|
|
 Re: ست الودع ارمى الودع شوفى بشة متين بنقلع عش (Re: صديق مهدى على)
|
يا صديق قال نزار قباني بطريقة مشابهة عندما مشي لي قارئة الفنجان وذهبنا نحن إلى ست الودع في السودان
ودعاتك دنيا مرعبة
وحياتك أهوال وحروب
في 30 يونيو 1989 يا ولدي جات الإنقاذ وما أنفكت يفكنا الفك المليم إلى أجزاء أصغر في سك العملة أو سلمها أو تراتيبها لا مشكل ، المهم يفكنا من هذا النظام الذي أمضي سبعة وعشرون عاماً عجافاً في السلطة جاطت فيها الدنيا وتلخبطت البلد بالطول والعرض. صحيح أن التغيير سنة الحياة لكن تغييرات الجماعة فتقت الحد المسموح به لدرجة أنها وقفت الحياة وجعلتها أكثر صعوبة علي سبيل المثال:
غيرت السلم التعليمي وحذفت منه عاماً كاملاً دون دراسة ، وحذفت ثلاثة أصفار من العملة ، وناطحت جرينتش وقالت ليها لو إنتي واقعة كقرية في خط صفر نحن كثير من قرانا وبعض المدن واقعين تحت الصفر ، فالأرض لمن تقرب للسودان بتكبر اللفة عشان كده محتاجين نقدم الزمن ساعة أو ما يعرف بالبكور عندهم وقد كان ، وجات في صينية الغدا شاتت ليها صحنين (زمان كان في صحن سلطة وملاح غير أم رقيقه يسر الناظرين) أها كتر خيرها خلت لينا صحن واحد وفي النهاية الصحن زاتو إتلحس وإتلحست على إثره وجبة الغدا وبقينا فطور وعشا دون توقف ، أها قبل أن نفيق من هول الصدمة جات شاتت ليك الديمقراطية ومسحت يوم السبت وحذفت الجنوب من السودان ، في ذمتكم لاقتكم حكومه حذافه زي دي ، ديل بستعملوا إستيكه خطيرة جداً تمسح أي شئ وأنا خايف ومكنكش في تلابيبي وجلابيبي ووليداتي لأنها ممكن تحذفنا نحن زاتو.
غايتو مضى علي حكم الجماعه قبل حوالي خمسه شهور سبعة وعشرون سنة ويكون باقي قدرها أها أرمي نصها البحر وأقع وراها يكون الجماعه شتتو أو إتعودت على الحاصل. شخصياً أحاول أن أتعود لأنه ما عندي تجربة في السباحة ولا عندي زورق. وأقول ليك كذب المنجمون ولو صدقوا ، ودقسنا نحن ولو حلمنا.
| |
  
|
|
|
|
صديق مهدى على
فرح الطاهر ابو روضة
almulaomar
فيس بوك
تويتر
انستقرام
يوتيوب
بنتيريست