شايف بعض الناس فرحانة شديد بانتصار دونالد ترامب ، واثر ذلك على امسودان مستقبلا..!!
الحكاية دي ذكرتني حكوة في ثقافة البقارة ، تجري هكذا: كان في واحدة فقرانة ومسكينة ، اسمها ام سعدان ، وكان كل امنيتها في الدنيا تسير مع الضعينة.. والمسار محتاج تور (نظام وسيلة نقل وكده)..! اها قام واحد غنيان (عندو بقر كتيرة كده) وعندو تور كلالي ، لكن مشكلة التور ده عندو دبره فوق ضهرو (نظام جرح) والتور اتهلك واصبح اقرب للجيفة ، لا تقدر تضبحو وتاكل لحمو ولا تقدر تستفيد منو ، فقام قدمو هدية لأم سعدان تلك..! اها ام سعدان ، ما صدقت ، تمت الليل كلو تجوعر في ناس الفريق: انا لقيت لي تور وامباكر ح اسير مع الضعينة..انا لقيت لي تور وامباكر ح اسير مع الضعينة.. تهاتي وتهاتي.. ولمن الصباح اصبح..لقت التور فطيس (بسبب الجرح الكبير)..!!
و يا فرحة ما تمت..!!
يبدو ان سيف دارفور ح تكون المرة دي سيف جنوب كردفان ، ودقي يا مزيكا..!! انتو صحي كده عيال جنوب كردفان المشوا يمسحوا الجوخ لترامب ديل منو بالضبط؟.. عموما جنوب كردفان لا يحكم مصيرها شوية نفرين تلاتة..! والإ.. خازوق أبيي ح يتجدد من تاني..! واصلا ما ح نحنس الناس بتحنايس باركوها وتعالوا نبقى سودانيين وشنو كده ما عارف..! اللعب المرة دي مكشوف للغاية..!! العيال المشوا قابلوا ترامب باسم جنوب كردفان لو فاكرين انفسهم يتامي مستعدين يدوا راسهم لترامب عشان يتعلم فيهو الحلاقة ، فناس جنوب كردفان ليس يتامي ومافي واحد وشو شبرين ح يتعلم فيهم الحلاقة (بالله ترجموا لمستر ترامب..!!)..!
كبر (واحد من ناس جنوب كردفان)..
العنوان
الكاتب
Date
الفرحة بترامب زي فرحة ام سعدان بي تورها الدبران..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة