|
Re: يا كبر .. بتعرف الأغنية دي ؟ (Re: يحي قباني)
|
يحي..حبابك ياصديقي وحباب الصديقات والأصدقاء ،
ياليالينا على الرمل النضير ، وملاهينا على شط الغدير ، في عروس الرمل حسناء الصحارى روضة العشاق ، جنات العذارى عارف ، زمان ، ونحن في المرحلة المتوسطة بمدرسة الدلنج الأميرية ، كانت عندنا عادة لذيذة للغاية ، بنقوم نجمع الكراسات ونلصقها مع بعض ، ونعمل دفتر كبير وسمين ، اها في الدفتر ده بنكتب كلمات الأغاني ، لأنو عندنا استاذنا واحد الله يطراهو بالخير قال لينا اوعكم تعتمدوا على (زهرة الأغاني) واخواتها لأنها مرات بتكتب الأغاني بصورة غير سليمة ، اها الدفاتر دي كانت لذيذة للغاية ، لأنها بتكون مدورة بين البنات والأولاد ، احد الصديقات كانت عندها دفتر جميل وقع في يدنا ذات صدفة ، وفيهو اغنية ليالي كردفان ، حتى اللحظة متذكر العنوان مكتوب بقلم بيك اخضر ، واسم استاذنا شرحبيل مكتوب باللون الأزرق ، واسم استاذ رضا مكتوب باللون الأحمر ، واشارة الى انها اول اغنية لشرحبيل ، ومعلومة بسيطة بتقول (حينما كان شرحبيل يغني بالأوركسترا)..ثم النص كاملا..! اها الكلام ده ، ايام تصريحات استاذنا الجيلاني الواثق من شاكلة (انا ملك ملوك الجاز) ، اها نحن طبعا عاملين فيها مقرمين وقعدنا نتغالط (اوركسترا شنو ياخي ، شرحبيل بتاع جاز وكده) وثم (ياخي شرحبيل ما قاعد يغني بالفصحى وشنو كده ما عارف) ، اها النقة امتدت ، لغاية ما لمينا في الزولة بتاعة الكراس عشان نقنعها انها بتنشر معلومة خاطئة..شفت المحن دي كيف يا يحي..؟..لاحظ ديل طلبة متوسطة ..؟!! والزولة كانت مصرة للغاية ، وقالت سمعت تسجيل للغنية لكن ما بتقدر تسمعنا ليهو..! اها ، من باب الفضول سألنا كم من اساتذنا في معهد التربية الدلنج (ده الحي القمنا فيهو ، حي المعهد ، والآن صار حي الجامعة) وكلهم قالوا يطرشنا ، وشرحبيل ما قاعد يشتغل غنا باوركسترا (كمان ، اوكورديون ، عود ..الخ)..زول واحد فقط ، وهو استاذنا الحاج عبد الرحمن الطيب ، وكان استاذ الفنون وتشكيلي ليهو اعمال كثيرة ، قام قال لينا فعلا الأغنية بتاعة شرحبيل ، وهي اول اغنية غناها ، والظريفة فتش دفاترو القديمة وطلع لينا النص كما كتبته الزولة صاحبتنا..!! لاحظ فكرة الترويج السياحي لمدينة الأبيض (عروس الصحارى) ولو كنت مسئول في تلك المدينة لأعتمدت هذا الإسم ، اسوة باسمها المعروف (عروس الرمال)..لأنو الخواجات لو قلت ليهم (عروس الصحاري) العميان ح يشيل المكسر..لأنو اسم رنان وحميم وجميل..! وناس مدينة الأبيض زمان كان بيمشوا رحلات خارج المدينة ، واشهر منطقة هي البان جديد (وبالطبع البان ليست هي شجرة البان ، وانم فعل ماضي من بان أي ظهر)..وهي منطقة تم تخليد ذكرها كثيرا ، خصوصا في اغاني الثنائي الأستاذ محمد عوض الكريم القرشي والأستاذ الفنان عثمان الشفيع ، عليهما الرحمة.. كلما اتأمل كلمات اغاني امسودان ، احمد الله انو اختراع الكاميرات الديجيتال اتأخر شوية ، لأنو اهلنا ديل كانوا شوافيين شديد..! هي جزء من شريط اقتنيتو قبل سنوات لشرحبيل ، وفيه اغنية (ليالي كردفان).. كتر خيرك يا صاحب.. كبر
|
|
|
|
|
|
|
العنوان |
الكاتب |
Date |
يا كبر .. بتعرف الأغنية دي ؟ | يحي قباني | 01-22-17, 06:52 AM |
Re: يا كبر .. بتعرف الأغنية دي ؟ | جلالدونا | 01-22-17, 07:18 AM |
Re: يا كبر .. بتعرف الأغنية دي ؟ | يحي قباني | 01-22-17, 07:28 AM |
Re: يا كبر .. بتعرف الأغنية دي ؟ | يحي قباني | 01-22-17, 08:00 AM |
Re: يا كبر .. بتعرف الأغنية دي ؟ | MOHAMMED ELSHEIKH | 01-22-17, 11:40 AM |
Re: يا كبر .. بتعرف الأغنية دي ؟ | يحي قباني | 01-22-17, 10:26 PM |
Re: يا كبر .. بتعرف الأغنية دي ؟ | Kabar | 01-23-17, 08:00 AM |
Re: يا كبر .. بتعرف الأغنية دي ؟ | Kabar | 01-23-17, 08:15 AM |
Re: يا كبر .. بتعرف الأغنية دي ؟ | يحي قباني | 01-24-17, 05:16 AM |
Re: يا كبر .. بتعرف الأغنية دي ؟ | Hamid Elsawi | 01-24-17, 10:35 PM |
|
|
|