|
Re: شبس وأبقرنين ... بقلم عبد المنعم الشغيل (Re: الهادي الشغيل)
|
عبد المنعم الشغيل بعد ما ركب الموتر السوزوكي كتب لطيفة عن جار لنا رباطابي اسمه عبد العاطي عشابي ما يلي :
هذي دعابة حقيقية لرباطابي جارنا إسمه (عبد العاطي أحمد عشابي), والذي يسكن الحصايا ويعمل بالسكة حديد , وكان يومها (عزابي) فأسرته سافرت للبلد (الرباطاب) . فعاد عبد العاطي لمنزله آخر اليوم منهك القوي من العمل ولزم السرير ونام , وما إن غط في سبات إلا والباب يطرق , فجاء بخاطره :- (قد يكون ده واحد طاشي) والتي توازي عندنا اليوم (النمرة غلط) , فإستمر الطرق , وأيضاً جال بخاطره :- (قد ييأس الطارق ويذهب) ولكن الطرق أصبح لايطاق , فقد كان بالعصا . وهنا أقتنع عبد العاطي أن هذا الزائر أكيد من أهله الفي الرباطاب وأكيد (نزلو اللوري أسه) وإصراره علي الدخول بطرق الباب بشدة يعني إنو ماعندو زول غير عبد العاطي في عطبرة (نص نهار) فشعر بحرص الطارق علي الدخول . فقام من سريره وفتح الباب , وفوجئ بأنه شحاد , وكان يحمل العصا إذ أن حمل العصا (كانت ولازالت وستظل) صفة ملازمة للشحادين , تعينهم علي طرق الباب وطرد العيال وقد تكون لهم فيها مآرب أخري , وفي موضوع طرق الباب فالعصا فعلاً لمن عصي وأبي أن يفتح الباب لهم , فالطرق الشديد المتواصل خير علاج لمن (دق طناش) , فيقوم (المطنش) بفتح الباب غصبة عنه وإعطاه الفيهو النصيب حتي يحافظ علي إثنين – بابه وطبلة أذنه -, فعرف عبد العاطي الشحاد (فقد كان يعرفه معرفة حقة) . فقال الشحاد ماداً يده :- كرامة لله , فأجاب عبد العاطي وفي عينيه بقايا نوم : الله يدينا ويديك .وعاد أدراجه بسرعه ليلحق (النومة ماتطير) , وفعلاً لحقها . ومالبث كثيراً إلا والباب يطرق ثانيةً , وهنا راودته نفس الأفكار , وتكررت , قد يكون (طاشي) . فزاد الطرق , فقال: قد يذهب ويطش إلي غير رجعة. لكن الطرق زاد لدرجة أنه لا يحتمل معه النوم فقال : أكيد ده واحد من أهلنا جاي من الرباطاب. وكان الطرق هذه المرة من باب عبد العاطي الآخر . فقام وفتح الباب , تخيل معي من وجد؟؟؟؟ وجد نفس الشحاد .لكن من باب عبد العاطي الثاني , والشحادين لهم فكرة وفن في تغطية البيوت بالشحدة , عشان مايفوت منو بيت , يمشي البيت ده , ولمن يخلص منو يمشي للقصادو ويرجع تاني لجار البيت الأول , يعني لتوضيح خارطة الشحدة (يمشي سبعة تمانية) . يعني لمن رجع الشحاد يكمل الرقم 8 وقع في باب عبد العاطي التاني . فكانت دهشة عبد العاطي كبيرة , فأبتدره قائلاً : يا فلان.....تشحد ليك 30 سنة , ما عارف (النمرة) فيها بابين !!!!!!!!!!!!!!!!!!!
|
|
|
|
|
|