الكوليرا تفتك بأهلنا.. وتحتاج حملة عالمية للتصدي لها..

Quote: يااااا وطن 🌷 ؛ --- فيما يخص الكوليرا __________________. أسف مقدما البوست ده جايط و ما مرتب.. في البداية..الهبهان ما بعالج الكوليرا..و لا التوم..و لا المضادات الحيوية.. أقسم بالله العظيم..ما بعالجوها.. ما عندها علاج النصيبة دي..في لقاح و ده بدوك ليهو كوقاية لو ماشي مكان فيهو كوليرا .. لكن مافي علاج .. مافي شنو؟ مافي علاج.. مافي زول يقول يا جماعة الكوليرا بقت وباء خلاص..منظمة الصحة العالمية بتتعامل مع ظهور عدد واحد حالة إصابة بالكوليرا ..على أنها وباء .. كوليرا يعني وباء.. أيوة بمناسبة الكوليرا دي..الهاشتاق ده في تويتر في تريند..يعني لاكتر الهاشتاقات المستخدمة.. في فيسبوك مافي..الهاشتاق في فيسبوك أشبه بأنك بتعمل مرجع..و في تويتر بأنك بتعمل إعلان .. طيب ..تاني داير أقول حاجة.. الكوليرا موجودة بقت في السودان ما حاجة جديدة..كل البحصل أنو بقت بتضرب في شكل موجات ..و نحنا هسي في موجة.. دقيقة الكلام ده سخيف شوية..حأقولو بطريقة تانية.. قبل سنة تقريبا ظهرت حالات إصابة بالكوليرا في النيل الأزرق.. كان الكلام ده في فترة العيد.. الإجراء السليم كان كالأتي: يتم إعلان الوباء..و يتم تحديد منطقة عزل..(الولاية كلها).. و يبقى حتى الخروج بفحوصات..و تمديد العزل لحدي تبقى نسبة الإصابة صفر.. طبعا ما محتاجين انو أقول ليكم الكلام ده ما حصل.. الحكومة قالت دي (إسهالات مائية) و الناس عاشت عادي..سافرت و رجعت.. و في ولايات إتأثرت بالذات المجاورة (سنار..الجزيرة).. المجتمع المدني أشتغل في قصة الوقاية و التوعية..و وزارة الصحة إتدخلت بعد ضغط إعلامي في قصة العلاج..(و صورة الوزيرة بتاعت السفنجة..بعيدا عن موقفك السياسي..هي كانت لزول نزل الفيلد يشتغل..نزل متأخر ده موضوع تاني ..).. بدت نسبة الإصابات تقل ..و بدو ناس يطلعو من المستشفيات نصيحين.. و ممكن نقول انو مرحلة الخطر تم تجاوزا.. لكن المرض اتحول من ظاهرة ..لمرض مستوطن معانا زيو و زي الملاريا و الرمد و الدسنتاريا.. و المستشفيات في كل السودان كانت بتستقبل حالات إصابة بالكوليرا بس لأنها بنسب قليلة و فردية ما كانت ظاهرة.. البكتيريا البتسبب الكوليرا دي بمجرد تتوفر ليها ظروف لطيفة بتعمل حفلة..و هي اصلا بقت قاعدة معانا..يعني لو جا خريف ظريف كده في شرق النيل..حتجي الكوليرا..و لو جات سيول في نهر النيل حتجي الكوليرا..و لو النيل فاض في توتي حتجي الكوليرا.. فقصة انو ظهرت حالات في الخرطوم ده ماخبر ..انا داير أقول ليكم بإختصار مبروك شديد لينا السودان كلو عندو كوليرا..الموضوع مسألة وقت ما أكتر.. هسي طبعا ما بقول خلاص نكتب وصايانا و نديها لعباس .. أكيد ممكن نتحرك ..او فعليا ما عندنا حل غير نتحرك.. و نتحرك في كم محور مع بعض.. اول محور..العلاج.. الكوليرا دي خطورتها في أنها وباء و في إهمالها..لكن علاجها ما صعب.. لازم تتأكد انك يوميا شرحت ل 5 أنفار كيف يعملو محلول التروية في البيت..لازم.. البكتيريا بتجفف و محلول التروية بعوض..و الفورة لمن المريض يقوم نصيح.. التبليغ الفوري ..مش شكيت انو الزول ده عيان..تقع فيهو خبت بالمحلول بتاع التروية ده لغايت توصلو المستشفى.. المحور التاني الوقاية.. الأكل خليهو دايما سخن..ما تاكل حاجة نية..و ما تاكل حاجة مكشوفة..و ما تلهط من طرف.. الموية حاول جيب حلة كبيرة صفي فيها موية بقماش..و أغلي الموية دي ..و أشربوا و أطبخوا من الموية دي..حتى بدون كوليرا الموية بطالة..او لو بتقدر اقع موية الصحة.. في المناطق الفيها انتشار للمرض..غسيل اليدين مهم..و صابونة الفنيك حنينة و رخيصة لو ما بتقدر تشتري نوع غالي.. أرفع مستوى النضافة الشخصية و العامة..في المطبخ والحمام.. و أي إسهال..افطر على مسئوليتي أنا..صدقني الإسهال ما حيبدا من اول لحظة مائي..و مافي صيام مع جفاف..دي ما بتبقى عبادة ..بتبقى إنتحار.. المحور التالت ..الإعلام.. أنشر هنا في الفيسبوك و في الواتساب و كلم الناس في الشارع و اتبرع للشباب البعملو الملصقات و البوسترات..للأسف قدرنا كجيل من السودانيين اننا نعمل معظم الحاجات برانا... ود الفكي قال ليبيا الما عندها حكومة فايتة السودان في مؤشر السعادة..واضح موقفنا من حكومتنا .. أيوة.. موضوع الكلوركس..ده يستحسن نختاهو في تعقيم الموية..ممكن عادي بدل تكون النتيجة موية معقمة تبقى موية سامة.. ده غير انو الكلوركس ذاتو ما متوفر .. زي ما قلت قبيل نحنا بنمر بموجة..حنقيف كلنا قصادها..و حنعديها..بإذن الله لكن لسه حتجينا موجات تانية كتيرة للأسف.. كتبه Ali Gamal ___________ كيفية صنع محلول الترويه : 8 كبايه مويه عليهم معلقتين سكر ونص معلقة ملح .. ما تشير البوست .. انسخو في صفحتك ، الواتس ، القروبات واي مكان .. اللهم رب الناس اذهب الباس واشف انت الشافي لاشفاء الا شفاؤك شفاء" لايغادر سقما ..