|
|
|
 Re: موضوع العصيان و علاقتو بالغُلاط (Re: مامون المعتصم أحمد)
|
قال لى كدى سيبك من الإستهبال و حركات الديش دى ،
خُش في الموضوع المهم .... قلت ليهو ياتو موضوع ؟؟؟
قال لى يوم 19 .... لا حول و لا قوة إلا بالله العلى العظيم ..
ياخ ما بريتنا برى بى يوم 19 دا .... قال لى دا ما يوم العصيان ...
عامل روحك ناسيهو يعنى و للاَّ ما مهتمى بيهو ؟؟؟ قلت ليهو
ياخ متأسف ... الموضوع دا مرق من بالى لأنك إنت قلت لى
نتلاقى يوم 24 وللاَّ 26 ديسمبر ما متذكر .... بعدين ياخ أنا
قالع ضُرس .... قال لى سيبك من كلامك الملولو دا ... و هسه
الساعة 11 و ربع يعنى 10 و ربع في السودان و مواقع التواصل
قالت ما في زول مرق من بيتو و لا عربية حايمة في الشارع ...
و الموضوع دا المرة دى حا يطربق على راسك الشايب دا ....
قلت ليهو طيب الفى راسك إنت دا حواشة قطن يعنى ؟؟ ما شيب
زى حقى دا .... ضحكنا سوا المرة دى ..... قلت ليهو يعنى إنت
هسى مبسوط ؟؟؟ قال لى يعنى ... ما مبسوط خالص لغاية ما
أتأكد .... قلت ليهو دىل بطاقتين موبايل بى 40 درهم ... أفتح
مكرفون موبايلك و أضرب لأى زول بتعرفو و نسمع كلامو
سوا .. و يورينا الحاجة الشايفها قدامو و هل الناس مشت
الشغل و المدارس و للاَّ ما مشت ؟؟؟ قال كلام جميل ...
و باقى البطاقات بيكون حقى ... قلت ليهو إستبينا يا عمك ...
| |
 
|
|
|
|
|
|
|
|
Re: موضوع العصيان و علاقتو بالغُلاط (Re: مامون المعتصم أحمد)
|
أول زول ضرب ليهو ود المامون عندو سكرى و عندو جرح
كبير في كراعو بيمشى يغير ليهو في مركز جابر في الخرطوم
2 يوم بعد يوم ..... التلفون جرسو يرن و ما في رد .... مرتين
تلاتة ... نحاول ما في رد ... قال يجرب نمرتو التانية بتاعة
السودانى .... ضرب النمرة التانية .... صاحبو طوالى رد
... صاحبى مبتهج .... سلام عليكم يا ود المامون ...
كيف الأحوال .... و عليكم السلام و الرحمة ..... الحمد لله
معاى منو .... معاك أبو آمنة ..... كيف الحال يا أبو
النسب إن شاء الله تكون بخير و عافية ... كنا متوقعنك
تحضر زواج طارق الشهر الفات بس ما جيت ... و الله كان
الواحد متمنى يجى و يلاقى عبدالحميد بعد المدة الطويلة
دى ياخ من زواج نوال بتو قبل 8 سنين تانى ما اتلاقينا ....
نتعاقب طوالى في الإجازات .... ربنا يسهل الرجعة لينا
كلنا ... تعبنا من الغربة ... غمزتو و قلت ليهو أسألو
من العصيان وضعو كيف ..... قال ليهو هسع كيف
مع العصيان بتاع الليلة دا ؟؟؟ قال ليهو عصيان شنو
يا اب آمنة أخوى هسه أنا جيت المركز و منتظر دورى
للغيار .... الحمد لله الجرح ماشى كويس و على وشك
يبرا و الناس هنا شغالين عادى و الشارع عادى
الوليدات مشوا مدارسهم و الشغالين مشوا شغلهم ...
و الحياة ماشة عادى .... من هنا أنا بغشى فرن
البركة 3 و أشيل الرغيف معاى لأنو بت عمتك قالت
الليلة جايين أولاد أختها من نبتة متغدين معانا ...
صاحبى ..... وشو إتنيل و بقى يبلع في ريقو ....
و يتمتم .... الناس في شنو و إنتو في شنو ؟؟؟؟ تاكلوا
الدُلق .... و ود المامون بى هناك شغال هالو هالو ....
يا حسبو .... حسبو أب آمنة ..... رجع صاحبى
قال ليهو الشبكة أظنها ما سمحة .... أها ربنا يديك
العافية يا أبو النسب و سلم على بنات عمتى و عيالهن ... ..
| |
|
|
|
|
|
|
|
|
|
Re: موضوع العصيان و علاقتو بالغُلاط (Re: مامون المعتصم أحمد)
|
قلت ليهو يا أبو الصحب و لا يهمك .... أول بيضة للغراب .....
هههههه ..... شوف زول غير دا .... قال لى .... ما تفرح أصبر شوية ....
قلت ليهو ياخ و لا فرح و لا شماتة ..... أنا ما سودانى زيك و داير خير
البلد زيك و زى بتاعين العصيان الما عندهم شغلة ديل و لو اختلفنا في
الراى إنت ما تبقى ضيق ... وسِّع صدرك شوية .... مرتين الحكومة
دى قالت ليهم الداير تغيير يجى صندوق الانتخابات .... لو عندهم فهم
و غيرة على البلد زى ما بيدّعوا كانوا إتفقوا على قائمة موحدة وقفوا
بيها ضد المؤتمر الوطنى الحاشيهم دا و فوزوا ناسهم بس دا كلام
ساكت .... المهم خلينا هسه في يوم 19 دا .... اضرب لى صاحبك
التانى .... صاحبى ضرب ... الزول الهناك فتح الخط طوالى ....
و باين عليهم أصحاب شديد ...... قال لى صاحبى أهلاً يا اب كرش
.... هههههه انا طوالى ضحكت ... صاحبى غطى المكرفون بى
إيدو و قال لى تضحك يا رمة .... إنتظر بَنَجِّمك .... الزول البى
هناك قال ليهو الرمة منو يا معفن ..... هههههه .... صاحبى قال
ليهو يا زول أنا ما معاك ... مع واحد هنا مؤتمر وطنى حاشينى
حش .... و جات ضحكة مجلجلة من هناك ... قال ليهو شكلك
ضارب لى عشان تسألنى من العصيان الوهم دا مش كدى ؟؟؟
وهم كيف يا أخينا ؟؟؟؟ قال ليهو يا صاحبى أنا هنا هسع في
جمارك الحاويات في سوبا و منتظر دورى ..... الشغل ماشى
زى العادة و ما في شيء مختلف .... الكلام دا وهمة شباب
الزمن دا ... ناس الفيس و الواتساب .... قبل ما أجى هنا وديت
الأولاد الصغار مدارسهم و الكبار مشوا جامعاتهم و الشغال
مشى شغلو ..... صاحبى قال ليهو ياخ مواقع التواصل كلها
قالت العصيان دا نجح نجاح تام و ما في زول مرق من بيتو
أبداً ..... صاحبو البى هناك قال ليهو يا صديقى شوف ليك
شغلة تنفعك و سيبك من الوهم دا ..... ما في أي شى هنا ...
صاحبى بعد قفل الخط .... صرف ليهو كوتة من السفاهة
البيصرفها كلما يزعل .... و ودعو على مضض و هو
يعاين لى شذراً .... بس مشيتها ليهو لأنو مسكين .....
ههههههههه ...... قلت ليهو تانى عندك 3 فرص تتصل
فيها بأهل ثقتك في السودان و تتأكد براك و نحن قاعديييين ..
إن شاء الكريم ..
| |
|
|
|
|
|
|
|
|
|
Re: موضوع العصيان و علاقتو بالغُلاط (Re: مامون المعتصم أحمد)
|
الحبيب ضرب تلفون لى زول تانى ..... قلت ليهو دا منو ؟؟؟؟
قال لى دا نكير إنت مالك ... أسمع بس ... ضحكت على تعبير
وشو ... و قلت ليهو حاضرين يا عمك ... نسمع و نحن ماشين
وين على قول على دفع الله .... الفورة كم مليار كدة أو كما قال ...
صاحبى قال لى على دفع الله دا وخالك الفى السعودية ؟؟ قلت
ليهو دا واحد زميل في سودانيز أون لاين .. المهم الزول
الضارب ليهو رد و فهموا إنو سايق الأمجاد حقتو و ماشى
يوصل أسرة راكبة معاه الكلاكلة اللفة و يغير فلتر و زيت
للعربية عشان ليها مدة طويلة ما غير ليها ....
صاحبى سألو عن العصيان ... لما قال ليهو الأمور ماشة
عادى ... قال ليهو سـلم على الحاجة و قول ليها تعفى مننا ...
دا كان أخوه ....
إتلفت على بعد داك و قال لى داير جبنة حبشية تظبط
راسى .... و ودعنى و هو يتوعد.. تاااانى حا يكون
في عصيان .... قلت ليهو .. ما في مشكلة .... بس
راى أغلبية الشعب السودانى ياها دى قدامكم ....
صرف لى كتير من الكلام السفيه مما لا يمكن كتابته
هنا ثم ولى هارباً تلاحقه أصوات ضحكاتى و ضحكات
الجالسين ....
| |
|
|
|
|
|
|
| |
مامون المعتصم أحمد
فيس بوك
تويتر
انستقرام
يوتيوب
بنتيريست