاع الكلّى ما من شك فى انها نقطة بازخة تجسب لمؤلف الايقاع
عارف حاتم دا كاتبي المفضل؛ ياخ بجود شغلو لمن غلط... وسخرية تهرس العضم؛ ولكنها محببة ولطيفة محفزة للتفكير والغوص؛ البقع تحت مواويليو بنجمو؛ نجام قبورة؛ ولا يتجاوز اللائحة؛ ولا يستخدم فاحش القول؛ والكتابة؛ ولا يدعي انه شفت بالوراثة؛ او انه تربية ........ فشنو حاتم اكتر زول مفيد في رائي في المنبر دا
..................................... بالمناسبة يا مدير انت ذاتك ماك زولن ساهل ياخ تحمل الفحل دا براهو يشفع لك لسبعين مداخلة؛
والله صحيح!!!
ههههههههههههههههه،
عبد المنعم يا صديق، يأخ ما تخاف علي اليمين أخوك جمل عصارة بس .
حاتم دا دايرنو ضروري في البوست دا، لأنو البوست حا يأخد منحىً آخر خالص يتطلب وجود الأُستاذ الموصلي ...
06-15-2017, 09:32 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
ودالمدير وشركاه الخواجات ديل اصلا بتاعين نفخ ولفخ .. مابقولوا لفحو العلوم العربية بتاعة ابن النفيس وابن سينا والرازيوالفارابي والبيطار وجابر وابن الهيثم وودوها بى هناك (الكاونتربوينت) هي اصلا كلمة سودانية مية المية وقالها واحد تربال اسمو عوض لى المفتش الانجليزي بتاع الزراعة قالوا ... او نما الى علمنا .. كما يقول حدباي ان المزارع التربال دا جاهم في المنطقة المفتش الانجليزي دا طبعا لابس القميص والردا الكاكي والبرنيطة الكاكية واجتمع بى اهل المنطقة .. الذين جهزوا تورا ماكن له قرنان ليربطوهو بالحبال ويطرحوه ارضا ثم ذبحه امام الخواجة واتوا بالتور الماكن العريض وشدوا وثاقه تمهيدا للضبح وبعد ان طرحوهو بكل صعوبة ارضا .. ورقد التور بكل هدوء في الارض ولكن بعد ان ظهرت السكاكين الكثيرة ولمعت تحت اشعة الشمس ولاح بروقها فاذا بالثور الراقد يثور ويهيج وينهض واقفا وهو يلوح بقرنية في حركة دائرية واخد وضع الهجوم والناس في هرج ومرج ..وعوض يقول للخواجة : الــ (كاو ) (نتر) وهو يشير للتور فاصبحت مصطلحا
06-15-2017, 10:20 AM
جلالدونا جلالدونا
تاريخ التسجيل: 04-26-2014
مجموع المشاركات: 9387
اسمعو يا امير و حاتم هنا تغالطونا بى ادواتنا نحنا اوعكم من سيرة روبرت و اسكريم و باستيل الكاونتر بوينت نحنا اسيادو و حتى بالامارة اسمو الخلفة فى الحتة دى بنطاقشكم عديل كده و نخليكم بغاث طير افو .. قالوليكم بنلعب نحنا هسى فى ضمتّكم الباكلا الدود دى الخلفة فى الجرارى دى فى السوناتا فى ____ يا ود المدير بصراحة محتاجين للزول الجميل عمر منصور هنا ياااخ شوف صاحبك سيد الحوش كان يديهو عضوية
06-15-2017, 11:21 AM
امير بوب امير بوب
تاريخ التسجيل: 01-02-2013
مجموع المشاركات: 1552
أمير هوي أجري ألحق روحك، لسة الوقت بدري القامة دا قال انت (شكرتو) وعامل معاها تلاتة علامات استفهام
Quote: لما د امير استشارني في مقامات النوت الجابها وكان مختلف احمد يس فيها كان في زول كاتب عليها؟؟؟ مش وريناهو؟؟؟ مش شكرني؟؟؟ Re: كاونتربوينت؟Re: كاونتربوينت؟
السمبك دا كان ما مرقتو هسع بيعمل ليك غنغرينا (غرغرينة) لقدام ههههه الزول دا والله يلمها ليك سنين وأول ما يلاقيك تاني ماش عكس يسوي فيك العملها في الشغيل في بوست الملايات والأحذية يذلك بيها ذلة شنيعة خلاس، تمشي منو قدومك طوييييل أمشي قول ليهو أنا ما شكرتك يا أستاذ أنا اعتذرت ساكت
06-15-2017, 11:23 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: الشغل الجبتوه دا كاونترميلودي بس ! ما فيه كاونتربوينت ... والله صحي 😂
يا ود المدير و جلال لو عايزين تغالطو ، أرفعو يدّينكم! ...
يا بوب نحن لا يمكن نغالتكُم في تخصصكم، ؤ حتي لو حاولنا نغالت لم ولن نستطيع، لكن نحن بنقدم الطرح ليكم إنتو ؤ دايرين رايكم فيهو علماً يأنّ الإيقاعات السودانية وضروب الغنا السوداني الذي لم يخضع في تأليفه لدراسة فيه ما يحيّر عقول أعتى الموسيقيين ؤ جايكم بنموزج في إعتقادي لم يجد حظه من التمحيص، والشبحة بتاعت الكاونتر بوينت دي كبيرة جداً بينما الكنز تحت الكرعين . البوست دا كاونتر نقطة وليس كاونتر بوينت عليه فليس هنالك مجال للغلآت والمهاترة . يهمنا رأي كل الموسيقيين السودانيين والمهتمين بمجال الموسيقى ...
06-15-2017, 12:03 PM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11825
ياود المدير مشيت بعيد كاونتر شنو الانا جاى اسال عنه انا عريبى جزيرة ساى وما بفرز الكونتينر من كاونتر بس حريف في الكن كان سعوالى كان عن العمة تراجى وهى هذه الايام بضواحيكم هل طلعت البومها عن الفريق التمرجى لانى سالت ملاحات التسجيلات القوقلية مالقيتو وسلامتك
06-15-2017, 12:05 PM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
Quote: الإيقاعات السودانية وضروب الغنا السوداني الذي لم يخضع في تأليفه لدراسة فيه ما يحيّر عقول أعتى الموسيقيين ؤ جايكم بنموزج في إعتقادي لم يجد حظه من التمحيص، والشبحة بتاعت الكاونتر بوينت دي كبيرة جداً بينما الكنز تحت الكرعين .
والله ما قلت إلا الحقيقة أولادنا ديل ما بدوروا إلا كلام الترك زماااان أنا قلت الكلام دا في بوست الدليب وزولكم المكنترها براً وبحراً وجواً داك مرق الدليب ذاتو يوناني قال جاي من أثينا دخل السودان عن طريقة مكة بعد ما شحن من الحجاز معاهو قنطار لغة عربية ووقيتين دين
الأكاديمي الضليع، جوزيف الكنتارا داك عايز يربط الحمار في كريمة ويمشي يدق البربندي في أثينا هناك ويجر الحبل عن طريق أنقرة جدة سواكن وبالعكس قال لو جراهو عديل حيقع ينبل بالموية في المتوسط
فعشان الهروب الجماعي دا، مافي زول شايف سماحة في ثقافتنا إلا من منظار غربي محض، إذا كان كبر يفتي في (راجل مرا) بأنها كاونتر نقطة شفت كيف!
06-15-2017, 12:15 PM
جلالدونا جلالدونا
تاريخ التسجيل: 04-26-2014
مجموع المشاركات: 9387
يا حاتم ياخى ما تستعجل على رزقك الدليب جايين عليهو و الجرّارى كمان بس ادونا فرصة ود المدير ينتهى من تحليلو العلمى المموسق ده مبلغ علمى ان الكاونتر نقطة يختلف تماماّ عن الكاونتر بوينت بتاعكم الحقيقة العلمية دى طلعت بيها من المعطيات الاولية لهذا البوست و مع التعمّق ستترسّخ الفكرة اكثر شوية صبر بنصل كلنا ان شاء الله
06-15-2017, 12:46 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: تناغم الصفقة وايقاع الدلوكة مع صقرية عمك أب شنب فيها كاونتربوينت يكهرب عديييل
يا حنين كلّ مافي الأمر مُصطلحات، بياكلوك بالمُصطلح يقولولك كاونتر بوينت إنت تترهب عديّل، في حين إنو نحن المُصطلح عندنا والغنوة دي فيها أكتر من مُصطلح أمسك عندك فيها (خنيّق دلوكة) ؤ (خلِف ؤ شِتيم)، شِتيم بمعني ضرب الشتم، وهذا الضرب زي ما قال الطيّب محمد الطيّب إسمو البوباي أو غُنا الدلوكة، زي ما الخواجات عندهم البلوز والريقي والكنتري وغيرها، المهم دراسة الموسيقى للمهتمين بهذا المجال ما بناباها لكن عدم إهتمامهم بموروثنا المحلي شئ محزن خاصةً وهو يذخر بالكثير . بوست الكاونتر بوينت والبوستات المنبثقة منه إنصرف فيها كلآم كتير أنا لا أنكر إنه كان مفيد، لكن علي مر السنين لم يصرف أهل الموسيقى عندنا ولو النذر القليل في الإهتمام بموروثنا ؤ زي ما قال حاتم، حتي الدليب حقنا نسبوهو لليونان !، يعني لآزم يُنسب لليونان عشان يتم الإهتمام به، والموسيقى المستوحاة من كفي القرع في الموية وضربه لآزم يهتمّ بيها بوب مارلي حتي ناسنا يعرفوا قيمتا ! ما زالت تتملكنا عُقدة الخوآجة وإن لم نتخلص منها لن نستطيع ان ندرك الكنز الذي بين يدينا ...
06-15-2017, 12:58 PM
امير بوب امير بوب
تاريخ التسجيل: 01-02-2013
مجموع المشاركات: 1552
يا ناس الموسيقى والغنا والمهتمين بالغنا والموسيقى أنا بصدد مدحة هي تعتبر يتيمة وسط الغنا في العالم كل العالم . ضرب وحيد وفريد مديح سوداني أصيّل، شُغُل يمكن أن يكون أرضية وأرضية صلبة لتأليف ضرب من الغنا جديد علي العالم لم يطرقه أصحاب المعرفة بالغناء والموسيقى في العالم كل العالم . نموذج فريد، نموذج وحيد، إعتقد فيهو إختلآق لضرب جديد من الغنا لكن وين الناس الممكن يطورو حقنا، المدحة دي لو كانت في الغرب كانت سوف تكون أرض خصبة لنمو ضرب راقي جداً من فن الغنا، فإلي النموذج والذي سوف انقل كل الفديوهات التي صورت هذه المدحة، هاكم يا ناس الغنا والموسيقى،
06-15-2017, 01:33 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
الكندآكة، أتحدى ايّ موسيقي أو غناي في العالم كل العالم لو يجيب نموذج للمدحة دي أو شي مُشابه لها، دي أساس لضرب جديد من الغنا لكن نحن طالما إننا بننظر بعيد طول عمرنا ما راح نشوف الشي الفي رآحة إيدنا ...
06-15-2017, 01:32 PM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11825
هى لكن ما حيرت روبرت استرين و كملت فهمو الشيالين براهم عاملين خمسة خلفات و كل خلفة عنده سلما براها ده غير خلفة النسوان الما مسموعة لكن تحس بيها .. ابو الزفت ده ... بالاضافة للخط الرئيسى للحن السايقو خلف الله بى اقتدار و بى بايرتونية مبالغ فيها ____ الاغنية دى لو خضعت للتمحيص و التدقيق و الدراسة فيها من الالق الموسيقى ما يعجز عنه بتهوفن و موزارت حقيقة اقولا ليك قبيلة الفن السودانى تعجز تمام العجز على ان تضيف شيئا للفنون فى السودان الشغل كلو تلحيق سوق و سبوبة رزق و منو العدادو رامى لو منتظر منهم يفككوا الاغنية دى و يعيدوا تركيبا موسيقياً يبقى اخير ليك تقعد فوق قيف البحر و انتظر السمكة تجيك مارقة براها و تقول ليك امسك اضطادنى
06-15-2017, 08:59 PM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11825
يا استاذ ممكن ناخد فكرة عن الطمبور وايهما اصلح جلد البقر ام جلد الحمير ونعرف حاجة عن النغمتين الناقصات نتمهن كيف؟ صفقة مثلا؟ يعني لو عايز اغنى بتتعلم من الايام اجيب تيريرريرم تم تررم تررم كيف؟ مثلا اخلي حلقوم واحد من الشيالين يشتغل ١/٣ تون ولا كاكيف ؟ وشكرا
06-15-2017, 09:25 PM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 24992
يا ود المدير سلام ياخي الفيديو بتاع الكنداكة دا. انا و اعوذ بالله من كلمة انا. أظهرته علي سودانيزاون لايص. ياخي المفروض تحفظ لي حقوق النشر. و ما عارف كدا حاجة اسمها شنو كدا الفكربة من باب الاخوة وكدا و شايف الاسكور بتاعك في العلالي. و النجم بتاعك طالع فوووووووق. زي سودانا فوووووووق. ممكن براحة تكون المساعد الايسر بتاع بكري. بس ما تنسي أخوك ود الفحل. تحياتي ممزوجة باحلي العطور. الكلونيا و كدا.
**** مداخلة من الآيفون. علي بعد خطوات من الحرم المكي.
عزالدين عباس الفحل مكة المكرمة. السعودية
06-15-2017, 10:03 PM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
البوست دا مهم جداً إذا الغرض منه مناقشة الموسيقى المحلية والريفية بآلاتها، فياريت المتداخلين يسهبوا في الحديث عن الآلات والرقصات والموسيقى وأنواعها مع مسمياتها للفائدة العامة
الغرض: الاستفادة من التقنية المعاصرة لتعريف العالم بثقافتنا الموسيقية، سأعمل على إضافة آلاتنا الشعبية لبرنامج ميوزسكور وياحبذا لو في شرح مبسط مع كل آلة، سطر سطرين
برنامج ميوزسكور برنامج مجاني لكتابة النوتة الموسيقية مشهور عالمياً، شخصي متكفل بالترجمة العربية للبرنامج وهي مكتملة بنسبة 90 بالمئة، وقد نجحت في حجز لغة مخصصة للسودان، على سبيل المثال: الغيتار عندنا (جيتار). البرنامج يشتمل على أصوات 300 آلة عالمية وشعبية مختلفة وأنوي إدخال آلاتنا الشعبية في البرنامج للتعريف بها حول العالم، ثم في مرحلة لاحقة وضع النوت الموسيقية للأغاني الشعبية والحديثة بالاتفاق مع أصحابها لنشر أغانينا حول العالم.
للبرنامج مكتبة مجانية ضخمة للتدوين الموسيقي (النوتة) يتطوع الأفراد لإثراءها هنا
https://musescore.com/sheetmusic
والبرنامج يمكن تنزيله من هنا
https://musescore.org
النسخة الحالية تدعم العربية، وضبطه للغة العربية من هنا
https://musescore.org/en/node/12678
إذا لم يعمل بالعربية الرجاء إبلاغي هنا لتقديم الدعم.
توجد فيديوهات إرشادية، مترجمة إلى 60 لغة من بينها العربية السودانية بالطبع
https://goo.gl/U7B2cy
لإظهار الترجمة العربية اضغط على رمز النجمة أسفل الفيديو ثم اختر Subtitle -> ar_SD
للاستفسار حول البرنامج، يمكنكم مبدئياً توجيه الأسئلة لشخصي.
06-15-2017, 11:29 PM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11825
Quote: ودالمدير وشركاه الخواجات ديل اصلا بتاعين نفخ ولفخ .. مابقولوا لفحو العلوم العربية بتاعة ابن النفيس وابن سينا والرازيوالفارابي والبيطار وجابر وابن الهيثم وودوها بى هناك (الكاونتربوينت) هي اصلا كلمة سودانية مية المية وقالها واحد تربال اسمو عوض لى المفتش الانجليزي بتاع الزراعة قالوا ... او نما الى علمنا .. كما يقول حدباي ان المزارع التربال دا جاهم في المنطقة المفتش الانجليزي دا طبعا لابس القميص والردا الكاكي والبرنيطة الكاكية واجتمع بى اهل المنطقة .. الذين جهزوا تورا ماكن له قرنان ليربطوهو بالحبال ويطرحوه ارضا ثم ذبحه امام الخواجة واتوا بالتور الماكن العريض وشدوا وثاقه تمهيدا للضبح وبعد ان طرحوهو بكل صعوبة ارضا .. ورقد التور بكل هدوء في الارض ولكن بعد ان ظهرت السكاكين الكثيرة ولمعت تحت اشعة الشمس ولاح بروقها فاذا بالثور الراقد يثور ويهيج وينهض واقفا وهو يلوح بقرنية في حركة دائرية واخد وضع الهجوم والناس في هرج ومرج ..وعوض يقول للخواجة : الــ (كاو ) (نتر) وهو يشير للتور فاصبحت مصطلحا
هههههههههههه، حباب الموسيقار أحمد ياسين . يأخي هنا ما دايرين كاو ينتِر ولا دايرين BBQ دايرين نشوف رايكم كموسيقيين فيما نملك من موروث متنوع لضروب كثيرة من غنانا المحلي والذي له مصطلحاته الخاصة وخاصيته المرتبطة بالمناطق والبيئة، فياريت تلقو لينا الضوء علي ماهو في حيازتنا من الغُنا والفلوكلور السوداني ...
06-16-2017, 12:26 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
إفتر لجهلنا بما نملك رحنا نركض خلف مستر روبرت استرين والكاونتر بوينت . رحم الله إسماعين عبد المعين كان له إهتمامات قصوى بالثراث ومحاولات جميلة جداً ومفيدة، وكما هو واضح في الفيديو الراجل وضع قطعة من واقع الحياة السودانية للخواجة والذي بدوره وضعها في نوتة موسيقية نتج عنها مارش المارينز الأمريكي، لكن نحن بجهلنا تركنا إسماعين عبد المعين يقف لوحده وتركنا موروثنا وثراثنا وأقتفينا اثر الفِرنجة ...
06-16-2017, 11:13 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
لي في المسالمة غزال نبدأ من ايقاع (النقرزان) عصايتين وكباية ومثلث وينسب الى (مرجان) واستوحاه من الحوليات وبدأ به رائدا الغناء كرومة وسرور (بارتون) صريح وواضح نوعين من الايقاع دا (الخفيف) وغنا بيها كرومة (دمعة الشوق كبي) و الفاضل احمد (لي في المسالمة غزال) الفوق دي وبعدين (التقيل) واصلا الايقاعات دي اتبنت على (ضرب) ثنائي ورباعي ..... بعد فترة الناس ملت الايقاع دا وجاء سيد الايقاعات التم تم وابعد النقرزان عن عرشه بضربة (ثلاثية)
06-17-2017, 02:34 AM
محمد محمود محمد محمد محمود محمد
تاريخ التسجيل: 02-04-2013
مجموع المشاركات: 910
Quote: ياود المدير مشيت بعيد كاونتر شنو الانا جاى اسال عنه انا عريبى جزيرة ساى وما بفرز الكونتينر من كاونتر بس حريف في الكن كان سعوالى كان عن العمة تراجى وهى هذه الايام بضواحيكم هل طلعت البومها عن الفريق التمرجى لانى سالت ملاحات التسجيلات القوقلية مالقيتو وسلامتك
هههههههههههههههههههههههه،
يا ود اللمير وِكت اصلنا في سيرة الغُنا خلني اللقولك كما قال الغناي متسائلاً، حدي يشعر بالسعادة يمشي يختار البُعاد ؟، عمتو مكنكشة في الفندق والبرلمان يعني من كندشة لكندشة، تجيبلها سيرة هميلتون تقولك الله يقطع هاميلتون، أو كما قال الغناي محجوب كبوشية . البوم البانسلين يا تمرجي لِسّع ما مرق لكن اليومين ديّل في السوق ظاهر البوم النخجي ...
06-17-2017, 03:23 AM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
يوم بيوم نبيع الكمبا في كفياكانجى دا ايقاع (الكمبا) الراقص .. ضرب طبول افريقيا دي كان الراحل خليل اسماعيل بسوق بيها الحفلة وحتى المكسر الرلقد في سريرو كان بهجج وملوك الهجيج و(الارتجال) وخفة الدم والروح والتفاعل الجماهيري العجيب هم رمضان زايد وعبدالعظيم حركة مع بنقز عمنا (خميس) ومساندة طبلة عمنا (عبيد)
06-17-2017, 10:29 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: والله ما قلت إلا الحقيقة أولادنا ديل ما بدوروا إلا كلام الترك زماااان أنا قلت الكلام دا في بوست الدليب وزولكم المكنترها براً وبحراً وجواً داك مرق الدليب ذاتو يوناني قال جاي من أثينا دخل السودان عن طريقة مكة بعد ما شحن من الحجاز معاهو قنطار لغة عربية ووقيتين دين
الأكاديمي الضليع، جوزيف الكنتارا داك عايز يربط الحمار في كريمة ويمشي يدق البربندي في أثينا هناك ويجر الحبل عن طريق أنقرة جدة سواكن وبالعكس قال لو جراهو عديل حيقع ينبل بالموية في المتوسط
فعشان الهروب الجماعي دا، مافي زول شايف سماحة في ثقافتنا إلا من منظار غربي محض، إذا كان كبر يفتي في (راجل مرا) بأنها كاونتر نقطة شفت كيف!
حباب حاتم، أنا والله دايرك تكثر تواجدك بجاي . بالنسبة لمسألة الدليب في ظني ولربما أكون مُخطئ ان العكس هو الحصل، لأنو نحن ما هاجرنا في الماضي لليونان ولا حتي في الحاضر ما عندنا هجرة تُذكر لها، بل العكس الأقاريق هم الذين أتو مهاجرين لبلدنا ؤ كمان إنتشرو فيها وكان منهم جزء عاش في اتبرا، لكن نسبةً لعددهم القليل في الأقاليم لم يكن لهم مهرجانات ثقافية، وإن وُجدت لربما تكون في العاصمة حيث الجالية كبيرة في الخرتوم، وهذه المهرجانات والنشاطات كانت محصورة في نطاق ضيّق جداً الحضور فيه من السودانيين دائماً يكون مقصور علي طبقة مُعيّنة، يبقى كيف نكون نحن أخدنا منهُم ومهرجاناتهم دي حتي مُجرّد خبرا ما بيصل لأهلنا في الشمال وباقي ربوع بلدنا الحبيبة !؟. إفتكر ثقافتنا والفلكلور بتاعنا أُهمِل تماماً، والذي لفت إنتباهي لهذا الإهمال القفزة الكبيرة بذآنة الكاونتر بوينت والإستعراض الأكاديمي الحاصل دا !...
06-17-2017, 10:57 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: الاغنية دى لو خضعت للتمحيص و التدقيق و الدراسة فيها من الالق الموسيقى ما يعجز عنه بتهوفن و موزارت حقيقة اقولا ليك قبيلة الفن السودانى تعجز تمام العجز على ان تضيف شيئا للفنون فى السودان الشغل كلو تلحيق سوق و سبوبة رزق و منو العدادو رامى لو منتظر منهم يفككوا الاغنية دى و يعيدوا تركيبا موسيقياً يبقى اخير ليك تقعد فوق قيف البحر و انتظر السمكة تجيك مارقة براها و تقول ليك امسك اضطادنى
بكل أسف يا جلال الشغلة أصبحت عدادات، بل تخطت ذلك إلي سوق أُم دفسو . رحم الله خلف الله حمد مافي زول فطن لهذه المنظومة واللوحة البديعة وجالسه بخصوصها كي يعرف منه سر هذا الإبداع، ؤ حتي بعد رحل عن دنيانا مافي زول فكر في سر هذه المدحة ونظر إليها بعين الإعتبار بل عيون المهتمين بالفن في بلآدنا رحلت بنظرها إلي ما وراء بحر الظُلمات ويبدو أننا في عصر اللعب بالمُصطلحات ...
06-17-2017, 11:20 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: يا استاذ ممكن ناخد فكرة عن الطمبور وايهما اصلح جلد البقر ام جلد الحمير ونعرف حاجة عن النغمتين الناقصات نتمهن كيف؟ صفقة مثلا؟ يعني لو عايز اغنى بتتعلم من الايام اجيب تيريرريرم تم تررم تررم كيف؟ مثلا اخلي حلقوم واحد من الشيالين يشتغل ١/٣ تون ولا كاكيف ؟ وشكرا
والله يا ود الشيخ انا نضميك دا ما بخبرو لكن قبل أحيلك لملك الطمبور النعام آدم داير أقولك إنو الربابة أو ألة الطمبور هي آلة أفريقية تشترك فيها عِدة دول أفريقية، وفي بعض حفلآت المرحوم وردي في اثيوبيا جابولو طمبور في المسرح . آلة الطمبور زيها ؤ زي الكثير من الألآت السودانية ما وجدت من يهتم بها وأنصرف موسيقينا للبيانو زي ما واضح الللهُمّ إلا بعض المحاولآت من محمد جبارة ولم يضيف شئ يُذكر وأظن الرجل ضآف وتر وسماعات فقط، لكن كدي أسمع النعام . النعام آدم هبش محلآت معيّنة في الطمبور ؤ رحل زيو ؤ زي خلف الله حمد دون ان يسبر أحد أغوار هذه المحلآت وكما هو واضح ما أظن في زول عندو إستعداد، عموماً غنوة سمح الخسايل دي دايرالآ قعدة خاصة وإن رب العالمين مدّ في الليام بنقعدلها ...
06-17-2017, 12:23 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
كدي النمشي علي بوداي كردفان وأهلنا الكبابيش الأبالة في باديتهم لنقف علي لون من الغُنا ظُلم كغيرة من الكثير من الموروث في بلآدنا . واواي الأناقيب، والذي أظنه ضرب من الحِداء يطرب ألبل وأهلها ...
06-17-2017, 04:21 PM
حامد بدري حامد بدري
تاريخ التسجيل: 03-10-2013
مجموع المشاركات: 2749
اتصل على وكاتبني الاخ زميل البورد معاوية المدير مستفسرا عن رأيي حول المقطع التاني - الحركة الاولى من سوناتا "الخدير ماني حي .. اللكلو الطير انا ماني حي" .. وعما اذا ما كان فيها كاونتر نقطة أم لا
في الحقيقة هناك مستويان .. فالسوناتا بحد ذاتها لا يوجد بها كاونتر نقطة .. الا أن انفعال الجمهور في حلبة الرقص وترديدهم وراء الفنان يخلق مجالا واسعا من الممكن أن ندعوه كاونتر نقطة .. بل ان هناك كانتر لحني اذ تتعدد اصوات الجمهور من اصوات نسائية واصوات رجالية بالاضافة لاصوات الشفع مما يضيف حالة فريدة من الكاونتر ميلودي المثير للغبار والاتربة ...
06-18-2017, 11:19 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: ابداع يامعاوية غايتو الكاونتر هنا زي الروح مابتعرفوا طالع من وين :))
يا حنين ضروب الغنا عندنا معروفة يا إمتاً شعبي أو حديس أو حقيبة ؤحتي ضروب الغنا في العالم معروفة ومحصورة ومفصلة، لكن الكنداكة فريدة في نوعها ومجالها مجال لم يطرقه أحد أبداً . في خلط بتاع اصوات بصورة غريبة جداً !، ومع الأصوات هنالك تصويّت من الفنان والكورس، أي إصدار أصوات موسيقية وهذا تجدة عند بوب مارلي ظاهر إذ هو يلجأ إلي هذا الضرب في اغانيه، لكن خلف الله حمد ليس له علآقة ببوب مارلي حتي نقول نقل منه . الكورس في هذه المدحة يظهر بعدم إلتزام بالطريقة التي يظهر بها الكورس في الغناء الشعبي أو أغاني الحقيبة فالأصوات كلها طالعة في لحظة وآحدة لكن بينها تناغُم بديع . غايتو يا زول ما سبقو عليها زول وجهلها أهل الموسيقى عندنا . هاك مارلي ...
06-18-2017, 12:11 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
الراحل حمزة علاء الدين عليه رحمة الله . وآحد من الذين إهتموا بالتراث والتأليف الموسيقي والفكلور السوداني ووقف صامداً لوحده حتي رحل، فكان غريب كصالح في ثمود ...
06-18-2017, 12:16 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: يا ود المدير سلام ياخي الفيديو بتاع الكنداكة دا. انا و اعوذ بالله من كلمة انا. أظهرته علي سودانيزاون لايص. ياخي المفروض تحفظ لي حقوق النشر. و ما عارف كدا حاجة اسمها شنو كدا الفكربة من باب الاخوة وكدا
حقك علينا يا ود الفحل، فلك قصب السبق وعلينا إعتذار لشخصك الكريم .
مودتي ...
06-18-2017, 03:39 PM
امير بوب امير بوب
تاريخ التسجيل: 01-02-2013
مجموع المشاركات: 1552
مرحبا بكل اهل المنبر وشكر خاص لصديقى العزيز المدير وبكرى ابوبكر لتشجيعى للكتابه مرة اخرى كل المساله اننى لا احب المهاترات ولا اتفق مع اللغو الذى لايفيد قضايانا ساعود للتعليق على مسالة الcounter point شكرا اخونا حاتم لذكر الميوزسكور انا اتعامل معه منذ فتره واستخدمه فى تدريس فصل الأطفال هنا في مدينة كالقارى ايضا ساستفيد منه فى تدريس فصلين فى مدينه ادمنتون نظرا للcompatibility التى يحظى بها مع كل البرامج مثال الFinale and sibelius وغيرها وسهولة الconversion . ارجو ايضا ان نجتهد عملية الensembles وكنت قد تحدثت فيها مع بعض الاساتذه فى كلية الموسيقى فمثلا مع عملاق مثل Yamaha يمكننا اضافة الطنبور,الشتم,الدلوكه,الوازا وغيرها من الاتنا الشعبيه وللحديث بقيه شكرا
06-20-2017, 11:26 AM
جلالدونا جلالدونا
تاريخ التسجيل: 04-26-2014
مجموع المشاركات: 9387
Quote: شكرا اخونا حاتم لذكر الميوزسكور انا اتعامل معه منذ فتره واستخدمه فى تدريس فصل الأطفال هنا في مدينة كالقارى ايضا ساستفيد منه فى تدريس فصلين فى مدينه ادمنتون نظرا للcompatibility التى يحظى بها مع كل البرامج مثال الFinale and sibelius وغيرها وسهولة الconversion . +++ ارجو ايضا ان نجتهد عملية الensembles وكنت قد تحدثت فيها مع بعض الاساتذه فى كلية الموسيقى فمثلا مع عملاق مثل Yamaha يمكننا اضافة الطنبور,الشتم,الدلوكه,الوازا وغيرها من الاتنا الشعبيه وللحديث بقيه
أنا أشارك في الترجمة والاختبار وبعض الأمور التصميمية للبرنامج مع الفريق واعتقد أن باضافتي للغة العربية الخاصة بالسودان أهمية كبيرة في الحفاظ على موروثنا وآمل أن يستخدم الناس البرنامج وأن يحاولوا أن ينظروا بطريقة أعمق في الموسيقى السودانية
+++
بالمناسبة، أذا لديك الوقت فأتمنى أن تضع تدوينات للموسيقى السودانية التراثية في مكتبة البرنامج حتى يعرفها الناس، صدقني فقد وضعت في بعض المواقع مقاطع لإيقاعات بهرت الناس واستغربت لذلك
أما بخصوص الآلات الشعبية فالتقصير مننا نحنا، لذلك انتهزت الفرصة هنا للتعرف إليها بعمق الموضوع من ناحية إضافة التسميات بسيط وسهل، لكن لإدراج أصوات الآلات لابد من عمل (sampling) لأكثر من نموذج لنفس الآلة فمعظم هذه الآلات منتشرة باختلافات يسيرة في ربوع السودان ومن غير المناسب اعتماد نسخة واحدة وتعميمها المهم، إذا توفرت لديك هذه العينات الصوتية يمكنني إضافتها للبرنامج ونكسب الكثير بهذه الإضافة بدلاً عن استهلاك منتجات الغير sudanbanana @ gmail.com
الأناشيد الدينية والمدائح يؤدونها في السودان الآن بالأورغان يا أخ عمر أقصد أورغان الكنيسة والنسخة الكهربية منه (Hammond Organ) ولم يتطوع شخص لتنبيه الناس لا تهمني المدائح بقدر قلقي على استخدام آلة مثل الأورغان في الموسيقى السودانية
06-20-2017, 12:37 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: البوست دا مهم جداً إذا الغرض منه مناقشة الموسيقى المحلية والريفية بآلاتها، فياريت المتداخلين يسهبوا في الحديث عن الآلات والرقصات والموسيقى وأنواعها مع مسمياتها للفائدة العامة
الغرض: الاستفادة من التقنية المعاصرة لتعريف العالم بثقافتنا الموسيقية، سأعمل على إضافة آلاتنا الشعبية لبرنامج ميوزسكور وياحبذا لو في شرح مبسط مع كل آلة، سطر سطرين
والله يا حاتم بوست الكاونتر بوينت رغم المكاجرة الفيهو لكنه بوست مفيد نوعاً ما خاستاً للدارسين مزيكا، لكن بالرغم من ذلك ؤ حسب وجهة نظري المجهود اللِنصرف فيهو كان ممكن يكون أفيّد لو إنصرف في تراثنا المحلي، فالسودان يذخر بتنوع موسيقي بحجم التعدُد في التراث الموجود في ربوعه، آلة وآحدة زي الطمبور مثلاً لو مسكتها حا تلقاها تختلف من منطقة إلي أُخرى، مثلاً طمبور الشمالية لا يشبه طمبور البطانة والطمبور عند أهلنا ناس الشرق لا يشبه كِليهما وهكذا، وقد أثبت حمزة علاء الدين أن العالم يتجاوب مع موسيقانا وكانت حفلاته تجد إقبال كبير جداً أينما حلّ . لعبد القادر سالم إسهامات أيضاً وجدت تجاوب وكذلك محمد كرم الله وعبد العزيز المبارك وكلهم أينما ذهبت هنا في كندا تجد نُسخ من سيدهات أغانيهم في المكتبات العامة . نحن مستسهلين الموارد العندنا ساكت ؤ جارين ورا المستورد، لا أعني أن لا نتعامل مع الوافد لكن في ثراثنا ما يغنينا عنه بصراحة ... أها يا حيدر حسن ميرغني، شِن قولك ؟...
06-21-2017, 12:25 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
حبابك عبد المنعم ؤ حباب أهلنا ناس كدباس . هذا الضرب من المديح هو نوع من الإنشاد، ولا يصاحبه الطار كما هو واضح والضرب الآخر يكون فيه الطار والطار يكون قريب الشبه بنظام الدلوكة إذ يكون هنالك ثلاثة طارات واحد كبير وِ إتنين سُغار، فالكبير بمثابة الدلوكة واللِتنين السغار بمثابة الشتم لكن الإيقاع يختلف، ؤ دا قطعاً إضافة قوية لأوركسترا التراث بتاعنا الذي لم يجد من يهتم به . طبعاً صاحب القِدح المُعلى في هذا النوع من الإنشاد المرحوم السماني أحمد عالم كما لحنان النيل إبداعها في هذا المجال ...
06-21-2017, 12:35 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: سحوركم فوقو العافية بي توقيتنا تحياتي المكنترة وحات الله ياود المدير زمان لامن يدوني الفتريتة والقمح للطاحونة كتا بكنتر مع سير الطاحونة وبرقص الجركي اتمنى من ابصفارة يشرح ظروفنا والتحية ليو النجاضة ده
مرحبا، يأخ وحاتك الشوق ليك ضُمّة ما فتر . الخليل الفراهيدي وضع قواعد لعِلم كامل شامل في هذا المجال من أصوات الآت الحِدادة وغيرها، فكل ما يحرّك دواخل الإنسان يصلح أن يضاف إلي عائلة الكاونتر بوينت، هههه . بعدين يا حامد السحور دا زاتو والمسحراتي يعتبر إضافة لتراثنا الموسيقي لأنو السحور يكون عبارة عن شي قريب للجلالآت مصحوبة بضرب النوبة والشتم أحياناً، يعني دا ضرب براهو خِلآف السيرة والطمبور والدلوكة وغيرها ...
06-21-2017, 12:43 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: ما شاء الله تبارك الله بوست ينضح بالكاونتر نقطه ولكن ليس به مستنير واحد
.وليس به سوناتايه واحده ولكنه ينضح بالكوامر
هههههههههههههه،
يا علي لا مكان للمستنيرين هنا فالشغل هنا محلي، أصلي بلآدو والمستنيرون يعشقون المستورد، لذلك الكوامر هنا دخاخينا عاكلة، ويا حبذا لو يعمل المستنيرين ساتر من هذا البوست الذي يذكُم الأُنُوّف ...
06-21-2017, 12:58 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: لي في المسالمة غزال نبدأ من ايقاع (النقرزان) عصايتين وكباية ومثلث وينسب الى (مرجان) واستوحاه من الحوليات وبدأ به رائدا الغناء كرومة وسرور (بارتون) صريح وواضح نوعين من الايقاع دا (الخفيف) وغنا بيها كرومة (دمعة الشوق كبي) و الفاضل احمد (لي في المسالمة غزال) الفوق دي وبعدين (التقيل) واصلا الايقاعات دي اتبنت على (ضرب) ثنائي ورباعي ..... بعد فترة الناس ملت الايقاع دا وجاء سيد الايقاعات التم تم وابعد النقرزان عن عرشه بضربة (ثلاثية)
يا أحمد (النقرزان) أو (النقرسان) اصلاً مُرتبط بالظار أو الحضرة، وفي الماضي المرا لآمن تظهر عليها أعراض المرض بيقولوا، نادوا فلآنة التسويلآ نقرسان . أها فلآنة دي بتجي معاها قضيبين زي المراويد جمع مرواد ؤ بتبدأ تطلّع منهِن إيقاع إذا المريضة تجاوبت مع الإقاع بيسولآ حضرة أو ظار وإذا ما تجاوبت عاد دا يبقى مرضاً كُتُر . إذا مرجان أخدو من الحوليات تبقى الحوليات أخدتو من الظار . الناس يا أحمد ملّت الإيقاع لأنو تطور إلي مرحلة وقف فيها ثم أُهمِل وهذا ما سيحدث لكل تراثنا إن لم نتداركه . التُم تُم زاتو إذا أُهمل ممكن برآحة يضيع في هرج ومرج الوافد إلينا عبر الفضائيات ...
06-22-2017, 11:38 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: ديل بيحبوا الموت، ناس زمان بيحبوا الموت، الواحد لما يقع ما بيقولوا أرفعوا، يمشوا فوقوا ويقول أمك ويفوت، مافي واحد بيقول الكلمة دي غير الجندي السوداني
وقفت في الوصف أعلاه منذ أسبوع أتأمل معانيه، إن كان هذا الوصف حقيقي فهو مخزي جداً. فحتى النمل يعتني بقتلاه، هل يا ترى واقعنا الحالي انعكاس لهذه الصفة؟
بدون حرف البوست عن مساره.
06-24-2017, 07:17 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: وقفت في الوصف أعلاه منذ أسبوع أتأمل معانيه، إن كان هذا الوصف حقيقي فهو مخزي جداً. فحتى النمل يعتني بقتلاه، هل يا ترى واقعنا الحالي انعكاس لهذه الصفة؟
بدون حرف البوست عن مساره.
في القرآن يا حاتم (لوإستغفرت لهم سبعين مرّة) . قالوا، في التفسير ليس المقصود الـ 70 في حد زاتها إنما ضرب من المبالغة في عدم الغفران، زي ما تقول لزول، لو قلت لي كلآمك دا مليون مرّة ما بيدخل رأسي . فالوصف غير حقيقي بل هو كناية عن الشجاعة المفرطة والجسارة الفايتة الحد، وهكذا نحن في عرفنا يمكن ان نضع مثل هذا التصرف في خانة الجسارة وبالمقابل نضع ستر الميت والحي في خانة الجسارة . يأخي مافِ حرف للبوست واللفتة في محلها ...
08-08-2017, 01:39 AM
جلالدونا جلالدونا
تاريخ التسجيل: 04-26-2014
مجموع المشاركات: 9387
Quote: اتصل على وكاتبني الاخ زميل البورد معاوية المدير مستفسرا عن رأيي حول المقطع التاني - الحركة الاولى من سوناتا "الخدير ماني حي .. اللكلو الطير انا ماني حي" .. وعما اذا ما كان فيها كاونتر نقطة أم لا في الحقيقة هناك مستويان .. فالسوناتا بحد ذاتها لا يوجد بها كاونتر نقطة .. الا أن انفعال الجمهور في حلبة الرقص وترديدهم وراء الفنان يخلق مجالا واسعا من الممكن أن ندعوه كاونتر نقطة .. بل ان هناك كانتر لحني اذ تتعدد اصوات الجمهور من اصوات نسائية واصوات رجالية بالاضافة لاصوات الشفع مما يضيف حالة فريدة من الكاونتر ميلودي المثير للغبار والاتربة ...
غايتو المداخلة دى فيها حاجتين .. كضب و سلبطة الكضب فى حكاية اتصل على ود المدير .. ود المدير ما عندو تلفون التلفون مع السكرتارية و عادة هم البستقبلو و يرسلو المكالمات عشان تتكلم معاهو لا بد من مواعيد و السلبطة فى شرح الكاونتر فى اغنية الخدير انا مانى حى حدد مستويان و تحدث عى ستة مستويات انتا قايل نحنا خلينا الموسيقى و تحليلا عشان شنو .. عشان سلبطتكم دى و الكلام ليك يا الناعسات عينيك
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
معاوية المدير
بدر الدين الأمير
MOHAMMED ELSHEIKH
عبدالمنعم الطيب حسن
جلالدونا
حاتم إبراهيم
حيدر حسن ميرغني
Ahmed Yassin
عزالدين عباس الفحل
عبدالله ود البوش
عبد المنعم سيد احمد
حامد بدري
على محمد على بشير
محمد محمود محمد
محمد حيدر المشرف
عمر منصور
فيس بوك
تويتر
انستقرام
يوتيوب
بنتيريست