|
|
|
 Re: دي أول مره أشاهد فيها العاصمة الرياض (Re: Osman Musa)
|
يومين أصلو ما كانت كفاية أزور فيها أهل وأصحاب وأحباب
مسكتني منهم الغربة 23 سنة .. واليومين راحن بين المسافة البعيدة الفاصلة بين حي العليا وجامعة الخرج في
مدينة الخرج . زايد حفاوة و ونسة أبن عمي الأديب والكاتب الكبير دكتور عبدالفتاح فرح ضو ومسكانو لي لامن قربت
تفوتني طيارة رحلة الصين . يا الله يا الرياض
| |
  
|
|
|
|
|
|
|
|
Re: دي أول مره أشاهد فيها العاصمة الرياض (Re: Osman Musa)
|
كيف ما ازور أخي دكتور عبدالفتاح و هو الوهب اكتر من نص عمرو للتدريس
في جامعات الخليج والسعودية .
جيت أبارك لو طلوع كتابو التاسع . ماشاء الله كتب دكتور عبدالفتاح في النقد والنحو أصبحت مراجع في
جميع جامعات المملكة العربية السعودية .
والله حاجة تكيف لما الواحد يشوف العقول السودانية المنتشرة في الدول الشقيقة والصديقة .
| |
|
|
|
|
|
|
|
|
|
Re: دي أول مره أشاهد فيها العاصمة الرياض (Re: Osman Musa)
|
كنا فرشنا السكة ورود ولو كلمتنا كان بالجية ... دي خطوة عطيلة ويوم موعود الخلاك تطرانا شوية ...
انت ما قصرت حاشة إلا اتلومت فينا ...
كان تدينا خبر الحبيب عثمان موسى وكنا قطعنا لك الفيافي ما بين الخرج والرياض .. ولكن قدر الله وما شاء فعل وعلى العموم المرة دي عفيناك لكن المرة الجاية لو ما اديتنا خبر بيكون عليك هدي عديييل واحتمال يكون عليك صيام ثلاثة ايام ههههههههههههه ..
كنا نتمنى لقاك اخي العزيز عثمان .. والجايات اكتر من الرايحات بس المرة الجاية ادينا خبر ...
تحياتي : ياسر العيلفون .....
| |
|
|
|
|
|
|
|
|
|
Re: دي أول مره أشاهد فيها العاصمة الرياض (Re: Osman Musa)
|
الاخ عثمان
تحية طيبة وارجو انك ما تقعد كتير ف الرياض
ما حصل في حياتي شفت مدينة زي الرياض دي
وما حصل كرهت مدينة زي ما كرهت الرياض دي
قعدت فيها سنتين وسكنت الناصرية ( دي الحاجة الوحيدة الكويسة السنتين دي ) تركت سكن الجامعة
وسكنت ف little Sudan زي م كانو الزملاء المحاضرين الغربيين بسموها لمن كنت بعزمهم
الغريبة كنت ف الوقت الجاء فيهو سلمان الملك الحالي وع الرغم من تراجع سلطة البوليس الديني ( المطاوعة)
لكن البني ادم السعودي وفعايلو بتطغي على جو الرياض وبتحلى اي زول يكون عصبي شوية .
دكتور بتاع علم نفس امريكي زميل كان في ج. الملك سعود عندو نظرية للرياض
بقول فيها انو بعد م الجوطة بتاع البترول دي تنتهي الرياض ح تبفا مدينة اشباح
وكان مستغرب ف المترو الدايرين يعلموهو دة.
المهم اتمنى ليك فامة طيبة على قصر مدتها.
| |
|
|
|
|
|
|
|
|
|
Re: دي أول مره أشاهد فيها العاصمة الرياض (Re: Osman Musa)
|
مرحب بالعزيز عثمان في الرياض.
بالفعل الزائر لهذه المدينة يحتاج لوقت أطول لمشاهدة معالمها التاريخية خاصة.
المرة القادمة زود فترة إقامتك بالرياض لرؤية الدرعية التاريخية...منطقة الديرة بوسط الرياض .....قصر المصمك ووادي حنيفة،،الخ
هناك الكثير مما يستحق الزيارة هنا...
تحياتي..
| |
|
|
|
|
|
|
|
|
|
Re: دي أول مره أشاهد فيها العاصمة الرياض (Re: Osama Mohammed)
|
اغتربت في السعودية عشر سنوات في المنطقة الشرقية زرت فيها الرياض مرتين اول ما جيت والمرة التانية مشيت عيدت مع اولاد الحلة
الرياض لا تملك مقومات مدينة تحس انها مصنوعة ( بالضبط ذي لعبة المكعبات ) وشالوها في طائرة وفي نص الخلا رموها من فوق
| |
|
|
|
|
|
|
|
|
|
Re: دي أول مره أشاهد فيها العاصمة الرياض (Re: Khalid Elsayed)
|
الأخ خالد سلامات
لا لا يا أخ خالد الرياض تملك مقومات مدينة ونص
و بتخيل الرياض فيها أحسن الخبرات و العقول السودانية في جميع المجالات .
وفي ناس مستمتعين جدا بوجودهم في الرياض من زمن ولما بعض من أهلنا يجونا في أمريكا يكونوا مستعجلين جدا
للعودة للرياض . وده معناهو البلد طيبة . حياك الله يا رياض الخير
| |
|
|
|
|
|
|
|
|
|
Re: دي أول مره أشاهد فيها العاصمة الرياض (Re: Osman Musa)
|
عثمان صباحك خير
بقيت غالاط ياخ ودة حالتو يومين بس ف الرياض ههههه
م كنت عاوز ارجع هنا تاني عشان م احبطك
لكن تتميز الرياض بشئ واحد انها لها القدرة على امتصاص كل الطاقات المتفائلة الموجودة عندك
هناك شئ واحد يتشارك فيه سكان الرياض كلهم بلا استثناء وهو انهم يسكنون بكامل قواهم العقلية في (فقاعات ) يصنعونها هم ويحبونها
المدينة لا يمكن ان تحبها الا اذا كانت تجاربك الانسانية فيها مميزة اما سكان ( فقاعات الرياض ) فلا يابهون كثيرا لتلك التجارب
لاحظت ان السكان لا يحبون التعرف على بعضهم البعض
( جاري ف الناصرية قال ليهو خمستاشر سنة ما اتعرف على زول جديد )
المشكلة ان السودانين بدأوا يعلمو زيهم ويعيشو ف فقاعاتهت المصنوعة لمواجهة صعوبة الحياة الاجتماعية ف الرياض .
ياخ مدينة سبل الترفيه الوحيدة فيها الاكل والعمل الاضافي
الرياض مدينة لا ترحب بالجديد ولا تحتفي به كما قلت بل تمتص كل ما هو جديد وتحوله لساكن رياضي فقاعي
دكتور علم اجتماع بجامعة الملك سعود قال لي مرة
( كل سكان الرياض نسخة مكررة يتشابهون في معظم الاشياء ويفعلون نفس الاشياء مرارا وتكرارا بشكل رتيب وممل ومخيف)
وبعدين يا عمك الماري زائر ما زي الساكن و(مفقع)
لك التحايا
| |
|
|
|
|
|
|
| |
Osman Musa
ياسر السر
Osama Mohammed
طه داوود
Khalid Elsayed
فيس بوك
تويتر
انستقرام
يوتيوب
بنتيريست