الى ان يعود صاحبنا المعز ابو نورا للحكي عن مظاهرات حي العرضة ، وما جاورها من احياء: الأمراء ، العباسية ، العرضة..الخ..وهو حكي يهمنا كثيرا حتى تكتمل الصورة..!
هدية لصديقتنا دوما..!
الزمن الحضاري السوداني ، عجيب ومدهش ، وبيرسل اسرارو في اشارات صغيرة ومدهشة..!
عارفة يا دوما ، لمن زرت امسودان في 2015 ومرقت منها قبال الحوار الوطني الشايلين بيهو حالنا لغاية اليوم ، غنية واحدة لفتت انتباهي ، وكنت بسمعها في الدلنج ، الأبيض ، ود عشانا ، تندلتي ، كوستي ، امدرمان ، ياخي حتى اطفال المدارس في طابور الصباح كانوا بيتغنوا بيها..!! والغنية اصلا ، زمنها قبال زمن حنين البنيات اليقين الفوق ديل..! من تأليف الليجند الموسقار السوداني العظيم اسماعيل عبد المعين.. !! وقام نكتها ونفض الغبار عنها ، الليجند السوداني الفنان الجميل النور الجيلاني ..!
الفيرشن ده ، باداء الفنان السوداني الشاب صلاح ولي ، وصلاح هذا بدا حياتو الفنية بترديد اغانيات الفنان الكبير حمد الريح (وفي التاريخ ، الفنان حمد الريح هو الزول الوحيد القامت الإذاعة السودانية سكتو لمن سفنجاتها اتقطعت ، عشان تقنعوا يجي يسجل عندها..والله صحي..!!).. المكان احتفال في قرية صغيرة اسمها (القلقالة)..والقرية دي اول مرة اسمع بيها من صديقنا تمبس ، وكان يدافع عن صوت غنائي شاب..!! الصوت بتاعة زولة سودانية ، ويا ريت يا دوما تندهي اخونا تمبس لأن يعود للمنبر ، ان شاء الله يكتب بغم ساكت في هذا الخيط..!! تمبس بيعرف سر القلقالة الباتع..! الفيديو في مهرجان تكريم لأستاذنا نور الجيلاني ، الزول القام نفض الغبار عن غنية (قابلتو مع البياح) ، وهو الزول الظاهر في الفيديو ولابس صديري وفوق عليهو وشاح التكريم..!! التحية لأستاذنا الفنان النور الجيلاني.. وهو من الفنان البتحرص شروق تتفرج علي فيديوهاتو.. لأنها بتفتكر انو عندو حضور كبير وقدرة على التواصل مع الجمهور ، وبالطبع صلاح ولي ، القامت شروق (بالأنجليزي طبعا) نبهتني لحضوره الجميل وقدرتها الفائقة على التواصل مع الجمهور ، مما جعلني اعيد اكتشاف الفنان عبد الله عبد القادر (البعيو)..!!
وما ابعد السكة في الفهم بين ملامح البنيات اليقين وزمن امسودان بتاع صلاح ولي ، وهو زمن عجيب ومدهش ومتصل بصورة عجيبة..!!
وحتى اللحظة ابحث عن سر غنية (قابلتو مع البياح) ، غنية تتكتب في الخمسينات وتقوم الناس تنساها ، ويتنفض عنها الغبار في الألفية الثالثة ، فتشتعل الحمي التي تفوق حمى ليلة السبت ذاتو..!!
في اليوتوب..الغنية باداء صلاح ولي في مهرجان نادي الرابطة بالقلقالة قارب نصف المليون مشاهدة..!!!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست